Lasi, Baibul eiava histori bukadia ai hereva unu bamona ta asie gwauraia.

Baibul momo ese una siri e hahanaia dalana dainai, haida na e laloamu Paulo ena nega ai taunimanima na mase taudia daidiai e ha bapatisodiava. Heḡereḡere, Baibul haida na e gwa: “Hari, bema toreisi lou na lasi, e mase taudia daidiai e bapatiso taudia be dahaka be karamu?”

To, mani Baibul mai dibadia namonamo taudia rarua edia hereva aita haerodia. Dr. Gregory Lockwood na e gwa, Baibul eiava histori ese se hahedinaraia ta na e mase tauna ta dainai bapatiso e abi. Una heḡereḡerena, Profesa Gordon D. Fee na e gwa, Baibul eiava histori ai bapatiso unu bamona ta se herevalaia. Bona ma e gwa, New Testament ai, bona Kristen ginigunadia edia nega ai, eiava aposetolo e mase muridiai dubu idauidau ese kara unu bamona ta se herevalaia.

Iesu ese ia murinai e rakava taudia na e hamaorodia eto: “Bese iboudiai hahediba ai ba halaodia, bona  . . , ba ha bapatisodia. Ba hadibadia danu, na henimui haheḡanidia iboudiai bae badina.” (Mat. 28:19, 20) Ta na bapatiso do se abi lalonai, ia ese Iehova bona Ia Natuna bae dibadia, bae abidadama henidia, bona bae badinadia na namo. Mase taudia na unu basie kara toma dibamu. Bona Kristen tauna ta na mase tauna ta dainai basine bapatiso dibamu.​—Koh. 9:5, 10; Ioa. 4:1; 1 Kor. 1:14-16.

Una dainai Paulo ena hereva anina be dahaka?

Kristen taudia haida na e gwauva mase taudia na basie toreisi loumu. (1 Kor. 15:12) Paulo ese una lalohadai na e hakoikoia. Ena be ia na dounu mauri, to e gwauva dina ta ta ia na kahirakahira bema mase. Paulo na hekwakwanai idauidau e davari, to e abia dae vaitani ena be baine mase, ia na guba ai baine toreisi lou, Iesu enai e vara heḡereḡerena.​—1 Kor. 15:30-32, 42-44.

Namona na Korinto taudia na bae laloparara ena be idia na e horodia Kristen taudia, to idia danu dina ta ta hahetoho be davarimu bona be masemu bena gabeai be toreisi loumu. Una dainai ‘Keriso Iesu ladana ai e bapatiso’ neganai, idia na ‘ena mase ai vada e bapatiso.’ (Roma 6:3) Anina na Iesu heḡereḡerena, idia na hahetoho be davarimu bona be masemu bena guba ai be toreisi loumu.

Iesu na ranu ai e bapatiso bena laḡani rua muridiai, ena hahediba taudia rarua e hamaorodia, eto: “Lau bae bapatisolaigu bapatisona umui danu bae bapatisolaimui.” (Mar. 10:38, 39) Iesu na dia una negai ranu ai e bapatiso karana e herevalaia. Iena hereva anina na Dirava baine badinaia ela bona baine mase. Paulo na eto, e horodia taudia na ‘bae hisihisi hebou, bena ia ida hairaidia bae abi hebou.’ (Roma 8:16, 17; 2 Kor. 4:17) Una dainai idia danu bae mase, unu amo guba toreisi louna bae abia.

Una dainai Paulo ena hereva anina korikori bina: “Bema mase taudia na basie toreisi lou, mase lalonai bapatiso e abi taudia be ede heto? Bema mase taudia na basie toreisi lou, dahaka dainai bapatiso unuhetomana e abiamu?”