Iesu na gabeai tanobadai ia murinai e rakava taudia ida bae ḡaukara hebou namonamo diba daladia na una negai e diba. Edena dalai Iesu ena haheitalai amo namo baita abimu? Iena haheitalai baita haeroa namonamomu neganai, dala toi baita dibamu, una ese be durudamu ḡaukara hebou tauna namona ai baita lao dibamu. Bona be durudamu tadikakada ida lalotamona ai baita ḡaukara hebou namonamomu.

Ḡaukara hebou tauna namona na ia ida e ḡaukara heboumu taudia e lalodia badamu bona se uramu vairadiai baine heaḡi. Iesu ese una manau karana na Tamana amo e dibaia. Ena be Iehova sibona na baita gwauraia diba ḡau iboudiai Ihavaradia Tauna, to ia ese Natuna ena ḡaukara bona ia ida e ḡaukara hebouva karana na e gwauraidia hedinarai. Dirava ena hereva amo una na ta dibaiamu: “Taunimanima aita karaia ita heida-idada.” (Gen. 1:26, NWT) Iesu na Iehova ese mai ena manau ida unu e laloa tomava karana na e laloa bada.​—Sal. 18:35.

Iesu tanobada ema neganai, Iehova heḡereḡerena manau karana e hahedinaraia. E kara ḡaudia dainai taunimanima ese e hanamoa neganai, ia na Dirava e hanamoa. (Mar. 10:17, 18; Ioa. 7:15, 16) Iesu na mai mainona ida ena hahediba ida e ḡaukara hebouva, bona idia na ia turana heḡereḡeredia e lalodia, dia hesiai taudia. (Ioa. 15:15) Danu aedia e huri, manau karana baine hadibadia totona. (Ioa. 13:5, 12-14) Iesu heḡereḡerena,  ita danu ta ḡaukara heboumu taudia baita lalodia bada, to dia siboda eda namo mo baita lalo. Bema baita ‘hemataurai hehenimu’ bona hahenamo iabina lalohekwarahina basita karaiamu, eda ḡaukara na baita haḡuḡurudiamu.​—Roma 12:10.

Manau tauna na e lalopararamu “hahealo taudia na hoho negana ai” ḡau momo e ḡuḡurumu. (Her. 15:22) Ena be ḡau haida ikaradia na mai dibada eiava eda diba na bada, to namona na baita helalotao taunimanima na ḡau iboudiai na asi dibadia. Iesu danu e gwau hedinarai ia na ḡau haida na asi dibana. (Mat. 24:36) Danu, ia na e urava ena hahediba, dia ḡoevadae taudia, e diba ḡaudia bona edia lalohadai baine diba. (Mat. 16:13-16) Ena kara dainai ia ida e ḡaukara hebouva taudia na ia ida ḡaukara hebou karana na e moalelaiava! Una heḡereḡerena, bema mai eda manau ida baita abia daemu ḡau haida na asi dibada, bona haida edia lalohadai e gwauraimu neganai baita hakalamu, mai mainoda ida baita ḡaukara heboumu bona ḡau iboudiai na baita haḡuḡurumu.

Elda taudia e ḡaukara heboumu neganai, Iesu ena manau karana bae tohotohoa na mai anina bada. Namona na bae helalotao elda oreana lalonai lauma helaḡa na idia ta baine ḡaukaralaia diba. Edia hebou lalonai, bema elda taudia na edia lalohadai igwauraina ai basie garimu bona basie hemaraimu, iboudiai ese abi hidi maorodia be karamu, unu amo kongrigeisin na hahenamo be abimu.

Ḡaukara hebou tauna namona na ḡaukara hebou taudia baine kara henidia namonamo totona, ḡau be haero namonamo gunamu. Ia na basine kara aukamu bona be lalopararamu. Iesu na Tamana ese ḡau ihaerodia namonamo karadia na nega momo e ita. Heḡereḡere, Iehova ese e siaia taunimanima na mase iḡuina amo e ruhadia.​—Ioa. 3:16.

Iesu na dala maorodia bona nega maorodia ai laloparara karana e hahedinaraia. Foenikia hahinena e durua dalana mani aita laloa, ena be ia ema badina na Israel taudia baine durudia to una idau bese hahinena na e durua. (Mat. 15:22-28) Danu ia ese ena hahediba taudia edia mauri na e haerodia namonamo dainai, idia edia amo ḡau momo na se tahu. Turana namona Petro ese taunimanima vairadiai e ḡorea neganai, Iesu ese ena dika na e gwauatao. Gabeai, ia ese Petro na maduna badadia e henia. (Luka 22:32; Ioa. 21:17; Apos. 2:14; 8:14-17; 10:44, 45) Iesu ena haheitalai ese e hahedinaraia ḡoevaḡoevamu,  bema haida edia namo baita lalomu, taunimanima iboudiai na be dibamu ita na ḡau ihaerodia namonamo taudia.​—Fili. 4:5, NWT.

Danu, ḡau ihaerodia namonamo karana ese be hagoadadamu taunimanima idauidau ida baita ḡaukara hebou namonamo dibamu. Iesu na taunimanima e kara namo henidiava dainai, ia e mama heniava taudia na e gwauva, “ia na tax gogo taudia bona kara dika taudia turadia” badina idia ese ena sivarai na e kamonaiava. (Mat. 11:19) Ita be Iesu heḡereḡerena taunimanima idauidau ida baita ḡaukara hebou diba, eiava? Tadikaka Louis, guna seket ḡaukara e kara bona Betele ai taunimanima idauidau ida e ḡaukara hebou, na e gwa: “A ḡaukara hebou taudia iboudiai na nadi idauidau amo e karaia habana ta ida na haheḡereḡeredia. E heato kerere nadidia baita atodia maoromaoromu neganai, ita na haba maorona baita haginia dibamu. Lau danu egu kara haida na haidau, unu amo ḡaukara hebou taudia ida a ḡaukara hebou namonamo.” Una na haheitalai namona!

Ededia negai eda kongrigeisin ai baita ḡaukara hebou karana baita hahedinaraia diba? Haroro grup ai unu baita kara toma diba. Reana baita ḡaukara heboumu pablisadia edia ruma bese madunadia na i’idau ita eda amo, eiava idia na eregabe o iahu. Unu bamona taudia edia mauri dalana o goada baita haeroa bena una heḡereḡerenai eda ḡaukara dalana baita haidaua, unu amo baita durudia edia hesiai ḡaukara bae moalelaia.

Ḡaukara hebou tauna namona na e noho heḡaeḡaemu ‘enai miadia ḡaudia na ma haida e henidiamu.’ (1 Tim. 6:18, NWT) Iesu na Tamana ida e ḡaukara hebouva neganai, e itaia Iehova ese ḡau na hehuni ai se karava. Iehova ese “guba e karaia negana ai” Iesu na unuseni bona ḡau momo iena amo e diba. (Her. 8:27) Gabeai, Iesu na Tamana ena amo e “kamonai herevadia iboudiai” na mai moalena ida ena hahediba taudia e hadibalaidia. (Ioa. 15:15) Una haheitalai ta laloamu neganai, ita danu namona na baita noho heḡaeḡae eda diba bona ta diba ḡaudia na ta ḡaukara heboumu taudia baita hadibalaidia. Momokani, ḡaukara hebou tauna namona na ia ida e ḡaukara heboumu taudia basine biagudia totona, ia e diba ḡaudia na idia be hadibalaidiamu. Bona mai moalena ida unu be kara tomamu.

Danu ita ese ḡaukara hebou taudia na baita hagoadadia. Ta ese eda hekwarahi e itaiamu bona mai kudouna ibounai ida e hanamodamu neganai, kudouda na e hamoaleamu, ani? Iesu na nega e ato ia ida e ḡaukara hebouva taudia ediai e itaia ḡau namona dainai e hanamodia. (Mataio 25:19-23 ba haheḡereḡerea; Luka 10:17-20.) Bona e hamaorodia idia ese ia e kara ḡaudia “e hereadiamu karadia danu” bae kara. (Ioa. 14:12) Ia do se hamasea hanuaboinai, ena aposetolo taudia e hanamodia e gwa: “Umui be e dibaḡaniguva negadia ai dekegu ai o noho tarika-tarikava taumui.” (Luka 22:28) Mani a laloa ena hereva ese e hagoadadia bada bae ḡaukara! Ita danu bema nega baita ato ta ḡaukara heboumu taudia baita hanamodiamu, idia na be moalemu bona ḡau momo be haḡuḡurumu.

Tadikaka ladana Kayode na e gwa: “Ḡaukara hebou tauna namona na dia baine ḡoevadae, to ia ida e ḡaukara heboumu taudia baine hamoaledia bona edia maduna baine haharaḡaia.” Oi be ḡaukara hebou tauna unu bamona, a? Reana tadikaka o taihu haida ba nanadaidia bema oi na ḡaukara hebou tauna namona eiava lasi. Bema idia na e moalemu oi ida o ḡaukaramu, Iesu ena hahediba ia ida e ḡaukara hebouva heḡereḡerena, oi na Paulo bamona bo gwau dibamu: “Ai na umui ida a ḡaukara heboumu emui moale ikahana.”​—2 Kor. 1:24, NWT.