1. Iesu ese ia murinai e raka taudia na mamoe ida e haheḡereḡeredia badina ta be dahaka?

IESU ese ia bona murinai e rakamu taudia edia kahikahi karana na mamoe nari tauna bona ena mamoe edia kahikahi karana ida e haheḡereḡerea. (Ioa. 10:14) Una haheḡereḡere karana na maoro. Mamoe na mai dibadia ireḡudia tauna bona ia gadona mo be kamonaimu. Loaloa tauna ta ese una na e dibaia. E gwa: “Ai na a ura mamoe haida laulaudia baia kara dainai a ura dekemai baema. To, dekemai na asiema badina ai gadomai na asi dibadia. Bena, mamoe nari meromerona ta e raka kau, ia e boi neganai idia na ia murinai e raka.”

2-3. (a) Iesu murinai e rakamu taudia ese edena dalai e hahedinaraiamu ia gadona na e kamonaimu? (b) Ina atikol bona atikol gabenai dahaka baita herevalaimu?

² Una loaloa tauna enai e vara ḡauna amo ita ese Iesu ena hereva, ena mamoe eiava ena hahediba ediai, ta laloamu. Ia na e gwa, idia ese “gadogu bae kamonai.” (Ioa. 10:16) To Iesu na guba ai. Edena dalai ita na ia gadona ta kamonaimu? Ita Biaguda gadona baita kamonai dalana badana na, ena hahediba herevadia na eda mauri ai baita badina.​—Mat. 7:24, 25.

³ Ina atikol bona atikol gabenai, Iesu ena hahediba herevadia haida baita herevalaimu. Baita itaiamu, Iesu ese e hadibada ḡau haida be basita kara a ḡau haida be baita kara. Ina atikol ai, mamoe nari tauna namona ese e haḡanida, basita kara ḡaudia rua baita herevalaimu.

4. Luka 12:29 ena hereva heḡereḡerena, dahaka ese lalo daradara baine havaraia diba?

⁴ Luka 12:29 ba duahia. Iesu ese ia murinai e rakava taudia e haḡanidia, tauanina ḡaudia ai ‘lalodia basie daradara’ eiava basie lalohekwarahi. Ita na mai dibada Iesu ena sisiba na nega iboudiai aonega e havaraiamu bona maoro. Ta uramu baita badinaia to reana nega haida na auka. Dahaka dainai?

5. Dahaka dainai haida na tauanina ḡaudia daidiai e lalohekwarahimu?

 ⁵ Haida na tauani dalanai idurudia ḡaudia​—aniani, dabua, bona ruma daidiai e lalohekwarahimu. Reana idia e nohomu hanuana ai, moni ena siahu na maraḡi. Una dainai, edia moni na dia heḡereḡere edia ruma bese bae naria. Eiava ruma bese lalonai moni ḡaukara e karamu tauna na e mase, una dainai moni dalanai ruma bese taudia na da asi idurudia. COVID-19 pandemic dainai, momo edia moni ḡaukara na e haboio. (Koh. 9:11) Bema unu eiava metau ma haida ta davarimu, edena dalai Iesu ena haheḡani basita lalohekwarahi baita badinaia?

6. Aposetolo Petro enai e vara ḡauna ta mani a herevalaia.

⁶ Nega ta, aposetolo Petro bona aposetolo ma haida na vanaḡi ta ai Galilea Gohuna ai, una neganai lai na bada dainai hurehure na e bada, bena Iesu e itaia gohu kopina amo e raka e laova. Petro na eto: “Lohiabada e, bema oi be boma haduagu, gohu kopina amo bama vasi.” Iesu ese e boiria eto “aoma” neganai, Petro na vanaḡi amo e diho bena “gohu kopina ai e raka matama, Iesu dekena bainela.” Mani gabeai e vara ḡauna aita laloa. “Lai e itaia, bena vada e gari, e maloa matama, bena e lolo, eto, Lohiabada e, ame hamaurigu.” Iesu ese imana e toia roro bona e hamauria. Namona na baita  laloatao, ena be hurehure na bada to Petro na gohu latanai e raka badina ia matana na Iesu enai mo dainai. To Petro ese hurehure e itadia neganai, e gari bena e maloa matama.​—Mat. 14:24-31.   

7. Petro ena haheitalai amo dahaka ta dibamu?

⁷ Petro ena haheitalai amo diba baita abimu. Petro na vanaḡi amo e diho bena gohu latanai e gini neganai, ia na se lalo hurehure dainai baine gari bena baine maloa. Ia na e ura ranu latana amo baine raka bainela bona Biaguna baine hedavari henia. To hurehure e laloa bada dainai, Iesu na da se raraia tarika-tarika. Momokani, ita na ranu latanai na basita raka dibamu, to eda abidadama be tohoamu hahetohodia baita davarimu. Bema ita ese Iehova bona ena gwauhamata baita matadia reamu o basita lalodia badamu, lauma dalanai baita maloamu eiava baita manokamu. Herevana eda mauri ai hurehure heḡereḡeredia hahetohodia baita davarimu, to namona na Iehova baita laloa bona baita abia dae Ia na heḡereḡere ita baine duruda. Una be ede baita karaia diba toma?

8. Dahaka ese baine duruda diba tauanina ḡaudia daidiai basita lalohekwarahi momo?

⁸ Bema basita lalohekwarahimu, to Iehova baita abidadama heniamu, namo baita davarimu. Ba helalotao, Tamada lalokauna Iehova na e gwauhamata tauanina dalanai be naridamu, bema lauma ḡaudia baita ato gunamu. (Mat. 6:32, 33) Una gwauhamata na nega momo herea vada e haḡuḡurua. (Deu. 8:4, 15, 16; Sal. 37:25) Bema Iehova ese manu bona tano heraheradia e naridiamu, baita ani o baita kara ḡaudia daidiai basita lalohekwarahi na namo! (Mat. 6:26-30; Fili. 4:6, 7) Lalokau dainai tama sina ese tauanina dalanai natudia e naridiamu heḡereḡerena, lalokau dainai Tamada gubai e nohomu ese tauanina dalanai ena taunimanima baine naridia diba. Oibe, baita abia dae momokani Iehova ese ita na be naridamu!

9. Tadikaka ta adavana ida edia ekspiriens amo dahaka o dibamu?

⁹ Mani haheitalai ta aita itaia, una ese be hahedinaraiamu Iehova ese tauanina dalanai be narida dibamu. Fultaim hesiai ḡaukara e karamu tadikakana ta adavana ida na, edia motuka amo hora ta mai kahana e heau, refugee e nohomu gabunai taihu haida e ha’udadia, hebou baela. Tadikaka na e gwa: “Hebou murinai, taihu na a boiridia baia aniani hebou, to a laloparara ai na asi emai aniani baia henidia.” Bena dahaka e vara? Tadikaka na ma e gwa: “Ruma ai a kau neganai, emai iduara vairanai na shopping baege badadia rua heheato, aniani amo e honu. Asi dibamai daidiai ese e atodia. Iehova ese e narimai.” Gabeai, una tadikaka adavana ida edia motuka na e dika. Una motuka na edia hesiai ḡaukara ai e ḡaukaralaiava, to asi edia moni bae hanamoa lou. Motuka na e laohaia motuka kara gabuna, to e tua tabe badina davana na do asie heni, tau ta na ema bena e henanadai: “Una be daika ena motuka?” Tadikaka na e gwa una na iena motuka bona ihanamona totona e laohaia. Una tau ese tadikaka e hamaoroa: “Asio laloa. Lau adavagu na e uramu motuka ini bamona bona ina na iena ura kalana. Davana be hida?” Una tau ese e hoia neganai tadikaka ena moni na da heḡereḡere motuka ma ta baine hoia. Ia na e gwa: “Emai moale ena bada na basina gwauraia hedinarai dibamu. A diba una na se vara kava. To una na Iehova ese ai e durumai dalana.”

10. Edena dalai Salamo 37:5 ese e hagoadadamu tauanina ḡaudia daidiai na basita lalohekwarahi?

¹⁰ Bema mamoe nari tauna namona ena hereva baita kamonai bona tauanina ḡaudia daidiai basita lalohekwarahi kava, baita abia daemu Iehova ese ita na be naridamu. (Salamo 37:5 ba duahia; 1 Pet. 5:7) Mani  paragraf 5 ai e herevalai hekwakwanaidia aita lalodia. Reana Iehova ese ruma bese kwarana eiava ita eda bosi  be ḡaukaralaiamu dina ta ta ai eda dabu ḡaudia baine heni. Bema ruma bese kwarana na dia heḡereḡere eiava eda moni ḡaukara baita haboioamu, Iehova ese dala ma haida ai be naridamu. Ta diba momokanimu ia ese be durudamu. Hari, mamoe nari tauna namona ese ita e haḡanida basita karaia ḡauna ma ta baita herevalaiamu.

11. Mataio 7:1, 2 ena hereva heḡereḡerena, Iesu ese e hamaoroda dahaka basita kara, bona dahaka dainai una na auka?

¹¹ Mataio 7:1, 2 ba duahi. Iesu na e diba taunimanima na dia ḡoḡoevadae bona nega momo haida edia kerere e lalo badamu. Una dainai ia na e gwa: “Basio hahemaoro.” Reana baita hekwarahimu tadikaka taihu basita hahemaoro henidia totona. To, nega haida una na be aukamu badina ita na kara dika tauda. Bema ta itaiamu ita ese ma haida ta maumauraidiamu, dahaka baita kara na namo? Iesu baita kamonai henia, bona baita hekwarahi haida na basita hahemaoro henidia.

12-13. Edena dalai Iehova ese King David e laloa dalana ese be durudamu haida basita hahemaoro henidia?

¹² Bema Iehova ena haheitalai baita laloa dobumu, namo baita davari dibamu. Ia na taunimanima edia kara namodia e lalo badamu. Una na Ia ese King David, kara dika badadia e kara tauna, e kara henia dalana amo baita itaiamu. Heḡereḡere, David na Bataseba ida e heudahanai, bona dala e kara una hahine adavana danu e hamasea. (2 Sam. 11:2-4, 14, 15, 24) Una dainai, David na dia ia sibona mo to ena ruma bese bona ia adavana ma haida danu e hahisihisidia. (2 Sam. 12:10, 11) Nega ma ta ai, David ese Israel ena tuari oreana ai tatau e duahidia neganai e hahedinaraia Iehova na se abidadama henia. Reana e hekokoroku bona e lalo ena tuari orea ena bada na heḡereḡere. Una dainai dahaka e vara? Israel taudia 70,000 heḡereḡerena na daihanai gorerena ai e mase.​—2 Sam. 24:1-4, 10-15.

¹³ Bema una negai oi na Israel ai boma noho, David be ede boma laloa toma? Boma hahemaoro henia boma gwau ia na dia heḡereḡere Iehova ena hebogahisi baine abia, a? Iehova na unu na se lalo toma. Ia ese David ena abidadama karadia iboudiai bona ena helalo-kerehai karana e lalodia bada. Una dainai, David ena dika na e gwaudiatao. Iehova na mai dibana David ese ia na e lalokau henia badava bona e urava kara maorona baine karaia. Ta moalemu badina Iehova ese eda kara namodia na e lalodia badamu.​—1 Han. 9:4; 1 Sis. 29:10, 17.

14. Kristen taudia be dahaka ese be durudiamu ma haida basie hahemaoro henidia?

¹⁴ Bema Iehova na e dibamu ita na kara dika taudia dainai baita kereremu, ita danu ma haida na unu baita lalopararalaidia toma na namo bona edia kara namodia baita lalodia bada. Ita taunimanima na haida edia kerere ta ita haraḡamu bona ta hahemaoro henidiamu. To, Iehova be tohotohoamu tauna ese tadikakana edia kerere na be itamu, to dounu idia ida be ḡaukara hebou namonamomu. Tano amo e abiamu diamond na asi hairaina, to laloparara tauna ese murimurina toana na se laloa badamu, a diamond bae utua bona bae polesia neganai baine hairai karana e laloa badamu. Iehova bona Iesu heḡereḡeredia, namona na taunimanima toadia na basita lalo to edia kara namodia hari.

15. Edena dalai taunimanima edia mauri dalana baita haeroa karana ese be durudamu basita hahemaoro henidia?

¹⁵ Taunimanima edia kara namodia ta lalodiamu karana ese e durudamu heḡereḡerena, dahaka ese danu baine duruda diba haida basita hahemaoro henidia? Namona na edia noho dalana ba laloa. Mani ina haheitalai a laloa. Dina ta, dubu lalonai, Iesu ese vabu ogoḡamina  ta e itaia moni maraḡidia rua maua ai e udadia. Ia na se gwa: “Dahaka dainai ia na moni momo se uda?” Iesu ese una vabu e atoa monina ena bada na se laloa, to una moni e atoa badina bona ena mauri dalana e laloa bona ena kara dainai e hanamoa.​—Luka 21:1-4.

16. Veronica enai e vara ḡauna amo dahaka o dibamu?

¹⁶ Taihu ta ladana Veronica enai e vara karana baita laloamu neganai, haida edia mauri dalana baita laloa bada ena namo baita dibamu. Ia e laomu kongrigeisin ai, asi adavana taihuna ta mai natuna ida danu e laomu. Veronica na e gwa: “Na laloava idia na nega haida mo e hebouva bona e harorova. Una dainai na lalodia kerereva. To, nega ta una taihu ida a haroro hebou. Bena ia ese e hamaorogu natuna ena kwara gorere dainai nega haida enai na auka. Ia na e hekwarahiva tauanina dalanai edia dabu ḡaudia bae abi bona lauma dalanai bae goada. Nega haida, natuna ena gorere dainai kongrigeisin ma ta ai e ha hebouva.” Veronica na e gwa: “Asina laloparara ia na e hekwarahi bada hereava. Hari, una taihu na laloa badamu bona na matauraiamu badina e hekwarahimu Iehova baine hesiai henia.”

17. Iakobo 2:8 ese e hadibadamu dahaka baita kara, bona edena dalai baita karaia?

¹⁷ Bema ta dibamu tadikakada ta na ta hahemaoro henia, dahaka baita kara na namo? Namona na baita helalotao ita ese tadikakada baita lalokau henidia na namo. (Iakobo 2:8 ba duahia.) Danu, namona na Iehova baita  ḡuriḡuri henia goadagoada, baita noia baine duruda haida basita hahemaoro henidia. Eda ḡuriḡuri heḡereḡerena, namona na nega baita ato ta laloa kereremu tauna baita hebamo henia. Unu amo ia baita dibaia namonamomu. Reana baita noia ia ida baita haroro hebou eiava baita aniani hebou. Tadikakada ta hetura heniamu lalonai, Iehova bona Iesu edia haheitalai baita tohotohoa bona iena kara namodia baita lalodia. Una dala amo, baita hahedinaraia ita na mamoe nari tauna namona ena haheḡani, basita hahemaoro, ta badinaiamu.

18. Edena dalai baita hahedinaraia mamoe nari tauna namona gadona na ta kamonaimu?

¹⁸ Mamoe ese inaridia tauna gadona e kamonaimu heḡereḡerena, Iesu murinai e rakamu taudia ese ia gadona e kamonaimu. Bema tauanina ḡaudia basita lalohekwarahilaimu bona haida basita hahemaoro henidiamu, Iehova bona Iesu ese eda kara dainai be hanamodamu. Ena be ita na “orea maraḡi” eiava “mamoe idaudia,” to namona na hanaihanai mamoe nari tauna namona gadona baita kamonai bona baita badinaia. (Luka 12:32; Ioa. 10:11, 14, 16) Atikol gabenai, Iesu ese murinai e raka taudia e hamaorodia bae badina ḡaudia rua baita herevalaimu.