Iehova ese taunimanima e hamaorodia “tanobada ba hahonua bona ba biagua” neganai, e hahedinaraia ina tanobada ibounai na paradaiso ai bainela. (Gen. 1:28) Una haheḡani na vaira negai tanobada bae noholaia taudia ese be badinaiamu. Idia ese tanobada na taina ruana paradaiso ai be halaoamu badina Eden imeana na vada lasi. Matamana amo ita na ḡaukara momo herea baita karamu, e hadika gabudia baita haḡoevamu bona baita hanamodiamu!

Unu amo ita ese Babulono amo edia tano e lou lao Israel taudia edia ḡaukara ta laloamu. Edia tano na laḡani 70 lalodiai ta ese se noholaia. To Isaia na e peroveta Iehova ena hahenamo dainai, una tano na bae hanamoa lou. Eto: “Tano ḡaḡaena na Eden heḡereḡerena ai baine halaoa, ena tano kaukauna na Iehova ena uma heḡereḡerena ai baine halaoa.” (Isa. 51:3) Israel taudia ese una ḡaukara na e haḡuḡurua. Una heḡereḡerena, Iehova ena hahenamo dainai, tanobada bae abia taudia ese tanobada na  paradaiso ai bae halaoa. Bona hari ba kara ḡaudia amo ba hahedinaraia oi na o uramu una negai una ḡaukara ba durua.

Dala ta na, emu ruma lalona bona badina ba haḡoevadia bona toadia na bae namo. Unu ba kara toma, ena be badimu taudia ese edia gabu na se haḡoevamu. Dala ma ta na, Kingdom Hall bona Assembly Hall ihaḡoevadia bona ihanamodia ḡaukaradia ai ba heduru. Danu, bema emu ai na heḡereḡere, aplikeisin ta ba hahonua diba, disasta negadiai ba heduru totona. Unu amo bo hahedinaraiamu oi na heḡaeḡae heduru ba heni totona. Sibomu ba henanadai, ‘Lau ese ḡaukara haida baina dibadia diba, unu amo tanobada ai mauri hanaihanai hahenamona baina abia neganai baina ḡaukaralaidia, a?’

Iesu ese Iairo natuna kekenina e hatorea isi lou murinai, maoromaoro e gwa una kekeni na aniani taina bae henia. (Mar. 5:42, 43) Una laḡanina 12 kekenina ana bae henia na dia ḡaukara badana. To, mani a laloa, Iesu ese ina gwauhamata, “gara ai e nohomu taudia iboudiai ese ia gadona bae kamonaia bena bae raka-lasi,” be haḡuḡuruamu neganai, ita na ḡaukara bada herea baita karamu. (Ioa. 5:28, 29) Ena be Baibul ese ḡau momo na se herevalai, to ina baita laloa diba, tore isi lou taudia ese aniani, dabua, bona noho gabudia bae abi na namo. Hari, ba hahedinaraia oi na uramu ba heduru. Mani ba kara diba ḡaudia haida aita lalodia.

Emu kongrigeisin ai seket tauna baine vadivadi hahediba herevana e gwauraiamu neganai, ba boiria diba bavaniani hebou totona. Bema Betele taudia haida edia asainmen e idaumu, eiava seket tauna ese ena seket ḡaukara e hadokoamu, ba durudia diba noho gabudia bae davari totona. Bema rijinol eiava special convention na emu gabu ai be heabiamu, unu hebou vairadiai o muridiai ba volentia diba eiava baola vadivadi taudia ba welkam henidia.

Aposetolo Edia Kara 24:15 ena hereva dainai, ta dibamu taunimanima bilion momo na be tore isi loumu. Idia momo na do asie mase neganai Iehova na asie dibaia. To be tore isi loumu murinai Iehova be dibaiamu. a Abidadama taudia momo na una hahediba ḡaukarana be duruamu. (Isa. 11:9) Europe, South America, bona Africa ai haroro ḡaukara e karaia taihuna, Charlotte ese una nega namona e nariamu. Ia na mai moalena ida e gwa: “Na uramu bae tore isi Iou taudia baina hadibadia. Lau ese gunaguna e nohova tauna ta sivaraina na duahiamu neganai, nega momo na lalomu: ‘Ia ese Iehova bema dibaia neganai, ena mauri na bema idau.’ Na ura dikadikamu tore isi lou taudia na Iehova sivaraina baina hadibalaidia.”

Iesu tanobada do sema neganai e mauriva abidadama taudia momo ese ḡau momo be dibadiamu. Mani a laloa, oi ese Daniel enai ia e tore to se lalopararalai peroveta herevadia anidia bo herevalaimu na hahenamo, ani? (Dan. 12:8) Eiava Ruta bona Naomi bo hadibadiamu idia edia bese amo Mesia e vara. Baita moale dikadikamu badina tanobada heḡeḡemadai ai una hahediba ḡaukarana baita karaiamu, bona tanobada ena lalo veri o lalohekwarahi ḡaudia na lasi!

Hari, ede ba hahedinaraia toma oi na heḡaeḡae tore isi lou taudia ba hadibadia totona? Dala ta na, emu hahediba dalana ba hanamoa bona hanaihanai haroro ḡaukarana ba karaia. (Mat. 24:14) Ena be buruka o emu noho dalana dainai ḡaukara momo basio kara dibamu, to emu hekwarahi ese be hahedinaraiamu, o ura dikadikamu tore isi lou taudia ihadibadia ḡaukarana ba karaia.

Oibe, ini mai anidia bada henanadaidia ba lalo, Oi be o ura dikadikamu tanobada bavabia, a? O uramu tanobada ba biagua, tore isi lou taudia edia dabu ḡaudia ba heni, bona ba hadibadia, a? Vaira negai bo karamu ḡaukaradia ida e heḡereḡere ḡaukaradia na hari bo karamu neganai, bo hahedinaraiamu oi na heḡaeḡae tanobada bavabia.