STADI ATIKOL 33
Iehova ese Ena Taunimanima Na E Itadia-Taomu
“Iehova ese ia garina e garimu taudia na e . . . itadia taomu.”—SAL. 33:18.
ANE 22 “Iehova Na Ireḡugu”
INA STADI ANINA *
1. Dahaka dainai Iesu ese Iehova e noia ena hahediba baine itadia-tao?
IESU do se mase hanuaboina ai, ia na Tamana enai mai anina bada ḡauna ta e noia. Ia ese Iehova na e noia ena hahediba taudia baine naridia. (Ioa. 17:15, 20) Vaia, Iehova na nega iboudiai ena taunimanima na e itadia-taomu, e naridiamu, bona e gimadiamu. To, Iesu na mai dibana ena hahediba na Satana ena amo daḡedaḡe karadia ma haida be davarimu. Danu, Iesu na mai dibana Iehova ena heduru bae abia na namo, unu amo Diabolo ena daḡedaḡe karadia bae haheaukalaidia.
2. Salamo 33:18-20 heḡereḡerena, dahaka dainai hekwakwanai ta davarimu neganai basita gari na namo?
2 Hari ina negai Satana ena tanobada ese Kristen taudia na be tohodia bada hereamu. Be hamanokada dibamu hahetohodia baita davarimu bona unu ese Iehova ibadinana karana danu be tohoamu. To, ina atikol ai baita itaiamu heḡereḡerena, ḡau ta garina basita gari na namo. Iehova ese ita na e itada-taomu—ta davarimu hekwakwanaidia na e itamu, bona Ia na noho heḡaeḡae baine duruda unu baita haheaukalai. Mani Baibul ena haheitalai rua aita herevalai, baita itaiamu ededia dala ai “Iehova ese ia garina e garimu taudia na e . . . itadia taomu.”—Salamo 33:18-20 ba duahi.
TA HEMAMIMU ITA NA SIBODA NEGANAI
3. Edena negai reana baita mamiamu ita na siboda?
3 Ena be eda kongrigeisin ai tadikaka taihu na momo herea, to nega haida reana baita hemamimu ita na siboda. Heḡereḡere, reana matamata taudia na edia klas taudia vairadiai e abi daemu ḡaudia bae gwaurai hedinarai neganai eiava kongrigeisin matamatana ta e laomu neganai, be mamiamu idia na sibodia. Ita haida be reana ta lalohisihisimu eiava lalohadai kereredia dainai baita lalometaumu, bena baita laloamu siboda ese unu hekwakwanai baita hamaoromaorodia. Reana baita halahemu, basita uramu eda hemami na ma haida baita hamaorolaidia, badina baita lalomu idia na basie lalopararamu. Bona nega haida reana baita laloamu, ta ese ita na se lalodamu. Siboda ta nohomu mamina e havaraiamu ḡaudia na idauidau, to una ese laloda be hahekwarahimu bona baita mamiamu ita na asi iduruda. Iehova na se uramu unu baita hemami toma. Dahaka dainai unu ta gwau tomamu?
4. Dahaka dainai peroveta tauna Elia na e gwa: “Lau mo sibogu na nohomu”?
4 Mani abidadama tauna Elia ena haheitalai a laloa. Iesebel na e gwauhamata baine hamasea, una dainai Elia na dina 40 lalodiai tano ḡaḡaena ai e hanoho. (1 Han. 19:1-9) Gabeai sibona nadi kohuana ta lalonai e noho neganai, Iehova e tai henia eto: “lau mo sibogu [peroveta taugu] na nohomu.” (1 Han. 19:10) Una tano ai peroveta taudia ma haida na nonoho; heḡereḡere Obadia ese peroveta taudia 100 na Iesebel ena amo e hamauridia. (1 Han. 18:7, 13) To dahaka dainai Elia na e mamia ia na sibona? Ia be e laloava Obadia ese e hamauridia peroveta taudia iboudiai na de mase, a? O e mamiava ia na sibona badina reana Karamele Ororona ai e hedinarai Baal na dirava koikoina dainai, ta na se ura ia ida Iehova bae hesiai henia, a? Eiava reana e mamiava ia ese e davariava hahetohona na ta ese se lalopararalaiava, o e laloava ta ese ia na se laloava? Baibul ese Elia ena hemami badina na se herevalaia. To, ta dibamu ḡauna na, Iehova ese Elia ena hemami badina na e lalopararalaia bona mai dibana ede baine durua toma.
Ta mamiamu ita na siboda neganai, edena dalai Iehova ese Elia e durua dalana amo hahegoada baita abi diba? (Paragraf 5-6 ba itadia)
5. Edena dalai Iehova ese e hahedinaraia Elia na dia sibona?
5 Iehova ese dala momo ai Elia na e durua. Elia na e hagoadaia baine hereva. Iehova ese nega rua Elia e nanadaia eto: “Oi dahaka o karamu iniseni ai?” (1 Han. 19:9, 13) Unu nega ta ta ai, Elia ese ena hemami e herevalaia neganai, Iehova na e hakala. Iehova na Elia baine durua totona, ḡau idauidau e kara amo e hahedinaraia Ia na noho bona ena siahu na bada herea. Danu, Iehova ese e hamaoroa Israel taudia ma haida na dounu Ia e tomadiho heniava. (1 Han. 19:11, 12, 18) Ta dibamu Elia ese ena hemami e gwauraia hedinarai bena Iehova ena haere e kamonai neganai, ena hemami na e namo. Iehova ese Elia na mai anina bada ḡaukaradia haida e henia. E noia Hasaele baine horoa Suria pavapavana ai bainela, Jehu baine horoa Israel pavapavana ai bainela, bona Elisaia baine horoa peroveta tauna ai bainela. (1 Han. 19:15, 16) Unu ḡaukara Elia e henia karana amo e hahedinaraia, Iehova na e ura Elia baine durua mai anina bada ḡaukaradia baine lalodia bada. Danu, Dirava ese turana namona ta, Elisaia, e henia. Bema o laloamu, oi na sibomu, Iehova ena heduru be ede bavabia toma?
6. Bema o mamiamu oi na sibomu, dahaka ba ḡuriḡurilai diba? (Salamo 62:8)
6 Iehova ese oi na e vavemumu ia ba ḡuriḡuri henia. O davarimu hekwakwanaidia na e itamu, bona e uramu ba diba herevana edena negai ba ḡuriḡuri to be kamonaimu. (1 Tes. 5:17) Ia e tomadiho heniamu taudia edia ḡuriḡuri na mai ena moale ida e kamonaimu. (Her. 15:8) Dahaka ba ḡuriḡurilai diba, bema o laloamu oi na sibomu? Elia e kara heḡereḡerena, emu hemami ibounai na Iehova ba hamaorolaia. (Salamo 62:8 ba duahia.) O lalohekwarahilaimu ḡaudia bona unu daidiai o abimu hemamidia na ba hamaorolaia. Ba noia baine durumu, emu hemami ba biagudia totona. Heḡereḡere, bema o hemaraimu skuli ai ba haroro, Iehova ba noia goada baine henimu, unu amo mai emu boga-auka ida ba haroro diba. Danu, ba noia diba aonega baine henimu, unu amo o abi daemu ḡaudia ba herevalai namonamo diba. (Luka 21:14, 15) Bema o lalometaumu, Iehova ba noia baine durumu lo Kristen tauna ta ba hereva henia totona. Iehova ba noia o hereva heniamu tauna baine durua mai ena laloparara ida emu hereva baine kamonai. Emu hemami na Iehova ba hamaorolaia, emu ḡuriḡuri e haerelaimu daladia ba ita, bona haida edia heduru bavabi dae; unu amo bo mamiamu oi na dia sibomu.
Emu hesiai ḡaukara ihabadana daladia bona hesiai ḡaukara ai ma haida ida ba ḡaukara daladia o tahumu, a? (Paragraf 7 ba itaia)
7. Mauricio ena ekspiriens amo dahaka o dibamu?
7 Iehova ese ita iboudai na mai anidia bada ḡaukaradia e henida. Bavabia dae diba Iehova ese kongrigeisin ai bona hesiai ḡaukara ai o karamu ḡaudia iboudiai na e itamu bona e lalodia badamu. (Sal. 110:3) Edena dalai, bema o mamiamu oi na sibomu, to unu ḡaukara ai bo bisimu karana ese be durumumu? Mani tadikaka matamatana ladana Mauricio, * ena haheitalai a laloa. Mauricio e bapatiso bena se daudau, turana namona ta ese hereva momokani e rakatania matama. Mauricio na gwa: “Na itaia Iehova e rakatania neganai, na lalo, lau ba heḡereḡeremu eiava. Na daradarava, egu gwauhamata Iehova enai ba haḡuḡuruamu eiava, bona Iehova ena ruma bese lalonai dounu ba nohomu eiava. Na mamiava lau na sibogu bona na lalo ta ese egu hemami basine lalopararalaiamu.” Mauricio be dahaka ese e durua? Ia na e gwa: “Egu hesiai ḡaukara na habadaia. Una ese e durugu sibogu basina helalo bona lalohadai kereredia baina dadarai. Na moaleva bona da asina mamiava lau na sibogu badina hesiai ḡaukara ai ma haida ida a ḡaukara hebouva.” Momokani, ena be tadikaka taihu ida asita haroro heboumu, to idia ida revareva bona telefon amo baita haroro diba. Dahaka ese danu Mauricio e durua? Ia na ma e gwa: “Kongrigeisin ḡaukaradia ai na bisiva. Stiuden edia kaha e heniguva neganai mai kudougu idoinai ida na heḡaeḡaelaiva bona na heniva. Unu kaha idauidau daidiai na dibava Iehova bona ma haida ese lau na e lalogu badamu.”
HAHETOHO AUKADIA DAINAI TA LALOMANOKAMU NEGANAI
8. Edena dalai ta davarimu hahetohodia ese laloda baine hamanokaia diba?
8 Ini dina gabedia ai hahetoho baita davarimu. (2 Tim. 3:1) To, baita abimu hahetohodia bona be varamu negadiai basita dibamu dahaka baita kara. Readia kara haraḡa moni dalanai baita hekwakwanaimu, gorere badana ta baita abiamu, eiava ta lalokau heniamu tauna ta be masemu. Nega unu bamodiai, baita lalometaumu bona basita dibamu dahaka baita kara, unu baita hemami toma dibamu, bema hahetoho na murina murina eiava nega tamona be varamu. To, baita helalotao Iehova ese ita na e itada-taomu, bona iena heduru amo mai eda goada ida baita davarimu hahetoho idauidau baita haheaukalaidiamu.
9. Iobu ese e davari hahetohodia haida a herevalai.
9 Mani Iehova ese abidadama tauna Iobu e durua dalana aita laloa. Ia na nega kwadoḡi lalonai hahetoho dikadia haida e davari. Dina tamona lalonai, Iobu na e kamonai ena ubu-ubu ḡaudia iboudiai na e henao eiava e mase, ena hesiai taudia na e mase, bona dika hereana be natuna lalokaudia iboudiai e hamasedia. (Iobu 1:13-19) Unu e daradokolaiva lalonai, se daudau, Iobu na gorere dikana ta ese e abia. (Iobu 2:7) Enai e vara ḡaudia na dika herea dainai e gwa: “Egu mauri na inai henia badamu; baina mauri hanaihanai asina uramu.”—Iobu 7:16.
Iehova na Ena lalokau Iobu enai e herevalaimu, E karadia mauri ḡaudia e naridiamu daladia amo Iobu na baine abia dae Ia ese na e lalokau heniamu bona baine naria diba (Paragraf 10 ba itaia)
10. Edena dalai Iehova ese Iobu ena hahetoho lalodiai iduruna ḡaudia e heni, unu amo baine haheaukalai? (Rau 1 laulauna ba itaia.)
10 Iehova ese Iobu na e itaia-tao. Ia ese Iobu na e lalokau henia dainai, ena hahetoho ihaheaukalaina ḡaudia na e henia. E kara ḡaudia amo e hahelaloatao iena aonega na bada bona bada herea bona ia ese e havara ḡaudia na mai ena lalokau ida e naridiamu. Ia ese mauri ḡaudia idauidau e herevalaidia. (Iobu 38:1, 2; 39:9, 13, 19, 27; 40:15; 41:1, 2) Iehova ese abidadama eregabe tauna Elihu e ḡaukaralaia baine hagoadaia bona tauhalo baine henia. Elihu ese Iobu e hagoadaia e gwa, Iehova na hanaihanai Ia e tomadiho heniamu haheauka taudia na e hanamodiamu. To Iehova ese danu Elihu na e ḡaukaralaia mai ena lalokau ida Iobu baine sisiba henia. Elihu ese Iobu na e durua baine helalotao Iehova, ḡau iboudiai Ihavaradia Tauna vairanai, ita na mamaraḡi-mamaraḡi. (Iobu 37:14) Iehova ese danu Iobu na ḡaukara ta e henia; bamona tatoiosi edia kara dika dainai baine ḡuriḡuri. (Iobu 42:8-10) Hari ina negai hahetoho aukadia ta davarimu neganai, edena dalai Iehova ese ita na e itada-taomu?
11. Baibul ese hahetoho negadiai, ede e hagoadada tomamu?
11 Iehova na dia Iobu enai e kara heḡereḡerena, maoromaoro guba amo be hereva henidamu, to Ena Hereva, Baibul amo ita na e hereva henidamu. (Roma 15:4) Ia ese vaira nega helarona amo e hagoadadamu. Mani hahetoho negadiai Baibul ena hahegoada herevadia haida aita herevalai. Baibul ai Iehova na e gwa, ḡau ta—hahetoho aukadia danu—ese “Dirava ena uraheni, . . . amo basine bibida oho diba.” (Roma 8:38, 39) Bona e gwa, ia na ḡuriḡuri amo ia “e boi heniamu taudia iboudiai dekedekediai.” (Sal. 145:18) Iehova na e gwa bema ienai baita tabekaumu, hahetoho idauidau baita haheaukalai diba bona ena be baita hisihisimu to dounu baita moalemu. (1 Kor. 10:13; Iak. 1:2, 12) Dirava ena Hereva ese danu e hadibadamu, bema mauri hanaihanai ena hahenamo na ta davarimu hahetohodia ida baita haheḡereḡeremu, baita dibamu, ta davarimu hahetohodia na nega kwadoḡi ḡaudia mo bona be oremu. (2 Kor. 4:16-18) Iehova ese helaro na e henidamu, unu hahetoho idauidau e havaramu tauna, Satana Diabolo bona ena kara dikadia e tohotohomu taudia iboudiai na be haoredia vaitanimu. (Sal. 37:10) Vaira neganai bae vara hahetohodia daidiai, Baibul ena hahegoada herevadia haida do laloatao, a?
12. Bema ta uramu iena Hereva amo heduru baita abi, Iehova be e uramu dahaka baita kara?
12 Iehova na e uramu nega baita ato Baibul baita stadilaia hanaihanai bona ta duahimu ḡaudia baita lalodia dobu. Ta dibamu ḡaudia baita badinamu neganai, eda abidadama na be goadamu bona Tamada gubai e nohomu ida eda hetura karana baita hanamoamu. Una dainai, hahetoho negadiai baita haheauka dibamu. Danu, Iehova na ena Hereva ai e tabekaumu taudia na ena lauma helaḡa amo e durudiamu. Bona una lauma helaḡa dainai hahetoho negadia iboudiai lalodiai “siahu herea-daena” baita abia diba baita haheauka totona.—2 Kor. 4:7-10.
13. Edena dalai “hesiai tauna mai ena abidadama bona aonega” ese e henimu lauma anianidia ese bae duruda diba hahetoho negadiai baita haheauka?
13 Iehova ena na “hesiai tauna mai ena abidadama bona aonega” edia amo atikol, vidio, bona miusik momo herea e havara, eda abidadama bae goada bona lauma dalanai baita gima totona. (Mat. 24:45, NWT) Namona na unu heduru ḡaudia na baita ḡaukaralai. Taihu ta United States amo, na unu lauma aniani daidiai vanegai ena tenkiu herevana e gwauraia. E gwa: “Laḡani 40 lalodiai Iehova na hesiai henia neganai, egu kamonai karana na e tohoa loulou.” Ia na hahetoho badadia haida e davari—kekero tauna ese tubuna tauna e habampaia bena e mase, tamana sinana na gorere dainai e mase, bona ia na nega rua kansa gorerena e abia. Dahaka ese e durua dainai e haheauka? Ia na e gwa: “Iehova ese nega iboudiai e nariguva. Ia ese hesiai tauna mai ena abidadama bona aonega amo lauma anianidia momo e heni baina haheauka totona. Una dainai, lau na Iobu heḡereḡerena baina hemami diba, ia na e gwa: ‘Harihari ela bona baina mase, egu lalo-maoromaoro basina negea.’”—Iobu 27:5.
Edena dalai kongrigeisin ai ma haida baita durudia diba? (Paragraf 14 ba itaia)
14. Edena dalai Iehova ese tadikaka taihu e ḡaukaralaidiamu hahetoho negadiai bae duruda? (1 Tesalonika 4:9)
14 Iehova ese ena taunimanima na e hadibadiamu nega aukadia lalodiai bae helalokau heheni bona bae hahegoada heheni. (2 Kor. 1:3, 4; 1 Tesalonika 4:9 ba duahia.) Tadikaka taihu na Elihu heḡereḡerena, nega aukadia ta davarimu neganai mai edia ura ida e durudamu eda abidadama basita negea totona. (Apos. 14:22) Heḡereḡere, Diane adavana na gorere badana ta e davaria neganai, iena kongrigeisin ese lauma dalanai e hagoadaia bona e durua dalana mani aita herevalaia. Ia na e gwa: “Una na auka. To, unu hua aukadia ai, ai ese Iehova imana goadana bona ena lalokau na a mamia. Emai kongrigeisin taudia ese ḡau momo ai e durumai. Baia haheauka totona e vadivadi henimai, e rini henimai, bona e rosimai. Lau na asi taritari dibagu dainai, tadikaka bona taihu edia motuka amo e laohaiguva hebou bona na heḡereḡereva neganai haroro totona e laohaiguva danu.” Ta moale badamu badina eda kongrigeisin ai lalokau tadikaka taihu na momo herea!
IEHOVA ENA LALOKAU DAINAI BAITA TENKIU HENIA
15. Dahaka dainai baita abia dae diba hahetoho negadiai baita haheauka diba?
15 Ita iboudai ese hahetoho na baita davarimu. To, tame herevalaia heḡereḡerena, dia siboda ese unu hahetoho baita vaira henimu. Tama lalokauna ta heḡereḡerena, Iehova ese nega iboudiai e itada-taomu. Ia na ita badidai, noho heḡaeḡae eda heduru noinoidia baine kamonai bona e ura badamu baine duruda. (Isa. 43:2) Ta diba momokanimu hahetoho na baita haheaukalai diba badina iduruda ḡaudia na momo herea e henidamu. Ia ese ḡuriḡuri karana ena hahenamo, Baibul, lauma aniani momo herea, bona lalokau tadikaka oreana e heni nega aukadiai bae duruda totona.
16. Edena dalai Iehova ena henari, mai lalokauna ida henunai dounu baita noho diba?
16 Ta moale badamu badina Tamada guba ai e nohomu ese ita na e itada-taomu! “Oibe, ita laloda ese ia e moalelaiamu.” (Sal. 33:21) Iehova ena lalokau dainai baita tenkiu henia diba, bema ita iduruda totona e heni heduru ḡaudia iboudiai baita ḡaukaralaidia. Danu, baita hekwarahi Dirava ena henari henunai baita noho. Eiava baita gwa diba, bema baita hekwarahimu dounu Iehova baita kamonai henia bona dala maorona baita badinaia, ia ese ita na be itada-tao hanaihanaimu!—1 Pet. 3:12.
ANE 51 Iehova Baita Badinaia Tarika-Tarika
^ Iehova ena heduru baita abia na namo, hari ta davarimu hekwakwanaidia baita hahanaidia. Ina atikol ese be hadibadamu Iehova ese ena taunimanima na e itadia-taomu o e naridiamu. Ia na mai dibana ita be dahaka hekwakwanai ta davarimu, bona unu hekwakwanai baita hahanaidia totona iduruda daladia na e henimu.
^ Lada haida na haidau.