• “Na mamia adavagu na vaitani e heudahanai loulou.”

• “Na hemami lau na asi anigu, na hemarai bona na lalo ia ese na se lalokau henigumu.”

• “Ta asina hamaoroa, a sibogu ese na lalohekwarahilaia.”

• “Na laloa Iehova ese lau na se lalogumu.”

Unu hereva ese e hahedinaraimu, háhine na adavadia ponografi e itamu neganai e lalohisihisi badamu. Bona bema tau na hua o laḡani haida lalodiai hehuni ai unu e kara tomamu, hahine ena trast ia enai na be oremu. Hahine ta na adavana e herevalaia neganai, e gwa, “Na hemami lau na adavagu na asi dibagu namonamo. Ia be ḡau ma haida danu lauegu amo e hunimu, a?”

Ina atikol ese háhine e durudiamu; idia adavadia na ponografi e itamu. a Danu ina atikol ese Baibul ena hahekau herevadia amo háhine e hagoadadiamu bona e hadibadiamu Iehova ese idia na e lalokau henidiamu, bona be durudiamu bae lalomaino bona edia hetura karana Ia ida bae hagoadaia. b

Ena be adavamu e karamu ḡaudia iboudiai na basio biagudia diba, to ḡau haida ba kara unu amo emu lalohekwarahi ba hamaraḡia bona ba lalomaino. Mani ini dala haida ba lalodia.

Basio lalo una na oiemu kerere. Hahine na be laloamu iena kerere dainai adavana na ponografi e itamu. Alice c na e laloava ia na dia hahine namona o asi hairaina. Ini e lalo toma, ‘Dahaka dainai adavagu na e uramu háhine ma haida baine itadia, to dia lau?’ Háhine haida na e laloamu idia edia kara dainai, adavadia na dounu ponografi laulaudia e itamu. Danielle na e gwa: “Adavagu na badu heniava, to na mamia una badu karana ese emai headava maurina na e hadikaiava.”

Bema emu hemami na unu bamona, ba laloparara Iehova ese adavamu ena kara gwauna na dia oi e henimumu. Iakobo 1:14 na e gwaumu: “Taunimanima ta sibona ena ura dikadia ese lalona  e aniamu bona e koiamu.” (Roma 14:12; Fili. 2:12) Iehova ese gwau na oi se henimumu, to ia o badinaiamu karana hari e laloa badamu.​—2 Sis. 16:9.

Danu namona na ba laloparara tau ta na ponografi laulaudia e itamu badina na dia ia adavana na hahine dikana o asi hairaina. Lasi. Diba bada taudia haida na e gwaumu ta na ponografi i’tadia karana amo mahuta hebou urana e habadaia kavamu.

Basio lalohekwarahi momo. Catherine na e gwa ia na adavana ese ponografi e ita karana mo e lalohekwarahilaiava. Frances na e gwa: “Adavagu ena lao gabudia asina dibamu neganai dina ibounai lalonai na lalohekwarahimu.” Háhine haida na e gwaumu adavadia edia hekwakwanai mai dibadia tadikaka taihu vairadiai idia na e hemaraimu. To ma haida na e laloamu ta ese idia na se lalopararalaidiamu.

Unu na vaevae taunimanima ese e abimu hemamidia. To, hemami unu bamodia ese lalohekwarahi be habadaiamu. Una dainai, emu hetura karana Iehova ida hari ba laloa bada. Una ese be durumumu bo haheaukamu.​—Sal. 62:2; Efe. 6:10.

Namona na Baibul ese e herevalaidia hahinedia sivaraidia ba duahi bona ba lalodia dobu​—idia na e lalohisihisi neganai ḡuriḡuri amo Iehova enai goada e abi. Iehova ese edia hekwakwanai na se kokidia, to lalomaino e henidia. Haheitalai ta na Hana, ia na enai e vara ḡauna ta dainai lalona na e ‘hisihisi bada.’ To Iehova “e ḡuriḡuri” henia loulou murinai lalona na e maino, ena be asi dibana ia enai be dahaka be varamu.​—1 Sam. 1:10, 12, 18; 2 Kor. 1:3, 4.

Kongrigeisin elda edia amo heduru ba tahu. Idia na “lai ilao-ahuna gabuna” bona “lai-gubana ilao-ahuna gabuna” na heheto. (Isa. 32:2) Idia ese reana oi baine durumu diba taihuna ta be gwauraiamu, ia ida ba herevahereva bona baine hagoadamu totona.​—Her. 17:17.

Adavamu ba durua diba ponografi i’itadia karana baine hadokoa totona, a? Reana ba durua diba. Baibul na e gwaumu hekwakwanai ta ihamaoromaorona o inai tauna ta ituari henina totona, “rarua ese tamona e hereaiamu.” (Koh. 4:9-12) Diba bada taudia na edia hetahu amo e davaria, headava taudia be ḡaukara heboumu neganai, tau  ese ponografi i’itadia karana na be hadokoamu bona adavana ese ia na ma be trastia loumu.

To namona na tau na lalona baine hadaia bona baine hekwarahi ponografi i’itadia karana baine hadokoa. Ia ese Iehova e noia goada baine henia bona elda taudia edia heduru vada e tahu, a? (2 Kor. 4:7; Iak. 5:14, 15) Ia be ḡau haida vada e kara ponografi i’itadia karana baine dadaraia totona, a? Heḡereḡere, ia ese ena fon bona kompiuta iḡaukaralaidia karana ai hetoa haida e ato bona hedibaḡani bae havara ḡaudia e dadaraimu, a? (Her. 27:12) Ia be e uramu oi ese ba durua bona oiemu ai ḡau iboudiai e herevalai hedinaraimu, a? Bema oibe, reana bo durua dibamu.

To edena dala ai? Mani haheitalai ta aita laloa. Felicia na Ethan e adavaia, bona Ethan na maraḡina negana amo ponografi ita karana na e manadalaia. Felicia ena haheauka bona hakala namonamo karadia dainai, Ethan na ponografi i’itadia urana e abiava negadiai, ia enai na dia auka Felicia enai ena hemami baine gwauraia. Ethan na e gwa: “Mai momokanigu ida adavagu enai ḡau iboudiai na herevalaimu. Ia na mai lalokauna ida lau e durugumu bona e sekegu louloumu. Danu e durugumu intanet iḡaukaralaina negana bona gabuna nahuadia baina toho.” Vaia, Ethan ese ponografi i’itadia karana e ura heniamu dainai Felicia na e lalohisihisimu. To Felicia na e gwaumu: “Egu badu bona lalohisihisi karana ese Ethan na se duruamu una kara baine dadaraia. Iena hekwakwanai a herevalaimu murinai, ia ese e durugumu basina lalohisihisi.”

Unu bamona herevahereva karana ese tau be duruamu ponografi i’itadia karana baine dadaraia, bona hahine be duruamu adavana baine trastia lou. Bema tau ese ena manoka ḡauna, dina ta ta ai baine kara ḡaudia, bona ena lao gabudia na adavana be hamaoroamu neganai, adavana ese ia na be trastia dibamu.

O laloamu oi danu adavamu ba durua diba, a? Bema oibe, namona na raruosi ese ina atikol ba duahia hebou. Adavamu ena ura na ponografi baine dadaraia bona baine hahedinaraia ia na ba trastia. Ia ese oiemu lalohekwarahi ḡaudia na basine badulai, to iena manoka ḡauna ese emu hemami e hadikaiamu na baine lalopararalaia. Oiemu ura na ia ba durua una kara baine dadaraia, bena ia na ba trastia diba. Namona na raruosi ba diba dahaka ese taunimanima e veridiamu ponografi e itamu bona una be ede bae hanaia toma. d

 Bema o laloamu una topik iherevalaina ai umui raruosi na bo hepapahuahumu, raruosi ese o manadaia eldana ta ba noia emui herevahereva lalonai ia danu baine helai. Namona na ba diba ena be adavamu ese ponografi i’itadia karana na vada e hadokoa, to nega be daudaumu murinai oi ese ia na bo trastia loumu. Basio hesiku. Emui headava lalonai o hanamomu ḡaudia ba lalodia. Bavabia dae bema raruosi bo haheaukamu, gabeai emui headava na ma be goada loumu.​—Koh. 7:8; 1 Kor. 13:4.

Bema adavamu na ponografi laulaudia ma be ita loumu, una anina be ia be do se helalo-kerehai eiava una kara basine hadokoamu, a? Lasi, anina na dia una. Bema ia ese una kara na e manadalaia, ena mauri lalonai dounu be hekwarahimu una kara baine dadaraia. Ena be vada e dadaraia to laḡani momo muridiai reana una kara na ma be karaia loumu. Una basine vara totona, namona na dounu baine henahua toho, bona igimana taravatudia baine ato bona baine badinadia. (Her. 28:14; Mat. 5:29; 1 Kor. 10:12) Namona na ‘darana baine hamatamataia’ bona ‘kara dika baine inai henia’​—unu kara haida na ponografi bona kara mirodia heḡereḡere tauanina igadaralaina karana. (Efe. 4:23; Sal. 97:10; Roma 12:9) Ia be e uramu una kara baine dadaraia, a? Bema oibe, una kara na be hadokoa vaitanimu. e

To bema adavamu na se uramu una kara baine hadokoa be ede bamona? Momokani, reana bo lalohisihismu, bo badumu bona mamiamu oi na e koimumu. To namona na emu lalohekwarahi na Iehova enai ba gwaurai hedinarai, unu amo lalomu na be mainomu. (1 Pet. 5:7) Namona na stadi, ḡuriḡuri, bona lalo dobu karadia amo emu hetura karana Iehova ida na dounu ba hagoadaia. Unu bo kara tomamu neganai, Iehova na turamu namona ai be laomu. Iehova na “lalo-hisihisi taudia” dekedekediai, bona e uramu baine durudia bae moale totona. (Sal. 34:18) Namona na mai emu abidadama ida dounu Iehova ba hesiai henia. Elda edia heduru ba tahu. Bona bavabia dae nega ta adavamu ese ena kara na be haidauamu.​—Roma 2:4; 2 Pet. 3:9.