1. Dahaka dainai taunimanima e haheaukamu neganai o moalemu?

 TAUNIMANIMA e haheaukamu neganai ita na ta moalemu. Badina be dahaka? Mai haheaukadia ida e narimu taudia na ta matauraidiamu. Ena be kerere ta karamu to e haheaukamu dainai ta moalemu. Danu, ta moalemu badina e stadi henida tadikakana o taihuna na mai haheaukana ida e duruda, ena be ta hekwarahiva Baibul ena hahediba herevana ta baita dibaia, baita abia dae bona baita badinaia. Mai anina bada ḡauna na, Iehova ta tenkiu heniamu badina ita edai haheauka karana e hahedinaraiamu!​—Roma 2:4.

2. Ededia nega ai baita haheaukamu na auka?

² Ena be haida e haheaukamu karana na ta laloa badamu, to nega haida ita siboda ese una kara baita hahedinaraia na auka. Heḡereḡere, bema ita na vada ta leiti bona dala ai motuka na momo, reana baita haheaukamu na auka. Eiava haida ese laloda be hahisiamu neganai baita badumu. Bona nega haida edai na be aukamu Iehova ese e gwauhamatalaia tanobada matamatana baita naria. Nega unu bamodia ai baita haheauka na namo. Ina atikol ai, haheauka anina baita dibaiamu bona dahaka dainai una kara baita hahedinaraia na mai anina bada. Danu, dahaka ese baine duruda haheauka karana baita goadalaia.

3. Haheauka tauna na haida ese e habaduamu neganai, dahaka e karamu?

³ Baita haheauka daladia 4 mani aita herevalai. Ginigunana na, haheauka tauna na se badu haraḡamu. Haida ese e habaduamu neganai, ia na ena kara e biaguamu bona edia kara davadia na se haloumu. Baibul ai Iehova na e gwa: “Lau binai Iehova; . . . hebogahisi bona harihari-bada Diravana. Badu ai na halahemu; hebogahisi ai bona uraheni ai na haraḡamu.” Una siri ai ina hereva “badu ai na halahemu” na nega ginigunana e hedinarai.​—Eso. 34:6.

4. Haheauka tauna na e narimu lalonai dahaka baine kara be namo?

⁴ Iharuana na, haheauka tauna na e narimu. Ia na e nariamu ḡauna se vara haraḡamu neganai, se hesikumu bona se badu haraḡamu. (Mat. 18:26, 27) Nega haida be varamu ḡaudia daidiai baita haheauka na namo. Heḡereḡere, ta e herevamu neganai, mai haheaukada ida baita hakala bona ena hereva na basita utua. (Iobu 36:2) Danu Baibul stadi ta na Baibul ena hahediba herevana ta baine lalopararalaia eiava e manadalaia kara mirona ta baine dadaraia totona ta duruamu neganai, baita haheauka na namo.

5. Edena dala ma ta ai baita haheauka na namo?

⁵ Ihatoina na, haheauka tauna na se haraḡa-haraḡamu. Vaia, nega haida ḡau haida ikaradia ai baita haraḡa na namo. To, haheauka tauna na ḡaukara badana ta baine haḡuḡurua totona basine haraḡa-haraḡamu, bona baine karaia ḡauna na be haeroa namonamomu. Unu amo baine karaia ḡauna na nega korikori ai be haḡuḡuruamu.

6. Hekwakwanai negadiai haheauka tauna be dahaka be karamu?

⁶ Ihahanina na, haheauka tauna na hahetoho e haheaukalaimu bona se maumaumu. Momokani, ta davaria hekwakwanaina ta  dainai turada namona ta enai eda hemami baita herevalaia na dia kerere. To, e haheaukamu tauna na dounu baine haheauka totona, ia na be hekwarahimu ḡau namodia be lalomu bona ena hesiai ḡaukara be goadalaiamu. (Kol. 1:11) Ita na Kristen taudia dainai, tame herevalai daladia 4 baita badina na namo. Dahaka dainai? Mani badi haida aita herevalai.

7. Iakobo 5:7, 8 heḡereḡerena, dahaka dainai haheauka na mai anina bada? (Laulau danu ba itaia.)

⁷ Baita haheauka na mai anina bada bema ta uramu baita mauri. Idaunegai abidadama taudia heḡereḡeredia, namona na mai haheaukada ida Dirava ese ena gwauhamata baine haḡuḡuru negana baita naria. (Heb. 6:11, 12) Baibul ese ita na biru tauna ta ida e haheḡereḡereda. (Iakobo 5:7, 8 ba duahidia.) Biru tauna na e ḡaukara goadamu uhe e hadomu bona e dairimu, to asi dibana edena negai be tubumu. Una dainai, ia na mai haheaukana ida e narimu, badina dibana uhe anidia na be hekaramu. Una heḡereḡerena, eda hesiai ḡaukaradia ai baita ḡaukara goada na namo, ena be eda “Lohiabada bainema negana” na asi dibada. (Mat. 24:42) Namona na mai haheaukada ida baita nari, bona baita abia dae Iehova na ena nega korikori ai ena gwauhamata iboudiai be haḡuḡurumu. Bema basita haheaukamu, baita hesikumu bena taina ruana Iehova baita rakataniamu. Bona harihari bae hamoaleda ḡaudia baita ura henimu. To bema baita haheaukamu ela bona dokona, baita maurimu.​—Mika 7:7; Mat. 24:13.

8. Haida ta kara henidiamu neganai haheauka karana ese ede baine duruda toma? (Kolose 3:12, 13)

⁸ Ma haida ta kara henidiamu neganai, haheauka karana na mai anina bada. Una kara ese be durudamu ta e herevamu neganai, baita hakala namonamomu. (Iak. 1:19) Danu, haheauka karana ese be durudamu ma haida ida maino ai baita nohomu. Ta lalohekwarahimu negadiai basita hereva haraḡamu eiava hereva kererena ta basita gwauraiamu. Bona haida ese eda hemami e hadikaiamu neganai, basita badu haraḡamu, to ‘baita haheauka hehenimu bona dika baita hegwau tao hehenimu.’​—Kolose 3:12, 13 ba duahidia.

9. Abi hidi ta do asita karaia neganai haheauka karana ese ede be duruda tomamu? (Hereva Lada-isidia 21:5)

⁹ Haheauka karana ese be durudamu abi hidi namodia baita karamu. Bona nega bada lalonai ḡau baita haerodiamu. Anina na abi hidi ta do asita karaia lalonai, baita hetahu namonamo bena abi hidi maorona baita karaia. (Hereva Lada-isidia 21:5 ba duahia.) Heḡereḡere, moni ḡaukara ta tahumu neganai, reana baita uramu ta davaria ḡaukara ginigunana baita abia dae, ena be una ḡaukara dainai asi eda nega baita hebou eiava baita haroro. To, namona na baita baita haeroa guna, ḡaukara gabuna be edeseniai, hora hida baita ḡaukaramu, bona una ḡaukara ese eda hetura karana eda ruma bese bona Iehova ida be duruamu eiava lasi. Bema baita haheaukamu, abi hidi maorona baita karaiamu.

10. Dahaka ese baine duruda haheauka karana baita manadalaia?

¹⁰ Baita haheauka totona baita ḡuriḡuri. Haheauka na Dirava ena lauma huahuana ta. (Gal. 5:22, 23) Una dainai, Iehova baita noia ena lauma helaḡa baine henida una kara baita hahedinaraia totona. Bema eda haheauka e tohoamu hahetohona ta e varamu, baita “noinoi” loulou baine duruda baita haheauka totona. (Luka 11:9, 13) Danu Iehova baita  noia baine duruda ena lalohadai heḡereḡerena ai ḡau baita haero. Bona dina ta ta ai baita hekwarahi baita haheauka. Bema baita ḡuriḡuri louloumu bona baita hekwarahimu haheauka karana baita hahedinaraia, una kara na baita manadalaiamu.

11-12. Iehova ese haheauka karana be ede e hahedinaraia toma?

¹¹ Baibul ai haheitalai namodia baita lalodia dobu. Baibul ese haheauka taudia momo e herevalaidia. Edia sivarai baita lalodia dobumu neganai, haheauka daladia baita dibamu. To, unu sivarai do asita herevalai lalonai, mani Iehova ena haheitalai namona aita laloa guna.

¹² Eden umana ai, Satana na Iehova ladana e hadikaia bona e gwauraia ia na Lohia dikana. Iehova ese Satana na maoromaoro se hamasea, to e haheauka badina mai dibana gabeai be hedinaraimu Iena lohia dalana mo na hereadae. Bona ia ladana ihadikana karadia iboudiai na doini e haheaukalaimu. Danu, e haheaukamu badina e uramu taunimanima momo na bae mauri hanaihanai. (2 Pet. 3:9, 15) Una dainai, taunimanima milion momo na ia e dibaiamu. Bema Iehova e haheaukamu ena namo baita laloamu neganai, baita uramu iena dina badana baita naria.

13. Edena dala ai Iesu ese Tamana ena haheauka karana e tohotohoa? (Laulau danu ba itaia.)

¹³ Iesu ese Tamana ena haheauka karana na e tohotohoa ḡoevaḡoeva, bona tanobada ema neganai una kara na e hahedinaraia. Itorena taudia bona Farisea taudia edia koikoi karadia ese iena haheauka karana na e tohoa loulouva. (Ioa. 8:25-27) To, Tamana heḡereḡerena, Iesu na badu ai e halaheva. Bona e ere dika henia negadiai se hadava. (1 Pet. 2:23) Iesu na hahetoho e haheaukalai bona se maumau.  Una dainai Baibul na e gwaumu, ia baita tohotohoa badina “kara dika taudia ese e inai henia, a ia ese e haheauka henidia”! (Heb. 12:2, 3) Ita danu Iehova ena heduru amo hahetoho baita haheaukalai diba.

14. Abraham ena haheauka karana amo dahaka ta dibamu? (Heberu 6:15) (Laulau danu ba itaia.)

¹⁴ Reana ita haida na ta lalo Dirava ena dina na idaunegai bema kau, to do se vara dainai ta lalohekwarahimu, ta lalomu reana baita masemu murinai una dina be kaumu. Dahaka ese baine duruda mai haheaukada ida baita nari? Abraham aita laloa. Ia na laḡanina 75 bona do asi natuna neganai, Iehova ese e gwauhamata henia, eto: “Lau ese bese badana ai baina halaomu.” (Gen. 12:1-4) Abraham ese una gwauhamata ibounai e ḡuḡuru be e itaia, a? Lasi, to gwauhamata kahana mo e itaia. Ia na Eufrate Sinavaina e hanaia bena ma laḡani 25 e nari murinai natuna Isaak e vara, bona ma laḡani 60 muridiai, tubuna Esau bona Iakobo e vara. (Heberu 6:15 ba duahia.) Abraham ese ia besena na bese badana ai ela bona Gwauhamata Tanona e abia negana na se itaia. To, Abraham na Dirava e abidadama henia bona ia turana namona ai ela. (Iak. 2:23) Abraham be tore isi loumu neganai, be moalemu badina be dibamu iena abidadama bona haheauka daidiai bese iboudiai na hahenamo e davari! (Gen. 22:18) Una ese dahaka e hadibadamu? Reana harihari ita ese Iehova ena gwauhamata iboudiai be haḡuḡurumu na basita itamu. To Abraham heḡereḡerena bema baita haheaukamu, Iehova ese hari be hanamodamu bona e gwauhamatalaia tanobada matamatana ai hahenamo momo be henidamu.​—Mar. 10:29, 30.

15. Siboda eda stadi ai dahaka baita kara?

 ¹⁵ Baibul ese haheauka taudia ma haida danu e herevalaidia. (Iak. 5:10) Namona na sibomu emu stadi ai sivaraidia ba stadilai. b Haheitalai bina, David na maraḡinai e horoa Israel ena king ai bainela to laḡani momo ma e nari gabeai king ai ela. Simeon bona Ana na gwauhamata Mesiana e nariava lalonai mai edia abidadama ida Iehova e tomadiho heniava. (Luka 2:25, 36-38) Sivarai unu bamodia o stadilaimu neganai, ini henanadai haeredia ba tahu: Dahaka ese ina tau o hahine e durua e haheauka? E haheauka dainai dahaka namo e davari? Lau ese ia be ede baina tohotohoa toma? Asie haheauka taudia sivaraidia amo danu diba bo abimu. (1 Sam. 13:8-14) Reana ba henanadai: ‘Dahaka dainai se haheauka? Dahaka dika e davari?’

16. Haheauka ena namo haida be dahaka?

¹⁶ Haheauka ena namo ba laloa. Baita haheaukamu neganai, baita moalemu, basita lalohekwarahimu bona basita gorere momomu. Haida edia kara baita haheaukalaimu neganai turadia namodia ai baita laomu. Bona eda kongrigeisin taudia ida lalotamona ai baita nohomu. Bema ta ese laloda be hahisiamu to basita badulaia haraḡamu neganai, hekwakwanai na basine badamu. (Sal. 37:8; Her. 14:29) To mai anina bada ḡauna na, baita haheaukamu neganai ita na Tamada guba ai ta tohotohoamu bona eda hetura karana ia ida na be goadamu.

17. Laloda baita hadai dahaka baita kara?

¹⁷ Haheauka na kara namona ta bona ita iboudai e durudamu karana! Ena be nega haida na auka una kara baita hahedinaraia, to Iehova ena heduru amo dounu baita haheauka diba. Bona mai haheaukada ida tanobada matamatana ta nariamu lalonai, baita abia dae “Iehova ese ia garina e garimu taudia na e itadiamu; iena hebogahisi e laroamu taudia ia ese e itadia taomu.” (Sal. 33:18) Namona na laloda baita hadai nega iboudiai baita haheauka.