1. Iehova ese e havara ḡaudia iboudiai baita haeromu neganai, dahaka baita lalomu?

IEHOVA ese e havara ḡaudia iboudiai baita lalomu neganai, eda hemami na salamo e torea tauna David heḡereḡerena, ia ese Iehova e ḡuriḡuri henia eto: “Emu guba name itaia oi imamu kwakikwakidia ese e karaia, hua bona hisiu danu oi ese o atodia: Taunimanima be dahaka oi ese o laloamu? taunimanima natuna be daika oi ese o igoa itamu?” (Sal. 8:3, 4) David heḡereḡerena, ita siboda na Iehova ese e kara hisiudia ida baita haheḡereḡeremu neganai, ita na maraḡi herea, to Iehova ese ita na e laloda badamu. Baita itaiamu Iehova ese taunimanima ginigunadia Adam bona Heva na e lalodia bada bona ena ruma bese ai e halaodia.

2. Iehova be e ura Adam bona Heva be dahaka bae kara?

² Adam bona Heva na Iehova natuna ginigunadia tanobada ai, bona Iehova be idia Tamadia lalokauna guba ai. Ia na e ura idia raruosi na bae ḡaukara hebou namonamo. Dirava ese e hamaorodia eto: “Besemui ba havaradia, ba hutuma; tanobada ba hahonua bona ba biagua.” (Gen. 1:28) Ia na e ura idia na natudia bae havara bona tanobada bae naria namonamo. Bema Adam bona Heva ese Iehova ena ura bema badinaia, idia bona natudia na dounu Dirava ena ruma bese taudia.

3. Dahaka dainai baita gwau diba Iehova ese ena ruma bese lalonai Adam bona Heva na mai anina bada ḡaukarana e henidia?

³ Iehova ese ena ruma bese lalonai Adam bona Heva na mai anina bada ḡaukarana ta e henidia. Salamo 8:5 (NWT) ai, Iehova ese e havaraia tauna na David ese ini e herevalaia toma: “Oi ese ia o karaia bona aneru edia goada ese ena goada e hereaia, bona ia na hairai bona hemataurai o henia.” Momokani,  taunimanima bona aneru edia goada, aonega bona diba na dia heḡereḡere. (Sal. 103:20) To, Iehova ese taunimanima na hairai bona hemataurai e henidia! Iehova ese tamada bona sinada ginigunadia e havaradia neganai, mauri hereadaena e henidia.

4. Adam bona Heva na Iehova e gwau-edeede henia dainai, ediai be dahaka e vara, bona ina atikol ai dahaka baita herevalaimu?

⁴ Adam bona Heva na Iehova e gwau-edeede henia dainai, Iehova ese e dadaraidia. Una dainai, besedia ese dika bada e davaria, bona ina atikol ai una baita herevalaiamu. To, una ese Iehova ena ura na se haidaua. Ia na e uramu ia e kamonai heniamu taudia na ia natuna ai baela hanaihanai. Ina atikol ai, baita itaiamu edena dalai Iehova ese e hahedinaraia ita na e laloda bada. Bona baita itaiamu, hari ita be dahaka baita kara unu amo baita hahedinaraia ita na ta uramu Dirava ena ruma bese lalonai baita vareai. Danu, tanobada ai Dirava ena ruma bese ese bae moalelai hahenamodia baita herevalaimu.

5. Dirava ese ita na ia heida-idana e karada dainai, edena dalai Ia baita hanamoa diba?

⁵ Iehova ese ita na e laloda bada dainai, ia heida-idana e karada. (Gen. 1:26, 27) Ita na Dirava heida-idana e karada dainai, iena kara namodia momo baita hahedinarai dibamu, heḡereḡere lalokau, hebogahisi, Dirava ibadinana karana, bona kara maoromaoro. (Sal. 86:15; 145:17) Unu kara namodia ta hahedinaraimu neganai, ita na Iehova ta hanamoamu bona ia ta tenkiu heniamu. (1 Pet. 1:14-16) Tamada gubai ihamoalena karadia ta karamu neganai, ita danu ta moalemu. Danu, Iehova ena kara namodia ta tohotohomu dainai, iena ruma bese lalonai baita noho diba.

6. Iehova ese tanobada e karaia neganai, edena dalai e hahedinaraia taunimanima na e lalodia bada?

⁶ Iehova ese eda noho gabuna namo hereana e karaia. Iehova ese tau ginigunana do se karaia neganai, tanobada e karaia taunimanima ese bae noholaia. (Iobu 38:4-6; Ier. 10:12) Iehova na hebogahisi bona hariharibada Diravana dainai, ia ese ḡau namodia momo herea e karadia ita ese baita moalelai. (Sal. 104:14, 15, 24) Nega haida, ia na e kara ḡaudia iboudiai e haerova bona e itadia idia na “nanamo heherea.” (Gen. 1:10, 12, 31) Ia ese taunimanima e lalodia bada dainai, tanobada ai e kara ḡau namodia iboudiai e henidia bae biagudia. (Sal. 8:6) Dirava ena ura na ḡoevadae taudia ese mai moaledia ida unu ḡau namodia bae naridia ela bona hanaihanai. Una gwauhamata namona dainai hanaihanai Iehova o tenkiu heniamu, a?

7. Iosua 24:15 ese edena dalai e hahedinaraiamu taunimanima na mai edia ura kwalimu?

⁷ Iehova ese harihari ḡauna ura kwalimu e henida. Una ura kwalimu dainai eda mauri lalonai baita kara ḡaudia na baita abi hidi diba. (Iosua 24:15 ba duahia.) Eda lalokau Diravana ihesiai henina karana baita abia hidimu neganai, ia na be moalemu. (Sal. 84:11; Her. 27:11) Dala momo ai eda ura kwalimu na baita ḡaukaralaia namonamo diba. Mani Iesu ena haheitalai aita laloa.

8. Iesu ese ena ura kwalimu be ede e ḡaukaralaia toma?

⁸ Iesu ena haheitalai baita tohotohoa totona, namona na ma haida edia namo baita tahu guna. Nega ta, Iesu bona ena aposetolo na e hesiku bada herea dainai ela gabu asi reḡereḡena ta ai bae laḡa-ani. To, idia na asie laḡa-ani. Hutuma ese e davaridia, bona idia na e ura dikadika Iesu ese baine hadibadia. Iesu na se badu to e bogadia hisi. Bena Iesu be dahaka e kara? Ia ese ḡau momo e “hadibadia” matama. (Mar. 6:30-34) Bema Iesu baita tohotohoamu bona  eda nega bona goada baita ḡaukaralaiamu haida baita durudiamu, ita ese Tamada guba ai baita heatolaiamu. (Mat. 5:14-16) Danu, ta hahedinaraiamu ita na ta uramu Iehova ena ruma bese lalonai baita noho.

9. Iehova ese taunimanima e henidia harihari ḡauna namona be dahaka?

⁹ Iehova ese taunimanima e henidia harihari ḡauna namona ta na, idia ese natudia bae havara, bona maduna e henidia natudia bae hadibadia Ia bae lalokau henia bona bae hesiai henia. Bema oi na tama o sina, una harihari ḡauna o moalelaiamu, a? Ena be aneru na Iehova ese hahenamo momo e henidia, to maoro na se henidia natudia bae havara. Una dainai bema oi na tama o sina, namona na natumu ba naria hahenamona ba moalelaia. Tama sina edia maduna badana na, idia ese natudia na Iehova ena “hahediba herevadia bona ena sisiba herevadia” bae hadibalaidia. (Efe. 6:4; Deu. 6:5-7; Sal. 127:3) Dirava ena orea ese tama sina idurudia totona, Baibul e herevalaiamu tulu idauidau momo e halasi, heḡereḡere pablikeisin, vidio, miusiki, bona websait ai atikol idauidau. E hahedinaraia ḡoevaḡoevamu, Tamada guba ai bona ia Natuna ese ita natuda na e lalokau henidiamu. (Luka 18:15-17) Bema tama sina na Iehova enai be tabekaumu bona be hekwarahimu natudia bae naridia totona, Iehova na be moalemu. Danu idia ese natudia be durudiamu Iehova ena ruma bese ai be laomu!

10-11. Iehova ese mauri idavalaina boubouna amo ita be ede e duruda toma?

¹⁰ Iehova ese Natuna lalokauna e heni, unu amo ita na iena ruma bese taudia ai baitala lou diba. Paragraf 4 ai ta herevalaia heḡereḡerena Adam bona Heva e kara dika neganai, idia na Iehova ena ruma bese amo e hekoki, bona idia edia amo bae vara natudia danu. (Roma 5:12) Adam bona Heva na mai edia ura ida Dirava e gwau-edeede henia dainai, Ia ese e luludia na maoro. To, idia natudia ediai be dahaka e vara? Iehova ese mai lalokauna ida dala e karaia ia e kamonai heniamu taudia na iena ruma bese ai baine halaodia. Una e karaia dalana na, Ia Natuna vara edeana, Iesu Keriso ena boubou ḡauna e heni. (Ioa. 3:16; Roma 5:19) Iesu ena boubou ḡauna dainai, Iehova ese abidadama taudia 144,000 na ia natuna ai e halaodia.​—Roma 8:15-17; Apok. 14:1.

¹¹ Danu, abidadama taudia milioni momo na Dirava ena ura e karaiamu. Idia na e uramu laḡani 1,000 dokonai baine vara hahetoho ginigabena murinai Dirava ena ruma bese taudia ai baela. (Sal. 25:14; Roma 8:20, 21) Una helaro e laloamu dainai idia ese Iehova, Ihavaradia Tauna, na e gwauraiamu “Tamamai.” (Mat. 6:9) Danu, toreisi lou taudia na nega be henidiamu Iehova bae dibaia totona. Iena hahekau dalana bae badinaia taudia danu iena ruma bese ai baela.

12. Edena henanadai baita haerelaiamu?

¹² Tame itaia Iehova ese taunimanima na e lalodia bada dainai, ḡau momo e kara. Ia ese horoa taudia na ia natuna ai vada e halaodia, bona e gwauhamata “hutuma bada-herea” na tanobada matamatana ai ia natuna ai baela. (Apok. 7:9) Hari dahaka baita kara diba, unu amo Iehova enai baita hahedinaraia ita na ta uramu iena ruma bese lalonai baita noho hanaihanai?

13. Dahaka baita kara diba Dirava ena ruma bese lalonai baita noho? (Mareko 12:30)

¹³ Mai lalomu idoinai ida Iehova ba hesiai henia unu amo emu lalokau ba hahedinaraia. (Mareko 12:30 ba duahia.) Dirava ese e henida harihari ḡaudia iboudiai amo harihari ḡauna hereadaena ta na, Ia baita tomadiho henia diba. Iehova ena haheḡani ta badinadiamu karana amo ta  hahedinaraiamu Ia na ta lalokau heniamu. (1 Ioa. 5:3) Iesu ese Tamana e herevalaia neganai, ita e haḡanida taunimanima na hahediba ai baita halaodia bona baita habapatisodia. (Mat. 28:19) Danu, e haḡanida baita helalokau heheni. (Ioa. 13:35) Iehova ese ena haheḡani e badinamu taudia na be abidia daemu ia e tomadiho heniamu ruma besena lalonai bae noho totona.​—Sal. 15:1, 2.

14. Haida ediai lalokau be ede baita hahedinaraia toma? (Mataio 9:36-38; Roma 12:10)

¹⁴ Haida ediai lalokau baita hahedinaraia. Lalokau na Iehova ena kara hereadaena. (1 Ioa. 4:8) Ita ese Iehova do asita dibaia neganai, Ia ese ita edai lalokau e hahedinaraia guna. (1 Ioa. 4:9, 10) Haida ediai lalokau ta hahedinaraiamu neganai, ita na ia ta tohotohoamu. (Efe. 5:1) Taunimanima baita lalokau henidia dala namona ta na, nega do mianai baita durudia Iehova bae dibaia. (Mataio 9:36-38 ba duahi.) Baita durudiamu neganai idia na be dibamu dahaka bae kara be namo, unu amo Dirava ena ruma bese ai baela. Ta e bapatisomu murinai, namona na dounu baita lalokau henia bona baita matauraia. (1 Ioa. 4:20, 21) Edena dalai unu baita kara toma? Dala ta na baita abia dae ia e kara ḡaudia na mai badidia. Heḡereḡere, bema e karaia ḡauna ta badina na asita lalopararalaiamu, basitato ia na sibona ena namo e laloamu dainai, unu e kara toma. To, namona na tadikakada baita matauraia bona baita laloa ia ese ita na e hereada.​—Roma 12:10 ba duahia; Fili. 2:3.

15. Daidiai ediai hebogahisi baita hahedinaraia na namo?

¹⁵ Taunimanima iboudiai ediai hebogahisi baita hahedinaraia. Bema ita na ta uramu Iehova ena ruma bese lalonai baita noho hanaihanai, namona na eda mauri lalonai Dirava ena Hereva baita badinaia. Heḡereḡere, Iesu ese ita e hadibada namona na taunimanima iboudiai, ita inaida danu ediai hebogahisi baita hahedinaraia. (Luka 6:32-36) Nega haida edai na auka unu baita kara toma. Bema unu bamona, namona na Iesu ena lalohadai bona kara baita diba bona baita tohotoho. Bema baita hekwarahimu Iehova baita badinaia bona Iesu baita tohotohoa neganai, ta hahedinaraiamu ita na ta uramu Iehova ena ruma bese lalonai baita noho hanaihanai.

16. Iehova ena ruma bese ladana be ede baita gimaia toma?

¹⁶ Iehova ena ruma bese ladana baita gimaia. Ruma bese ta lalonai mero maraḡina ta na nega momo kakana ena kara be tohotohomu. Bema mero badana na ena mauri lalonai Baibul ena hahekau herevadia be badinamu, ia na tadina enai haheitalai namona be hahedinaraiamu. To bema mero badana na kara kereredia be karamu, ia tadina danu ena haheitalai dikana be tohotohoamu. Iehova ena ruma bese lalonai danu unu bamona. Bema abidadama Kristen tauna ta na gabeai aposteit ta ai be laomu o kara dikadia be karamu, ma haida ese ia na be tohotohoamu bona idia danu kara dikadia be karamu. Unu e kara tomamu taudia ese Iehova e tomadiho heniamu ruma besena ladana be hadikaiamu. (1 Tes. 4:3-8) Namona na haheitalai dikadia e hahedinaraimu taudia basita badinadia bona ḡau ta ese eda hetura karana Tamada lalokauna Iehova ida basine hadikaia.

17. Edena lalohadai baita dadaraia na namo, bona dahaka dainai?

¹⁷ Iehova baita abidadama henia, dia kohu bona moni. Iehova na e gwauhamata bema iena Basileia baita tahua guna bona ena kara maoromaoro taravatudia baita badina, ia ese aniani, dabua, bona noho gabudia baine henida. (Sal. 55:22; Mat. 6:33) Una gwauhamata baita abidadama heniamu neganai, basita laloamu ina tanobada ena kohu bona moni ese ita be gimadamu bona be hamoaledamu. Dibada lalomaino korikorina baita  abia dalana tamona na, Iehova ena ura baita karaia. (Fili. 4:6, 7) Ena be eda moni na heḡereḡere ḡau momo baita hoi diba, to namona na baita haeroa, ita be momokani mai eda nega bona goada unu ḡau baita ḡaukaralai bona baita naridia eiava lasi. Ita be kohu bona moni ta ura heni dikadikamu, a? Namona na baita helalotao Dirava ese ita na ḡaukara e henida iena ruma bese lalonai. Una dainai, una ḡaukara ta karaiamu neganai, ḡau ta ese basine kouda na namo. Ita na asita uramu eregabe tauna heḡereḡerena baita kara, ia na ena kohu e ura heni dikadika dainai se ura Iesu murinai baine raka. Una dainai, ia ese Iehova ihesiai henina ḡaukarana bona ia natuna ta ai bainela hahenamodia na e readia!​—Mar. 10:17-22.

18. Kamonai taudia ese bae moalelai hanaihanai hahenamodia be dahaka?

¹⁸ Kamonai taudia ese be moalelaiamu hahenamo hereadaena na, Iehova be lalokau heniamu bona be tomadiho henia hanaihanaimu! Tanobada helarona bae abia taudia na mai moaledia ida ina tanobada, Iehova ese bae noholaia totona e karaia ḡauna, be naria namonamomu. Kahirakahira Dirava ena Basileia ese ina tanobada bona mauri ḡaudia iboudiai be hamatamatadia loumu. Iesu ese Adam bona Heva edia gwau-edeede dainai e vara hekwakwanaidia iboudiai be hamaoromaorodiamu. Iehova ese mase taudia milioni momo be hatoredia isi loumu bona be durudiamu tanobada paradaisona ai bae mauri hanaihanai totona. (Luka 23:42, 43) Tanobada ai Iehova e toma henia dihomu ruma besena na ḡoevadae taudia ai be laomu neganai, idia iboudiai ese David e gwauraia herevana, “hairai bona hemataurai” be abimu.​—Sal. 8:5.

19. Dahaka baita laloatao be namo?

¹⁹ Bema oi na “hutuma bada-herea” tauna ta, oi na mai emu helaro namona ta. Dirava ese e lalokau henimumu bona e uramu oi na ena ruma bese lalonai ba noho. Una dainai, o karamu ḡaudia iboudiai lalodiai Ia ba hamoalea. Dina ta ta iboudiai Dirava ena gwauhamata ba lalodia loulou. Tamada gubai e nohomu itoma diho henina karana ba laloa bada, bona ia ba hanamoa ela bona hanaihanai!