1. Tesalonika Ginigunana 5:11 heḡereḡerena, ita iboudai be edena ḡaukara baita karaia?

 EMU kongrigeisin ese Kingdom Hall ta de haginia eiava de hanamoa, a? Bema oibe, a dibamu oi ese Kingdom Hall matamatana ai emu hebou ginigunana na o laloataomu. Oi na Iehova o tenkiu henia bada. Momokani, reana oi na o moale bada bona kahirakahira o tai bona ane ginigunana iabina emu ai na e auka. E hagini ḡoevaḡoevamu Kingdom Hall matamatadia ese Iehova na e hanamoamu. To, haginihagini ḡaukara idauna ma ta baita karaiamu neganai, Iehova na be moale badamu. Una na haginihagini ḡaukara korikorina amo na idau. Una na tomadiho gabudia e maimu taudia baita hagoadadia karana. Aposetolo Paulo ese eda stadi sirina, 1 Tesalonika 5:11 ai e gwaurai herevadia e tore neganai, laulau dalanai una haginihagini ḡaukarana e laloa.​—Ba Duahia.

2. Ina atikol ai dahaka baita herevalaimu?

² Aposetolo Paulo na e diba ena tadikaka taihu be ede baine hagoadadia toma, una kara ai ia na haheitalai namona. Ia ese edia hemami na e lalopararalai. Ina atikol ai, ia ese ena tadikaka taihu e durudia dalana baita herevalaiamu, (1) hahetoho e haheaukalai, (2) ta ta ida bae maino, bona (3) edia abidadama Iehova enai bae hagoadaia. Mani Paulo baita tohotohoa dalana bona tadikaka taihu baita hagoadadia dalana aita herevalaia.​—1 Kor. 11:1.

3. Paulo be edena lalohadai maorona e abia?

³ Paulo ese ena tadikaka taihu na e lalokau henidia bada. Ia na hekwakwanai e davari danu; una dainai tadikaka taihu na hahetoho e davari neganai, ia ese e bogadia hisi bona edia hemami na e lalopararalai. Nega ta, Paulo ena moni na ore dainai ia na  ḡaukara baine tahu sibona ena bona bamona edia dabu ḡaudia baine hoi totona. (Apos. 20:34) Ia na palai e turiva tauna. Korinto ai e kau neganai, palai e turiva taudia rarua Akula bona Priskila ida e ḡaukara hebou guna. To, sabati eiava “dina helaḡadia” ai ia na Iuda bona Grik taudia e haroro henidiava. Bena Sila bona Timoteo e kau neganai, “una negana ai Paulo e haroro goadagoadava.” (Apos. 18:2-5) Paulo ese Iehova ihesiai henina ḡaukarana na se laloaboio. Badina Paulo na e haroro goadagoadava dainai, ia na heḡereḡere ena tadikaka taihu baine hagoadadia. E hadibadia namona na mauri ena lalohekwarahi ḡaudia bona ruma bese totona mauri iduruna ḡaudia ihenidia karana ese edia nega na basine haorea, unu amo mai anina bada ḡaudia o “ḡau namodia”​—unu na Iehova itomadiho henina karadia bae lalo bada totona.​—Fili. 1:10.

4. Edena dalai Paulo bona Timoteo ese tadikaka taihu e durudia daḡedaḡe karadia bae haheaukalai?

⁴ Tesalonika ai kongrigeisin e hematama murinai, se daudau tadikaka taihu matamatadia na daḡedaḡe bada e davari. Daḡedaḡe taudia ese Paulo bona Sila asie davaridia neganai, idia ese tadikaka taihu haida “e dabuidia dobi, hahemaoro taudia vairadiai e veridia lao, e lolo, eto, Tanobada idoinai vada e uhea hebubumu taudia iniseni ai danu vada eme gini dae.” (Apos. 17:6, 7) Una gabu ai e nohova daḡedaḡe taudia ese e inai henidia neganai, unu Kristen taudia matamatadia na e gari dikadika, ani? Reana edia hesiai ḡaukara Iehova totona na bema hamaraḡia, to Paulo na se ura una baine vara. Ena be ia bona Sila ese idia na bae rakatanidia, idia na ḡau haida e kara kongrigeisin bae hagoadaia totona. Paulo ese Tesalonika taudia e hamaorodia: “A tadimai Timoteo, . . . a siaia vasi, emui abidadama ai lalomui baine hagoadadia bona taumui baine halodia totona, ini hisihisi lalodiai ta basine marere-marere helaoreana.” (1 Tes. 3:2, 3) Timoteo na reana ena nega ginigunana ena gabu Lustera ai daḡedaḡe e davari. Ia na unukahai Paulo ese tadikaka taihu e hagoadadia dalana na e itaia. Iehova ena heduru dalana e itaia dainai, Timoteo ese tadikaka taihu matamatadia na baine hagoadadia diba ḡau iboudiai na bae namo lou.​—Apos. 14:8, 19-22; Heb. 12:2.

5. Tadikaka ta ladana Bryant be edena dalai elda ta amo heduru e abi?

⁵ Edena dala ma ta amo Paulo ese ena tadikaka taihu e hagoadadia? Paulo bona Banaba na Lustera, Ikonio, bona Antioka e lou lao neganai, idia ese “ekalesia oreadia iboudiai lalodiai heitatao taudia vada e abidia hidi.” (Apos. 14:21-23) Ta dibamu unu elda matamatadia ese edia kongrigeisin na e durua bada, hari ina negai elda taudia e karamu heḡereḡerena. Mani tadikaka ta ladana Bryant ese e gwaurai herevadia a lalo: “Laḡanigu e 15 neganai, tamagu ese ai na e rakatanimai bona sinagu na orea murimurina ai e atoa. Na hemami lau na sibogu bona na lalomanoka.” Dahaka ese Bryant e durua una nega aukana baine haheaukalaia? E gwa: “Elda ta ladana Tony, na hebou ai bona nega ma haida ai lau e hereva heniguva. Hahetoho e davari bona dounu e moaleva taudia sivaraidia na lau vairagu ai e gwauraiva. Ia ese Salamo 27:10 na lauegu ai e herevalaia bona nega momo Hesekia, mai ena abidadama ida Iehova e hesiai henia ena be tamana na dia haheitalai namona, e herevalaiava.” Una heduru dalana ese Bryant be ede e durua toma? E gwa: “Tony ena hahegoada dainai, lau ese ful-taim hesiai ḡaukarana ena moale na mamia matama.” Elda taudia e, Bryant heḡereḡerena taudia ba durudia, reana idia na umui amo hahegoada “hereva namona” be kamonaimu.​—Her. 12:25.

6. Edena dalai Paulo ese mauri sivaraidia e ḡaukaralai ena tadikaka taihu baine hagoadadia?

⁶ Paulo ese ena tadikaka taihu na e hadibadia Iehova ena goada amo witnes “taudia hutuma”  ese edia hekwakwanai na e haheaukalai. (Heb. 12:1) Paulo na e laloparara guna e nohova taudia, mai goadadia ida edia hekwakwanai e haheaukalai taudia edia mauri sivaraidia ese ena tadikaka taihu baine hagoadadia bona baine durudia “Mauri Diravana ena hanua” bae laloa bada totona. (Heb. 12:22) Hari danu unu bamona. Momokani, Iehova ese Gideon, Barak, David, Samuel, bona ma momo e durudia sivaraidia baita duahimu neganai, una ese be hagoadadamu, ani? (Heb. 11:32-35) Bona hari eda negai abidadama taudia edia haheitalai be ede bamona? World headquarters ai, nega momo ai ese, hari eda negai Iehova e hesiai heniamu taudia goadadia edia ekspiriens e duahimu bena goada e abimu tadikaka taihu momo amo revareva a abimu.

7. Paulo ena sisiba Roma 14:19-21 amo dahaka o dibamu?

⁷ Ta hekwarahimu kongrigeisin ai eda hereva bona kara amo maino dalana ta hahedinaraiamu neganai, eda tadikaka taihu na ta hagoadadiamu. Haida edia lalohadai na i’idau dainai, asita uramu una ese ita na baine hapararada. Bona bema Baibul ena hahekau herevana ta asita utuamu, siboda eda maoro na asita gwauraimu. Mani haheitalai ta a laloa. Roma kongrigeisin ai Iuda bona Idau Bese Kristen taudia e nohova. Mose ena Taravatu e kokia neganai, Iehova e tomadiho heniava taudia ese aniani haida basie ani taravatudia na da asie badinava. (Mar. 7:19) Una nega amo, Iuda Kristen taudia haida na e hemami aniani idauidau na bae ani diba. To, Iuda Kristen taudia ma haida na e laloa unu bae kara toma na dia namo. Una dainai kongrigeisin na e parara. Paul ese e hahedinaraia namona na bae maino, ia na e gwa: “Vamu basita ania, vine ranuna basita inua, bona varavarada ihahekwakwanaina karana ta basita karaia, unu hari namo.” (Roma 14:19-21 ba duahi.) Una dainai Paulo ese tadikaka taihu e durudia, sibodia bae itaia unu hekwakwanai o hepapahuahu karadia ese Kristen ta bona kongrigeisin ibounai baine hadikaia diba. Paulo danu lalona e hadaia haida basine hahekwakwanaidia totona, sibona ena kara baine haidaua. (1 Kor. 9:19-22) Bema siboda eda ura ḡaudia basita hepapahuahulaimu, ma haida baita hagoadadiamu bona maino ai baita noho dibamu.

8. Mai anina bada ḡauna ta ese kongrigeisin ena maino e hadikaia neganai, Paulo be dahaka e kara?

⁸ Paulo na haheitalai namona e hahedinaraia, mai anina bada ḡaudia ai haida na asie lalotamona neganai, ia na maino dalana e badinaia. Heḡereḡere, Kristen ginigunadia edia negai haida na kongrigeisin ai e hepapahuahu, e urava Idau Bese taudia na bae peritomedia, unu amo Iuda taudia ese basie maumauraidia. (Gal. 6:12) Paulo ese edia ura na se lalotamonalaia, bona se ura idia ese iena dala bae badinaia, to ia na mai manauna ida una hepapahuahu bae hamaoromaoroa totona Ierusalem ai aposetolo taudia bona elda taudia edia amo sisiba e noi. (Apos. 15:1, 2) Una dainai, iena kara ese Kristen taudia na e durudia bae moale bona kongrigeisin ai bae maino.​—Apos. 15:30, 31.

9. Paulo ena haheitalai be ede baita tohotohoa toma diba?

⁹ Bema hepapahuahu badana ta e varamu, maino dalana baita badinaiamu bema Iehova ese e abidia hidi taudia edia amo hahekau daladia baita tahumu. Nega momo, Baibul ena hahekau daladia na eda pablikeisin ai o orea ese e halasimu hahekau daladia ai baita davarimu. Bema baita hekwarahimu unu hahekau daladia baita badinamu to dia siboda eda ura baita lalomu, ita ese kongrigeisin ai maino baita havaraiamu.

10. Paulo be dahaka danu ma e kara, kongrigeisin ai maino baine mia totona?

 ¹⁰ Paulo ese dia tadikaka taihu edia kerere to edia kara namodia e gwauraiva amo maino e havaraia. Heḡereḡere, Paulo ese Roma taudia e tore henidia revarevana dokonai, ia ese momo ladadia e gwaurai bona nega momo edia kara namodia eiava idia be taunimanima ede bamodia e gwauraiva. Tadikaka taihu edia kara namodia baita gwauraimu amo, ita na Paulo ta tohotohoamu. Unu baita kara tomamu neganai, eda hetura karana tadikaka taihu ida be goadamu, unu amo kongrigeisin ai tadikaka taihu edia helalokau heheni karana danu be goadamu.

11. Ḡau haida ai asita lalotamonamu neganai, maino be ede baita havaraia toma?

¹¹ Nega haida, reana lo Kristen taudia danu ḡau haida ai basie lalotamonamu eiava be hepapahuahumu. Una na Paul bona ia turana namona ta, Banaba ediai e vara. Idia raruosi na edia misinari laolaona ma ta ai Mareko ese baine bamodia o lasi na e hepapahuahulaia. “Una gwauna raruosi e heai,” bona una dainai lalodia e hadai basiela hebou. (Apos. 15:37-39) To, Paul, Banaba, bona Mareko na e maino lou, e hahedinaraia kongrigeisin ena maino bona lalotamona na mai anina bada. Paulo ese gabeai Banaba bona Mareko edia kara namodia e herevalai. (1 Kor. 9:6; Kol. 4:10) Ita danu kongrigeisin ai bema haida ida ḡau haida ai asita lalotamonamu eiava ta hepapahuahumu, baita hamaoromaorodia bona tadikaka taihu edia kara namodia na dounu baita gwaurai hedinarai. Unu amo, baita mainomu bona baita lalotamonamu.​—Efe. 4:3.

12. Eda tadikaka taihu ese e davarimu hekwakwanaidia haida be dahaka?

¹² Tadikaka taihu edia abidadama Iehova enai ta hagoadaiamu neganai, una ese idia na e durudia badamu. Idia haida na edia ruma bese taudia, ḡaukara hebou taudia o skuli hebou taudia, dia Witnes taudia ese e kirikirilaidiamu. Haida be gorere badadia eiava haida edia kara bona hereva daidiai lalodia na e hisihisimu. A ma haida be laḡani momo lalodiai hereva momokani ai vada e noho, bona reana nega daudau lalonai ina tanobada oromana dokona ena ore e nariamu. Unu ḡau idauidau ese hari ina negai Kristen taudia edia abidadama na baine tohoa diba. Kristen ginigunadia danu hekwakwanai unu bamodia e davari. Paulo be dahaka e kara, ena tadikaka taihu baine hagoadadia totona?

13. Paulo ese edena dalai edia abidadama dainai e kirikirilaidiava taudia e durudia?

¹³ Paulo ese Toretore Helaḡadia e ḡaukaralai ena tadikaka taihu edia abidadama baine hagoadaia totona. Heḡereḡere, Iuda taudia haida, dia Kristen taudia na e hegwau heniva e gwauva Iuda tomadihona ese Kristen tomadihona na e hereaia dainai, Iuda Kristen taudia na asi dibadia idia be ede bae haere henidia toma. Una dainai, ta dibamu Paulo ena revareva ese Heberu Kristen taudia na e hagoadadia bada. (Heb. 1:5, 6; 2:2, 3; 9:24, 25) Paulo ena hereva ese idia na bema durudia diba edia ruma bese taudia, dia Kristen taudia bae haere henidia totona. Hari ina negai, eda tadikaka taihu, haida ese e kirikirilaidiamu taudia baita durudia diba, idia ese Baibul e herevalaimu pablikeisin bae ḡaukaralai diba edia abidadama bae gwaurai hedinarai totona. Bona bema eda matamata taudia na e abia daemu Dirava na e nohomu bona Ia ese ḡau iboudiai e kara dainai haida ese e hevasehalaidiamu neganai, baita durulaidia diba buklet ladana, Was Life Created? bona The Origin of Life​—Five Questions Worth Asking ai heduru herevadia bae tahu, bona bae hahedinaraia dahaka dainai idia ese e abia daemu mauri na mai ihavarana tauna.

14. Ena be Paulo na haroro bona hahediba ḡaukarana ai e bisiva, to ia be dahaka e kara?

 ¹⁴ Paulo ese ena tadikaka taihu e hagoadadia edia “kara namodia” amo edia lalokau bae hahedinaraia. (Heb. 10:24) Dia e gwaurai herevadia amo mo, to ena kara amo danu ena tadikaka taihu e durudia. Heḡereḡere, Iudea ai tadikaka taihu na doe e vara neganai, Paulo ese idia totodia heduru ḡaudia haida e laohai. (Apos. 11:27-30) Momokani, ena be Paulo na haroro bona hahediba ḡaukarana ai e bisiva, to nega iboudiai dala e tahuva tauani dalanai heduru bae abi tadikaka taihu ediai heduru ḡaudia e heniva. (Gal. 2:10) Unu amo tadikaka taihu na e hagoadadia bae diba Iehova ese idia na be naridiamu. Hari ina negai, eda nega, goada, bona diba baita ḡaukaralaiamu dika e vara gabudia ai heduru baita henimu neganai, ita danu eda tadikaka taihu edia abidadama baita hagoadaiamu. Tanobada heḡeḡemadai ḡaukarana baita duruamu negadiai danu unu bamona. Unu dala bona ma dala haida amo, eda tadikaka taihu baita durudiamu bae abia dae Iehova ese idia na basine rakatanidiamu.

15-16. Edia abidadama ai e manoka taudia be ede baita kara henidia toma?

¹⁵ Paulo ese edia abidadama ai e manoka taudia na dounu e durudiava. Ediai hebogahisi e hahedinaraia bona hahegoada dalanai e hereva henidia. (Heb. 6:9; 10:39) Heḡereḡere, Heberu taudia e tore henidia revarevana ai, nega momo ini hereva “baita” bona “ita” e ḡaukaralai momo, e hahedinaraia ia sibona ese e heni sisibana danu baine badinaia. (Heb. 2:1, 3) Paulo heḡereḡerena, edia abidadama ai e manoka taudia danu dounu baita durudia. Bona edia namo baita lalomu karana ese be hahedinaraiamu, idia na ta hagoadadiamu. Una dala amo, ta hahedinaraiamu idia na ta lalokau henidiamu. Hahegoada dalanai baita herevamu ese haida lalodia na be hanamomu bona be hagoadadiamu.

 ¹⁶ Paulo ese ena tadikaka taihu e hamaorodia, Iehova ese edia kara namodia na e lalo badamu. (Heb. 10:32-34) Ena abidadama ai e manoka tadikaka o taihu ta ta duruamu neganai, unu baita kara toma diba. Baita nanadaia ia ese hereva momokani be ede e dibaia toma baine herevalaia eiava baita hagoadaia Iehova ena heduru e mamia dalana baina laloa lou. Una dala baita ḡaukaralaia ia baita hadibaia, Iehova ese guna iena lalokau e hahedinaraia dalana na basine laloaboiomu bona vaira negai Ia na basine rakataniamu. (Heb. 6:10; 13:5, 6) Herevahereva unu bamodia ese edia abidadama ai e manoka tadikaka taihu be hagoadadiamu edia hesiai ḡaukara Iehova enai na dounu be goadalaiamu.

17. Edena ḡaukara ai eda diba baita habadaia na namo?

¹⁷ Konstraksen ḡaukara e karamu tauna ese ena diba e habadaiamu heḡereḡerena, ita danu hahegoada heheni karana ai eda diba baita habadaia na namo. Edia hahetoho idauidau e haheaukalai taudia edia ekspiriens baita herevalai heboumu neganai, haida baita durudia dibamu edia hahetoho bae haheaukalai totona. Haida ediai ta itamu kara namodia baita herevalai, kongrigeisin ai maino baita havaraia totona siboda eda ura na basita gwaurai, ḡau haida ai asita lalotamonamu o e vara hepapahuahudia baita hamaoromaoro amo maino baita havaraiamu. Bona eda tadikaka taihu edia abidadama dounu baita hagoadaia daladia haida na, Baibul ena hereva momokani baita herevalai hebou, baita kara diba heduru daladia baita heni, bona edia abidadama ai e manoka taudia baita durudia.

18. Lalomu ba hadaia dahaka ba kara totona?

¹⁸ Iehova ena hesiai ḡaukara totona konstraksen ḡaukaradia e karamu taudia na e moalemu bona dekediai miadia ḡaudia danu e moalelaimu. Unu baita hemami toma dibamu, bema lauma dalanai eda tadikaka taihu edia abidadama baita hagoadaiamu. Ruma o bildin korikorina ta na gabeai be hadikamu, to ta karamu ḡaukara anidia na bae mia ela bona hanaihanai! Laloda baita hadai dounu baita “hahealo heheni” bona baita “hahegoada heheni.”​—1 Tes. 5:11.