1. E Helalo kerehaimu tauna be dahaka e karamu?

 BEMA kara dikana ta ta karaiamu, baita helalo kerehai na mai anina bada. Baibul na e gwa, bema ta na e karaia kara dikana baine inai henia, una kara baine rakatania vaitani, bona lalona baine hadaia una kara dikana basine karaia lou, ia na vada e helalo-kerehai.—Mat. 3:8; Apos. 3:19; 2 Pet. 3:9.

2. Dahaka dainai helalo kerehai dalana baita lalopararalaia na namo? (Nehemia 8:​9-11)

² Taunimanima iboudiai ese helalo kerehai dalana bae lalopararalaia na namo. Dahaka dainai? Badina ita iboudiai na ta kereremu. Adam bona Heva edia amo tama dainai, mai eda kara dika bona ta masemu. (Roma 3:23; 5:12) Ita iboudai na kara dika tauda, una dainai baita helalo kerehai na namo. Abidadama taudia danu, heḡereḡere aposetolo Paulo, na e hekwarahiva kara dika ikarana urana baine dadaraia. (Roma 7:​21-24) Una anina be nega iboudiai eda kara dika dainai baita lalohisihisi, a? Lasi, Iehova na hebogahisi Diravana, ia na e uramu ita na baita moale. Mani Nehemia ena nega ai e nohova Iuda taudia aita lalodia. (Nehemia 8:​9-11 ba duahidia.) Iehova na se ura idia na edia kara dika gunadia dainai bae lalohisihisi hanaihanai, to e urava mai moaledia ida ia bae tomadiho henia. Iehova na mai dibana baita helalo kerehaimu neganai, baita moalemu. Una dainai, ia ese helalo kerehai dalana e hadibadamu. Bema eda kara dika amo baita helalo kerehaimu, baita abia dae momokani Tamada Iehova ese eda dika na be gwautaomu.

3. Ina atikol ai be dahaka baita herevalaimu?

 ³ Ina atikol ai, helalo kerehai anina baita dibaiamu. Baita herevalaimu ḡaudia bini: (1) Iehova ese Israel taudia be ede e durudia toma helalo kerehai anina bae lalopararalaia, (2) Iehova ese kara dika taudia be ede e durudia toma bae helalo kerehai, bona (3) Iesu Keriso ese ena hahediba ediai helalo kerehai anina be ede hadibadia toma.

IEHOVA ESE ISRAEL TAUDIA E DURUDIA HELALO KEREHAI ANINA BAE LALOPARARALAIA

4. Iehova ese Israel taudia be ede e durudia toma helalo kerehai anina bae lalopararalaia?

⁴ Iehova ese ena taravatu na Israel taudia e henidia neganai, idia na e gwauhamata unu taravatu bae badina. Bona Iehova na e gwauhamata bema idia ese unu taravatu bae badina, ia ese be gimadiamu bona be hanamodiamu. Ia ese unu taravatu na ini e herevalaidia toma: “Badina be hari ina dina ai na haḡanilaimui haheḡanina na dia auka herea bona dia daudau herea.” (Deu. 30:​11, 16) To bema idia ese Iehova ena taravatu basie badinaia, bena dirava idaudia bae tomadiho henidia, Iehova ese ena hahenamo na idia edia amo baine kokia, bona hekwakwanai momo bae davari. To, Iehova ese idia na basine dadaraidia vaitani. Idia ese ‘Iehova [edia] Dirava, bae lou henia diba bona erena bae kamonai.’ (Deu. 30:​1-3, 17-20) Anina na bae helalo kerehai diba. Bema unu bae kara toma, Iehova ese idia na baine abidia dae bona ma baine hanamodia lou.

5. Iehova ese ena taunimanima ediai ena haheauka karana be ede e hahedinaraia toma? (2 Han. 17:​13, 14)

⁵ Israel besena ese Iehova na e gwau-edeede henia loulouva. Idia ese dirava koikoidia e tomadiho heniva, bona kara dika rohorohodia e karava. Unu kara daidiai, idia ese Iehova ena hahenamo e haboioa. To, Iehova ese ena taunimanima na dounu e durudiava ia bae hesiai henia lou. Iehova ese ena peroveta taudia e siaidia loulouva ena taunimanima bae hagoadadia bae helalo kerehai bona Ia bae lou henia.—2 Hanua Pavapavadia 17:​13, 14 ba duahidia.

6. Edena dala ai Iehova ese ena peroveta taudia amo ena taunimanima e durudia bae helalo kerehai na mai anina bada? (Laulau danu ba itaia.)

 ⁶ Iehova ena taunimanima na e gwau-edeedeva neganai, ia ese ena peroveta taudia amo e sisiba henidiava bona e durudiava bae helalo kerehai. Heḡereḡere, Dirava ese Ieremia amo Israel taudia e hamaorodia, eto: “Kara hebeatai besena Israel e, a lou! . . . Mai badugu ida basina haḡeremu, badina be lau na mai hebogahisigu; lau na basina badu hanaihanai. . . . Emu kerere a gwaurai hedinarai mo; Iehova, emu Dirava, o daḡedaḡe henia.” (Ier. 3:​12, 13) Ioel ena amo be e gwa: “Ina harihari lau dekegu ai a lou mai, mai lalomui idoidiai ida.” (Ioel 2:​12, 13) Isaia ena amo be e gwa: “Sibomui ba hehuri; sibomui ba haheḡoeva; emui kerere na vairagu amo bavabi oho. Kara dika ba hadoko.” (Isa. 1:​16-19) Bona Esekiel amo, Iehova na e henanadai: “Edena na moalelaiamu, kara dika tauna baine mase, eiava ena dala baine rakatania bena baine mauri, a? . . . Badina be lau ese ta ena mase asina moalelaiamu; taunabunai, ba helalo kerehai, bena ba mauri.” (Esek. 18:​23, 32) Iehova na e moale bada hereamu bema e itaiamu, taunimanima na edia kara dika amo e helalo kerehaimu, badina ia na e uramu idia na bae mauri hanaihanai! To, Iehova na se narimu ela bona kara dika tauna baine helalo kerehai, bena baine durua. Mani haheitalai ma haida aita herevalai.

7. Peroveta tauna Hosea bona adavana edia sivarai amo Iehova ese ena taunimanima be dahaka e hadibadia?

⁷ Mani peroveta tauna Hosea adavana Gomera, ena sivarai amo Iehova ese ena taunimanima e hadibadia ḡauna aita itaia. Gomera na e heuda-hanai murinai, Hosea e rakatania. Iehova be dahaka e kara? Iehova na kudou e itamu Diravana, una dainai Hosea e hamaoroa, eto: “Ma baola, tau ta ese e eno henia bena ia ida e heuda hanai hahinena na ba ura henia, Iehova ese Israel taudia, dirava idaudia e haḡerediamu . . . taudia, na e ura henidiamu heḡereḡerena.” (Hos. 3:1; Her. 16:2) Mani a laloa, Hosea adavana na dounu una kara dika rohorohona e karaiava. To, Iehova ese Hosea na e hamaoroa hahine ena dika baine gwauatao bona baine adavaia lou. a Una haheitalai amo, Iehova na e ura ena taunimanima ese idia e lalodiava dalana bae lalopararalaia. Ena be idia na kara dika rohorohodia e karava, to ia ese na dounu e lalokau henidiava dainai ena peroveta taudia na e siaidiava idia be durudia bae helalo kerehai bona edia mauri ai ḡau haida bae haidau. Una sivarai ese e hadibadamu, Iehova ese “taunimanima lalodia e tohodiamu,” una dainai e ḡaukara goadamu kara dika tauna baine durua baine helalo kerehai. (Her. 17:3) Mani Iehova ese una e karaia dalana aita itaia.

IEHOVA ESE KARA DIKA TAUDIA E DURUDIAMU BAE HELALO KEREHAI

8. Iehova ese Kain be ede e durua toma baine helalo kerehai totona? (Genese 4:​3-7) (Laulau danu ba itaia.)

⁸ Kain na Adam bona Heva natudia roboana. Ia danu tamana sinana edia amo kara dika ikarana urana na e abia hanai. Baibul ese Kain na ini e herevalaia toma: “Iena kara na dika.” (1 Ioane 3:12) Reana una badi dainai ia ese boubou ḡauna e heni neganai, Iehova ese “Kain ena boubou ḡauna se haḡerea.” Kain ese ena kara na se haidaua, to “e badu dikadika, bena vairana e huaia.” Iehova be ma dahaka e kara? Ia ese Kain e hereva henia. (Genese 4:​3-7 ba duahi.) Mani a laloa, Iehova na mai manauna ida Kain e hereva henia bona e hamaoroa bema ena kara baine haidaua, baine hanamoa. Danu e hadibaia una badu dainai kara dika badana ta  baine karaia diba. To madi, Kain na se kamonai. Ia ese Iehova ena heduru na se abia dae. Ena be Kain na se kamonai, to una ese Iehova se koua kara dika taudia ma haida baine durudia bae helalo kerehai.

9. Edena dala ai Iehova ese David e durua baine helalo kerehai?

⁹ Iehova ese King David na e lalokau henia bada. Ia ese David na e gwauraia “egu lalokau tauna.” (Apos. 13:22) To David na kara dika badadia haida e kara, ia na e heuda hanai bona ta e alaia. Mose ena Taravatu henunai, David na baine mase mo vadaeni. (Lev. 20:10; Num. 35:31) To, Iehova na e ura David baine durua baine helalo kerehai. b Ena be David na helalo kerehai toana ta do se hahedinaraia, to Iehova ese ena peroveta tauna Natan e siaia king baine vadivadia. Natan ese haheitalai David e durua baine laloparara, ia na kara dika rohorohodia e kara. David na e laloparara ia ese Iehova kudouna na e hahisia bada herea bona e helalo kerehai. (2 Sam. 12:​1-14) David ese ane ta amo ena lalohisihisi e gwauraia hedinarai. (Sal. 51) Kara dikadia e kara taudia momo ese salamo bukana e duahiamu neganai, tauhalo e abimu bona e hagoadaia bae helalo kerehai. Ta moalemu badina Iehova ese David na e lalokau henia bona e durua baine helalo kerehai.

10. Iehova ena haheauka bona dika e gwautaomu karana o dibamu neganai, emu hemami be ede bamona?

¹⁰ Iehova ese kara dika iboudiai na e inai henidiamu. (Sal. 5:​4, 5) To momokani, Iehova na mai dibana ita iboudai na kara dika tauda, bona e lalokau henidamu, ta kereremu neganai, ia na e uramu baine duruda. Ena be ta na kara dika hereadia e kara, to Iehova na nega iboudiai dala be tahumu ia baine durua, baine helalo kerehai bona ia baine lou henia. Iehova na e uramu eda dika baine gwautao, una ta dibaiamu karana ese tauhalo e henidamu. Iehova ena haheauka bona dika igwautaona karana ta laloamu neganai, una ese na e hagoadadamu Iehova baita badinaia bona ta kereremu neganai, kara haraḡa baita helalo kerehai. Mani Iesu ese ena hahediba taudia ediai helalo kerehai anina e hadibadia dalana aita herevalaia.

 IESU ESE ENA HAHEDIBA EDIAI HELALO KEREHAI ANINA E HADIBADIA

11-12. Iesu be edena haheitalai amo e hahedinaraia Tamana na e ura dikadikamu eda dika baine gwautao? (Laulau ba itaia.)

¹¹ Laḡani 29 C.E. ai, Mesia baine hedinarai negana e kau. Atikol 31 ai e herevalaia heḡereḡerena, Iehova ese Ioane Bapatiso bona Iesu Keriso amo taunimanima e hadibadia helalo kerehai karana na mai anina bada.—Mat. 3:​1, 2; 4:17.

¹² Iesu tanobada ai e nohova neganai, taunimanima e hadibadiava Tamana na e ura dikadikamu kara dika taudia edia dika baine gwautao. Iesu ese boio merona ena parabole amo una e hahedinaraia. Una mero na lalona e hadaia ruma baine rakatania bona tanobada maurina baine moalelaia. To, nega taina e daudau murinai, “lalona e parara” bena ena ruma e lou henia. Tamana be dahaka e kara? Natuna na “ruma e raka henia e laova ai, dauhai tamana ese e mataia davari, bena e bogaia hisi, e heau lao, aiona ai e hahegagiu dae, e harahua.” Una mero na e laloava tamana ese ena dika na basine gwautaomu, una dainai tamana e noia ena ruma ai hesiai tauna ta bamona baine ḡaukara. To tamana ese ena dika na e gwautao bona e gwa “ina natugu,” bona ena ruma bese lalonai e abia vareai lou. Tamana na e gwa: “Ina natugu . . . e boio, to vada name davaria.” (Luka 15:​11-32) Iesu na guba ai e nohova neganai, Tamana ese mai hebogahisina ida e helalo kerehai taudia edia dika e gwautao haraḡava karana na e itaia. Iesu ese e gwauraia sivaraina amo ta dibamu Tamada Iehova na hebogahisi Diravana!

13-14. Aposetolo Petro be dahaka ese e durua helalo kerehai anina baine lalopararalaia, bona ia ese ma haida be ede e durudia toma? (Laulau danu ba itaia.)

¹³ Aposetolo Petro na Iesu ena amo Iehova ese helalo kerehai tauna ena dika e gwauataomu karana e dibaia. Petro na kerere momo e kara, to Iesu na mai ena ura ida ena dika e gwautao. Heḡereḡere, Petro ese Iesu na nega  toi e gorea murinai, e lalohisihisi bada herea. (Mat. 26:​34, 35, 69-75) To Iesu e toreisi lou murinai, ia na Petro enai e hedinarai unu amo baine hereva henia. (Luka 24:​33, 34; 1 Kor. 15:​3-5) Una ese e hahedinaraia Iesu na mai dibana Petro na vada e helalo kerehai, bona e ura baine Petro na baine diba ena dika na vada e gwauatao.—Mar. 16:7.

¹⁴ Petro ese helalo kerehai bona dika igwautaona karana na e lalopararalaia. Una dainai ia e dibaia ḡauna na ma haida e hadibalaidia. Pentekoste ariana dinana murinai, Petro ese asi edia abidadama Iuda taudia e haroro henidia, e hadibadia idia ese Mesia e hamasea. To, dounu mai lalokauna ida e hagoadadia: “Ba helalo lou, ba helalo kerehai; bena emui dika bae heabi oho, bona hahemauri negadia na Lohiabada ena amo baema.” (Apos. 3:​14, 15, 17, 19) Petro ese e hahedinaraia helalo kerehai ese kara dika tauna baine durua baine helalo lou—una anina na ena lalohadai kereredia baine haidau, ena kara dikadia baine rakatani vaitani—bona Iehova e hamoaleamu karadia baine kara. Danu e hahedinaraia Iehova ese edia kara dika na be gwautao vaitanimu, una na heḡereḡere edia kara dika be rohodiamu, eiava be lalodia boio vaitanimu. Laḡani momo muridiai, Petro ese Kristen taudia e hadibadia, eto: “[Iehova ese] e haheauka henimuimu, badina be ia na se uramu ta baine mase; e uramu iboumui ai ba helalo kerehai.” (2 Pet. 3:9) Ta moalemu badina ta dibamu Iehova ese e helalo kerehai taudia edia dika na be gwautao vaitanimu!

15-16. (a) Aposetolo Paulo ese dika igwautaona karana be ede e dibaia toma? (1 Timoteo 1:​12-15) (b) Atikol gabena ai be dahaka baita herevalaimu?

¹⁵ Taso tauna Saulo na kara dikadia momo e kara. Ia ese Keriso murinai e rakava taudia e daḡedaḡe henidia bona haida e hamasedia. Kristen taudia momo na e laloava ia ese ena kara na basine haidau diba. To, Iesu na mai dibana Saulo ese ena kara na be haidaumu bona be helalo kerehaimu. Iesu Tamana ida na Saulo enai kara namodia e ita. Iesu na e gwa: “[Ina tau na] lau ese vada name abia hidi.” (Apos. 9:15) Danu, Iesu ese hoa karana ta amo Saulo e durua baine helalo kerehai. (Apos. 7:58–8:3; 9:​1-9, 17-20) Kristen tauna ta ai ela murinai, Saulo—gabeai ladana e haidaua aposetolo Paulo—na nega momo Iehova bona Iesu Keriso edia hebogahisi karana e herevalaiva. (1 Timoteo 1:​12-15 ba duahidia.) Una dainai Paulo na e gwa: “Dirava ena harihari-bada ese e hakaumumu helalo kerehai dalana ai.”—Roma 2:4.

¹⁶ Nega ta Paulo na e kamonai heuda hanai tauna ta na dounu Korinto kongrigeisin ai e nohova. Paulo ese Korinto kongrigeisin be e hamaorodia dahaka bae kara? E gwaurai herevadia amo baita dibamu, Iehova na mai ena lalokau bona hebogahisi ida ena hesiai taudia e matahakani henidiamu, bona e durudiamu bae helalo kerehai. Atikol gabena ai ita ese Korinto kongrigeisin ai e vara ḡauna baita herevalaiamu.