1. Iehova be edena dala ai ena hesiai taudia edia ḡuriḡuri e haerelaimu?

 OI BE mai dibamu Iehova ese oi na baine ḡaukaralaimu diba ta ena ḡuriḡuri baine haerelaia totona, a? Heduru ba heni diba, ena be oi na elda, hesiai tauna, painia, eiava kongrigeisin pablisa. Iehova e lalokau heniamu tauna ta na heduru totona ia e noiamu neganai, nega momo Iehova ese elda taudia bona abidadama hesiai taudia ma haida e ḡaukaralaidiamu ia ‘lalona bae hagoadaia.’ (Kol. 4:11, NWT) Ta moalemu badina una dala ai Iehova bona tadikakada baita hesiai henidia diba! Daihanai gorere, disasta, eiava daḡedaḡe negadiai tadikakada baita durudia diba.

2. Dahaka dainai daihanai gorerena ta e varamu neganai haida idurudia na auka?

² Daihanai gorerena ta e varamu neganai, baita heduru heheni dalana na e aukamu. Heḡereḡere, ta uramu turada baita vadivadidia, to gorere dainai asita laomu. O reana ta uramu moni ai e hekwakwanaimu taudia baita boiridia baita aniani hebou, to una na auka. O reana ta uramu haida baita durudia to auka badina eda ruma bese taudia danu e hisihisimu. To dounu, ta uramu tadikakada baita durudia, bona Iehova na be moalemu bema idurudia totona baita kara dibamu ḡaudia ta  karamu. (Her. 3:27; 19:17) Dahaka baita kara diba?

3. Desi ena kongrigeisin ai elda taudia edia haheitalai amo dahaka ta dibamu? (Ieremia 23:4)

³ Elda taudia ese bae kara diba ḡaudia. Bema oi na elda ta, mamoe ba dibadia namonamo. (Ieremia 23:4 ba duahia.) Stadi atikol 51 ai ta herevalaia taihuna, Desi na e gwa: “Emai haroro grup ai elda taudia na ai ida e harorova bona moale karadia ai a hebamova.” b Una dainai COVID-19 pandemic e vara bona Desi ena ruma bese taudia haida na una gorere ai e mase neganai, unu elda taudia ediai na se auka Desi bae durua.

4. Dahaka dainai elda taudia ediai na se auka Desi bae durua, bona dahaka ta dibamu?

⁴ Desi na e gwa: “Elda taudia na, na manadadia dainai idia ediai egu hemami bona lalohekwarahi ḡaudia baina herevalai na dia auka.” Una ese elda taudia be dahaka e hadibadiamu? Dika ta do se vara ai, tadikaka taihu ba durudia. Turadia ai baola. Bema daihanai gorerena ta dainai basio vadivadidia dibamu, dala ma haida ai ba durudia. Desi na e gwa: “Nega haida dina tamona lalonai elda idauidau na e riniva eiava teks meseij e siaiva. E heniguva Baibul siridia ese e hagoadagu, ena be unu siri na mai dibagu namonamo.”

5. Edena dala ai elda taudia ese tadikaka taihu edia dabu ḡaudia bae diba bena bae durudia?

⁵ Tadikaka taihu edia dabu ḡaudia ba diba dalana ta na, ba nanadaidia. (Her. 20:5) Edia aniani, muramura, bona ma ḡau haida heḡereḡere, a? Edia moni ḡaukara bae haboioa diba, a? Edia moni heḡereḡere ruma davana bae heni totona, a? Idia e uramu baita durudia gavamani ena heduru bae abia totona, a? Desi na tadikaka taihu amo tauanina dalanai heduru e abi. Danu elda taudia ese Baibul siri amo lalona e hagoadaia dainai, una nega aukana na e haheaukalaia. Ia na e gwa: “Elda taudia na lau ida a ḡuriḡuri. Ena be idia e gwaurai ḡaudia ta ta na asina lalotaomu, to e durugu dalana hari na laloataomu. Una na heḡereḡere Iehova na lau e hamaorogumu, ‘Oi na dia sibomu.’”​—Isa. 41:10, 13.

6. Kongrigeisin taudia be dahaka bae kara diba ma haida bae durudia totona? (Laulau ba itaia.)

⁶ Ma haida ese bae kara diba ḡaudia. Ita na ta lalomu elda taudia ese kongrigeisin tadikaka taihu bae durudia na maoro. To Iehova na e uramu ita iboudai ese haida baita hagoadadia bona baita durudia. (Gal. 6:10) Ena be  gorere taudia daidiai ḡau maraḡina ta baita karaiamu, to una ese dounu be hagoadadiamu. Natu maraḡina ta ese kadi ta eiava laulau ta baine torea diba tadikaka ta baine hagoadaia totona. Matamata tauna ta ese taihu ta iduruna totona stoa bainela o ḡau ma ta baine karaia diba. Ma haida be gorere tauna totona aniani taina bae nadua bona bae laohaia diba. Momokani, bema gorere ta na e hanai haraḡamu, kongrigeisin taudia iboudiai hahegoada bae abi na namo. Hebou na Kingdom Hall eiava Zoom ai ta abimu murinai, reana do baita noho sisina unu amo tadikaka bona taihu ida baita herevahereva. Bona elda taudia danu hahegoada bae abi na namo. Witnes taudia haida ese tenkiu kadidia na elda taudia e siai henidia, badina daihanai gorerena e vara neganai idia na e ḡaukara goada tadikaka taihu e durudia. Oibe, ‘ta hahealo hehenimu’ bona ‘ta hahegoada hehenimu’ na mai moalena!​—1 Tes. 5:11.

7. Disasta ta murinai be dahaka hekwakwanai ma e varamu?

⁷ Disasta ta ese taunimanima ta ena mauri na baine hadikaia haraḡa diba. Haida na edia kohu, ruma, eiava lalokau taudia e haboiodia. Unu ḡau dika hereadia na tadikaka taihu ediai danu e vara. Dahaka baita kara baita durudia totona?

8. Elda taudia bona ruma bese kwaradia na disasta ta do se vara ai dahaka bae kara diba?

⁸ Elda taudia ese bae kara diba ḡaudia. Elda taumui e, tadikakamui ba durudia, disasta ta do se vara lalonai bae heḡaeḡae totona. Namona na kongrigeisin taudia iboudiai ba hadibadia idia be dahaka bae kara, unu amo dika basie davari bona elda taudia bae rini henidia. Stadi atikol 51 ai ta herevalaia taihuna, Margaret na e gwa: “Emai elda taudia ese kongrigeisin iduruna herevadia e heni neganai, e hadibamai lahi na dounu be hekaramu dainai baia henari namonamo. Idia na e gwa bema gavamani bae gwa gabu baia rakatania o dika na be badamu, namona na gabu baia rakatania haraḡa.” Una hahediba herevana na nega korikori ai e heni badina pura 5 muridiai lahi bada hereana ta e hekara. Ruma bese tomadiho ai, ruma bese kwaradia ese edia bese taudia ta ta bae kara diba ḡaudia bae herevalai lou diba. Bema oi bona natumu na do heḡaeḡae, disasta ta be varamu neganai basio lalohekwarahimu.

9. Disasta do se vara bona baine vara murinai, elda taudia be dahaka bae kara diba?

⁹ Bema oi na kongrigeisin grup ta o nariamu, basio nari ela bona disasta ta baine vara bena emu grup taudia edia fon namba bona noho gabudia ba tahu. Emu grup taudia edia noho gabuna bona fon namba listina ta ba karaia bona ba sekea loulou bema e haidau o lasi. Bena disasta e varamu neganai, oi na vada heḡereḡere ba rini henidia diba bena edia noho dalana ba dibaia bona idurudia daladia ba heḡaeḡaelai. Bena o diba ḡaudia na elda oreana ena kodineita ba hadibaia haraḡa, bena ia ese seket tauna baine hadibaia. Tadikaka na unu bae ḡaukara hebou toma neganai heduru bada bae heni diba. Lahi e hekara murinai, Margaret edia seket inarina tauna na hora 36 lalodiai se mahuta, elda taudia e durudia gabu idauidau ela tadikaka taihu 450 bamona e rini henidia bona idurudia daladia e kara. (2 Kor. 11:27) Unu amo asi edia noho gabudia taudia na edia noho gabudia e davari.

10. Dahaka dainai elda taudia ese mamoe vadivadi ḡaukarana bae laloa bada na ḡau badana? (Ioane 21:15)

¹⁰ Elda taudia edia maduna ta na, kongrigeisin taudia bae durudia lauma dalanai bona bae hagoadadia. (1 Pet. 5:2) Disasta ta e varamu  neganai, elda taudia ese bae karaia ḡauna ginigunana na, bae seke tadikaka taihu ta ta na nanamo, mai edia aniani, dabua bona noho gabudia. To hua momo muridiai, disasta amo e mauri taudia na be uramu lauma dalanai heduru bae abi bona bae hagoadadia. (Ioane 21:15 ba duahia.) Harold​—Brens Komiti ta bona disasta gabudiai e noho tadikaka taihu momo e hedavari henidia​—na e gwa: “Unu bamona taudia ese ediai e vara ḡauna na basie laloa boio haraḡamu. Ena be e haboio kohudia na be davari loumu, to e haboiodia lalokau taudia, o e laloa badamu ḡauna ta, eiava mokona bema mase karana na dounu be lalomu. Unu ilalodia karana ese lalohisihisi baine havaraia lou diba. Una ese se hahedinaraiamu idia na asi edia abidadama, to una na vaia taunimanima ese e abimu hemamidia.”

11. Ruma bese dounu be durudiamu ḡaudia be dahaka?

¹¹ Elda taudia ese ina sisiba, “e taitaimu taudia ida ba tai,” na e badinaiamu. (Roma 12:15) Disasta amo e mauri taudia ese ina bae mamia na namo, Iehova bona edia Kristen tadikaka taihu ese idia na e lalokau henidiamu. Namona na elda taudia ese ruma bese bae durudia ḡuriḡuri, stadi, hebou ilao henina, bona haroro ḡaukara basie hadoko. Danu elda taudia ese tama sina bae hagoadadia, natudia bae durudia disasta ese basie hadika diba ḡaudia bae lalodia. Tama sina e, natumui ba hadibadia Iehova na nega iboudiai idia turadia ai be laomu bona hanaihanai be durudiamu. Bona ba hahedinaraia idia na tanobada heḡeḡemadai ruma bese badana ta lalonai bona unu tadikaka taihu na heḡaeḡae idia bae durudia.​—1 Pet. 2:17.

12. Ma haida be dahaka bae kara disasta negadiai bae heduru totona? (Laulau ba itaia.)

¹² Ma haida ese bae kara diba ḡaudia. Bema o nohomu gabuna badinai disasta ta baine vara, elda taudia ba noidia oi be ede ba heduru toma. Reana edia ruma e haboio taudia eiava konstraksin volentia taudia na emu ruma ai bavabidia dae. Eiava e dabu pablisadia na aniani o kohu ba henidia. Bema disasta na gabu daudauna ta ai e vara, dounu ba heduru diba. Edena dala ai? Idia daidiai ba ḡuriḡuri. (2 Kor. 1:8-11) Eiava tanobada heḡeḡemadai ḡaukarana iduruna totona kontribiusin ba heni. (2 Kor. 8:2-5) Bema dika e vara gabuna na baola diba, ba volentia totona elda taudia ba nanadaidia. Bema bae boirimu, treinin be henimumu, unu amo gabu maorona bona nega maorona ai be siaimumu.

13. Eda ḡaukara e taravatua tanodia ai tadikaka taihu be dahaka hekwakwanai ma haida e davari?

¹³ Eda ḡaukara e taravatu tanodia ai, daḡedaḡe karadia ese mauri na e ha-aukaiamu. Unu tano ai, tadikaka na moni dalanai e hekwakwanaimu, e goreremu, bona edia lalokau taudia e haboiodiamu. To taravatu dainai, elda taudia ediai na auka tadikaka taihu bae vadivadidia bona bae hagoadadia. Una na stadi atikol 51 ai ta herevalaia tadikakana, Andrei enai e vara. Iena haroro grup ai taihu ta na moni dalanai na dia heḡereḡere. Bena motuka ai aksiden ta e davaria. Ia na opereisin haida baine abi bona basine ḡaukara diba. Ena be taravatu henunai bona pandemic e vara, to Iehova ese una taihu enai e vara ḡauna na e itaia bona tadikaka amo e durua.

14. Edena dala ai elda taudia na Iehova enai bae tabekau amo haheitalai namona bae hahedinaraia?

¹⁴ Elda taudia ese bae kara diba ḡaudia. Andrei na e ḡuriḡuri bona baine kara diba ḡaudia e kara. Iehova ese ena ḡuriḡuri be ede e haerelaia toma? Ia ese kongrigeisin taudia haida e ḡaukaralaidia Andrei e durua. Idia haida ese hari taihu na hospele e laohaia. Ma haida ese taihu na moni e henia. Iehova ena heduru amo bae kara diba ḡaudia e kara, bona edia lalotamona bona gari lasi karana na Iehova ese e hanamoa. (Heb. 13:16) Elda taumui e, eda ḡaukara e taravatuamu neganai, ḡaukara na ba hari. (Ier. 36:5, 6) To bada hereana na, Iehova enai ba tabekau. Ia ese baine durumui tadikaka taihu edia dabu ḡaudia ba heni totona.

15. Daḡedaḡe negadiai edena dala ai eda Kristen tadikaka ida lalotamona ai baita noho?

¹⁵ Ma haida ese bae kara diba ḡaudia. Eda ḡaukara e taravatuamu negadiai, grup maraḡidia ai baita hebamo heheni. Mai anina bada ḡauna na, maino ai baita noho. Satana baita tuari henia, dia tadikaka taihu. Tadikaka edia kerere na ba lalo nege, o padamui ai hekwakwanai e varamu neganai ba hamaoromaoro haraḡa. (Her. 19:11; Efe. 4:26) Ba hahedinaraia oi na o ura dikadikamu ba heduru. (Tito 3:14) Ma haida ese hari taihu e durua karana ese una haroro grup na e durua. Edia hebamo na e namo herea, ruma bese ta na heto.​—Sal. 133:1.

16. Kolose 4:3, 18 heḡereḡerena, daḡedaḡe e davarimu tadikaka taihu be ede baita durudia toma?

¹⁶ Eda tadikaka taihu momo herea na dounu Iehova e hesiai heniamu, ena be gavamani ese  taravatu e atomu. Haida na edia abidadama dainai e hadiburadia. Idia bona edia ruma bese daidiai baita ḡuriḡuri, danu lauma bona tauani dalanai bona kota lalodiai idia e durudiamu tadikaka taihu daidiai baita ḡuriḡuri; idia na unu e kara tomamu dainai bae arestidia diba. c (Kolose 4:3, 18 ba duahidia.) Ba helalotao, emu ḡuriḡuri na mai siahuna.​—2 Tes. 3:1, 2; 1 Tim. 2:1, 2.

17. Daḡedaḡe do se vara ai edena dala ai ba heḡaeḡae diba?

¹⁷ Oi bona emu ruma bese na hari ba heḡaeḡae diba daḡedaḡe do se vara ai. (Apos. 14:22) Bae vara diba ḡau dikadia na basio lalodia. To, emu hetura karana Iehova ida ba hagoadaia bona natumu ba durudia unu bae kara toma. Bema nega haida o lalohekwarahimu, Dirava enai emu hemami ibounai ba gwauraia hedinarai. (Sal. 62:7, 8) Emu ruma bese ida Iehova o abidadama heniamu badidia ba herevalai. d Disasta do se vara ai, emu heḡaeḡae bona Iehova iabidadama henina karana ese natumu be durudiamu basie gari bona bae lalomaino.

18. Dahaka be vaira negai be varamu?

¹⁸ Dirava ena maino ese laloda e gimaiamu. (Fili. 4:6, 7) Una dainai, ena be gorere, disasta, bona daḡedaḡe karadia na bae vara, to basita lalohekwarahi badamu o basita garimu. Dirava ese e ḡaukara goadagoadamu elda taudia e ḡaukaralaidiamu ita e durudamu. Bona dala e kehoamu ita iboudai baita heduru heheni totona. Hari, ta moalelaiamu mainona ese be durudamu, gabeai bae vara hahetoho badadia baita hanaidia totona, “hisihisi badana” danu. (Mat. 24:21, NWT) Una negai, maino ai baita noho na ḡau badana, bona ma haida baita durudia unu bae kara toma. To hisihisi badana murinai, lalohekwarahi e havaramu dika idauidau na basie vara loumu. Iehova ese e uramu baita abia ḡauna, maino ḡoeva-daena, baita moalelaiamu.​—Isa. 26:3, 4.