UNA be ede e vara toma? Mani aina herevalaia. Lau na July 29, 1929 ai na vara, Bulacan hanuana ta, Philippines ai. Unuseni ai emai ḡau na dia momo badina moni siahuna na maraḡi. Lau merogu ai tuari e vara. Japan edia ami oreana ese Philippines e tuari henia. To, emai hanua na daudau dainai, tuari ese se hadikaia. Ai na asi emai reidio, televisen, bona niuspepa dainai, tuari sivaraina na haida edia amo a kamonaiva.

Ai natu 8 amo lau na namba 2, bona laḡanigu 8 neganai, tubugu ese e laohaigu idia ida baina noho totona. Ena be ai na Katolik taumai, to Tubugu tauna ese tomadiho iboudiai na e abi daeva, bona turana ese e heniava tomadiho bukadia na e haboudiava. Na helalotaomu ia ese Tagalog gado ai buklet ladadia Protection, Safety, bona Uncovered, * bona Baibul e hahedinarai henigu. Egu Baibul duahiduahi ai Evanelia bukadia haniosi na na moalelaiva. Unu na kara toma dainai, na ura Iesu ena haheitalai baina tohotohoa.​—⁠Ioa. 10:27.

Laḡani 1945 ai, Japan taudia ese edia tuari karana na e hadokoa. Una murinai, tamagu bona sinagu ese e noigu baina lou. Tubugu tauna ese e hamaorogu baina lou na namo. Una dainai nala.

Se daudau, December 1945 ai, Iehova ena Witnes taudia haida na Angat hanuana amo ema emai hanua ai bae haroro. Witnes burukana ta na emai ruma ema bona “dina gabedia” anina na Baibul amo e herevalaia. (2 Tim. 3:1-5) Ia ese e boirimai hanua kahikahina ta ai Baibul stadi ta baiala. Tamagu bona sinagu na sela, to lau na nala. Taunimanima 20 heḡereḡerena na unuseniai, bona haida ese Baibul henanadaidia e heniva.

Idia ese e herevalaiva ḡaudia na asina lalopararalaidia namonamova dainai, na ura baina raka oho. To, una nega ai, idia ese Basileia anena ta e abia matama. Ane ese lalogu e veria dainai, na noho. Ane bona ḡuriḡuri e ore murinai, iboumai e  boirimai Sunday gabena ai Angat hanuana ena hebou ta baiala.

Ai haida na kilomita 8 heḡereḡerena a raka, Cruz ruma besena edia ruma ai baia hebou totona. Na hoa badina hebou taudia 50 bogaraḡidiai natu danu Baibul ena hereva dobudia e haerelaiva. Hebou haida muridia ai, painia tadikaka burukana ta, Damian Santos, guna mayor dagina e abia tauna, ese e noigu ena ruma ai baina mahuta. Una hanuaboi ai Baibul a herevalaiava.

Una negai, ai momo ese Baibul ena hereva momokanidia a dibava neganai a abidia dae haraḡava. Hebou ma haida muridiai, tadikaka ese lau bona ma haida e nanadaimai, “O uramu bapatiso bavabi, a?” Na haere, “Io, na uramu.” Na diba lau na na ura “Lohiabada Keriso ena hesiai” tauna ai bainala. (Kol. 3:24) Ai na sinavai kahikahina ta ala, bona February 15, 1946 ai lau bona ma tau ta na a bapatiso.

A laloparara ai na bapatiso Kristen taumai dainai, namona na baia haroro hanaihanai unu amo Iesu baia tohotohoa. To una ese tamagu na se hamoalea, ia na eto, “Oi na maraḡi dainai basio haroro. Bona sinavai ai o bapatiso karana ese oi na haroro tauna ai se halaomu.” Na hadibaia Dirava na e uramu Basileia sivaraina namona baia harorolaia. (Mat. 24:14) Ma na gwa, “Egu gwauhamata Dirava enai baina hamomokania na namo.” Una nega ai, tamagu ese hahegari herevana e gwauraia, matamana ai na herevalaia heḡereḡerena. Oibe, ia na e ura egu haroro ḡaukara baine koua. Una nega ai, lau ese ḡau iboudiai na rakatani lauma ḡaudia baina tahu totona.

Cruz ruma besena ese e noigu idia ida baia noho, Angat hanua ai. Idia ese lau bona natudia kekenina, Nora, e hagoadamai baia painia totona. November 1, 1947 ai, ai raruosi ese painia ḡaukara a karaia matama. Nora na hanua idauna ta ai e painiava, bona lau na Angat hanuana ai na painiava.

Egu painia laḡanina ihatoina ai, brens ofesi amo tadikaka ta, Earl Stewart, ese taunimanima 500 vairadiai tok ta e heni, Angat hanuana ena ariara ai. Ia na English gado ai tok e heniva, bena lau ese Tagalog gado ai ena tok na hahanaiava. Lau na laḡani 7 mo na sikuli, to emai sikuli hahedibadia na hanaihanai English gado e ḡaukaralaiava. Egu English gado e hanamoa ḡauna ma ta na, emai Tagalog gado pablikeisen na dia momo. Una dainai English gado pablikeisen momo na stadilaiva. Unu amo English gado na dibaia namonamo dainai una tok bona gabe heboudia edia tok na Tagalog gado ai na hahanaiva.

Tadikaka Stewart ena tok na hahanaia dinana ai, ia ese Angat kongrigeisen e hadibaia brens ofesi na e urava painia tadikakadia ta eiava rarua bae boiridia Betele baela. Badina misinari na 1950 Tiokratik Ḡaukarana Ihabadana Hebouhebouna baela, New York, U.S.A. ai. E boiridia tadikakadia amo ta na lau. Una na lau ese ḡau iboudiai na rakatani negana ma ta; una negai Betele ḡaukarana baina durua.

June 19, 1950 ai Betele nala, bona egu asainmen matamatana na karaia matama. Betele na au badadia ese e ḡeḡea ahu rumana ta, bona tanona ena bada na 2.5 acre heḡereḡerena. Singul tadikakadia 12 heḡereḡerena na unuseni ai e ḡaukarava. Daba ai, lau na kisini ai na heduruva. Bena, 9 oklok amo, lau na laundry gabunai na ḡaukarava bona dabua na aeanidiava. Adorahi ai danu unu na kara tomava. Misinari taudia na hebouhebou amo e lou neganai, lau na dounu Betele ai na ḡaukarava. Magasin na kumidiava bae siai totona, taunimanima edia oda magasin (subscription) na siaiva, bona risepsen ḡaukara na karaiava; e heniguva ḡaukaradia iboudiai na na karava.

Lau bona Philippines tadikakadia 6 na laḡani 1952 ai, a moale bada herea badina e boirimai Gilead Sikuli ena klas namba 20 baiala. United States ai, a ita ḡaudia momo na mamatamata ai emai ai. Momokani, guna emai hanua maraḡina ai na diba ḡaudia amo na idau.

 Heḡereḡere, paoa kohudia bona ma ḡau haida iḡaukaralaidia daladia na asi dibamai. Bona una tano ena weda danu idau herea! Daba ta ai, na raka lasi neganai gabu hairaina na itaia. Egu nega ginigunana snow na ita. Bena keru mamina na abia!

To, na ita ḡaudia ese lau na se kougu, badina Gilead ai na dibava ḡaudia na na moalelaiva. Gilead Sikuli hahedibadia ese hahediba daladia namodia e ḡaukaralaiva. Mai anina bada ḡaudia itahudia bona istadilaidia daladia a diba. Gilead ai e hadibamai ḡaudia ese e durugu egu lauma dalana baina hanamoa totona.

Gradueisen murinai, lau na e siaigu Bronx, New York Siti ai, baina spesol painia. Una dainai, July 1953 ai, lau na New World Society Hebouhebouna nala, una na New York taonina ai e karaia. Hebouhebou murinai, lau na asainmen ta dainai Philippines na lou lao.

Brens ofesi tadikakadia na e gwa, “Hari oi na seket ḡaukara ba karaia.” Una ese dala e kehoa Keriso aena gabudia ai baina raka totona; ia na gabu daudau hanuadia e laova, Iehova ena mamoe baine durudia totona. (1 Pet. 2:21) Lau na e abigu hidi Philippines ena motumotu badana, Luzon, ai seket ḡaukara baina karaia. Danu provins ma haida, Bulacan, Neuva Ecija, Tarlac, bona Zambales baina vadivadidia. Taoni haida baina vadivadidia totona, Sierra Madre ororo badadia na hanaidiava. Unu gabu ai PMV na asie laova. Una dainai, motuka badadia e tariva taudia na noidia edia motuka ai e kwatuva au badadia latadiai baina helai totona. Nega momo egu noinoi na e abi daeva, to unu au badadia na dia helai gabudia namodia.

Unuseni ai kongrigeisen momo na mamaraḡi bona mamatamata. Una dainai hebou bona haroro ḡaukara ikaradia dalana na hadibadia neganai, tadikaka na e moale.

Gabeai, e siaigu Bicol hanuana ai seket ḡaukara baina karaia. Unuseni ai grup maraḡidia na momo bona asie karava teritoridia na spesol painia ese e karadiava. Ruma ta ai, edia toilet tamona na guri toilet bona au badadia rua e atodia. Unu au latadiai na gini neganai, au na e moru guri lalonai, bona lau danu na moru. Sibogu na haheḡoeva daudau, bena una murinai na heḡaeḡae egu ḡaukara baina hamatamaia totona.

Egu asainmen lalonai Nora na laloa matama, ia na Bulacan ai e painia matama. To gabeai, Dumaguete Siti ai spesol painia e karaiava, bona nala baina vadivadia. Una murinai, ai raruosi na revareva amo a hetore heheniva, bona laḡani 1956 ai, a headava. Emai headava murinai, ai ese Rapu Rapu Motumotu ena kongrigeisen ta a vadivadia. Unuseni ai, ena be ororo momo a daradiava bona gabu momo a laova, to adavagu ida unu gabu tadikakadia a vadivadidiava karana na a moalelaia!

Laḡani 4 heḡereḡerena seket ḡaukara a karaia murinai, e boirimai brens ofesi ai baia ḡaukara. Una dainai, January 1960 ai, Betele ai a ḡaukara matama. Laḡani haida e hanai muridiai, maduna badadia e huava tadikakadia edia amo ḡau momo na diba, bona Nora na Betele ai ḡaukara idauidau e dibava.

Betele ai na nohova negana ai, na moale badina na itaia Philippines ai pablisa ena namba na e bada e laova. Merogu ai Betele nala matama neganai, Philippines ena pablisa iboudiai na 10,000 heḡereḡerena. To hari pablisa ena namba na 200,000 mai kahana, bona Betele taudia handred momo ese haroro ḡaukara e duruamu.

Laḡani momo lalodiai ḡaukara na e bada dainai, Betele rumana na dia heḡereḡere. Una dainai, Gavanin Bodi ese a noimai gabu badana ta baia tahua ruma badana ta baia haginia totona. Lau bona printa gabuna e nariava tadikakana ese brens badinai e nohova China taudia edia ruma ta ta ala, bona a nanadaidiava bema ta na e urava ena tano baine hoihoilaia eiava lasi. Ta na se ura; tano biaguna ta danu e gwa: “Ai China taumai ese emai tano na asia hoihoilaimu. Ai ese haida edia tano a hoimu.”

To dina ta, tano ta biaguna na sibona ema bena e nanadaimai bema ai na a uramu iena tano baia hoia, badina ia na United States bainela. Una ese dala e kehoa ma haida danu e ura edia tano baia hoi. Gabeai tau ta danu e ura ena tano baia hoia, bona ma haida e hagoadadiava edia tano bae hoihoilaidia. Guna ina hereva, “Ai China taumai ese emai tano na asia hoihoilaimu,” e gwauraia tauna ena tano danu a hoia. Gabeai, brens ena gabu matamatana ena bada ese brens gunana ena tano na nega toi e hereaia. Na diba momokani Iehova Dirava na e urava una na baine vara.

Laḡani 1950 ai, Betele famili lalonai lau na mero matamata. To hari, lau bona adavagu na Betele ai vada a noho daudau. Keriso na badinaiamu bona e henigumu ḡaukaradia na karamu dainai, asina lalohisihisimu. Momokani, ena be tamagu bona sinagu ese e lulugu, to Iehova ese ena ruma bese badana lalonai e abigu dae. Asina daradarava, herevana dahaka asainmen a abiva to Iehova ese emai dabu ḡaudia iboudiai na e heniva. Lau bona Nora ese Iehova a hanamoamu badina mai ena hebogahisi ida e durumai, bona ma haida a hagoadadiamu Iehova bae tohoa totona.​—⁠Mal. 3:10.

Nega ta Iesu ese tax gogo tauna ta ladana Mataio Levi, e boiria, eto: “Murigu ai ame raka.” Ia be dahaka e kara? “Ena ḡau iboudiai e rakatani, [Iesu] murinai e raka.” (Luka 5:27, 28) Lau danu unu na kara toma, bona mai kudougu idoinai ida ma haida na hagoadadiamu unu bae kara toma bena hahenamo momo bae davari.