1. “Hereva momokani” ta dibaia dalana iherevalaina karana ese ita be ede be duruda tomamu?

 “HEREVA momokani be ede o dibaia toma?” A dibamu, oi ese una henanadai na nega momo do haerelaia. Tadikaka ta o taihu ta ta dibaiamu neganai, una na ta henimu henanadai ginigunana ta. Ta moalemu bema ita edai tadikaka taihu na Iehova e dibaia bona e lalokau henia dalana e herevalaiamu, bona ita ese hereva momokani ta abia dalana idia ediai ta herevalaiamu na moale ḡauna. (Roma 1:11) Herevahereva unu bamodia ese be durudamu hereva momokani na baita laloa badamu. Danu, una ese be durudamu laloda baita hadai “hereva momokani dalana ai” dounu baita raka​—una na Iehova ena hahenamo bona ena lalonamo baine havara daladia ai baita mauri.​—3 Ioa. 4.

2. Ina atikol ai dahaka baita herevalaimu?

² Ina atikol ai, hereva momokani ta ura henia badidia haida baita riviulaimu. Bena una harihari ḡauna hereadaena totona eda ura baita habadaia daladia baita herevalaimu danu. Momokani, ina atikol ai baita riviulaimu ḡaudia ese be hagoadadamu, ita na Iehova ese hereva momokani ai e hakauda mai dainai, eda tenkiu karana ienai na be badamu. (Ioa. 6:44) Danu, ma haida ediai hereva momokani iherevalaina karana ai eda ura na be habadaiamu.

3. Hereva momokani ta ura heniamu badi bada hereana be dahaka?

³ Badi momo daidiai hereva momokani na ta ura heniamu. Badi bada hereana na, Iehova Dirava, hereva momokani Badina na ta lalokau heniamu. Iena Hereva, Baibul amo ta diba, ia na dia guba bona tanobada e karadia siahu idoinai Tauna mo, to ia na gubai e nohomu Tamada lalokauna mai hebogahisina ida ita e naridamu danu. (1 Pet. 5:7) Dibada eda Dirava na ‘hebogahisi bona harihari-bada Diravana. Badu ai e halahemu;  hebogahisi ai bona uraheni ai e haraḡamu bona nega iboudiai ena hereva na hamomokanidiamu.’ (Eso. 34:6, NWT) Iehova ese hahemaoro maoromaoro na e ura heniamu. (Isa. 61:8) Ita ta hisihisimu neganai ia na se moalemu, bona ia na e heḡaeḡaemu​—oibe, e ura badamu​—hisihisi iboudiai na ena nega korikorina ai be haoredia vaitanimu. (Ier. 29:11) Una nega namo hereana na ta nariamu! Iehova ta lalokau heniamu badina ta na una!

4-5. Dahaka dainai aposetolo Paulo ese eda helaro na dogo ta ida e haheḡereḡerea?

⁴ Hereva momokani ta ura heniamu badina ta be ma dahaka? Hereva momokani ese dala momo ai e durudamu. Mani haheitalai ta a laloa. Baibul ena hereva momokani ese vaira nega helarona danu e herevalaia. Aposetolo Paulo ese una helaro ena namo e herevalaia, ia na e gwa: “Una helaro na laumada dogona na heto, se idaumu bona se mareremu.” (Heb. 6:19) Dogo ese bouti ta e dogoataomu heḡereḡerena, Baibul amo ta dibaiamu helarona ese baine duruda eda mauri ai ta davarimu hahetohodia baita haheaukalai totona.

⁵ Una siri ai, Paulo na horoa Kristen taudia ese bae abia guba helarona e herevalaiamu. To ena hereva ese tanobada paradaisona ai bae mauri hanaihanai Kristen taudia danu e durudiamu. (Ioa. 3:16) Momokani, mauri hanaihanai helarona idibana karana ese eda mauri na e durua badamu.

6-7. Yvonne be edena dalai vaira nega totona, hereva momokani idibana karana ese e durua?

⁶ Taihu ta ladana Yvonne, ena ekspiriens mani a laloa. Ia na dia hereva momokani ai e bada, bona maraḡinai ia na mase garina e gariva. Basine laloaboio diba ḡauna ta e herevalaia, ia na e gwa: “Dina ta be maimu kerukeru na da basita laloamu. Unu hereva daidiai hanuaboi ai na hekureva vaira negana na laloava. Momokani na lalo, mauri na dia ina nega mo. ‘Dahaka dainai ta maurimu?’ Lau na asina uramu baina mase!”

⁷ Yvonne na gabeai ena matamata neganai, Iehova ena Witnes taudia ida e hedavari. Ia na e gwa: “Na abia dae matama lau na tanobada Paradaisona ai baina mauri hanaihanai diba.” Hereva momokani idibana karana ese eda taihu be ede e durua toma? Ia na ma e gwa: “Hanuaboi ai hekuregu ai vaira negana bona mase ai bae vara ḡaudia na da asina lalodiamu.” Momokani e hahedinaraiamu Yvonne ese hereva momokani na e laloa badamu, bona haida ediai vaira nega helarona iherevalaina karana na e moalelaia badamu.​—1 Tim. 4:16.

8-9. (a) Iesu ena parabole ta ai, tau ta ese e davaria dava bada kohuna be ede e laloa toma? (b) Hereva momokani be ede o laloa tomamu?

⁸ Baibul ena hereva momokani ta na, Dirava ena Basileia ena sivarai namona. Iesu ese una Basileia ena hereva momokanina na e hehuni kohu namona ta ida e haheḡereḡerea. Una na Mataio 13:44 ai e herevalaia, Iesu na e gwa: “Guba basileiana na kohu namona tano ai e hehuni na heto. Tau ta ese e davaria, bena e tahunia, ela, mai moalena ida ena ḡau iboudiai eha hoi, una tano e hoia.” O itaiamu una tau ese una e hunia kohuna na se tahua. To una kohu e davaria neganai, ena ḡau iboudiai baine halusi diba, unu amo una dava bada kohuna baina abia. Momokani, enai miadia ḡaudia iboudiai e hoihoilai. Dahaka dainai? Badina e diba una na dava bada kohuna. Una kohu ena namo ese ia baine halusi kohudia edia namo na e hereadia.

⁹ Oi ese hereva momokani be unu o laloa tomamu, a? Oibe, a dibamu emu hemami na unu bamona. Ta dibamu hari Iehova ihesiai henina amo ta abiamu moalena na ina tanobada ai ḡau ta ese basine haheḡereḡerea diba, bona vaira negai Dirava ena Basileia henunai baita mauri hanaihanai dibamu. Ta abia hahenamona,  Iehova ihetura henina karana ese kohu o ḡau ta baita halusia karana na e hereaia. Ta moalelaia badamu ḡauna na, ‘Ia baita hamoalea.’​—Kol. 1:10.

10-11. Dahaka ese Michael e durua ena mauri ai sensi badadia e kara?

¹⁰ Ita momo na Iehova ena lalonamo iabina totona, eda mauri ai sensi badadia momo ta kara. Haida na edia moni ḡaukara, pei badadia e abimu ḡaukaradia e rakatani. A haida be se ura edia mauri ai bae taḡa. A ma haida be Iehova e dibaia neganai, edia mauri na e haidaua momokani. Michael na unu e kara toma. Ia na dia hereva momokani ai e bada. Ena matamata neganai, ia na karate baine dibaia totona e treininiva. Ia na e gwa: “Lauegu ai mai anina bada ḡauna na, basine goreregu. Nega haida na hemamiva, ta ese lau basine halusigumu.” To, Michael ese Baibul e stadilaia matama neganai, Iehova ena lalohadai daḡedaḡe karana ai e dibaia. (Sal. 11:5) Michael ese ia e stadi heniava tadikaka mai adavana ida e herevalaidia neganai, ia na e gwa: “Idia ese lau na se hamaorogu karate baina hadokoa; to dounu egu ai Baibul ena hereva momokani e hahedibalaiva.”

¹¹ Michael ese ena diba Iehova totona e habadaia neganai, ena lalokau Ienai na e bada. Ia na Iehova ese Ia e tomadiho heniamu taudia e bogadia hisimu karana e dibaia neganai, una ese kudouna na e hamarerea bada. Una murinai, Michael na e laloparara ena mauri ai abi hidi badadia haida baine kara na namo. Ia na e gwa: “Lau na na diba egu mauri ai karate baina rakatania na abi hidi aukana. To, na diba danu unu ba kara tomamu neganai Iehova na be moalemu, bona na abia dae momokani Ia ihesiai henina karana na mai anina bada ḡau iboudiai amo.” Michael ese e davaria hereva momokanina ena namo na e laloa bada, bona una ese ia na e hagoadaia ena mauri ai sensi badadia baine kara totona.​—Iak. 1:25.

12-13. Edena dalai Baibul ena hereva momokani ese Mayli na e durua?

¹² Baibul ena hereva momokani ena namo baita hahedinaraia totona, Baibul ese hereva momokani na lamepa diarina ese gabu diburana ta e hadiariamu karana ida e haheḡereḡerea. (Sal. 119:105; Efe. 5:8) Taihu ta ladana Mayli, ia na Azerbaijan amo, ese Dirava ena Hereva amo e davari heduru herevadia na e lalodia bada. Ia tamana bona sinana na dubu idaudia e laomu. Tamana na Muslim tomadihona e laova, bona sinana be Jew taudia edia edia dubu e laova. Ia na e gwa: “Ena be mai dibagu Dirava na e nohomu, to na daradaralaiva ḡaudia na momo. Na Ialo, ‘Dahaka dainai Dirava ese taunimanima e havaradia, bona edena badi maorona ta dainai ta na ena mauri ibounai lalonai baine hisihisi bena gabeai hell ai hisihisi baine ani hanaihanai?’ Taunimanima na e gwaumu ḡau iboudiai e varamu na Dirava ena ura dainai, lau na lalo, ‘Dirava be taunimanima e biagudiamu bona idia e hisihisimu neganai, ia be e moalemu, a?’”

¹³ Mayli na dounu ena henanadai haeredia e tahuva. Una murinai, Baibul stadi ta e abia dae bona Iehova ena Witnes ta ai ela. Ia na e gwa: “Baibul ena hereva momokani ese e durugu egu mauri na baina moalelaia diba. Dirava ena Hereva amo na davari badi maorodia idibadia karana ese lalomaino e henigu.” Mayli heḡereḡerena, ita iboudai ese Iehova, ‘dibura amo e boirida bona ena diari herea-daena ai e hakauda lasi’ Tauna baita hanamoa.​—1 Pet. 2:9.

14. Edena dalai eda ura hereva momokani ai baita habadaia diba? (“ Haheḡereḡere Ḡaudia Ma Haida” mauana ba itaia danu.)

¹⁴ Unu na hereva momokani ena namo e hahedinarai ḡaudia haida mo. A dibamu reana oi ese hereva momokani ena namo ma haida o lalodiamu. Sibomu emu stadi ai hereva  momokani baita ura henia badidia ma haida ba tahu diba. Hereva momokani ai eda ura baita habadaiamu neganai, ma haida ediai iherevalaina daladia ma haida baita davarimu danu.

15. Edena dala ta amo baita hahedinaraia, hereva momokani na ta ura heniamu?

¹⁵ Hanaihanai Baibul bona Baibul e herevalaimu pablikeisin baita stadilai amo, ta hahedinaraiamu hereva momokani na ta ura heniamu. Herevana ede daudauna hereva momokani ai vada ta noho, ita na nega iboudiai ḡau matamatadia ta dibamu. Watch Tower ginigunana na ini e gwau toma: “Hereva momokani na flaoaflaoa mai hairaina ta tano ḡaḡaena ai na heto, una flaoaflaoa na ava dikadia ese e ḡeḡea ahu. Ba davaria totona oi na bo hetahu namonamomu. . . . Bema o uramu bavabia, namona na ba igo diho bena bavabia. To flaoa tamona mo bavabia na dia heḡereḡere. . . . Oi na flaoa momo ba tahu bona ba gogo.” Stadi karana na mai hekwarahina to baita hetahu namonamomu neganai, namo baita abimu.

16. Edena stadi dalana be oi ese o badinaiamu bona o moalelaiamu? (Hereva Lada-isidia 2:4-6)

¹⁶ Dia ita iboudai ese duahiduahi bona stadi karana na ta ura heniamu. To Iehova ese  ita na e vavedamu hereva momokani baita lalopararalaia namonamo totona, dounu baita “tahua” bona baita “tahua goada.” (Hereva Lada-isidia 2:4-6 ba duahi.) Baita hekwarahimu unu baita kara tomamu neganai, nega iboudiai namo baita davarimu. Corey na sibona ena Baibul duahiduahi e herevalaia neganai, e hahedinaraia siri ta e duahiamu neganai do e laloamu. Ia na e gwa: “Futnout iboudiai na duahimu, cross-reference iboudiai na itamu, bona hetahu ma haida na karamu. . . . Una stadi dalana amo lau ese ḡau momo na dibadiamu!” Herevana ita ese una stadi dalana eiava ma dala ta ta badinaiamu, eda nega bona goada na stadi karana ai baita atoamu neganai, ta hahedinaraiamu hereva momokani na ta laloa badamu.​—Sal. 1:1-3.

17. Eda mauri ai ta dibamu ḡaudia baita badina anina be dahaka? (Iakobo 1:25)

¹⁷ Momokani, dibada hereva momokani istadilaina karana mo na dia heḡereḡere. Namo bada baita abi totona, ta dibaiamu hereva momokanina, na eda mauri ai baita badinaia na ḡau badana. Unu baita kara tomamu neganai, moale korikorina baita davariamu. (Iakobo 1:25 ba duahia.) Edena dalai baita hahedinaraia ta dibamu ḡaudia na ta badinamu? Tadikaka ta na e gwa, eda mauri ai siboda baita seke bema ta dibamu ḡaudia ta badinamu eiava bona dounu baita seke bema eda mauri ai ḡau haida baita hanamo diba. Aposetolo Paulo na ini e gwa toma: “Ḡau tamona, vada ta davari ḡaudia heḡereḡeredia ai baita raka.”​—Fili. 3:16.

18. Dahaka dainai baita hekwarahi “hereva momokani dalana ai” dounu baita raka?

¹⁸ Bema baita hekwarahimu “hereva momokani dalana ai” dounu baita rakamu, mani ena namo a laloa! Dia eda mauri mo baita hanamoamu, to Iehova bona tadikaka taihu baita hamoalediamu. (Her. 27:11; 3 Ioa. 4) Momokani, ini na hereva momokani baita ura henia bona eda mauri ai baita badina badi hereadaedia, ani?