1. Heberu 12:1 heḡereḡerena, dahaka baita kara eda heau-helulu baita haḡuḡurua?

 BAIBUL ese eda Kristen maurina na heau-helulu ida e haheḡereḡerea. Una heau-helulu bae haḡuḡurua taudia ahudia na mauri hanaihanai. (2 Tim. 4:7, 8) Namona na baita hekwarahi dounu baita heau, badina dokona na kahirakahira. Aposetolo Paulo ese heau-helulu ai baita kwalimu totona baine duruda ḡauna na e herevalaia, eto: “E hametaudamu ḡaudia idoidiai . . . baita ato tabe, bena heau-helulu vairadai e hure na baita heau mai haheaukada ida.”​—Heberu 12:1 ba duahia.

2. ‘E hametaudamu ḡaudia idoidiai baita ato tabe’ anina be dahaka?

² Paulo ese ina hereva, ‘e hametaudamu ḡaudia idoidiai baita ato tabe,’ e gwauraia neganai, anina be Kristen tauna ese maduna ta basine huaia, a? Lasi, iena hereva anina na Kristen tauna ese ḡau asi anidia na baine ato tabe. Unu ḡau ese ia na bae koua o bae hahesikua diba. Mai haheaukada ida baita heau totona, namona na bae hametauda ḡaudia baita dibadia bona baita kokidia haraḡa, to baita huadia madunadia na basita nege. Unu amo heau-helulu lalonai dounu baita heaumu. (2 Tim. 2:5) Ededia maduna baita huadia be namo?   

3. (a) Galatia 6:5 ena hereva heḡereḡerena, dahaka baita kara? (b) Ina atikol ai dahaka baita herevalaimu, bona dahaka dainai?

 ³ Galatia 6:5 ba duahia. Paulo ese baita karaia ḡauna na e herevalaia. Ia na eto: “Ta ta ena maduna ena maduna bae hua.” Paulo na ita ta ta ese Dirava vairanai baita huaia madunana e herevalaia, una maduna na ta ese ita daidai basine huaia. Ina atikol ai, ita ese “ta ta ena maduna” anina bona baita huaia dalana baita herevalaiamu. Danu, baita itaiamu dahaka ese ita e hametaudamu bona baita kokidia na namo. Siboda eda maduna baita huamu bona e hametaudamu ḡaudia baita kokimu neganai, mauri ena heau-helulu ai baita kwalimumu.

4. Dahaka dainai Iehova enai ta karaia gwauhamatana baita badinaia na dia metau? (Laulau danu ba itaia.)

⁴ Iehova enai ta karaia gwauhamatana. Ita ese eda mauri na Iehova enai ta gwauhamatalaia neganai, ta gwa ia baita tomadiho henia bona ena ura baita karaia. Una gwauhamata baita badinaia na namo. Ena be una na maduna badana, to ihuana na dia metau.  Badina Iehova ese ita e karada na iena ura baita karaia. (Apok. 4:11) Danu ia idibana bona itomadiho henina urana na e henida, bona ita na ia heida-idana e karada. Unu dainai, ia turana namona ai baitala bona mai moaleda ida iena ura baita karaia diba. (Sal. 40:8) Danu, Dirava ena ura baita karaiamu bona Natuna baita badinaiamu neganai, baita “goada” dibamu.​—Mat. 11:28-30, NWT.

5. Dahaka ese baine durumu emu gwauhamata ba haḡuḡurua? (1 Ioane 5:3)

⁵ Emu maduna be ede ba huaia toma? Bae durumu ḡaudia rua be ini: Ginigunana na, emu lalokau Iehova enai ba hagoadaia. Unu ba kara toma dalana na, ia ese oi daimu ai e kara ḡau namodia bona vaira neganai be henimumu hahenamodia ba lalodia dobu. Emu lalokau Dirava enai bo hagoadaiamu neganai, ia bo badinaiamu na dia auka. (1 Ioane 5:3 ba duahia.) Iharuana na, Iesu ba tohotohoa. Ia na Iehova ena ura ikarana ai e kwalimu, badina Iehova ena heduru e noia bona ahuna e laloa bada. (Heb. 5:7; 12:2) Iesu heḡereḡerena, Iehova enai goada ba noi bona mauri hanaihanai helarona ba laloa bada. Emu lalokau Dirava enai be badamu bona Natuna bo tohotohoamu neganai, emu gwauhamata na bo haḡuḡuruamu.

6. Dahaka dainai eda ruma bese madunadia baita hua? (Laulau danu ba itaia.)

⁶ Eda ruma bese madunadia. Mauri ena heau-helulu lalonai, Iehova bona Iesu ilalokau henidia karana ese varavarada ilalokau henidia karana baine hereaia na namo. (Mat. 10:37) To, dia namo ruma bese madunadia baita dadarai badina ta laloamu unu ese Dirava bona Keriso baita hamoaledia karana e kouamu. Dirava bona Keriso ihamoaledia totona, namona na eda ruma bese madunadia baita haḡuḡuru. (1 Tim. 5:4, 8) Unu baita kara tomamu neganai, baita moalemu. Iehova na mai dibana ruma bese na baine moale bema tau bona hahine bae helalokau heheni bona bae hemataurai heheni, tama sina ese natudia bae lalokau henidia bona bae hadibadia, bona natu ese tamadia sinadia bae kamonai henidia.​—Efe. 5:33; 6:1, 4.

7. Ruma bese lalonai emu maduna be ede ba haḡuḡurua toma?

⁷ Emu maduna be ede ba huaia toma? Ena be ruma bese lalonai dahaka maduna o huamu, to ḡau badana na Baibul ai aonega herevadia ba badina, dia emu hemami, kastom, eiava diba bada taudia edia hereva. (Her. 24:3, 4) Iseda pablikeisin idauidau ba ḡaukaralaidia namonamo. Unu pablikeisin ese Baibul ena hahekau herevadia ba badina daladia e herevalaimu. Heḡereḡere, emu “Ruma Bese Baine Moale Diba” buklet bona “Mauri Ba Moalelaia Hanaihanai” bukana ena lesen 49 bona 50 ese headava taudia, tama sina bona matamata taudia e durudiamu. b Lalomu ba hadaia Baibul ena hereva ba badinadia, ena be emu ruma bese ai haida ese na se badinamu. Unu bo kara tomamu neganai, emu ruma bese na namo be davarimu bona oi ese Iehova ena hahenamo bo moalelaimu.​—1 Pet. 3:1, 2.

8. Edena dala ai eda abi hidi ese eda mauri be haidauamu?

⁸ Eda abi hidi amo e varamu ḡaudia. Iehova ese ita na ura kwalimu e henida, bona e uramu ta karamu abi hidi namodia daidiai baita moale. To danu eda abi hidi kereredia daidiai e varamu dika amo na basine koudamu. (Gal. 6:7, 8) Una dainai, baita abia dae bema abi hidi  kereredia baita karamu, hereva kereredia baita gwauraimu, eiava kara kereredia baita karamu neganai, dika na baita davarimu. Bona reana laloda mamina ese be hahemaoro henidamu. To, bema baita abia daemu ita na ta kerere, una ese be durudamu eda kerere baita gwaurai hedinaraimu, eda kara baita hamaoromaoromu, bona una kerere na basita karaia loumu. Unu baita kara tomamu neganai, mauri ena heau-helulu lalonai dounu baita heaumu.

9. Bema oi na abi hidi kererena ta o karaia, dahaka ba kara diba? (Laulau danu ba itaia.)

⁹ Emu maduna be ede ba huaia toma? Bema oi na abi hidi kererena ta o karaia, dahaka ba kara diba? Namona na ba laloparara e vara ḡauna na basio haidaua dibamu. Emu nega bona goada na basio haorea emu maoro ba hahedinaraia totona, eiava gwau na ma haida basio henidia. To, bavabia dae oi na kerere bona harihari ba kara ḡaudia ba lalodia. Bema o karaia kererena dainai o lalohisihisimu, mai manaumu ida Iehova ba ḡuriḡuri henia, emu kerere ba gwauraia hedinarai, bona ba noia emu dika baine gwautao. (Sal. 25:11; 51:3, 4) O hahisidia taudia ba sori henidia, bona elda edia amo heduru ba tahu. (Iak. 5:14, 15) O karaia kererena amo diba bavabi bona basio karaia lou. Unu iboudiai bo karamu neganai, Iehova ese be bogamu hisimu bona be durumumu.​—Sal. 103:8-13.

10. Dahaka dainai eda ura ḡauna se ḡuḡurumu na ihametauda ḡauna ta? (Galatia 6:4)

¹⁰ Eda ura ḡauna se ḡuḡurumu dainai ta lalohisihisimu. Ita na siboda baita hahemetaumu bema ma haida ida baita haheḡereḡeremu. (Galatia 6:4 ba duahia.) Bema hanaihanai unu baita kara tomamu, baita mamamu bona baita kara helulumu. (Gal. 5:26) Bema baita uramu haida e karamu ḡaudia heḡereḡeredia baita kara ena be eda diba bona noho dalana na dia heḡereḡere, dika baita davarimu. Bona Baibul na e gwaumu: “Helaro mai halahena ese lalo-hisihisi e havaraiamu.” Una dainai bema basita haḡuḡrua diba ḡauna ta na ta uramu baita karaia to anina basine varamu, baita lalohisihisimu. (Her. 13:12) Danu eda goada be maraḡimu bona mauri ena heau-helulu ai basita heau namonamomu.​—Her. 24:10.

11. Dahaka ese baine durumu unu amo ba karaia diba ḡauna ba karaia?

¹¹ Una metau be ede ba kokia toma? Iehova na e uramu oi ese ba karaia diba ḡauna ba karaia, bona se dorimumu basio karaia diba ḡauna ba karaia. (2 Kor. 8:12) Namona na ba diba Iehova ese o karamu ḡaudia na ma haida e karamu ḡaudia ida se haheḡereḡeremu. (Mat. 25:20-23) Ia ese emu abidadama, haheauka, bona mai kudoumu idoinai ida ia o hesiai heniamu karana na e laloa badamu. Mai manaumu ida bavabia dae oi laḡanimu, emu helt, bona noho dalana dainai ḡau haida na basio karamu. Barasilai bamona, bema oi na gorere o buruka dainai asainmen ta ba karaia na auka, bao gwa diba oi na dia heḡereḡere. (2 Sam. 19:35, 36) Mose bamona, ma haida edia heduru bavabi dae bona maduna haida na ma haida ba henidia. (Eso. 18:21, 22) Una ese be durumumu, ba kara diba ḡaudia ba kara bona mauri ena heau-helulu ai dounu ba heau.

12. Ma haida edia abi hidi kereredia be iseda kerere, a? Mani ba herevalaia.

¹² Baita lalomu haida ese e karamu abi hidi kereredia na iseda kerere. Ita ese haida edia abi hidi na basita kara, bona edia abi hidi kereredia amo bae vara dika na basita koudia dibamu. Heḡereḡere, reana natu ta na lalona be hadaiamu Iehova ihesiai henina karana baine hadokoa. Una abi hidi ese tamana sinana  lalodia na be hahisimu. To, bema idia na be lalomu idia edia kerere dainai natudia na una abi hidi e karaia, una ese be hametaudia badamu. Iehova na se uramu idia na unu bae lalo toma.​—Roma 14:12.

13. Tama sina ese natudia ena abi hidi kererena be ede bae laloa toma?

¹³ Una metau be ede ba kokia toma? Baita helalotao Iehova ese ita iboudai na ura kwalimu e henida, unu amo ta ta na siboda abi hidi baita kara ia baita hesiai henia eiava lasi. Iehova na mai dibana umui tama sina na dia ḡoevadae, to ia na e uramu umui ba kara diba ḡaudia mo ba kara. Natumu ese e karaiamu abi hidina na iena maduna, dia oiemu. (Her. 20:11) To reana dounu bo laloamu emu kerere dainai natumu na unu e kara toma. Bema unu bamona, Iehova enai emu hemami ba gwauraia hedinarai bona ba noia emu dika baine gwautao. Ia na mai dibana e vara ḡauna na basio haidaua dibamu. To danu, se uramu natumu ena abi hidi kererena amo e varamu dika na oi ese ba koua. Ba helalotao bema natumu na be hekwarahimu Iehova baine lou henia, Iehova ese mai moalena ida ia na be abia daemu.​—Luka 15:18-20.

14. Dahaka dainai kerere gunadia ilalohisihisilaidia karana baita hadokoa?

¹⁴ Kerere gunadia daidiai dounu ta lalohisihisimu. Ta karaia kara dikana ta dainai baita lalohisihisi na maoro. To, Iehova na se uramu dounu baita lalohisihisi. Una na ita be hametaudamu dainai baita kokia na namo. Ede ta diba tomamu ita na dounu ta lalohisihisimu? Bema eda dika ta gwauraia hedinarai, ta helalo-kerehai, bona una kara dikana basita karaia lou totona ta hekwarahimu, baita abia dae Iehova ese eda dika na vada e gwauatao. (Apos. 3:19) Bema unu na vada ta kara, Iehova na se uramu dounu baita lalohisihisi. Ia na mai dibana lalohisihisi unu bamona ese eda mauri na be hadikaiamu. (Sal. 31:10) Dia una mo, to mauri ena heau-helulu lalonai baita hesikumu danu.​—2 Kor. 2:7.

15. Dahaka ese baine duruda eda kerere gunadia ilalohisihisilaidia karana baita hadokoa? (1 Ioane 3:19, 20) (Laulau danu ba itaia.)

 ¹⁵ Una metau be ede ba kokia toma? Kerere gunadia daidiai dounu ta lalohisihisimu neganai, Dirava ese dika e gwautao vaitanimu karana baita laloa. (Sal. 130:4) Ia ese mai momokanidia ida e helalo-kerehaimu taudia edia dika e gwautaomu neganai, e gwaumu: “Edia kara dika basina laloa tao lou.” (Ier. 31:34) Anina na Iehova ese emu kara dika gunadia na basine lalodia loumu. Una dainai, emu kara dika gunadia amo e varamu dika daidiai basioto Iehova ese emu dika na se gwautao. Bona basio lalohisihisi bema emu kerere gunadia daidiai emu hesiai ḡaukara madunadia haida o haboio. Iehova na dika e gwautaomu neganai se lalodia loumu, una dainai oi danu unu ba kara toma.​—1 Ioane 3:19, 20 ba duahidia.

16. Mauri ena heau-helulu lalonai, dahaka baita kara be namo?

¹⁶ Namona na mauri ena heau-helulu lalonai, ‘baita heau ela bona davada baita abia.’ (1 Kor. 9:24) Unu baita kara toma dibamu bema baita hua madunadia bona baita koki metaudia edia idau baita lalopararalaimu. Ina atikol ai, ita ese baita kara diba ḡaudia haida bona baita koki ḡaudia haida tame herevalai. To ḡau ma haida danu baita lalodia. Iesu na e gwa: “Aniani momo bona kekero muramuradia bona tanobada ena lalo-haguhi ḡaudia ese lalomui bae hametaudia.” (Luka 21:34) Siri unu bamodia ese bae durumu diba ba kara sensidia ba lalopararalai bona mauri ena heau-helulu ai ba heau.

17. Dahaka dainai ta dibamu mauri ena heau-helulu lalonai baita kwalimumu?

¹⁷ Ita na ta dibamu mauri ena heau-helulu ai na baita kwalimumu, badina Iehova ese goada be henidamu. (Isa. 40:29-31) Una dainai, baita heau goadagoada! Aposetolo Paulo baita tohotohoa, ia na e hekwarahi baine abia davana namona e ḡavaia. (Fili. 3:13, 14) Mauri ena heau-helulu lalonai, ta na oi daimu ai basine heaumu, to Iehova ena heduru amo bo kwalimumu. Iehova ese be durumumu emu maduna ba huaia bona e hametaumumu ḡaudia ba koki. (Sal. 68:19) Iehova na oi ida dainai, mauri ena heau-helulu lalonai mai haheaukamu ida bo heaumu ela bona davamu bo abiamu!