Una atikol amo ta diba, taunimanima bona aneru ediai mai anina bada ḡauna na ina: Iehova ladana hereana ihahelaḡana karana. Dirava ena lohia siahuna o lohia dalana hereadaena dainai e vara hepapahuahuna na mai anina bada ia ladana ihahelaḡana karana ai. Dia una mo, taunimanima ese Dirava bae badinaia karana na mai anina bada ia ladana hereana ihahelaḡana karana ai.

Dahaka dainai hari ta gwaumu Iehova ladana bona una lada ihahelaḡana karana na mai anina bada? Mani badi toi aita lalodia.

Ginigunana na, Eden umana ai Satana ese Iehova ladana e hadikaia. Satana ena henanadai Heva enai ese e hahedinaraia, ia na vaitani e gwa Iehova na dia hariharibada Diravana bona Adam bona Heva e henidia taravatudia na dia mamaoro. Bona Satana ese Iehova ena hereva na e girodia, unu amo Dirava na e gwauraia koikoi tauna. Una dainai ia ese Iehova ladana na e hadikaia. Satana na “Diabolo” ai ela, anina na “lada e hadikamu tauna.” (Ioa. 8:44) Heva na Satana ena koikoi herevadia e abi dae dainai Dirava e gwau-edeede henia, unu amo iena lohia dalana e dadaraia. (Gen. 3:1-6) Ema bona hari, Satana na Iehova e sivarailaia koikoimu amo ia ladana e hadikaiamu. Satana ena koikoi herevadia be abi daemu taudia ese Iehova na be gwau-edeede heniamu. Una dainai Dirava ena taunimanima ediai Iehova ladana helaḡana ihadikana karana na kara dika rohorohona. Una kara dainai tanobada ai kara dika bona hisihisi e varamu.

Iharuana na, Iehova na lalona e hadaia ladana baine abia isi, anina na ladana ihadikana karadia iboudiai baine haoredia, unu amo ia ese e havara ḡaudia iboudiai na namo bae davari. Iehova enai una na mai anina bada. Ia na eto: “Lau ladagu hereana ena helaḡa, . . . baina gwauraia maoro.” (Esek. 36:23) Iesu ese e hahedinaraia, Iehova ena hesiai taudia iboudiai edia ḡuriḡuri ai Dirava ladana bae laloa bada na namo. Iesu na e gwa: “Oi ladamu baia hahelaḡaia.” (Mat. 6:9) Baibul ese Iehova ladana iheatolaina karana na e herevalaia loulou. Haheitalai haida be ini: “Hairai ba gwauraia, Iehova ladana ena.” (1 Sis. 16:29; Sal. 96:8) “Ia ladana hairaina anedia bavabi.” (Sal. 66:2) “Oi ladamu baina imodaia hanaihanai.” (Sal. 86:12) Ierusalem dubuna ai Iesu na Tamana e ḡuriḡuri henia neganai, e gwa: “Tamagu e, ladamu a heatolaia.” Una neganai Iehova na guba amo e hereva, eto: “Vada name heatolaia; ma baina heatolaia.”​—Ioa. 12:28. a

Ihatoina na, Iehova ena ura na ita iboudai ese ia ladana helaḡana baita imodaia hanaihanai. Mani ina a laloa: Keriso Ena Lohia Laḡanidia 1,000 dokonai, hahetoho ginigabena be varamu murinai, ma dahaka be varamu? Una negai aneru bona taunimanima ese Iehova ladana be ede be laloa tomamu? Una henanadai haerena  baita diba totona, ini mai anidia bada ḡaudia rua aita lalodia: Taunimanima ese Dirava bae badinaia karana bona Dirava ena lohia siahuna. Hahetoho ginigabena murinai Dirava be badinaiamu taudia be dounu hahetoho be davarimu, a? Lasi. Badina idia na vada ḡoevadae bona hahetoho iboudiai na vada e hanaidia. Idia na be mauri hanaihanaimu. Danu, Dirava ena lohia dalana be ta ese be hepapahuahulaiamu, a? Lasi. Badina una negai guba bona tanobada taudia iboudiai na lalotamona ai be nohomu bona be abia daemu Iehova ena lohia dalana na hereadae. To, una negai Iehova ena taunimanima ese ia ladana be dounu be laloa badamu, a?

Una negai Iehova ladana na be hereadaemu bona ta ese ma basine hadikaia loumu. Guba bona tanobada ai Iehova ena hesiai taudia iboudiai ese ia ladana na dounu be laloa badamu. Dahaka dainai? Badina Iehova ese dounu be karamu ḡau namodia na idia ese be itamu. Mani a laloa: Iesu na mai manauna ida lohia siahuna ibounai Iehova be henia loumu, bena Dirava na “baine herea, baine herea dae.” (1 Kor. 15:28) Una murinai, taunimanima na “Dirava natuna edia ura-kwalimu herea-daena bae abia.” (Roma 8:21) Bona Iehova ese ena ura na be haḡuḡuruamu, ia ese guba taudia bona tanobada taudia na ruma bese ta bamona be hatamonadiamu.​—Efe. 1:10.

Unu muridiai, Iehova ena ruma bese guba ai bona tanobada ai be dahaka be karamu? Idia ese Iehova ladana be imodaiamu. Salamo itorena tauna David na e gwa: “Iehova . . . aita hanamoa. . . . Ia ladana herea-daena baita imodaia hanaihanai.” (Sal. 72:18, 19) Ita na badi namodia idauidau daidiai Iehova baita hanamoa hanaihanai.

Iehova ladana ese iena kara iboudiai e hahedinarai. Bada hereana be ina, Iehova ladana ta laloamu neganai iena lalokau ta laloamu. (1 Ioa. 4:8) Hanaihanai baita helalotao Iehova na lalokau dainai ita e karada bona mauri idavalaina boubouna e heni. Danu lalokau dainai e hahedinaraia iena lohia dalana na maoro. To Iehova ese ita edai ena lalokau be hahedinaraiamu dalana na dounu baita itaiamu. Ia na ita Tamada dainai badibadinai baita nohomu bona ladana ihanamona anedia baita abimu ela bona hanaihanai.​—Sal. 73:28.