1. Dahaka dainai Babulono taudia ese peroveta tauna Daniel na e ura heniava?

 PEROVETA tauna Daniel na eregabena ai Babulono taudia ese Ierusalem amo e abia mauri bona Babulono e laohaia. Ia na Babulono taudia ese e ura heniava, badina e itaia ia na mero namona bona “raho-namo,” bona iena ruma bese na e matauraidiava. (1 Sam. 16:7) Unu badi daidiai, Babulono taudia ese treinin e henia, unu amo king ena ruma ai baine ḡaukara.​—Dan. 1:3, 4, 6.

2. Iehova ese Daniel be ede e laloa toma? (Esekiel 14:14)

² Iehova ese Daniel na e lalokau henia, dia ia toana eiava king ena ruma ai e ḡaukarava dainai, to badina Daniel ese Iehova e badinaiava. Daniel laḡanina na reana 20 heḡereḡerena neganai, Iehova ese ia na kara maoromaoro taudia Noa bona Iobu ida e gwauraia hebou; idia na laḡani momo lalodiai Iehova e badinaia. (Gen. 5:32; 6:9, 10; Iobu 42:16, 17; Esekiel 14:14 ba duahia.) Bona Iehova ese Daniel na dounu e lalokau heniava.​—Dan. 10:11, 19.

3. Ina atikol ai be dahaka baita herevalaimu?

³ Ina atikol ai, ita ese Daniel ena kara rua baita herevalaimu, unu kara daidiai Iehova ese e lalokau henia bada. To baita herevalaiamu ḡauna ginigunana na, unu kara ta ta bona e hahedinarai negadia. Iharuana be, dahaka ese Daniel e durua unu  kara e hahedinarai. Bona ihatoina na, ita ese ia baita tohotohoa dalana baita herevalaiamu. Ena be ina atikol na matamata taudia totodia e torea, to ita iboudai ese Daniel ena haheitalai amo diba baita abimu.

4. Edena dala ai Daniel na e lalo goada? Haheitalai ta ba gwauraia.

⁴ E lalo goadamu taudia na bae gari diba, to una ese na se koudiamu kara maorona bae karaia. Daniel na e lalo goada. Una kara e hahedinaraia negadia rua mani aita lalodia. Ginigunana na, Babulono taudia ese Ierusalem e hadikaia bena laḡani rua muridiai e vara ḡauna ai ia na e lalo goada. Una negai King Nebukadnesara na ena nihi lalonai e itaia kaivakuku badana ta dainai e lalohekwarahi. Bona e haheḡani aonega tataudia iboudiai, Daniel danu, bae hamasedia bema iena nihi bona anina basie hamaorolaia. (Dan. 2:3-5) Daniel na kara ta baine karaia haraḡa na namo, bema lasi, momo bae mase diba. Ia na “e raka vareai, hanua pavapavana e noia, nega ta baine gwaurai henia, nihi anina na hanua pavapavana baine hamaorolaia helaoreana.” (Dan. 2:16) Una ese e hahedinaraia Daniel na e lalo goada bona e abidadama. Baibul ese na se hahedinaraia Daniel na guna nihi anidia e gwaurai. Ia ese turana Sadaraka, Mesaka bona Abedenego e noidia “guba Diravana ena hebogahisi bae tahua, una ḡau hehunina dainai.” (Dan. 2:18) Iehova ese edia ḡuriḡuri na e haerelai. Dirava ena heduru amo Daniel ese Nebukadnesara ena nihi anina e gwauraia hedinarai. Una dainai, Daniel bona turana na asie mase.

5. Edena nega ma ta ai Daniel na e lalo goada?

⁵ Daniel na Nebukadnesara ese ena nihi ai e itaia kaivakukuna anina e gwauraia murinai, ḡau ma ta ese ena lalo goada karana e tohoa lou. Nebukadnesara na ena nihi ma ta lalonai e itaia ḡauna dainai e lalohekwarahi. Una nihi lalonai au lata hereana ta e itaia. Daniel na mai lalo goadana ida king enai una nihi anina e gwauraia, bona e hamaoroa ia na do baine kavaia bona laḡani haida basine lohia. (Dan. 4:25) King na bema lalo Daniel ese ia na e gwau-edeede henia bona bema hamasea diba. To Daniel na se gari bona nihi anina e gwauraia.

6. Dahaka ese Daniel e durua e lalo goada?

 ⁶ Dahaka ese Daniel e durua dainai ena mauri lalonai lalo goada karana e hahedinaraia? Daniel na maraḡina ai tamana bona sinana edia haheitalai ese e durua. Idia na Iehova ese Israel tama sina e henidia haheḡanidia e badina, bona natudia na Dirava ena Taravatu e hadibalaia. (Deu. 6:6-9) Daniel na dia Taravatu 10 mo e dibadia, to taravatu ma haida, heḡereḡere Israel taudia ese bae ani o basie ani ḡaudia taravatudia danu e dibadia. b (Lev. 11:4-8; Dan. 1:8, 11-13) Danu, Daniel na Dirava ena taunimanima sivaraidia bona idia ese Iehova ena taravatu asie badina neganai ediai e vara ḡaudia e dibadia. (Dan. 9:10, 11) Daniel na ena mauri lalonai e vara ḡaudia amo e diba momokani, Iehova bona ena aneru goadadia ese ia na e duruava.​—Dan. 2:19-24; 10:12, 18, 19.

7. Daniel be ma dahaka ese e durua e lalo goada? (Laulau danu ba itaia.)

⁷ Daniel ese Dirava ena peroveta taudia edia toretore, bona Ieremia ena peroveta herevadia e stadilai. Una stadi karana amo e laloparara, Babulono ena iḡui ai e nohova Iuda taudia na kahirakahira edia tano bae lou henia. (Dan. 9:2) Daniel na Baibul ena peroveta herevadia e ḡuḡuru karana e itaia neganai, ena abidadama Iehova enai na e goada, bona Dirava e abidadama henia momokanimu taudia na e lalo goadamu. (Roma 8:31, 32, 37-39 ba haheḡereḡere.) Mai anina bada ḡauna na, Daniel na nega iboudiai Tamana guba ai e ḡuriḡuri heniava. (Dan. 6:10) Ia ese ena kara dika bona hemami na Iehova enai e gwaurai hedinarai. Bona e noia baine durua. (Dan. 9:4, 5, 19) Daniel na taunimanima mo, bona lalo goada karana na se varalaia, to stadi, ḡuriḡuri bona Iehova iabidadama henina karadia amo lalo goada karana e dibaia bona e hahedinaraia.

8. Dahaka baita kara unu amo baita lalo goada?

⁸ Dahaka baita kara unu amo baita lalo goada? Ena be tamada sinada ese be hamaorodamu baita lalo goada, to idia ese ita daidai una kara na basie hahedinaraiamu. Lalo goada karana na ḡaukara matamatana ta idibana karana ida baita haheḡereḡerea. Una ḡaukara ba dibaia namonamo totona, e hadibamumu tauna ena kara ba itaia bona ba tohotohoa. Una heḡereḡerena, lalo goada karana baita dibaia totona, ma haida ese una kara e hahedinaraiamu dalana baita itaia namonamo bona baita tohotohoa. Daniel ena amo dahaka ta dibamu? Namona na Dirava ena Hereva baita dibaia namonamo. Bona Iehova baita ḡuriḡuri henia hanaihanai, unu amo eda hetura karana ia ida baine goada. Danu Iehova baita abidadama henia, bona baita abia dae ia ese ita na e durudamu. Bena eda abidadama bae tohoa neganai, baita lalo goada dibamu.

9. Baita lalo goada ena namo be dahaka?

⁹ Baita lalo goada na mai ena namo. Mani Ben ena ekspiriens aita laloa. Germany ai ia e skuliva gabunai momo ese evolusen herevana na e abia daeva bona e laloava Dirava ese ḡau iboudiai e havara sivaraina Baibul ai na koikoi. Dina ta, Ben na teacher ese e hamaoroa klas vairanai baine gini bona mauri e hematama dalana e abia daemu badina baine herevalaia. Ia na mai lalo goadana ida e abi dae ḡaudia e herevalai. Bena dahaka e vara? Ben na e gwa: “Egu teacher na e hakala namonamo, bona egu hereva ihamomokanina totona na ḡaukaralai infomeisin kopedia e kara bona  stiuden ta ta e henidia.” Ben ena klas taudia be dahaka e kara? Ben na e gwa: “Idia momo na e kamonai bona e moale.” Ben ena ekspiriens ese e hahedinaraiamu, baita lalo goadamu neganai, ma haida ese be matauraidamu. Bona ma haida baita durudiamu Iehova be dibaiamu. Momokani, badi namodia daidiai baita lalo goada.

10. Ina hereva “badinaia” anina be dahaka?

¹⁰ Baibul ai, Heberu gado ai e hahanaia herevana “badinaia,” o “mia hanaihanai lalokauna,” anina na Dirava ese ena hesiai taudia ediai e hahedinaraiamu lalokauna e herevalaiamu. Una hereva tamona na e ḡaukaralaia Dirava ena hesiai taudia bogaraḡidiai e miamu lalokauna e herevalaia. (2 Sam. 9:6, 7 NWT) Iehova na e uramu ita danu ia baita badinaia. To una badinaia karana na taina ruana be goadamu. Mani Daniel ese una kara e hahedinaraia dalana aita laloa.

11. Daniel na ena buruka negana lalonai dahaka hahetoho e davari? (Rau 1 laulauna ba itaia.)

¹¹ Daniel na Iehova e badinaiava lalonai hahetoho momo e davari. To ia laḡanina 90 mai kahana neganai, hahetoho badana ta e davaria. Una negai, Babulono na Mede bona Parasa taudia ese e abia bona King Darauese ese e lohiaiava. King ena ruma ai e ḡaukarava taudia ese Daniel na asie ura heniava bona ia ese e tomadiho heniava Diravana na asie matauraiava. Una dainai plen e kara Daniel bae alaia. Idia ese King e hamaoroa taravatu ta baine torea, unu amo Daniel bae tohoa ia be Dirava baine badinaia eiava King baine badinaia. Daniel na king baine badinaia bona basie hamasea totona dina 30 lalodiai Iehova basine ḡuriḡuri henia. To ia na dounu Iehova e badinaia, una dainai laion gurina ai e tahoa dobi. A Iehova ese laion ududia amo e hamauria. (Dan. 6:12-15, 20-22) Daniel heḡereḡerena, ita ese Iehova be ede baita badinaia toma?

12. Edena dala ai Daniel na Iehova e badinaia tarika-tarika?

¹² Matamanai ta herevalaia bamona, Iehova baita badinaia totona eda lalokau ia enai baine goada na namo. Daniel na Iehova e lalokau henia bada e badinaia tarika-tarika. Ia ese una lalokau na e hagoadaia badina nega e ato  Iehova ena kara namodia bona unu kara e hahedinarai daladia e haerodia. (Dan. 9:4) Danu Iehova ese ia bona ena taunimanima daidiai e kara ḡau namodia na e lalodia dobu.​—Dan. 2:20-23; 9:15, 16.

13. (a) Matamata taudia na Dirava e badinaiamu dainai, dahaka hahetoho e davarimu? (Laulau danu ba itaia.) (b) Vidio ai bamona, ede bo haere tomamu bema haida bae henanadai Iehova ena Witnes ese homosexual maurina na e abia daemu eiava lasi?

¹³ Daniel heḡereḡerena, iseda matamata taudia na Iehova bona ena taravatu asie matauraiamu taudia bogaraḡidiai e nohomu. Taunimanima unu bamodia ese ma haida na e dadaraidiamu badina edia lalohadai eiava e abi daemu ḡaudia na i’idau. Ma haida ese eda matamata taudia na e hagaridiamu unu amo Iehova basie badinaia. Australia ai e nohomu matamata tauna, Graeme enai e vara ḡauna aita laloa. Ia na haiskul ai neganai hahetoho ta e davaria. Teacher ese klas taudia e nanadaidia idia be dahaka bae kara bema ta na baine gwa ia na homosexual merona o kekenina. c Teacher na e gwa, una mauri dalana e abia daemu taudia na kahanai bae gini bona se abia daemu taudia be ma kahana ta ai bae gini. Graeme na e gwa: “Una mauri dalana e abia dae taudia iboudiai kahanai e gini, a lau bona Witnes merona ta be ma kahana ta ai a gini.” Gabeai e vara ḡauna ese Iehova baine badinaia karana na e tohoa. Graeme na e gwa: “Hora ta lalonai, student ma haida bona teacher ese danu ai na e gwauraimai dika. Na hekwarahi na abi dae ḡaudia na mai egu manau bona hemataurai ida na gwaurai hedinarai, to idia na se kamonai.” Graeme ena hemami be ede bamona? Ia na e gwa: “Lau na asina ura idia ese bae gwauraigu dika, to na moale badina na abi dae ḡaudia na herevalaidia bona Iehova dounu na badinaia.” d

14. Iehova baita badinaia tarika-tarika totona dahaka baita kara?

¹⁴ Daniel heḡereḡerena, Iehova baita badinaia tarika-tarika totona, eda lalokau ia enai baita hagoadaia na namo. Unu baita kara toma dalana na, Iehova ena kara namodia baita dibadia. Anina na ia ese e kara ḡaudia baita stadilai. (Roma 1:20) Bema o uramu emu lalokau bona hemataurai Iehova enai ba habadaia “Was It Designed?” kahanai e ato atikol ba duahidia o vidiodia ba ita. Danu ini buklet Was Life Created? bona The Origin of Life​—Five Questions Worth Asking ba duahidia. Danish ai, eregabe taihuna ta ladana Esther ese unu pablikeisin na ini e herevalaidia toma: “Hereva badidia na e gwaurai ḡoevaḡoeva. Unu buklet na asie gwaumu oi be dahaka bavabi dae, to e vara momokani ḡaudia e herevalai bona be durumumu oi sibomu ese abi hidi ba kara.” Matamanai ta herevalaia merona Ben na e gwa: “Unu buklet ese egu abidadama na e hagoadaia. Bona e hamomokaniamu mauri na Dirava ena amo.” Unu pablikeisin bo stadilaimu murinai, ina hereva Baibul ai na bo abia daemu, e tomu: “Emai Lohiabada, emai Dirava e, Namona binai: Hairai bona hemataurai bona siahu bavabi. Badina be oi ese ḡau iboudiai o havara.”​—Apok. 4:11. e

15. Eda hetura karana Iehova ida baita hagoadaia dalana ma ta be dahaka?

¹⁵ Eda lalokau Iehova enai baita hagoadaia dalana ma ta na, ia Natuna Iesu ena mauri baita stadilaia namonamo. Germany ai, matamata  taihuna Samira na unu e kara toma. Ia na e gwa: “Iesu amo Iehova na dibaia namonamo.” Samira maraḡina ai na se lalopararava Iehova na ia turana ai bainela diba bona Iehova ese ia na e lalokau heniamu. To Iesu ena hemami be e lalopararalaia. Ia na ma e gwa: “Iesu na ura henia badina iena kara na namo bona maraḡidia na e lalokau henidiamu.” Iesu e dibaia neganai, Iehova danu e dibaia bona e lalokau henia. Dahaka dainai? Ia na e gwa: “Taina ruana na laloparara Iesu ese Tamana na e tohotohoa ḡoevaḡoeva. Edia kara na heḡereḡere. Na Ialoparara Iehova ese Iesu e siaia tanobada ai badina ta na, dala baine kehoa taunimanima ese Iehova bae dibaia namonamo.” (Ioa. 14:9) Bema o uramu emu hetura karana Iehova ida ba hagoadaia, namona na nega bavato Iesu ba dibaia namonamo. Unu bo kara tomamu neganai, emu lalokau Iehova enai na be badamu bona ia bo badinaiamu.

16. Dahaka dainai Dirava baita badinaia? (Salamo 18:25; Mika 6:8)

¹⁶ E hebadina hehenimu taudia edia hetura karana na e goadamu eiava e mia hanaihanaimu. (Ruta 1:14-17) Danu, Iehova e badinaiamu taudia na e lalo mainomu. Dahaka dainai? Badina Iehova na e gwauhamata ia e badinaiamu taudia na basine rakatanidia. (Salamo 18:25; Mika 6:8 ba duahidia.) Mani ina a laloa: Siahu idoinai Diravana na hanaihanai ita e lalokau henidamu! Bona unu e kara tomamu neganai, hahetoho, inai tauna, eiava mase ese danu una lalokau na basine kokia oho diba. (Dan. 12:13; Luka 20:37, 38; Roma 8:38, 39) Una dainai Daniel baita tohotohoa bona Iehova baita badinaia hanaihanai na mai anina bada.

17-18. Daniel amo ma dahaka baita dibamu?

¹⁷ Ina atikol ai, ita ese Daniel ena kara rua mo tame herevalai. To ia amo ma ḡau momo baita dibadiamu. Heḡereḡere, Iehova ese Daniel na matahanai bona nihi haida e henia, bona peroveta herevadia anidia igwauraidia dibana danu e henia. Unu peroveta herevadia momo na vada e ḡuḡuru. Ma haida be vaira negai bae vara ḡaudia e herevalai bona unu ese taunimanima edia mauri be haidaumu.

¹⁸ Atikol gabena ai, ita ese Daniel ena peroveta herevadia rua baita herevalaimu. Unu baita lalopararalaidiamu neganai, ita iboudai​—matamata taudia bona burukadia​—be durudamu abi hidi namodia baita karamu. Danu, unu peroveta herevadia ese be durudamu baita lalo goadamu bona Dirava baita badinaia tarika-tarikamu, unu amo ita na vada e heḡaeḡae vaira negai bae vara hahetohodia baita hanaidia.