1. Bema baita lalomanokamu, dahaka baine vara diba?

DINA ta ta ita ese hekwakwanai idauidau ta davarimu bona ta hekwarahimu baita haheaukalaidia. To ta lalomanokamu neganai, reana be aukamu eda hekwakwanai baita hanaidia. Lalomanoka dainai, ta na be mamiamu ena mauri na asi anina bona basine moalemu. Hereva Lada-isidia 24:10 na e gwa: “Hekwakwanai dinana ai boma manoka-manoka, emu goada na maraḡi-maraḡi.” Momokani lalomanoka negadiai, baita hemamimu ita na asi goadada, bona eda hekwakwanai ihanaidia na auka.

2. Dahaka ese lalomanoka e havaraiamu, bona ina atikol ai dahaka baita herevalaimu?

² Ḡau idauidau ese lalomanoka e havaraiamu heḡereḡere lalohadai kereredia, eiava eda kerere ta lalodia momomu, bona gorere. Danu Iehova ena hesiai ḡaukara ai ta ura heniamu asainmen asita abiamu, eiava teritori ai taunimanima na asie uramu bae kamonai neganai reana ta lalomanokamu. Ina atikol ai lalomanoka baita hanaia daladia baita herevalaimu.

3. Lalohadai kereredia bona kerere ta lalo momomu neganai, dahaka ese baine duruda diba?

³ Lalohadai kereredia bona eda kerere ta lalo momomu dainai asita moalemu. Reana ta laloamu Iehova na basine uramu Paradaiso ai baita noho. Lalohadai unu bamodia na basita abi. Bema ta kereremu dahaka baita laloa na namo? Baibul na e gwaumu, taunimanima iboudiai “vada e kara dika.” (Roma 3:23) To Iehova na dia eda kerere e lalotaomu, bona mai dibana ita na dia ḡoevadae. Ia na Tama lalokauna ta bona e uramu baine duruda. Danu ia na e haheaukamu.  Ia na e itaiamu ita na ta hekwarahimu kara maorona baita karaia, bona lalohadai kereredia baita dadarai.​—Roma 7:18, 19.

4-5. Ioane Ginigunana 3:19, 20 ena hereva ese edena dala ai taihu rarua e durudia basie lalomanoka totona?

⁴ Mani Deborah bona Maria * edia ekspiriens aita laloa. Deborah maraḡinai ena famli ese na se kara namo heniava dainai e mamiava ia na ta ese se ura heniava. Bona nega momo e gwau heniava. Una dainai ia e bada neganai, e laloava ia na dia taunimanima namona. Kerere maraḡidia e karava neganai, e hemamiva ia na ḡau ta basine karaia namonamo diba. Maria enai danu hekwakwanai unu bamodia e vara. Varavarana ese e hahemaraiava. Una dainai e laloava ta ese ia na se lalokau heniava. Ia e bapatiso murinai danu e hemamiva ia na dia heḡereḡere Dirava ladana baine nemaia!

⁵ To, unu taihu raruosi na dounu Iehova e hesiai heniava. Dahaka dainai? Badina hanaihanai ḡuriḡuri amo Iehova enai edia hemami na e gwaurai hedinaraiva. (Sal. 55:22) Gabeai idia na e laloparara eda lalokau guba Tamana na mai dibana guna edai e vara ḡau dikadia daidiai, lalohadai kereredia baita abimu. To Dirava ese eda kara namodia na e itamu, ena be ita siboda ese unu na asita itamu.​—1 Ioane 3:19, 20 ba duahi.

6. Bema ta na kerere ta e karaia loumu ena hemami be ede bamona?

⁶ Ta na e uramu e manadalaia karana ta baine hadokoa. To una kara ma e karaia loumu neganai e lalohisihisimu. Oibe ta kara dikamu neganai, eda hemami na e dikamu. (2 Kor. 7:10) To dia namo una kerere mo baita laloa bena baitato: ‘Lau na dia heḡereḡere kara maorona ta baina karaia. Iehova ese egu dika na basine gwau taomu.’ Una na dia momokani, bona una lalohadai kererena dainai eda hesiai ḡaukara baine hadikaia diba. Hereva Lada-isidia 24:10 ena hereva heḡereḡerena, baita lalomanokamu neganai eda goada na be maraḡimu. To ḡuriḡuri amo Iehova ida ba “hereva hebou,” bona ba noia emu dika baine gwautao. (Isa. 1:18) Iehova na be itaiamu oi na mai kudoumu ibounai ida o helalo-kerehai neganai emu dika be gwautaomu. Danu elda ba hereva henidia. Idia na mai lalokaudia ida oi be durumumu ba goada lou totona.​—Iak. 5:14, 15.

7. Bema ta hekwarahimu kara dikana ta baita dadaraia, dahaka dainai basita lalomanoka?

⁷ France ai, elda tadikaka ta ladana, Jean-Luc ese edia kerere e lalo momomu taudia na ini e hagoadadia toma, eto: “Ena  be ta na e kereremu, to ena kerere dainai e sorimu bona e helalo-kerehaimu neganai, Iehova vaiaranai ia na kara maoromaoro tauna.” (Roma 7:21-25) Una dainai bema oi na o hekwarahimu kara dikana ta ba dadaraia basio lalomanoka. Ita iboudai na dia ḡoevadae dainai, Iehova ena hebogahisi baita abia na namo, una na Iesu ena mauri idavalaina boubouna amo e hahedinaraia.​—Efe. 1:7; 1 Ioa. 4:10.

8. Bema ta lalomanokamu daidia amo heduru baita abi diba?

⁸ Eda tadikaka taihu amo heduru baita abi diba! Bema ta uramu baita hereva henidia, idia na be hakalamu bona be hagoadadamu. (Her. 12:25; 1 Tes. 5:14) Nigeria ai, taihu ta ladana Joy na laḡani momo lalodiai e lalometau, ia na e gwa: “Bema tadikaka oreana mo lasi, basinama haheauka diba. Tadikaka bona taihu edia heduru ese e hamomokaniamu Iehova na egu ḡuriḡuri e haerelaimu. Idia amo na diba, lau ese danu lalomanoka taudia ma haida baina hagoadadia diba.” Namona na baita helalotao, tadikaka bona taihu na hanaihanai basie dibamu ita be heduru ta uramu eiava lasi. Una dainai, eda tadikaka bona taihu dekedia baitala bena idia amo heduru baita abi.

9. Salamo 41:3 bona 94:19 ese ede e hagoadada tomamu?

⁹ Iehova ba noia baine durumu. Bema gorere ta na laḡani momo lalodiai vada ta haheaukalaia, nega momo basita lalo maoromaoromu. Iehova ese ita na hoa dalanai eda gorere basine hanamoamu, to ia ese tauhalo bona goada be henidamu baita haheauka totona. (Salamo 41:3; 94:19 ba duahi.) Heḡereḡere heduru ta uramu negadiai Dirava ese eda tadikaka bona taihu be ḡaukaralaidiamu eda ruma ḡaukaradia bae kara, stoa ai eda ura ḡaudia bae hoi diba, eiava ita ida bae ḡuriḡuri hebou. Danu be durudamu Baibul ai tauhalo herevadia baita lalodia lou, heḡereḡere tanobada matamatana ai mauri namona baita moalelaiamu, basita goreremu, bona basita hisihisi loumu.​—Roma. 15:4.

10. Aksiden murinai dahaka ese Isang e durua basine lalohisihisi?

¹⁰ Isang, na Nigeria ai e nohomu, ia na aksiden ta e davaria murinai e paralais. Ena dokta ese e hamaoroa ia na basine rakamu. Isang na e gwa: “Na lalohisihisi bada herea.” To ia be dounu e lalohisihisiva eiava? Lasi! Dahaka ese e durua? Isang ma eto: “Lau na adavagu ida hanaihanai Iehova a ḡuriḡuri heniava bona Baibul a stadilaia hebouva. Ai na lalomai a hadai a davarimu hahenamodia baia lalodia, bona tanobada matamatana ai mauri namona baia laloa.”

11. Ena be Cindy na gorere badana ta e davaria, to edena dala ai dounu e moaleva?

¹¹ Cindy na Mexico ai e nohomu, bona dokta ese e hamaoroa, iena gorere ese baine hamasea diba. Ia be dahaka e kara una nega baine haheaukalaia totona? Hospele e laova negadiai, ena ura badana na ta baine haroro henia. Taihu na e gwa: “Una ese e durugu haida baina lalodia, dia egu opereisen, egu hisihisi bona gorere mo baina lalo. Lau na ini na kara tomava: Dokta bona nesi ida na herevaherevava lalonai, edia famili henanadaidia na karava. Bena ma nanadaidiava, dahaka dainai idia ese una ḡaukara aukana e abia hidi. Unu amo na dibava edena topik be idia kudoudia be hamareremu. Dokta bona nesi momo na e gwauva, vaevae gorere taudia na se henanadaimu, ‘Oi namo?’ Lau ese unu dokta bona nesi na lalodia badava dainai, e tenkiu  heniguva. Haida be edia fon namba eiava adres e heni. Na diba ina nega aukana lalonai Iehova ese e durugu bona lalomaino e henigu.”​—Her. 15:15.

12-13. Gorere eiava buruka taudia be ede e haroro tomamu, bona dahaka hahenamo e davari?

¹² Nega haida gorere taudia na e lalomanokamu, badina edia goada na dia heḡereḡere bae haroro. To idia momo na dala idauidau ai e haroromu. United States ai, taihu ta ladana Laurel na misini ta lalonai e hekureva, una ese e duruavu baine hahodi namonamo, laḡani 37 lalonai ia na una misini lalonai e hekure. Danu ia na kensa gorerena e abia, opereisen idauidau e abi, bona kopina ai gorere ma haida e davari. Ena be hekwakwanai badadia momo e davari, to una ese na se koua baine haroro totona. Ia ese nesi bona ia e nariava taudia e haroro henidiava. Dahaka e vara? Ia ese taunimanima 17 e durudia Baibul amo Iehova e dibaia! *

¹³ France ai e nohomu elda ta ladana, Richard ese ruma ai e nohomu gorere taudia eiava nursing home ai e nohomu burukadia daidiai haroro dalana namona ta e gwauraia. Ia na e gwa: “Teibol ta ai eda pablikeisin haida bae ato diba, unu amo raka hanai taudia ese bae ita bona bae abi. Una ese ruma-ta-ruma-ta ai basie haroro diba tadikaka bona taihu be hagoadadiamu.” Ruma ai e nohomu gorere taudia danu revareva amo eiava telefon amo bae haroro diba.

14. Edena dala ai ita edai King David na haheitalai namona?

¹⁴ Nega haida badi idauidau daidiai Iehova ena hesiai ḡaukara ai ta ura heniamu asainmen asita abiamu. Heḡereḡere, reana buruka o gorere, eiava ḡau ma haida daidiai kongrigeisin ai o sekit lalonai maduna asita abimu. Bema eda noho dalana na unu bamona, King David ena haheitalai amo ḡau ta baita dibamu. David na e ura Dirava ena dubu helaḡa baine haginia, to Iehova ese ta e abia hidi una ḡaukara baine karaia. David na Iehova ese e abia hidi tauna e urava baine durua dainai, mai lalona idoinai ida gold bona silver momo herea e heni. Ita edai David na haheitalai namona.​—2 Sam. 7:12, 13; 1 Sis. 29:1, 3-5.

15. Edena dala ai Hugues ese lalomanoka karana e hanaia?

¹⁵ France ai, tadikaka ta ladana Hugues na e gorerea dainai elda maduna e atoa diho, bona ruma ai ḡaukara maraḡidia baine kara na auka. Ia na eto: “Matamanai, na hemami lau na asi anigu bona na lalohisihisi bada herea. To gabeai  na abia dae egu goada na mai hetoana, bona egu goada heḡereḡerena ai Iehova dainai na karamu ḡaudia na moalelaimu. Lalogu na hadaiamu basina hesiku. Ena be Gideon bona tatau 300 na e hesiku, to e kwalimu. Una heḡereḡerena lau danu dounu baina hekwarahi.”​—Hah. 8:4.

16. Aneru edia haheitalai amo dahaka ta dibamu?

¹⁶ Dirava e badinaiamu anerudia na haheitalai namodia. Heḡereḡere, nega ta Iehova na King dikana, Ahaba, ikoina daladia e tahuva neganai, ia ese aneru e boiridia edia lalohadai bae gwaurai. Aneru haida ese edia lalohadai e gwaurai. To Dirava ese aneru tamona ena lalohadai e abia dae, bona e hamaoroa ena lalohadai heḡereḡerena baine kara. (1 Han. 22:19-22) O laloamu aneru haida e lalomanoka, bena reana e gwa, ‘Dahaka dainai egu nega na haorea egu lalohadai na gwauraia?’ Baita gwau diba idia na unu se lalo toma. Aneru iboudiai na e manaumu, bona e uramu hahenamo iboudiai na Iehova bae henia.​—Hah. 13:16-18; Apok. 19:10.

17. Bema asainmen ta asita abiamu dainai ta lalomanokamu, dahaka baita kara na namo?

¹⁷ Iehova ladana ta nemaia bona iena Basileia ta harorolaiamu na hahenamo badana. Asainmen baita abi eiava basita abi na dia ḡau badana, to Iehova ese ita na dava bada ḡauna ta bamona e lalodamu. Bema baita manaumu, Iehova, bona eda tadikaka taihu ese be lalokau henidamu. Una dainai Iehova ba noia baine durumu ba manau. Baibul ai Iehova e hesiai henia manau taudia edia haheitalai namodia ba lalo. Mai lalomu idoinai ida tadikakamu ba durudia.​—Sal. 138:6; 1 Pet. 5:5.

18-19. Ena be emu teritori ai taunimanima na asie kamonaimu, to emu moale be ede ba habadaia toma?

¹⁸ Emu teritori ai taunimanima na asie kamonaimu, eiava ruma ai so davaridiamu neganai, nega haida o lalomanokamu, a? Nega unu bamodiai, eda moale be ede baita habadaia toma? Dala namodia haida na maua ladana “Emu Haroro Ḡaukara Ba Hanamoa Daladia” ese e herevalai. Danu haroro ḡaukara ai lalohadai maorona baita abia na ḡau badana. Una anina be dahaka?

¹⁹ Dirava ladana bona iena Basileia dainai ta haroromu. Iesu ese e hahedinaraia  ḡoevaḡoeva mauri dalana ai be rakamu taudia na dia momo. (Mat. 7:13, 14) Haroro ḡaukara ai Iehova, Iesu, bona aneru ida ta ḡaukara heboumu na hahenamo badana. (Mat. 28:19, 20; 1 Kor. 3:9; Apok. 14:6, 7) Iehova sibona ese kudou maoro taudia e veridiamu. (Ioa. 6:44) Una dainai bema ta ese sivarai namona se abia daemu, reana nega ma ta ai be kamonaimu.

20. Edena dala ai Ieremia 20:8, 9 ese be durudamu lalomanoka karana baita hanaia?

²⁰ Peroveta tauna Ieremia amo ḡau momo baita dibamu. Ia ena teritori ai momo na asie kamonaiva. Bona “dina idoinai” taunimanima ese e gwau heniava bona e kirikirilaiava. (Ieremia 20:8, 9 ba duahi.) Nega ta ia na e lalomanoka dainai se ura baine haroro. To una ese ia na se koua. Dahaka dainai? Badina Ieremia enai “Iehova ena hereva” na lahi e arava na heto, bona baine haheaukalaia na auka! Ita ediai danu unu be vara tomamu, bema dina ta ta Baibul baita stadilaiamu bona baita laloa dobumu. Unu amo haroro ḡaukara baita moalelaiamu, bona reana taunimanima ese ita na be kamonai henidamu.​—Ier. 15:16.

21. Edena dala ai lalomanoka karana baita hanaia diba?

²¹ Matamanai tame herevalaia hahinena, Deborah na e gwa: “Satana ese e ḡaukaralaiamu tulu badana ta na lalomanoka karana.” To Iehova vairanai Satana ese e ḡaukaralaimu ḡaudia na asi siahudia. Badi idauidau daidiai o lalomanokamu neganai, Iehova ba noia baine durumu. Unu amo be durumumu lalohadai kereredia, bona kerere ilalo momo karana bo hahanaimu, bona emu gorere bo haheaukalaiamu. Danu be durumumu asainmen iabidia karana bona haroro ḡaukara ai lalohadai maorona bavabia totona. O lalohadailaimu ḡaudia na Tamamu guba ai e nohomu enai ba herevalai. Iena heduru amo lalomanoka karana ba hanaia diba.