1. Dahaka dainai bapatiso na mai anina bada? (Rau 23 ai laulau ba itaia.)

LAḠANI ta ta ai, Baibul stiuden tausen momo na e bapatisomu. Idia momo na matamata taudia. Reana hereva momokani lalonai e tubu. Oi danu idia ta, a? Bema oibe, a hanamomumu. Kristen taudia bae bapatiso na namo, bona una na mai anina bada hahemauri iabina totona.​—⁠Mat. 28:19, 20; 1 Pet. 3:21.

2. Dahaka dainai gwauhamata ikarana totona basio gari o basio daradara?

² Ena be bapatiso ese dala e kehoamu hahenamo momo bavabi, to mai ena maduna danu. Edena dala ai? Emu bapatiso dinana ai, oi ese ina henanadai, “Iesu Keriso ena boubou dainai, emu kara dika amo vada o helalo-kerehai bona oi sibomu Iehova vada o gwauhamata henia Iena ura ba karaia, a?” e heni neganai, oi na o haere, ‘Oibe.’ Emu bapatiso ese emu gwauhamata e hamomokania. Oi ese Iehova o gwauhamata henia ia ba lalokau henia bona iena ura bavatoa guna. Una na mai anina bada gwauhamatana. Una gwauhamata dainai ba lalohisihisi, a? Lasi. Iehova ba badinaia karana na abi hidi  maorona. Mani a laloa, Iehova ena amo e daudaumu tauna na Satana ese e biaguamu. Diabolo na se uramu ba mauri. Ia na be moalemu bema ia ida Iehova ena lohia siahuna bo dadaraiamu bona mauri hanaihanai helarona bo haboioamu.

3. Emu mauri Iehova enai o gwauhamatalaia dainai dahaka hahenamo o davari?

³ Emu mauri o gwauhamatalaia bona o bapatiso murinai o davari hahenamodia ba lalodia. Emu mauri na Iehova o henia dainai, mai emu abidadama ida bao gwa diba: “Iehova na lau badibadigu ai dainai lau na asina garimu: taunimanima ese ede bae hadikagu toma?” (Sal. 118:6) Oi na Dirava ena kahai o gini bona iena lalonamo o abia na hahenamo badana.

4, 5. (a) Edena dala ai gwauhamata ikarana na ta sibona ena maduna? (b) Ededia hekwakwanai na taunimanima iboudiai ese e davarimu?

⁴ Oi na bapatiso Kristen tauna ta dainai, emu hetura karana Iehova ida na dia tamamu sinamu daidiai ba hagoadaia. To, una na oiemu maduna hahemauri bavabia totona, ena be tamamu sinamu edia henari henunai dounu o nohomu. Dahaka dainai una ba laloatao na mai anina bada? Badina asi dibamu vaira negai be dahaka hekwakwanai bo davarimu. Heḡereḡere, bema oi na maraḡimu ai o bapatiso, o bada o laomu lalonai, emu hemami na be idaumu bona hahetoho bo davarimu. Laḡanina 18 kekenina ta na e gwa: “Natu ta na Iehova ena Witnes ta dainai basine badumu bema sikuli gabunai birthday kekena ta basine aniamu. To laḡani haida muridiai, mahuta hebou urana be goadamu neganai, namona na baine abia dae momokani hanaihanai Iehova ena taravatu ibadinadia karana na abi hidi maorona.”

⁵ To, dia memero kekeni mo hahetoho e davarimu. E bapatiso tataudia bona hahinedia danu, ḡau momo ese edia abidadama na e tohoamu. Heḡereḡere, headava lalonai e varamuhekwakwanaidia, gorere eiava moni ḡaukara. Momokani, taunimanima iboudiai​—⁠badadia bona maraḡidia​—⁠na ḡau momo ese edia abidadama Iehova enai e tohoamu.​—⁠Iak. 1:12-14.

6. (a) Edena dala ai emu gwauhamata Iehova enai na ḡau ta ese basine haidaua? (b) Filipi 4:11-13 amo dahaka o dibamu?

⁶ Emu abidadama ba hagoadaia totona, namona na ba helalotao emu gwauhamata Iehova enai na ḡau ta ese basine haidaua diba. Anina na oi ese ḡau iboudiai e havaradia Diravana o hamaoroa Ia ba hesiai henia hanaihanai, ena be turamu eiava tamamu sinamu ese Ia ihesiai henina karana bae rakatania. (Sal. 27:10) Namona na hanaihanai Iehova ba noia goada baine henimu, emu gwauhamata ba badinaia totona.​—⁠Filipi 4:11-13 ba duahi.

7. ‘Mai garimu bona mai heude-heudemu ida’ ihamaurimu ba tahua anina be dahaka?

⁷ Iehova na e uramu turana ai baola. To una hetura karana ba hagoadaia bona ihamaurimu dalana ba tahua totona, ba ḡaukara goada na namo. Filipi 2:12 na eto: “Mai garimui bona mai heude-heudemui ida ihamaurimui ba tahua.” Unu hereva ese e hahedinaraimu, emu hetura karana Iehova ida ba hagoadaia bona Ia ba badinaia hanaihanai dalana ba laloa na namo, ena be hahetoho bae vara. Sibomu emu goada ai na basio tabekau. Laḡani momo lalodiai Dirava e hesiai henia taudia haida na e moru. Una dainai, dahaka ba kara diba ihamaurimu dalana ba tahua totona?

8. Siboda eda stadi ai dahaka baita kara, bona dahaka dainai una na mai anina bada?

⁸ Iehova turana ai baitala daladia na rua​—⁠Ia baita kamonai henia bona baita hereva henia. Baibul istadilaina karana na Iehova ta kamonai heniamu dalana badana. Una anina na Baibul bona pablikeisen idauidau ta duahimu bona ta lalodia dobumu karana amo diba ta abimu. Unu ba kara toma neganai, ba helalotao Baibul istadilaina karana na dia sikuli ena eksam heḡereḡerena. Ia na dia hereva iboudiai ba lalotao eksam amo ba pasi totona. To, ia na na laolao ta heḡereḡerena, una laolao lalonai Iehova ena kara namodia bo dibadiamu. Una ese baine durumu Dirava ba raka henia kahi, bena Ia ese baine raka henimu kahi.​—⁠Iak. 4:8.

9. Ededia tulu namodia ese bae durumu sibomu emu stadi ba karaia totona?

⁹ Iehova ena orea ese tulu namodia momo e heḡaeḡaelai, emu stadi karana ba moalelaia totona. Heḡereḡere, jw.org ai “Teenagers” kahana ai, “Bible Study Activities” ese baine durumu Baibul sivaraidia ba diba totona. Danu, jw.org ai study guides kahana ai, “Baibul Ena Hahediba Maorodia be Dahaka?” ese baine durumu o abi daemu ḡaudia bavabidadama henidia totona. Unu stadi tuludia ese bae durumu diba emu abidadama ba gwauraia hedinarai. Emu stadi ba karaia daladia ma haida na April 2009 Awake! ai atikol ladana Young People Ask . . . How Can I Make Bible Reading Enjoyable?” ai bo davarimu. Ihamaurimu dalana ba tahua totona, stadi bona lalo dobu karana na mai anina bada.​—Salamo 119:105 ba duahia.

10. Dahaka dainai bapatiso Kristen tauna enai ḡuriḡuri karana na mai anina bada?

¹⁰ Siboda eda stadi karana amo Iehova ta kamonai heniamu, to ḡuriḡuri karana amo Ia ta hereva heniamu. Kristen tauna ta ese ḡuriḡuri karana na basine laloa maraḡi; eiava namo iabina totona ‘laki ḡauna ta’ ai basine halaoa. To, ḡuriḡuri na Ihavarada Tauna ida ta herevaherevamu karana. Iehova na e uramu emu hereva baine kamonai. (Filipi 4:6 ba duahi.) O lalohekwarahimu neganai, Baibul na e gwa,  “emu maduna na Iehova enai ba tahoa kau.” (Sal. 55:22) Una o abia daemu, a? Tadikaka bona taihu momo na ḡuriḡuri karana ese e durudia. Oi danu baine durumu diba!

11. Dahaka dainai hanaihanai Iehova baita hanamoa na namo?

¹¹ Iehova ena heduru baita noia mo na dia heḡereḡere. Baibul na e gwa: “Dirava ba hanamoa.” (Kol. 3:15) Nega haida eda hekwakwanai baita lalodia momo dainai, ta davarimu hahenamodia na basita lalodiamu. Dina ta ta ai o davarimu hahenamodia toi mani ba lalodia, bena unu hahenamo daidiai Iehova ba tenkiu henia. Laḡanina 12 ai e bapatiso kekenina ta ladana, Abigail, na e gwa: “Na laloamu ḡau iboudiai lalodiai Iehova sibona baita hanamoa na ḡau badana. Ia ese e henida harihari ḡaudia daidiai baita tenkiu henia na namo. Nega ta ini na lalo toma: Bema hari dina ta abi ḡaudia daidiai Iehova baita tenkiu henia, bona kerukeru unu ḡau ma baita abi loumu, dahaka ḡau ma haida daidiai baita tenkiu heniamu?” *

12, 13. Dahaka dainai Iehova ena kara namodia o mamidia dalana ba laloa na mai anina bada?

¹² King David na Dirava ena heduru amo hahetoho momo e haheaukalai, una dainai ena ane ai ini e gwa toma: “A mamia toho, bena ba diba, Iehova na namo; ia e abidadama heniamu tauna danu e moalemu.” (Sal. 34:8) Una siri ese e hahedinaraiamu Dirava ena kara namodia baita lalodia na namo. Baibul bona eda pablikeisen bo duahimu bona Kristen heboudia bo laomu neganai, Dirava ese ma haida e durudia daladia bo dibamu. To lauma dalana ai bo goada bo laomu neganai, Iehova ese e durumumu dalana ba laloa na namo. Edena dala ai Iehova ena kara namodia o mamidia toho?

¹³ Kristen taudia iboudiai ese Iehova ena kara namodia na vada e mamidia toho. Ia ese e vaveda Ia bona Natuna baita raka henidia kahi totona. Iesu na eto: “Tamagu, e siaigu Diravana, ese baine veria mai tauna mo sibona lau dekegu bainema diba.” (Ioa. 6:44) Unu hereva be emu ai e ḡuḡuru, a? Reana mero o kekeni ta na be gwaumu, ‘Iehova ese tamagu sinagu e veridia mai dainai, idia na badinadiamu.’ To emu mauri Iehova enai o gwauhamatalaia bona o bapatiso neganai, o hahedinaraia oi na o uramu Ia ba hetura henia. Hari Ia na mai dibana oi. Baibul na e gwaumu: “Tau ta ese Dirava baine lalokau henia, Dirava ese ia baine dibaia.” (1 Kor. 8:3) Namona na hanaihanai Iehova ena orea lalonai o nohomu hahenamona ba laloa bada.

14, 15. Edena dala ai haroro ḡaukara ese emu abidadama baine hagoadaia diba?

¹⁴ Iehova ena kara namodia ba mamidia toho dalana ma ta na, ia ese goada be henimumu ma haida vairadiai emu abidadama ba gwauraia hedinarai. Haroro ḡaukara ai bona sikuli gabudiai emu abidadama ba gwauraia hedinarai diba. Reana emu ai na auka sikuli gabudiai turamu ba haroro henidia. Badina asi dibamu idia ese oi be ede be lalomu tomamu. Danu reana bo garimu hutuma vairadiai ba haroro totona. To dahaka ese baine durumu?

¹⁵ Ḡau ginigunana na, ba laloa dahaka dainai o abi daemu ḡaudia na momokani. Study guides kahana, jw.org ai, be emu gado ai e hahanaidia, a? Bema o daradaramu, namona na nega bavato ba tahua totona. Una kaha ese be durumumu, o abi  daemu ḡaudia ba lalodia, dahaka dainai o abi daemu, bona o abi daemu ḡaudia be edena dala ai ma haida ediai ba herevalai diba. Bema o abi dae ḡaudia bo hamomokanimu bona bo heḡaeḡae namonamomu, bo uramu Iehova ladana ba harorolaia.​—⁠Ier. 20:8, 9.

16. Dahaka ese baine durumu emu abidadama ba gwauraia hedinarai totona?

¹⁶ Ena be bo heḡaeḡae namonamomu, to reana gari o hemarai dainai basio uramu emu abidadama ba gwauraia hedinarai. Laḡanina 18 taihuna ta, na laḡanina 13 ai e bapatiso. Ia na e gwa: “Na abi daemu ḡaudia na mai dibagu, to nega haida na auka baina gwauraidia hedinarai.” Una hekwakwanai be ede e hahanaia toma? Ia na eto, “Lau na herevahereva dalanai na haroromu. Egu klas taudia na e karamu ḡaudia e herevalaimu. Lau danu unu baina kara toma na namo. Una dainai e vara ḡauna ta na gwauraiava, heḡereḡere ‘Vanegai lau na Baibul na herevalaiava, bona . . . ’ Bena egu sivarai anina na herevalaiava. Ena be idia ida Baibul asia herevalaiava, to idia haida na e urava Baibul na hahedibalaiava dalana bae diba. Nega haida una na e henanadailaiava. Una dala na ḡaukaralaia hanaihanaiva neganai, idia na haroro henidiava. Bona una murinai na moalemu!”

17. Edena dala ai emu abidadama ba laloa karana ese baine durumu ma haida ba haroro henidia?

¹⁷ Ma haida bo matauraidiamu bona bo lalodia badamu neganai, idia na be kamonaimu. Laḡanina 17 taihuna ta, Olivia, na maraḡinai e bapatiso. Ia na eto: “Lau na nega iboudiai na gariva badina bema Baibul ba herevalaiamu, taunimanima na be laloamu edia tomadiho na hadikaiamu.” Gabeai Olivia ese ena lalohadai na e haidaua. Ia ese ena gari karana na se laloa, to ini e gwau toma: “Memero kekeni momo na asi dibadia Iehova ena Witnes taudia be ede bamona taudia. To idia na mai dibadia ita mo Witnes tauda. Una dainai eda kara ese be durudiamu bae kamonai eiava lasi. Bema ta hemaraimu o ta garimu dainai eda abidadama na basita gwauraia hedinaraimu, dahaka baine vara diba? Idia na reana be laloamu ta abi daemu ḡaudia na asita lalodia badamu. Eda gari karana dainai, idia na dia hemataurai dalanai ita be hereva henidamu. To, bema ta abi daemu ḡaudia na mai manauda ida bona herevahereva dalanai baita herevalaimu neganai, be matauraidamu.”

18. Ihamaurimu dalana ba tahua totona dahaka ba kara na namo?

¹⁸ Tame herevalaia heḡereḡerena, ihamaurimu dalana itahuna karana na maduna badana ta. Ba kara ḡaudia haida na, Baibul ba duahia bona ba laloa dobu, Iehova ba ḡuriḡuri henia, bona Ia ese e hanamomumu daladia ba lalodia. Unu bo kara tomamu neganai, emu hetura karana Iehova ida bo hagoadaiamu. Bona be durumumu ma haida vairadiai emu abidadama ba herevalaia totona.​—Salamo 73:28 ba duahia.

19. Dahaka dainai ihamaurimu dalana ba tahua totona ba ḡaukara goada na namo?

¹⁹ Iesu na e gwa: “Tau ta bema ura lau murigu ai bema raka, ia na sibona bema hedadarai, ena satauro bema huaia, lau murigu ai bema raka.” (Mat. 16:24) Una ese e hahedinaraiamu, Iesu ibadinana karana​—⁠gwauhamata bona bapatiso danu​—na Kristen tauna ena maduna. Una maduna dainai hari ina negai hahenamo momo bo davarimu bona Dirava ena tanobada matamatana ai mauri hanaihanai bo abiamu. Una dainai, namona na ba ḡaukara goada, ihamaurimu dalana ba tahua totona!