1. Dahaka ese be durudamu Baibul ena peroveta herevadia istadilaidia karana baita moalelaiamu?

 BAIBUL ena peroveta herevadia istadilaidia karana be ede o laloa tomamu? Stadi atikol 33 ai ta herevalaia tadikakana, Ben na e gwaumu: “Baibul ena peroveta herevadia istadilaidia karana na, na moalelaiamu.” Oi danu unu o lalo tomamu, a? Eiava o laloamu peroveta herevadia ilalopararalaidia na auka? Reana o hesikumu peroveta herevadia ba stadilai. To, Iehova ese ena Hereva lalonai unu peroveta herevadia e tore badidia bo dibamu neganai, bo uramu ba duahidia.

2. Ina atikol ai dahaka baita herevalaimu?

² Ina atikol ai, Baibul ena peroveta herevadia baita diba badidia bona baita stadilai daladia baita herevalaimu. Danu, Daniel bukana ai peroveta herevadia rua baita herevalaimu bona baita itaiamu edena dala ai unu peroveta herevadia ilalopararalaidia karana ese hari ina negai ita be durudamu.

3. Baibul ena peroveta herevadia baita lalopararalai totona dahaka baita kara?

³ Baibul ena peroveta herevadia baita lalopararalai totona, namona na heduru baita tahu. Ina haheitalai mani a laloa: Oi na asi dibamu gabuna ta o lao heniamu, to e bamomu tauna be una gabu na mai dibana namonamo. Ia na mai dibana oi be edena gabu ai bona ededia dala ba badina. Ia ese oi e bamomu  dainai bo moalemu! Una heḡereḡerena, Iehova na hari bona vaira negai bae vara ḡaudia na mai dibana namonamo. Una dainai, Baibul ena peroveta herevadia baita lalopararalai totona, namona na mai manauda ida Iehova ena heduru baita tahua.​—Dan. 2:28; 2 Pet. 1:19, 20.

4. Dahaka dainai Iehova ese Baibul lalonai peroveta herevadia e toredia? (Ieremia 29:11) (Laulau danu ba itaia.)

⁴ Iehova na tama namona ta na heto, e uramu natuna na vaira negai bae moale. (Ieremia 29:11 ba duahia.) To ia na vaira negai bae vara ḡaudia na baine gwaurai diba bona ena hereva na nega iboudiai mamaoro. Ia ese Baibul lalonai peroveta herevadia e toredia, gabeai bae vara mai anidia bada ḡaudia baita diba helaoreana. (Isa. 46:10) Baibul ena peroveta herevadia na Dirava ena harihari ḡaudia. To ede ba diba toma Baibul ese e perovetalai herevadia na be vara momokanimu?

5. Matamata taudia na Max ena sivarai amo dahaka e dibamu?

⁵ Eda matamata taudia na Baibul asie laloa badamu taudia ida e skuli heboumu. Edia hereva bona kara ese Witnes merona o kekenina baine hadaradaraia diba. Mani tadikaka ta ladana Max aita laloa. Ia na e gwa: “Lau na skuliva neganai, na daradarava bema tamagu bona sinagu ese tomadiho momokanina e hadibaguva bona Baibul be Dirava ena amo eiava.” Ia tamana sinana be dahaka e kara? Max na e gwa: “Idia na asie badu, ena be dibagu idia na lau daigu ai e lalohekwarahiva.” Max tamana bona sinana ese Baibul amo iena henanadai e haerelaidia. To Max danu ḡau ta e karaia. Ia na e gwa: “Lau sibogu ese Baibul ena peroveta herevadia na stadilai, bona na diba ḡaudia na matamata taudia ma haida ediai na herevalai.” Bena dahaka e vara? Max na e gwa: “Lau na, na diba BaibuI na Dirava ena amo!”

6. Dahaka ba kara bema o daradaramu, bona dahaka dainai?

⁶ Max heḡereḡerena, bema oi na Baibul ena hereva momokani o daradaralaiamu, basio lalohisihisi. To ḡau ta ba karaia na namo, emu daradara ba hamaoromaoroa totona. Daradara na rasta heḡereḡerena, bema basio kokiamu dava bada ḡauna na taina ruana be hadikaiamu. Emu abidadama bae hadikaia daradara ḡaudia ba kokidia totona, namona na sibomu ba henanadai, ‘Baibul ese vaira negana e gwauraia herevadia be na abi daemu eiava?’ Bema o daradaramu, vada e ḡuḡuru peroveta herevadia Baibul ai ba stadilaidia. Una be ede ba karaia toma?

7. Edena dala ai Daniel na haheitalai namona peroveta herevadia istadilaidia karana ai? (Daniel 12:10) (Laulau danu ba itaia.)

⁷ Daniel na haheitalai namona e hahedinaraia peroveta herevadia istadilaidia karana ai. Ia na badi maorona dainai peroveta herevadia e stadilai​—una na hereva momokani baine dibaia. Danu, ia na e manau, badina e diba Iehova ese ia e dibaiamu bona ena taravatu e badinamu taudia na laloparara be henidiamu. (Dan. 2:27, 28; Daniel 12:10  ba duahia.) Daniel na Iehova ena heduru ai e tabekau amo e hahedinaraia ia na e manau. (Dan. 2:18) Danu, Daniel ese peroveta herevadia na e stadilai namonamo. Iena negai e miava Toretore Helaḡadia ai e hetahulai namonamo. (Ier. 25:11, 12; Dan. 9:2) Edena dala ai Daniel ba tohotohoa diba?

8. Taunimanima haida be dahaka badi daidiai peroveta herevadia e stadilaimu?

⁸ Peroveta herevadia o stadilaimu badidia ba haerodia. Baibul ena peroveta herevadia o stadilaimu badina be o uramu hereva momokani ba diba, a? Bema oibe, Iehova ese be durumumu. (Ioa. 4:23, 24; 14:16, 17) To taunimanima haida be dahaka badi daidiai peroveta herevadia e stadilaimu? Reana e uramu bae hamomokania Baibul na dia Dirava ena amo. Reana e laloamu bema Baibul na dia Dirava ena amo, idia sibodia ese abi hidi bae kara dahaka be maoro bona dahaka be kerere. To, ita na badi maorona dainai baita stadi na namo. Danu, Baibul ena peroveta herevadia baita lalopararalaidia totona, mai anina bada karana ta baita hahedinaraia na namo.

9. Edena kara ese baine duruda Baibul ena peroveta herevadia baita lalopararalaidia?

⁹ Ba manau. Iehova na e gwauhamata manau taudia baine durudia. (Iak. 4:6) Una dainai Baibul ena peroveta herevadia baita lalopararalai totona, iena heduru baita noia na namo. Danu baita abia dae Iehova ese hesiai tauna mai ena kamonai amo lauma aniani na nega korikori ai e henidamu. (Luka 12:42) Iehova na ḡau iboudiai e kara namonamomu Diravana, una dainai ia na orea tamona amo ita e durudamu Baibul ai hereva momokanidia baita lalopararalai.​—1 Kor. 14:33, NWT; Efe. 4:4-6.

10. Esther ena sivarai amo dahaka o dibamu?

¹⁰ Peroveta herevadia ba stadilai namonamo. Oi ese o ura heniamu peroveta herevana ta bavabia hidi bona ba hetahulaia. Stadi atikol 33 ai ta herevalaia taihuna Esther na unu e kara toma. Iena ura na Mesia ena mai e perovetalaia herevadia baine diba namonamo. Ia na e gwa: “Lau laḡanigu 15 neganai, hahemomokani ḡaudia na hetahulai, bena na diba unu peroveta herevadia na Iesu do sema negana ai e tore.” Ia na Dead Sea Scroll e herevalai bukadia e duahidia amo e diba ḡaudia ese e durua. Ia na e gwa: “Unu toretore haida na Keriso do sema negana ai e tore ḡaudia, una dainai unu toretore lalodiai e hetore peroveta herevadia na Dirava ena amo.” Esther na ma e gwa: “Unu peroveta herevadia na duahidia loulou baina lalopararaIai helaoreana.” Ia na unu e kara toma dainai e moale. Baibul ena peroveta herevadia momo e stadilai namonamo murinai, eto: “Sibogu ese na hamomokania Baibul ena hereva na momokani!”

11. Baibul ena hereva e ḡuḡurumu karana baita lalopararalaia ena namo be dahaka?

¹¹ Ita ese e ḡuḡuru peroveta herevadia haida ta lalopararalaimu neganai, eda abidadama Iehova enai e hagoadaiamu bona e durudamu ena hahekau dalana baita badinaia. Danu, ena be dahaka hekwakwanai ta davarimu, to Baibul ena peroveta herevadia ese be durudamu vaira nega helarona baita laloa bada. Namona  na Daniel ese e gwaurai peroveta herevadia rua aita herevalai, unu na hari e ḡuḡurumu. Bona anidia baita lalopararalaimu neganai be durudamu abi hidi maorodia baita karamu.

12. Auri bona raro ae palapaladia ese dahaka e laulaulaia? (Daniel 2:41-43)

¹² Daniel 2:41-43 ba duahidia. Daniel ese King Nebukadnesara ena nihi anina e gwauraia, una nihi lalonai king ese e itaia kaivakukuna aena palapaladia na “auri” bona “raro manoka-manokana ida e hebulo.” Una peroveta herevana bona Daniel bona Apokalupo bukadia ese e perovetalai herevadia ma haida baita haheḡereḡerediamu neganai, baita lalopararamu unu ae palapaladia ese Anglo-America e laulaulaia, bona hari ina negai ia na tanobada ai e lohiamu gavamani goadana o world power. Daniel ese una world power e herevalaia neganai, eto: “Basileia kahana baine goada bona kahana baine makohi kava.” Dahaka dainai baine makohi kava? Badina raro manokana ese e laulaulaia taudia edia gwau-edeede karadia daidiai, Anglo-America ena lohia siahuna na e hamanokaiamu. b

13. Daniel ena peroveta herevana amo ededia hereva momokanidia ta dibamu?

¹³ Daniel ese kaivakuku aena palapaladia anidia e herevalai amo mai anidia bada hereva momokanidia haida ta dibamu. Ginigunana na, Anglo-American World Power na dala haida ai e hahedinaraiamu ia na mai goadana. Heḡereḡere, ia na World War I bona World War II ai e kwalimu. To, una World Power na manoka badina ena taunimanima na sibodia e hetuari hehenimu. Iharuana na, Dirava ena Basileia ese taunimanima edia gavamani iboudiai do se haoredia lalonai, Anglo-America na baine lohia gavamani orena. Ena be bese ma haida ese Anglo-American World Power na be tuari heniamu, to gabuna na basie abiamu. Unu ta gwau tomamu badina na, Dirava ena Basileia e laulaulaia “nadina” ese Anglo-America e laulaulaia ae palapaladia baine hamakohidia sisisisi.​—Dan. 2:34, 35, 44, 45.

14. Edena dala ai auri bona raro ae palapaladia e perovetalaia herevana baita lalopararalaiamu ese be durudamu?

¹⁴ Daniel ese auri bona raro ae palapaladia e perovetalaia herevana be o abia daemu, a? Bema oibe, una ese be durumumu emu mauri lalonai abi hidi maorodia bo karamu. Heḡereḡere, moni bona kohu momo itahudia karana na basio laloa badamu, badina mai dibamu kahirakahira ina tanobada dikana na be oremu. (Luka 12:16-21; 1 Ioa. 2:15-17) Danu, ina peroveta herevana bo lalopararalaiamu neganai, bo dibamu haroro bona hahediba ḡaukaradia na mai anidia bada. (Mat. 6:33; 28:18-20) Ina peroveta herevana o stadilaiamu murinai, sibomu ba henanadai: ‘Egu abi hidi ese e hahedinaraiamu lau be na abia daemu Dirava ena Basileia ese taunimanima edia gavamani iboudiai be kahirakahira be haorediamu, a?’

15. Hari ina negai not ena king bona saut ena king be daidia? (Daniel 11:40)

¹⁵ Daniel 11:40 ba duahia. Daniel karoa 11 ese king rua, o politikol oreadia rua e herevalaidiamu, idia na tanobada ibiaguna totona e kara helulumu. Una peroveta herevana bona peroveta herevadia ma haida Baibul ai baita haheḡereḡeremu neganai, baita dibamu not ena king na Russia bona ia  e duruamu tanodia, bona saut ena king be Anglo-American World Power. c

16. Not ena king ese Dirava ena taunimanima be ede e kara henidia tomamu?

¹⁶ Not ena king ese Dirava ena taunimanima na e daḡedaḡe henidiamu. Witnes taudia haida na edia abidadama dainai e dadabadia bona dibura ruma ai e atodia. A tadikaka ese not ena king ena daḡedaḡe karana na asie garilaiamu, to edia abidadama na e goadamu. Dahaka dainai? Badina e dibamu una daḡedaḡe karana ese Daniel ena peroveta herevadia e hamomokaniamu. d (Dan. 11:41) Una ta dibamu ese e durudamu eda helaro baita hagoadaia bona Iehova baita badinaia hanaihanai.

17. Saut ena king ena lohia henunai, Dirava ena taunimanima be dahaka hahetoho e davarimu?

¹⁷ Gunaguna, saut ena king ese Iehova ena taunimanima na e daḡedaḡe henidiava danu. Heḡereḡere, World War I bona World War II ai,  tadikaka momo na e hadiburadia badina asie ura bae tuari bona Witnes maraḡidia haida na fleg asie saluti henidia dainai skuli amo e kokidia. To, vanega laḡani lalodiai, saut ena king ena lohia henunai Iehova ena hesiai taudia edia abidadama na ma dala haida ai e tohoa. Heḡereḡere, eleksin lalodiai Kristen tauna ta be tohoamu politikol pati ta o kendideit ta baine durua. Ena be ia na basine voutimu to reana lalona o kudouna ai be gwaumu, una politikol pati baine gini na namo. Una dainai ḡau badana na eda kara, lalohadai bona hemami amo baita hahedinaraia politikol karadia na ta dadarai vaitanimu!​—Ioa. 15:18, 19; 18:36.

18. Not ena king bona saut ena king e hetuari hehenimu lalonai, ita be dahaka baita kara? (Laulau danu ba itaia.)

¹⁸ Baibul ena peroveta herevana asie abidadama heniamu taudia na saut ena king bona not ena king e hetuari hehenimu karana be itaiamu neganai, be lalohekwarahi badamu. (Dan. 11:40) Unu king ruaosi na edia niuklia tuari kohudia amo tanobada ibounai bae hadikaia diba. To una na basine varamu badina Iehova ese be koudiamu. (Isa. 45:18) Una dainai basita lalohekwarahi to eda abidadama baita hagoadaia na namo, badina unu king ruaosi e hetuari hehenimu karana ese e hamomokaniamu, ina nega oromana na kahirakahira be oremu.

19. Baibul ena peroveta herevadia be ede baita lalodia toma?

¹⁹ Ita na asi dibada Baibul ena peroveta herevadia haida be ede be ḡuḡuru tomamu. Peroveta tauna Daniel danu e tore herevadia iboudiai anidia na se lalopararalaidia. (Dan. 12:8, 9) Ena be peroveta herevadia bae ḡuḡuru daladia na asi dibada namonamo, to basitato idia na basie ḡuḡurumu. Namona na baita abidadama Iehova ese nega korikori ai be hadibadamu, gunaguna e kara heḡereḡerena.​—Amos 3:7.

20. Ededia peroveta herevadia na kahirakahira be ḡuḡurumu, bona dahaka baita kara?

²⁰ Tanobada besedia ese maino bona noho namo herevana bae gwauraia. (1 Tes. 5:3) Bena tanobada ena politikol gavamanidia ese tomadiho koikoidia be tuari henidiamu bona be haoredia vaitanimu. (Apok. 17:16, 17) Una murinai, idia ese Dirava ena taunimanima be tuari henidiamu. (Esek. 38:18, 19) Bena Aramagedono tuarina vada be matamamu. (Apok. 16:14, 16) Ta diba momokanimu unu peroveta herevadia na kahirakahira be ḡuḡurumu. Una nega ta nariamu lalonai, Baibul ena peroveta herevadia baita haerodia bona ma haida baita durudia unu bae kara toma, unu amo Tamada lalokauna enai eda tenkiu karana baita hahedinaraia.