1. Iehova ese mauri hanaihanai baine heni gwauhamatana baita laloa dobumu neganai, dahaka be varamu?

 IEHOVA na e gwauhamata ia e badinaiamu taudia na “mauri hanaihanai” bae abia. (Roma 6:23) Iehova ena gwauhamata baita laloa dobumu neganai, eda lalokau ia enai na be goadamu. Mani a laloa: Tamada lalokauna guba ai ese ita na e lalokau henida badamu, una dainai ḡau ta ese ia ena amo basine bibida oho diba.

2. Mauri hanaihanai gwauhamatana ese ita be ede e duruda tomamu?

² Dirava ese mauri hanaihanai e gwauhamatalaia karana ese be durudamu, hari ta davarimu hekwakwanaidia baita haheaukalai totona. Ena be inaida ese ihamaseda herevadia amo bae hagarida, to eda abidadama na basita rakatania. Dahaka dainai? Badina ta na, ta dibamu bema mai eda abidadama ida baita masemu, Iehova ese be hatoreda isi loumu bona basita mase loumu. (Ioa. 5:28, 29; 1 Kor. 15:55-58; Heb. 2:15) Dahaka dainai baita abia dae momokani ita na baita mauri hanaihanai diba? Mani badi haida aita herevalai.

3. Dahaka dainai ta dibamu Iehova ese mauri hanaihanai na baine henida diba? (Salamo 102:12, 24, 27)

³ Ta dibamu Iehova ese mauri hanaihanai baine henida diba, badina ia na mauri Badina bona e mauri hanaihanaimu. (Sal. 36:9) Baibul siridia haida ese e hamomokaniamu, Iehova na e noho hanaihanaiva bona baine noho hanaihanai. Salamo 90:2 ese Iehova na ini e gwauraia toma: “Ema bona hari ela bona hanaihanai oi mo Dirava.” Salamo 102 danu hereva unu bamodia e gwaurai. (Salamo 102:12, 24, 27 ba duahidia.) Bona peroveta tauna Habakuku ese Tamada guba ai na ini e herevalaia  toma: “Iehova e, oi na gunaguna negana amo o nohomu ema bona hari, ani? Egu Helaḡa Diravana e, oi na basio mase diba.”​—Hab. 1:12, NWT.

4. Bema Iehova e noho hanaihanaimu lalohadaina asita lalopararalaiamu, baita lalohekwarahi be namo, a? Mani a herevalaia.

⁴ Iehova e noho hanaihanaimu lalohadaina ilalopararalaina oi emu ai auka, a? (Isa. 40:28) Taunimanima momo ediai danu auka. Elihu ese Dirava na ini e herevalaia toma: “Ena laḡani na ede hohodia basita tahua diba.” (Iobu 36:26) To dia ḡau ta asita lalopararalaiamu dainai baitato una ḡau na dia momokani. Heḡereḡere, ena be diari e ḡaukaramu dalana na asita lalopararalaia namonamomu, to una anina be diari be vada lasi, a? Lasi! Una heḡereḡerena, ita ese Iehova e noho hanaihanaiva bona baine noho hanaihanai dalana na asita lalopararalaia ḡoevaḡoevamu. To dia una dainai baita lalo Dirava na se noho hanaihanaimu. Ḡau iboudiai Ihavaradia Diravana na asi hetoana, ena be ta lalopararamu eiava lasi. (Roma 11:33-36) Danu Iehova na vada e nohova, guba bona tanobada​—diari ḡaudia danu heḡereḡere dina​—do lasi negana ai. Iehova ese e hadibadamu “ia ese ena siahu amo tanobada e karaia.” Oibe, ‘guba do se idia roro’ negana ai, ia na vada e nohova. (Ier. 51:15; Apos. 17:24) Edena badi ma ta dainai ta dibamu ita na baita mauri hanaihanai diba?

5. Tau bona hahine ginigunadia edia helaro be dahaka?

⁵ Iehova ese tanobada ai e havara mauri ḡaudia edia mauri na mai hetoadia, to taunimanima be lasi. Ia ese taunimanima na helaro idauna e henidia, idia na basie mase. To, Iehova ese Adam e hamaoroa: “Namo bona dika idibalaidia auna huahuana una mo basio ania; badina be ia bavania dinana ai oi na ba mase vaitani.” (Gen. 2:17) Adam bona Heva ese Iehova bema kamonai henia neganai basiema mase. Una dainai baita gwau dibamu, gabeai Iehova ese maoro na bema henidia diba “mauri auna huahuana” bema ania. Una ese bema hahedinaraia diba ia na e uramu idia na bae “mauri hanaihanai.” b​—Gen. 3:22.

6-7. (a) Dahaka ese danu e hahedinaraiamu taunimanima e havaradia na dia bae mase? (b) Tanobada matamatana ai oi be o uramu dahaka ba kara? (Laulau ba itadia.)

⁶ Saiens taudia haida ese e davari hahemomokani ḡaudia amo e hahedinaraia, ita harada ese infomeisin momo herea baine habou diba, hari ina negai harada ese e haboumu ḡaudia baine hereadia. Laḡani 2010 ai, magasin ladana, Scientific American Mind ena atikol  ta na e gwa, harada ese infomeisin 2.5 milion gigabytes heḡereḡerena baine habou diba, una na TV program ai hora 3 milion o laḡani 300 mai kahana lalodiai e atomu infomeisin edia bada heḡereḡerena. Bona harada na infomeisin ma momo herea baine habou diba. Una ese e hahedinaraiamu Iehova ese harada e karaia na infomeisin momo herea baine habou diba, dia laḡani 70 eiava 80 ai ta dibadia ḡaudia mo.​—Sal. 90:10.

⁷ Danu Iehova ese ita e karada neganai mauri hanaihanai urana e henida. Baibul na e gwaumu Dirava ese taunimanima “kudoudia ai noho hanaihanai urana e atoa.” (Koh. 3:11, NWT) Ita ese mase ta inai heniamu badina ta be una. (1 Kor. 15:26) Bema ta gorere dikadikamu, ita be ḡau ta asita karaiamu to ta narimu baita mase, a? Lasi. Vaia, dokta dekena baita laomu eiava nega haida muramura baita abimu baita namo helaoreana. Oibe, ḡau idauidau ta karamu basita mase totona. Bona ta lalokau heniamu tauna ta, maraḡina o badana, e masemu neganai, nega daudau lalonai ta lalohisihisimu, ani? (Ioa. 11:32, 33) Momokani, e Havarada Tauna lalokauna na e uramu baita mauri hanaihanai, una dainai harada e karaia dalana na diba baine abi hanaihanai bona kudouda ai noho hanaihanai urana e atoa. To ma badi momo daidiai baita abia dae ita na baita mauri hanaihanai diba. Mani Iehova ese guna e kara ḡaudia bona hari e karamu ḡaudia baita herevalai, unu ese be hamomokanimu iena ura ginigunana na se haidaua.

8. Isaia 55:11 ese Iehova ena ura baine ḡuḡuru karana be ede e gwauraia toma?

⁸ Ena be Adam bona Heva e kara dika dainai natudia na e masemu, to Iehova ese ena ura  na se haidaua. (Isaia 55:11 ba duahia.) Ia na e uramu abidadama taudia na bae mauri hanaihanai. Iehova ese ena ura ihaḡuḡuruna totona e gwaurai bona e kara ḡaudia baita lalomu neganai, una baita hamomokaniamu.

9. Dirava ena gwauhamata be dahaka? (Daniel 12:2, 13)

⁹ Iehova na e gwauhamata mase taudia baine hatoredia isi lou bona bae mauri hanaihanai. (Apos. 24:15; Tito 1:1, 2) Abidadama tauna Iobu na e diba momokani Iehova na e ura dikadikamu mase taudia baine hatoredia isi lou. (Iobu 14:14, 15) Peroveta tauna Daniel na e diba taunimanima edia helaro na bae tore isi lou, bona mauri hanaihanai bae abia diba. (Sal. 37:29; Daniel 12:2, 13 ba duahidia.) Danu, Iesu ena negai Iuda taudia na dibadia Iehova ese ena hesiai taudia na “mauri hanaihanai” baine henidia diba. (Luka 10:25; 18:18) Iesu ese una gwauhamata na e herevalaia loulou, bona ia na Tamana ese mase amo e hatorea isi lou.​—Mat. 19:29; 22:31, 32; Luka 18:30; Ioa. 11:25.

10. Gunaguna tore isi loudia ese dahaka e hamomokaniamu? (Laulau ba itaia.)

¹⁰ Iehova na Mauri Ihenina Diravana bona mai ena siahu mase taudia baine hamauridia lou. Ia ese peroveta tauna Elia na siahu e henia Sarefata ai vabu ta natuna merona e hatorea isi lou. (1 Han. 17:21-23) Gabeai, Iehova ena heduru dainai, peroveta tauna Elisaia ese Suneme hahinena ta natuna merona e hatorea isi lou. (2 Han. 4:18-20, 34-37) Unu tore isi lou bona tore isi lou ma haida ese e hamomokanimu, Iehova na mai ena siahu mase taudia baine hatoredia isi lou. Iesu na tanobada ai e nohova neganai, e hamomokania Tamana ese una siahu na ia e henia. (Ioa. 11:23-25, 43, 44) Hari, Iesu na guba ai bona Dirava ese “siahu idoinai guba ai bona tanobada ai vada” e henia. Una dainai, ia ese ina gwauhamata baine haḡuḡurua diba, “gara ai e nohomu taudia iboudiai” baine hatoredia isi lou bona bae mauri hanaihanai.​—Mat. 28:18; Ioa. 5:25-29.

11. Edena dala ai mauri davana ese dala e kehoa baita mauri hanaihanai totona?

¹¹ Dahaka dainai Iehova ese Natuna lalokauna ena hisihisi bona mase se koua? Iesu ese badina e gwauraia, eto: “Dirava ese tanobada ini e lalokau henia tomamu: Natuna vara-edeana vada eme heni, bae abidadama henia taudia iboudiai basie mase, a mauri hanaihanai bae abia.” (Ioa. 3:16) Dirava ese Natuna ena mauri davana amo eda dika e gwautaomu, bona dala e kehoa baita mauri hanaihanai totona. (Mat. 20:28) Dirava ena ura lalonai una na mai anina bada, bona aposetolo Paulo ese una e herevalaia, eto: “Taunimanima ena amo mase vada e vara; ma taunimanima ena amo mase taudia ihatore-isidia vada e vara. Badina be taunimanima iboudiai Adam bagunai vada e mase na heto, Keriso bagunai iboudiai do bae mauri.”​—1 Kor. 15:21, 22.

12. Edena dala ai Basileia ese Iehova ena ura taunimanima totodia baine haḡuḡurua?

¹² Iesu ese ena hahediba e hadibadia bae ḡuriḡuri, Dirava ena Basileia bainema bona ena ura tanobada ai baine karaia totona. (Mat. 6:9, 10) Dirava ena ura ta na, taunimanima na tanobada ai bae mauri hanaihanai. Una baine haḡuḡurua totona, Iehova ese Natuna e abia hidi Mesia Basileiana Pavapavana ai bainela. Dirava ese tanobada ai taunimanima 144,000 e haboudiamu, Iesu ida bae ḡaukara hebou Dirava ena ura bae haḡuḡurua totona.​—Apok. 5:9, 10.

13. Hari Iehova be dahaka e karamu, bona dahaka ba kara be namo?

¹³ Hari Iehova na “hutuma bada-herea” e haboudiamu bona e hadibadiamu dahaka bae kara unu amo ena Basileia henunai bae noho. (Apok. 7:9, 10; Iak. 2:8) Ena be ina tanobada ai, taunimanima momo na tuari bona inai  heheni karadia daidiai e pararamu, to hutuma bada herea na e hekwarahimu inai heheni karadia iboudiai bae dadarai totona. Edia kara amo e hahedinaraiamu, vaitani edia dare na tano ḡei ḡaudia ai e halaomu. (Mika 4:3) Idia na tuari lalodiai asie vareaimu, to Dirava momokanina bona ena ura na taunimanima e hadibalaidiamu, unu amo e durudiamu ‘mauri korikorina’ bae abia. (1 Tim. 6:19) Dirava ena Basileia e badinaiamu dainai, ruma bese taudia ese e inai henidiamu eiava moni dalanai e hekwakwanaimu, to Iehova ese edia dabu ḡaudia na e henidiamu. (Mat. 6:25, 30-33; Luka 18:29, 30) Unu iboudiai ese e hadibadamu, Dirava ena Basileia na ḡau korikorina bona Iehova ena ura na baine haḡuḡurua.

14-15. Iehova ese mase baine haorea vaitani gwauhamatana be ede be ḡuḡuru tomamu?

¹⁴ Hari, Iesu na guba ai Dirava ena Basileia Pavapavana bona Iehova ena gwauhamata iboudiai baine haḡuḡurudia. (2 Kor. 1:20) Laḡani 1914 amo, Iesu na inaina bogaraḡidiai vada e lohiamu. (Sal. 110:1, 2) Kahirakahira Iesu bona ia ida be lohiamu taudia ese kara dika taudia be haorediamu bona be kwalimumu.​—Apok. 6:2.

¹⁵ Iesu Ena Lohia Laḡanidia 1,000 lalonai, mase taudia bae tore isi lou, bona Dirava e badinaiamu taudia na bae ḡoevadae. Hahetoho ginigabena murinai, Iehova ese baine gwauraidia, kara maoromaoro taudia ese “tano bae  abia, bae noholaia hanaihanai.” (Sal. 37:10, 11, 29) Ta moalemu badina ‘inai gini-gabena mase’ na be ‘ha-oreamu.’​—1 Kor. 15:26.

16. Iehova ta hesiai heniamu badina badana be dahaka?

¹⁶ Ina atikol ai tame herevalaia heḡereḡerena, mauri hanaihanai helarona na Dirava ena Hereva lalonai e gwauraia. Una helaro ese be durudamu hari nega aukadia lalodiai Dirava baita badinaia hanaihanai. Iehova baita hamoalea totona, mauri urana baita abia mo na dia heḡereḡere. To Iehova bona Iesu ta badinadiamu badina badana na, idia na ta lalokau henidia badamu. (2 Kor. 5:14, 15) Una lalokau ese be doridamu idia baita tohotohodia bona eda helaro na ma haida ediai baita herevalaia. (Roma 10:13-15) Siboda eda namo basita lalomu bona haida baita kara namo henidiamu neganai, Iehova na be uramu turana ai baitala hanaihanai.​—Heb. 13:16.

17. Ita ta ta eda maduna be dahaka? (Mataio 7:13, 14)

¹⁷ Ita be mauri hanaihanai bae abia taudia padadiai baita nohomu, a? Iehova ese una hahenamo baita abia dalana na e kehoa. To ita ta ta eda maduna na, baita hekwarahi una mauri dalanai dounu baita raka totona. (Mataio 7:13, 14 ba duahidia.) Mauri hanaihanai baita abiamu neganai, mauri be ede bamona? Atikol gabena ai una henanadai haerena baita herevalaiamu.