1-2. (a) Kara dika be dahaka, bona edena dala amo baita hadarerea? (Futnout ai “Hereva Anina” danu ba itaia) (b) Ina atikol bona atikol gabedia ai dahaka baita herevalaimu? (Ina kaha danu ba itaia, “Duahiduahi Tauna E.”)

 O URAMU Iehova ese oi e lalokau henimumu ena bada ba dibaia, a? Una haere bavabia dalana namona ta na ina: Kara dika amo oi e hamaurimu dalana ba stadilaia. Kara dika a na ita inaida ḡauna badana, iseda goada amo basita hadarerea dibamu. Ita iboudai na kara dika tauda, dina ta ta ai ta kereremu bona kara dika dainai ta masemu. (Roma 5:12) To sivarai namona na ina, Iehova na e gwauhamata ia ese kara dika bona mase amo be hamauridamu.

² Iehova na laḡani 6,000 mai kahana lalonai taunimanima e durudia ia bae hesiai henia, ena be idia na dia ḡoḡoevadae. Dahaka dainai? Badina ia ese e lalokau henidamu. Matamana negana amo Iehova ese taunimanima na e lalokau henidia, una dainai ḡau momo vada e kara ita baine duruda kara dika baita hadarerea. Dirava na mai dibana kara dika ahuna na mase, to ia na se uramu ita baita mase. Ia na e uramu baita mauri hanaihanai. (Roma 6:23) Ia na e uramu oi na ba mauri. Ina atikol ai, ita na henanadai toi baita herevalaimu: (1) Iehova ese kara dika taudia ediai dahaka helaro e heni? (2) Baibul negadiai dia ḡoevadae taudia be dahaka e kara dainai Iehova e hamoalea? (3) Iesu be edena dala amo dia ḡoevadae taudia na kara dika bona mase amo e hamauridia?

 IEHOVA ESE KARA DIKA TAUDIA EDIAIDAHAKA HELARO E HENI?

3. Edena dala ai Adam bona Heva na kara dika taudia ai ela?

³ Iehova ese tau bona hahine ginigunadia e karadia neganai, ia na e urava idia na bae moale. Ia ese noho gabuna namona ta e henidia, edia headava e hanamoa, bona mai anina bada ḡaukarana ta e henidia. Idia na besedia bae havara, tanobada bae hahonua, bona tanobada na paradaiso ai bae halaoa Eden umana heḡereḡerena. Ia ese bae badinaia diba taravatuna na e henidia. Danu e hadibadia, bema idia ese una taravatu basie badinaiamu idia na bae mase diba. E vara ḡauna na vada mai dibada. Aneru dikana ta, taunimanima bona Dirava se lalokau henidiamu aneruna, ese Adam bona Heva e dibaḡanidia bona Dirava e gwau-edeede henia. Adam bona Heva ese una aneru dikana, Satana, ena koikoi herevana na e abia dae. Idia ese Tamadia lalokauna na se abidadama henia dainai, e kara dika. Iehova ena hereva na e momokani. Adam bona Heva na e gwau-edeede nega amo hekwakwanai idauidau e davari: Ia na e buruka bona gabeai e mase.—Gen. 1:​28, 29; 2:​8, 9, 16-18; 3:​1-6, 17-19, 24; 5:5.

4. Dahaka dainai Iehova ese kara dika e inai heniamu bona e durudamu ia baita hesiai henia? (Roma 8:​20, 21)

⁴ Iehova ese una sivarai na Baibul lalonai e atoa unu amo mai anina bada ḡauna ta baita lalopararalaia. Ita na e durudamu Iehova ese kara dika e inai heniamu badina baita lalopararalaia. Kara dika ese eda hetura karana Iehova ida na e hadikaiamu bona una ese mase e havaraiamu. (Isa. 59:2) Satana ese Iehova bona taunimanima na e inai henidiamu. Una dainai ia ese Adam bona Heva e koidia, bona doini hari ina negai taunimanima e koidiamu. Adam bona Heva e gwau-edeede neganai, Satana na e laloava ia na e kwalimu. To, se laloparara Iehova na lalokau Diravana. Iena ura Adam bona Heva natudia ediai na se haidaua. Ia ese taunimanima na e lalokau henidiamu dainai, maoromaoro helaro e henidia. (Roma 8:​20, 21 ba duahidia.) Iehova na mai dibana Adam ena amo ema taudia haida na ia be lalokau heniamu bona be badinaiamu. Ia na idia Tamadia bona Ihavaradia Diravana dainai, ia ese dala ta e kehoa kara dika amo baine ruhadia bona ia bae raka henia kahi. Iehova be dahaka e kara una baine haḡuḡurua totona?

5. Edena nega ai Iehova ese kara dika taudia ediai helaro e heni matama? Ba herevalaia. (Genese 3:15)

⁵ Genese 3:15 ba duahia. b Kara haraḡa, Iehova na e gwa Satana na baine hadarerea, bona una ese taunimanima iboudiai helaro e henidia. Dirava na e peroveta, “natuna” amo taunimanima baine hamauridia. Una natu ese Satana na baine haorea vaitani bona hekwakwanai iboudiai na baine haoredia. (1 Ioa. 3:8) To ginigunana na, Satana ese una natu baine “haberoa,” eiava baine alaia mase. Una ese Iehova lalona na e hahisia bada herea. To, Iehova ese una na e abia dae badina e ura taunimanima iboudiai baine hamauridia.

BAIBUL NEGADIAI KARA DIKA TAUDIA BE DAHAKA E KARA IEHOVA BAE HAMOALEA?

6. Abidadama taudia Abel, Noa, bona ma haida be dahaka e kara Iehova turana ai baela?

⁶ Laḡani momo muridiai, Iehova na taina ruana e hahedinaraia kara dika taudia be dahaka bae kara unu amo ia turana ai baela. Eden ai gwau-edeede e vara murinai, Adam bona Heva natudia iharuana, Abel, na Iehova e abidadama heniava tauna ginigunana. Abel  ese Iehova na e lalokau heniava, e urava baine hamoalea, bona turana ai bainela dainai, boubou ḡauna ta na Iehova e henia. Abel na mamoe e naridiava tauna ta, una dainai ia ese mamoe maruanena ta e abia bona Iehova enai e bouboulaia. Iehova ese ede e haerelaia toma? Ia ese e “lalonamo henia bona ena boubou ḡauna e abia dae.” (Gen. 4:​4, NWT) Una heḡereḡerena Iehova ese ia e lalokau heniava bona e abidadama heniava taudia haida edia boubou na e abi daeva—idia ta na Noa. (Gen. 8:​20, 21) Iehova ese kara dika taudia e lalonamo henidiamu dalana ta na, edia boubou ḡaudia e abi daemu bona ia kahirakahira baela diba. c

7. Abraham ese natuna se rua, to e bouboulaia karana amo dahaka ta dibamu?

⁷ Iehova ese abidadama tauna Abraham e hamaoroa natuna Isaak baine bouboulaia neganai, baita gwau diba Abraham enai una na auka herea. Bona reana una ese lalona na e hahisia bada herea. To, ia ese Iehova e kamonai henia. Abraham na natuna baine alaia neganai, Dirava ese e koua. Una sivarai ese mai anina bada ḡauna ta e hadibadamu—Iehova na mai ena ura ida natuna lalokauna na boubou ḡauna ta heḡereḡerena baine do heni. Momokani, Iehova ese taunimanima na e lalokau henidia badamu.—Gen. 22:​1-18.

8. Animal ibouboulaina taravatuna amo dahaka ta dibamu? (Levitiko 4:​27-29; 17:11)

⁸ Laḡani momo muridiai, Iehova ese animal ibouboulaina taravatuna na Israel e henidia, e hamaorodia boubou na unu bae karaia toma. (Levitiko 4:​27-29; 17:11 ba duahidia.) Unu boubou amo e hahedinaraiamu, Iehova ese boubou ta e heḡaeḡaelaia taunimanima na kara dika amo baine hamauridia. Dirava ese ena peroveta taudia e hamaorodia e gwauhamatalaia natuna sivaraina na bae torea. E hahedinaraia Dirava Natuna hereadaena na baine hisihisi bona baine mase. Ia na mamoe ta na heto bae bouboulaia. (Isa. 53:​1-12) Mani a laloa: Iehova ese Natuna lalokauna e bouboulaia unu amo taunimanima na kara dika bona mase amo baine hamauridia—oi danu!

IESU BE DAHAKA E KARA TAUNIMANIMA NA KARA DIKA AMO BAINE HAMAURIDIA?

9. Ioane Bapatiso ese Iesu be ede e herevalaia toma? (Heberu 9:22; 10:​1-4, 12)

⁹ Laḡani 29 C.E. ai, Dirava ena hesiai tauna Ioane Bapatiso ese Iesu e itaia neganai, e gwa: “Dirava ena Mamoe Natuna a itaia; ia na tanobada ena dika iabi-ohona tauna.” (Ioa. 1:29) Ioane ena hereva ese e hahedinaraiamu, Iesu na Dirava ese e gwauhamatalaia natu hereadaena. Ia ese ena mauri baine bouboulaia. Iehova ese e gwauhamatalaia natu hereadaena vada e ginidae, ia ese taunimanima na kara dika amo do baine hamauridiamu.—Heberu 9:22; 10:​1-4, 12 ba duahidia.

10. Edena dala ai Iesu ese e hahedinaraia ia na kara dika taudia “iboiridia” ema?

¹⁰ Iesu ema badina badana na, e lalohisihisiva kara dika taudia baine durudia bona e boiridia ia murinai bae raka. Ia na mai dibana taunimanima na kara dika amo e vara dainai e hisihisiva. Una dainai kara dika taudia e tahudiava bona e durudiava. Haheitalai ta amo una e hahedinaraia, eto: “Goada taudia na muramura tauna basie tahua, a gorere taudia hari.” Ma e gwa: “Badina be kara maoromaoro taudia iboiridia asinama, a kara dika taudia hari.” (Mat. 9:​12, 13) Iesu na ena hereva heḡereḡerena ai unu e kara toma. Hahine ta ese iruru matana amo Iesu aena e huri neganai, Iesu na mai gado namona ida una hahine  e hereva henia bona ena dika e gwautao. (Luka 7:​37-50) Iesu na Samaria hahinena ta enai mai anina bada hereva momokanidia e hadibaia, ena be mai dibana una hahine ena mauri dalana na dika. (Ioa. 4:​7, 17-19, 25, 26) Kara dika dainai taunimanima na e masemu, to Dirava ese Iesu na siahu e henia taunimanima iboudiai, tatau, hahine bona natu na baine hatoredia isi lou diba.—Mat. 11:5.

11. Dahaka dainai kara dika taudia na e urava Iesu dekena baela?

¹¹ Momokani, ta lalopararamu dahaka dainai kara dika taudia na Iesu dekena e laova. Ia ese edia hemami na e lalopararalai bona mai manauna ida e durudiava. Idia na asie gariva Iesu bae hereva henia. (Luka 15:​1, 2) Iesu ese taunimanima unu bamodia na e hanamodia badina ia e abidadama heniava. (Luka 19:​1-10) Iesu ese taunimanima ediai Tamana ena hebogahisi karana na e hahedinaraia ḡoevaḡoeva. (Ioa. 14:9) Ena hereva dalana bona ena kara amo e hahedinaraia Iehova na hebogahisi Diravana, ia ese taunimanima na e lalokau henidiamu bona e uramu baine durudia kara dika bae hadarerea. Iesu ese kara dika taudia na e durudia edia mauri bae haidau bona ia bae badinaia.—Luka 5:​27, 28.

12. Iesu ena mase amo dahaka ta dibamu?

¹² Iesu na mai dibana ena mauri na baine bouboulaia. Nega momo, ena hahediba na e hamaorodiava ia na taona bae torea bona au ta ai bae hamasea. (Mat. 17:22; 20:​18, 19) Bona mai dibana ena boubou ḡauna ese  tanobada ena dika be abia ohomu; Ioane bona peroveta taudia edia hereva heḡereḡerena. Danu Iesu na ma e gwa, ia be masemu murinai “taunimanima idauidau” na ia be badinaiamu. (Ioa. 12:​32, NWT) Dia ḡoevadae taudia ese Iesu be abidadama heniamu bona ena haheḡani be badinamu neganai, Iehova be hamoaleamu. Una kara ese idia na ‘kara dika ena iḡui amo be ruhadiamu.’ (Roma 6:​14, 18, 22; Ioa. 8:32) Una dainai, Iesu na mai ena ura bona lalogoada ida hisihisi e haheaukalaia ela bona e mase, unu amo ita baine hamaurida.—Ioane 10:​17, 18.

13. Iesu be ede e mase toma, bona ena mase ese ita be dahaka e haḡuḡuru? (Laulau danu ba itaia.)

¹³ Iesu na turana ta ese taona e torea, inaina ese e dabaia tao, e hereva dika henia, ladana e hadikaia, e samania koikoi, bona e hahisia. Bena gabeai, tuari taudia ese ia bae hamasea gabuna e laohaia bona au ta ai e kokoa kau. Iesu na mai ena abidadama ida hisihisi iboudiai e haheaukalai. To, Iehova ese Natuna e itaia unu e hahisia tomava neganai, ia enai hisihisina na bada herea. Iehova na mai ena siahu bona mai ena maoro, Natuna ena hisihisi bema koua diba, to ia na unu se kara toma. Iehova ese Natuna na e lalokau henia bada, to dahaka dainai ena hisihisi bona mase na se koua? Badina Iehova ese ita na e lalokau henidamu. Iesu na e gwa: “Dirava ese tanobada ini e lalokau henia tomamu: Natuna vara-edeana vada eme heni, bae abidadama henia taudia iboudiai basie mase, a mauri hanaihanai bae abia.”—Ioa. 3:16.

14. Iesu ena boubou ḡauna amo dahaka ta dibamu?

¹⁴ Iesu ena boubou ḡauna ese e hamomokaniamu Iehova ese Adam bona Heva natudia, herevana dia ḡoḡoevadae, na e lalokau henidiamu. Una ese e hamomokaniamu Iehova ese oi na e lalokau henimu badamu. Ia ese natuna lalokauna e bouboulaia bona hisihisi bada herea e haheaukalaia, una dala amo oi na kara dika bona mase amo baine ruhamu. (1 Ioa. 4:​9, 10) Oibe, Iehova na e uramu ita baine duruda kara dika baita hadarerea bona baita kwalimu!

15. Dirava ese e heni mauri idavalaina boubouna amo namo baita davari totona, dahaka baita kara?

¹⁵ Dirava ese Iesu amo mauri davana e heni dainai, eda kara dika na bae hegwautao diba. To, Dirava ese eda dika baine gwautao totona, ḡau ta baita karaia na namo. Una be dahaka? Ioane Bapatiso bona gabeai Iesu ese una e haerelaia, eto: “A helalo kerehai, badina be guba basileiana vada eme kahira-kahira.” (Mat. 3:​1, 2; 4:17) Una dainai namona na eda kara dikadia amo baita helalo kerehai, unu amo Iehova turana ai baitala bona ia ese eda dika baine gwautao diba. To baita helalo kerehai anina be dahaka? Bona edena dala ai una ese ita e durudamu Iehova baita hamoalea? Atikol gabena ese una be haerelaiamu.