1. Edena hahenamo be ita ese ta moalelaiamu?

IEHOVA ena kongrigeisin lalonai ta nohomu na hahenamo badana! Momokani, iseda tadikaka bona taihu ida Iehova ta tomadiho heniamu neganai, maino bona moale ai ta noho heboumu. Kongrigeisin ai emu ḡaukara be dahaka?

2. Paulo ena revareva haida lalodiai be dahaka haheitalai ta e herevalaia?

² Aposetolo Paulo ese ena revareva haida ai e herevalaia haheitalai ta amo ta dibamu, kongrigeisin ai ita na mai eda ḡaukara. Unu revareva ta ta ai, Paulo ese kongrigeisin na tauanida ida e haheḡereḡerea. Danu, kongrigeisin taudia ta ta na tauanida regedia ta ta ida e haheḡereḡerea.​—Roma 12:4-8; 1 Kor. 12:12-27; Efe. 4:16.

3. Ina stadi ai dahaka ḡau toi baita herevalaimu ?

³ Ina stadi lalonai, Paulo ena haheitalai amo ḡau badadia toi baita dibadiamu. Ginigunana be, baita dibamu Iehova ena kongrigeisin lalonai ita ta ta na mai eda ḡaukara. * Iharuana be, baita itaiamu dahaka baita kara be namo bema ta laloamu kongrigeisin lalonai ita na asi eda ḡaukara. Bona ihatoina be, dahaka dainai Dirava ena kongrigeisin lalonai iseda ḡaukara baita goadalaia na mai anina bada.

4. Roma 12:4, 5 ena hereva anina be dahaka?

⁴ Paulo ena haheitalai amo baita dibaiamu ḡauna ginigunana binai, Iehova ena ruma bese lalonai ita ta ta na mai eda ḡaukara. Paulo eto: “Ita heḡereḡereda, tau ta regena na momo, a edia ḡaukara na idau-idau; unuhetomana, ita na hoho, a tau-anina tamona Keriso enai, rege idauidau ta ḡaukara heboumu.” (Roma 12:4, 5) Paulo ena hereva anina be dahaka? Kongrigeisin lalonai ita ta ta iseda ḡaukara na idauidau to mai anidia bada.

5. Iehova ese kongrigeisin e henidia “harihari ḡaudia” be dahaka?

⁵ Kongrigeisin lalonai iboudai na mai eda ḡaukara. To, mani ihakauda taudia aita herevalaidia guna. (1 Tes. 5:12; Heb. 13:17) Keriso amo, Iehova ese “taunimanima na harihari ḡaudia na heto” ena kongrigeisin e henidia. (Efe. 4:8, 11, NWT) Unu “harihari ḡaudia” haida bini: Gavanin Bodi memba taudia, Gavanin Bodi e duruamu taudia (appointed helpers), Brens Komiti memba taudia, seket taudia, Baibul skul idauidau ai e hahedibamu tadikakadia, kongrigeisin elda taudia, bona ministerial servant. Unu tadikaka iboudiai na lauma helaḡa ese e abidia hidimu Iehova ena mamoe bae reḡudia bona kongrigeisin bae hagoadaia totona.​—1 Pet. 5:2, 3.

6. Ita ese 1 Tesalonika 2:6-8 ai tame duahia, ihakauda taudia ese dahaka bae kara be namo?

⁶ Ihakauda taudia ta ta na ḡaukara idauidau e karamu. Imada, aeda o tauanida kahadia idauidau ese tauanida ibounai e duruamu heḡereḡerena, ihakauda taudia na kongrigeisin ibounai e duruamu. Idia na asie uramu ma haida ese idia bae imodaidia. To, idia na e hekwarahimu tadikaka taihu bae hagoadadia totona. (1 Tesalonika 2:6-8 ba duahi.) Iehova ta tenkiu heniamu badina unu lo tadikaka namodia na iseda namo e lalo badamu!

7. Ful-taim hesiai taudia momo be dahaka hahenamo e moalelaimu?

⁷ Kongrigeisin ai haida be misinari taudia, spesol painia taudia, bona regula painia taudia. Oibe, tanobada heḡeḡemadai, tadikaka taihu ese haroro bona hahediba ihalaodia ḡaukarana na e karaia hanaihanaimu. Bona idia ese momo e durudiamu Iesu Keriso ena hahediba taudia ai baela. Ena be unu tadikaka taihu edia moni o kohu na dia momo, to Iehova ese ḡau namodia momo herea idia e henidiamu. (Mar. 10:29, 30) Ita ese unu tadikaka bona taihu ta lalokau henidiamu, bona ta moalemu badina idia na kongrigeisin ai e nohomu!

8. Dahaka dainai Iehova ese pablisa iboudiai na e lalodia badamu?

⁸ To, kongrigeisin ai ita e hakaudamu taudia bona ful-taim hesiai taudia sibodia mo mai edia ḡaukara, a? Lasi! Sivarai namona e harorolaiamu pablisa iboudiai danu na Dirava bona kongrigeisin taudia ese e lalodia badamu. (Roma 10:15; 1 Kor. 3:6-9) Bona kongrigeisin ai ḡaukara badana binai: Ma haida baita durudia iseda Lohiabada Iesu Keriso ena hahediba taudia ai baela. (Mat. 28:19, 20; 1 Tim. 2:4) Ena be pablisa ta e bapatiso o do lasi, to haroro taudia iboudiai ese una hahediba ḡaukara na e atoa gunamu.​—Mat. 24:14.

9. Dahaka dainai taihu iboudiai baita lalodia bada na namo?

⁹ Iehova ese Kristen taihu na kongrigeisin lalonai ḡaukara e henidia. Ia ese idia danu e lalodia badamu, ena be idia na headava taihudia, sina, vabu, bona singul. Baibul ese Dirava e hamoaleamu  hahinedia momo na e sivarailaidia. Idia na haheitalai namona badina be mai edia aonega, abidadama, ura, boga-auka, hariharibada, bona kara namodia. (Luka 8:2, 3; Apos. 16:14, 15; Roma 16:3, 6; Fili. 4:3; Heb. 11:11, 31, 35) Iehova ta tenkiu heniamu badina iseda kongrigeisin lalodiai taihu unuhetomadia ta itadiamu.

10. Dahaka dainai iahudia o burukadia na baita lalodia bada?

¹⁰ Kongrigeisin lalonai iahudia na momo. Idia haida na laḡani momo lalodiai Iehova e hesiai henia. Ma haida be reana vanegai mo hereva momokani e diba. Madi, momo na e burukamu bona e goreremu. Unu daidiai, kongrigeisin lalonai momo na ḡaukara haida mo e karamu bona nega haida mo e haroromu. Badina be idia ese haroro ḡaukarana na doini e laloa badamu, bona ma haida e hagoadadiamu bona treinin e henimu! Danu, idia edia ekspiriens ese e hagoadadamu. Oibe, Iehova bona ita vairadai iahudia o burukadia na mai hairaidia.​—Her. 16:31.

11-12. Emu kongrigeisin ai natu ese oi be ede e hagoadamu tomamu?

¹¹ Natuda danu mani aita lalodia. Idia e badamu lalonai hekwakwanai momo e davarimu, badina ina tanobada na Satana Diabolo ese e biaguamu, bona lalohadai kavakavadia na e bada e laomu. (1 Ioa. 5:19) To, bema natu na hebou lalodiai henanadai e haerelaimu, haroro ḡaukara e duruamu, bona edia abidadama dainai e gini goadamu sivaraina ta kamonaimu neganai, una ese ita na e hagoadadamu. Oibe, Iehova ena kongrigeisin lalonai natuda na mai edia ḡaukara danu!​—Sal. 8:2.

¹² To, tadikaka bona taihu haida na e laloamu kongrigeisin lalonai idia na asie ḡaukara. Dahaka baita kara una amo baita itaia kongrigeisin lalonai ita ta ta na mai eda ḡaukara? Mani una aita herevalaia.

13-14. Dahaka dainai ma haida e laloamu kongrigeisin lalonai idia na asi edia ḡaukara?

¹³ Paulo ena haheitalai amo ḡau iharuana baita dibaiamu. Hari, momo edia hekwakwanai  ta binai: Idia e laloamu kongrigeisin lalonai idia na asi edia ḡaukara. Paulo etomu: “Ae-palapala bema toma ‘Lau na dia ima-palapala dainai lau na dia tau-anina ena’; una dainai ia na dia tau-anina ena a? Bona taia bema toma ‘Lau na dia mata dainai lau na dia tau-anina ena’; una dainai ia na dia tau-anina ena a?” (1 Kor. 12:15, 16) Paulo ena hereva anina be dahaka?

¹⁴ Bema kongrigeisin ai ma haida edia ḡaukara na emu ḡaukara ida bo haheḡereḡerea tohomu, reana bo laloamu kongrigeisin ai oi na asi emu ḡaukara. Reana kongrigeisin taudia haida be hahediba taudia, haida be ḡaukara e haria namonamomu taudia, eiava ma haida be hereḡu taudia namodia. To reana oi na bo laloamu Dirava ese unu harihari ḡaudia na idia sibodia mo e henidia dainai, oi na dia heḡereḡere. Una ese e hahedinaraiamu oi na manau tauna. (Fili. 2:3) To, nahuamu na ba tohoa. Tadikaka haida na ḡaukara mai dibadia namonamo, bona bema edia ḡaukara na emu ḡaukara ida bo haheḡereḡerea louloumu, reana gabeai oi na bo lalomanokamu. Dia namo Paulo ese e gwauraia herevana ai, lalohadai kererena bavabia, bena baoto, ‘Kongrigeisin lalonai lau na asi egu ḡaukara.’ Dahaka ese baine durumu lalohadai kereredia ba dadaraidia totona?

15. Ita ese 1 Korinto 12:4-11 ai tame duahia, harihari ḡaudia be ede baita lalodia toma be namo?

¹⁵ Aposetolo edia negai, Iehova ese harihari ḡaudia na Kristen taudia iboudiai e henidia, to haida sibodia mo na ena lauma helaḡa amo durudiava hoa karadia bae kara. (1 Korinto 12:4-11 ba duahi.) Iehova ese harihari ḡaudia idauidau e heni, badina be ia ese Kristen taudia ta ta na e lalodia badava. Hari ina negai, lauma helaḡa ese ita na se durudamu hoa karadia baita kara totona. To, iboudai ese baita badinaia sisibana binai: Ena be iseda aonega na idauidau, to Iehova ese ita ta ta na e laloda badamu.

16. Edena Baibul sisibana baita badinaia be namo?

 ¹⁶ Iseda ḡaukara na ma haida edia ḡaukara ida basita haheḡereḡerea, to aposetolo Paulo ena sisiba baita badinaia, eto: “Ta ta ena ḡaukara ena ḡaukara bae diba, a bamona ena basine diba, unu amo sibona ena ḡaukara baine heaḡilaia.”​—Gal. 6:4.

17. Paulo ena sisiba baita badinaiamu ena namo be dahaka?

¹⁷ Bema Paulo ena sisiba baita badinaiamu bona siboda eda kara baita tahua namonamomu, reana baita davariamu ita danu mai eda harihari ḡaudia namodia haida. Heḡereḡere, ena be pletfom ai elda ta ese tok na se heni namonamomu, to reana ia ese e stadi henidiamu taudia be hahediba taudia ai e laomu. Eiava reana ia ese ena ḡaukara na se karaia ḡoevaḡoevamu, dia elda ma haida heḡereḡeredia, to ia na tadikaka bona taihu ese e lalokau heniamu, se gari heniamu, bona ia amo Baibul ena heduru e abimu. Eiava reana momo e gwaumu, ia na heabidae tauna. (Heb. 13:2, 16) Momokani, iseda goada bona harihari ḡaudia baita lalopararalaimu neganai, baita moalemu badina ta itaiamu kongrigeisin ai ita na mai eda ḡaukara. To, dia namo baita mama badina iseda tadikaka edia harihari ḡaudia be iseda amo e idau.

18. Edena dalai iseda hesiai ḡaukara baita hanamoa diba?

¹⁸ Herevana kongrigeisin ai dahaka ḡaukara ta karamu, to namona na iboudai ese hesiai ḡaukara ikarana daladia baita hanamo. Bona Iehova ese ena orea amo ita e durudamu unu baita kara toma totona. Heḡereḡere, iseda haroro ḡaukara baita karaia namonamo dalana na, wiki hebouna ai ta dibaiamu. Una hebou amo o dibamu ḡaudia be o badinamu, a?

19. SKE baola totona, dahaka ba kara be namo?

¹⁹ Dirava ena orea ena treinin program namona ma ta be, School for Kingdom Evangelizers (SKE). Una skul baela diba taudia be, ful-taim hesiai ḡaukara e karamu tadikaka taihu bona laḡanidia 23 ela laḡanidia 65 taudia. To reana oi na o laloamu oi na dia heḡereḡere una skul baola. Una na lalohadai kererena; namona na o uramu una skul baola badidia ena lista ta ba torea. Bena palani ta ba torea​—emu lista ba badinaia ela bona skul ai ba vareai. Momokani, Iehova ese emu hekwarahi be hanamoamu dainai, o lalohadailaiamu ḡauna anina na be varamu.

20. Roma 12:6-8 ena hereva amo dahaka ta dibamu?

²⁰ Paulo ena haheitalai amo baita dibaiamu ḡauna ihatoina na Roma bukana ai baita davariamu. (Roma 12:6-8 ba duahi.) Ina buka ai Paulo ese kongrigeisin ena harihari ḡaudia e abi taudia e herevalaidia. To danu, Paulo ese ita e hamaorodamu, iseda harihari ḡaudia idauidau amo kongrigeisin baita hagoadaia.

21-22. Robert bona Felice edia ekspiriens amo dahaka ta dibamu?

²¹ Tadikaka Robert ena haheitalai mani aita laloa. Idau tano ai ena hesiai ḡaukara e doko murinai, ia na ela ena gabu ena Betele ai baine ḡaukara. Ena be tadikaka ta ese Robert e hamaoroa una tano e rakatania na dia kerere ta dainai, to Robert na eto: “Hua momo lalodiai lau na asina moaleva badina na laloava egu ḡaukara na asina karaia namonamo. Nega haida ai, launa na urava Betele baina rakatania be namo.” To dahaka dainai Robert e moale  lou? Badina elda ta ese e hamaoroa, ‘Iehova na iseda ḡaukara ḡunadia ta ta amo treinin e henidamu, unu amo ita ese eda ḡaukara matamatana baita karaia namonamo diba.’ Robert e laloparara, namona na ḡaukara gunadia basine lalodia lou, to harihari baine kara ḡaukaradia baine lalodia bada be namo.

²² Tadikaka Felice Episcopo ena haheitalai danu taina unu heto. Laḡani 1956 ai, ia bona adavana na Gilead amo e gradueit murinai, ela Bolivia ai seket ḡaukara e karaiava. Laḡani 1964 ai, natudia merona e vara. Felice eto: “Ai na asia ura emai [seket] ḡaukara baia rakatania. Koikoi na dika, laḡani tamona lalonai launa na lalomanoka. To Iehova ena heduru dainai, egu lalohadai na haidaua bona natugu baina naria ḡaukarana na laloa bada.” Oi danu Robert bona Felice heḡereḡeredia, a? Nega haida ai, o lalomanokamu badina harihari o karamu ḡaukaradia na dia gunaguna o karava ḡaukaradia heḡereḡeredia, a? Bema oi na o uramu ba moale, namona na emu lalohadai ba haidaua bena harihari Iehova bona emu tadikaka o durudiamu ḡaukaradia ba lalodia bada. Emu ḡaukara lalonai ba bisi, emu harihari ḡaudia bona aonega amo ma haida ba durudia, bona kongrigeisin o hagoadaiamu dainai oi na bo moalemu.

23. Dahaka baita lalohadailai be namo, bona stadi gabena ai dahaka baita herevalaimu?

²³ Iehova ese ita ta ta na e laloda badamu. Ia e uramu ita na ena ruma bese taudia ai baitala. Bema tadikaka taihu ihagoadadia ḡaukaradia baita lalohadailaimu bona baita hekwarahimu unu ḡaukara baita karadiamu, baita davariamu kongrigeisin ai ita na mai eda ḡaukara. To, kongrigeisin ai ma haida be ede baita lalodia toma? Edena dala ai baita hahedinaraia idia na ta lalokau henidiamu bona ta matauraidiamu? Stadi gabena ai, ita ese una topik badana baita herevalaiamu.