Aposetolo Paulo ese Kristen taudia Tesalonika ai e tore henidia neganai, e gwa: “Tau ta ese ina revareva ai a torea herevadia basine abidae, ia toana ba itaia [eiava bae makaia, NWT].” (2 Tes. 3:14) Guna ta gwauva ina hahekau herevana na elda ese bae badinaia. Bema ta na e sisiba henia loulouva to Baibul ena hahekau herevadia na se badinava, elda taudia na kongrigeisin iduruna totona tok ta e heniva. Una murinai pablisa ese sisiba e abia tauna na moale negadiai se bamoava.

To, una hahekau herevana ai laloparara matamatana ta abia. Paulo ese e gwauraia sisiba herevana na Kristen ta ta ese bae badinaia herevana. Una dainai elda taudia ese e makaia tauna dainai, tok na vada basie heni. Dahaka dainai hari unu ta gwau tomamu? Mani Paulo ena sisiba herevana aita haeroa namonamo.

Paulo na e gwa una kongrigeisin ai haida na e ‘raka havara-havarava.’ Ena be Dirava ena Hereva amo e sisiba henidiava, to asie badinadiava. Una kongrigeisin e vadivadia neganai, Paulo ese e hamaorodia: “Ta basine ḡaukara, ia na basine aniani.” To, haida na dounu asie urava bae ḡaukara sibodia bae heubu totona ena be idia ediai na heḡereḡere unu bae kara toma. Danu, e urava ma haida edia mauri lalonai e varava ḡaudia iboudiai bae diba. Kristen taudia ese unu e kara tomava taudia be ede bae kara henidia toma?—2 Tes. 3:​6, 10-12.

Paulo na e gwa, “toana ba itaia.” Una hereva Grik gado ai anina na, taunimanima unu bamodia edia amo ba henahua toho. Paulo ese una sisiba herevana na dia elda taudia mo, to kongrigeisin taudia iboudiai e henidia. (2 Tes. 1:1; 3:6) Una dainai, Kristen tauna ta na e itaiava tadikaka eiava taihu ta ese Dirava ena sisiba na se badinadiava, ia sibona ese abi hidi baine kara una tadikaka eiava taihu baine bamoa eiava lasi.

Anina be una tadikaka eiava taihu be kongrigeisin amo e atoa lasi tauna heḡereḡerena baita kara henia, a? Lasi, Paulo na e gwa: “Ba sisiba henia, tadimui na heto.” Una dainai Kristen taudia ta ta ese ‘toana bae itaia’ tauna na dounu Kristen heboudia ai bona haroro ḡaukaradia ai bae bamoa diba, to moale negadia ai na basie bamoa. Dahaka dainai? Badina Paulo na e gwa, unu amo “kopina baine hemarai.” Bema unu bae kara henia toma, e ‘raka havara-havaramu’ tauna na ena kara dainai be hemaraimu bona sensi haida be karamu.—2 Tes. 3:​14, 15.

Hari ina negai Kristen taudia ese una sisiba be ede bae badinaia toma? Ginigunana, namona na baita haeroa Paulo ena hereva heḡereḡerena una tadikaka be ena kara amo e hahedinaraiamu ia be e ‘raka havara-havaramu,’ eiava. Paulo na dia eda lalo-mamina heḡereḡerena abi hidi e karamu taudia e herevalaidiamu. Bona ia na dia ita e hahisidamu taudia e herevalaidiamu. To, Paulo ese e gwauraidia e “raka havara-havaramu taudia” na, Dirava ena Hereva amo sisiba e abi, to asie uramu bae badina taudia e herevalaidia.

Bema tadikaka ta o taihu ta na Dirava ena Hereva amo e abia sisiba herevana se badinaiamu, a ita siboda ese abi hidi baita kara una tadikaka o taihu be moale negadia ai baita bamoa eiava lasi. Una na ta ta ena abi hidi dainai ma haida ediai na basita herevalaia, to ruma tamona ai ta nohomu taudia mo baita hadibadia. Ita ese una tadikaka na dounu Kristen heboudia eiava haroro ḡaukara ai baita bamoa. Bema ena kara baine haidaua neganai, moale negadia ai ma baita bamoa lou diba.