1. Iesu baine mase neganai, ia badinai kara dika tauna be dahaka e hamaorolaia? (Luka 23:39-43)

 IESU bona ia badinai kara dika taudia na do asie mase ai, hisihisi bada herea e mamia. (Luka 23:32, 33) Unu kara dika taudia raruosi ese Iesu na e gwauraia dika, una ese e hahedinaraiamu idia na dia iena hahediba taudia. (Mat. 27:44; Mar. 15:32) To idia ta ese ena lalohadai na e haidaua. Eto: “Iesu e, emu basileia bavabia negana ai, ba lalogu.” Iesu e haere, eto: “Hari dina ai na hamaoromu momokanimu, oi na lau ida Paradaiso ai baita noho.” (Luka 23:39-43 ba duahidia; NWT) Ḡau ta ese se hamomokaniamu, una kara dika tauna na Iesu ese e harorolaia “guba basileiana” sivaraina e abia dae. Bona Iesu na se gwa una tau na Basileia lalonai baine vareai. (Mat. 4:17) Iesu ese vaira negai baine vara tanobada Paradaisona e herevalaia. Dahaka dainai unu ta gwau tomamu?

2. Dahaka ese e hahedinaraiamu e helalo-kerehai kara dika tauna na Iuda tauna?

² E helalo-kerehai kara dika tauna na reana Iuda tauna ta. Ia ese bamona e hamaoroa, eto: “Dirava garina [so] garimu a? Oi danu bo masemu, ia heḡereḡerena.” (Luka 23:40) Iuda taudia na Dirava tamona e tomadiho heniava, to bese idauidau taudia be dirava momo e abidia daeva. (Eso. 20:2, 3; 1 Kor. 8:5, 6) Bema idia raruosi na idau bese tataudia, reana ina henanadai bema gwauraia, “dirava garidia so garimu a?” Danu, Iesu na  dia idau besedia ediai, to “Israel besena ena dobi mamoedia mo ediai” e siaia. (Mat. 15:24) Dirava ese Israel taudia e hadibadia, ia ese mase taudia na baine hatoredia isi lou. E helalo-kerehai kara dika tauna ese reana una na e dibaia, bona ena hereva amo e hahedinaraia, ia na e laloava Iehova ese Iesu be hatorea isi loumu bena ena Basileia ai be lohiamu. Reana e ura Dirava ese ia danu baine hatorea isi lou.

3. Iesu ese Paradaiso e gwauraia neganai, e helalo-kerehai kara dika tauna be reana dahaka e lalo? Mani a herevalaia. (Genese 2:15)

³ E helalo-kerehai kara dika tauna na Iuda tauna dainai, Adam bona Heva bona Iehova ese idia e atodia gabuna, Paradaiso, sivaraidia na mai dibana. Una dainai, mai dibana Iesu ese e gwauraia Paradaisona na ina tanobada ai baine vara ḡauna.​—Genese 2:15 ba duahia.

4. Iesu ese kara dika tauna e hamaoroa herevana dainai dahaka baita laloa?

⁴ Iesu ese kara dika tauna e hamaoroa herevana dainai, Paradaiso maurina baita laloamu. Momokani, King Solomon ena lohia henunai e vara maino negana amo Paradaiso ai baine vara ḡauna baita dibamu. Bona ta dibamu Iesu, Solomon e hereaia tauna, na ia ida be lohiamu taudia ida be ḡaukara heboumu tanobada na paradaiso ai be halaoamu. (Mat. 12:42) Una dainai, namona na “mamoe idaudia” na bae diba idia be dahaka bae kara, unu amo bae heḡereḡere Paradaiso ai bae mauri hanaihanai totona.​—Ioa. 10:16.

5. Paradaiso maurina be ede o laloa tomamu?

⁵ Paradaiso maurina be ede o laloa tomamu? Reana o laloamu ia na gabu mai hairaina ta, Eden imeana heḡereḡerena. (Gen. 2:7-9) Bona reana Mika ena peroveta herevana o laloamu, e gwa una negai Dirava ena taunimanima na “ta ta ena vine auna ena vine auna bona ena suke auna ena suke auna henudiai bae helai.” (Mika 4:3, 4) Danu, reana Baibul siri haida o lalodiamu, e hahedinaraiamu aniani na be momo hereamu. (Sal. 72:16; Isa. 65:21, 22) Una dainai mani ba lalo, oi na uma mai hairaina ta lalonai, aniani mai mamidia namodia amo e honu-honudae teibolona ta badinai helai. Bona tubutubu ḡaudia bona flaoa idauidau bonadia namodia daidiai hodahoda na ḡoeva. Danu ruma bese bona tura​—mase amo e tore isi lou taudia danu​—e herevaherevamu bona e kirimu reḡedia o kamonaimu. Unu iboudiai na dia nihi ta. To ta diba momokanimu, unu iboudiai na tanobada ai be vara momokanimu. Danu Paradaiso ai ḡaukara namodia baita moalelaimu.

6. Paradaiso ai be dahaka baita karamu? (Laulau ba itaia.)

⁶ Iehova ese ita e karada na eda ḡaukara baita moalelai. (Koh. 2:24) Keriso Ena  Lohia Laḡanidia 1,000 lalonai ita na ḡaukara momo baita karamu. Hisihisi badana amo be roho maurimu taudia, bona tore isi lou taudia milion momo na dabua, aniani, bona noho gabudia bae abi na namo. Unu dabu ḡaudia baita henidia totona ita na ḡaukara namodia baita karamu. Adam bona Heva edia ḡaukara na edia uma bae hahairaia, una heḡereḡerena ita ese ina tanobada na Paradaiso ai baita halaoamu. Danu mani a laloa, tore isi lou taudia milion milion baita hadibadiamu na mai moalena; idia momo na Iehova bona ena ura na asi dibadia namonamo, bona Iesu do sema neganai e nohova abidadama taudia baita durudiamu ma ḡau momo bae diba totona.

7. Dahaka ta dibamu, bona dahaka dainai?

⁷ Ta dibamu vaira negai Paradaiso maurina na be namo hereamu, maino ai baita nohomu, bona ḡau iboudiai na be heau namonamomu. Dahaka dainai? Badina Iehova ese Natuna ena lohia henunai baine vara maurina toana na vada e hahedinaraia. Una na King Solomon ena lohia henunai e vara ḡaudia amo baita dibamu.

8. King David ese Salamo 37:10, 11, 29 ai e tore herevadia be ede e ḡuḡuru toma? (Ina magasin ai “Taunimanima Edia Henanadai” ba itaia.)

⁸ King David na Dirava ena heduru amo vaira negai aonega bona abidadama pavapavana henunai baine vara maurina e herevalaia. (Salamo 37:10, 11, 29 ba duahidia.) Ita ese Paradaiso maurina ta herevalaiamu neganai, nega momo Salamo 37:11 ta duahiamu. Una na maoro badina Iesu ese una siri ena hereva na iena Ororo Harorona ai e gwauraia, e hahedinaraia una na vaira negai baine ḡuḡuru. (Mat. 5:5) To David ena hereva ese danu King Solomon ena nega maurina e hahedinaraia. Solomon ese Israel e lohiaia neganai, Dirava ena taunimanima na “rata bona bada ranuna e arumu tanona” ai maino bona noho namona e moalelaiava. Dirava na eto: “Egu taravatu boma badinadia . . . , lau ese maino baina henimui emui tano ai; vada ba laḡa ani, asi tauna ta ese baine hagarimui.” (Lev. 20:24; 26:3, 6) Solomon ena lohia negana lalonai unu gwauhamata na e ḡuḡuru.  (1 Sis. 22:9; 29:26-28) Bona kara dika taudia na bae “puki” o basie noho. (Sal. 37:10) Una dainai, Salamo 37:10, 11, 29 ena hereva na gunaguna e ḡuḡuru bona vaira negai danu baine ḡuḡuru.

9. Sieba ena kwini ese King Solomon ena lohia dalana be ede e herevalaia toma?

⁹ Solomon ena lohia henunai Israel taudia ese maino bona noho namo e moalelaiava sivaraina na Sieba ena kwini ese e kamonaia. Una lohia hahinena na gabu daudauna amo Ierusalem ela, e kamonai ḡaudia na matanai baine ita totona. (1 Han. 10:1) Solomon ena basileia e itaia murinai, e gwa: “Kahana na asie hamaorogu. . . . Emu hesiai taudia bini, dina iboudiai oi vairamu ai gigini bona emu aonega herevadia e kamonaimu danu daka moale!” (1 Han. 10:6-8) Solomon ena lohia henunai e vara ḡaudia amo Iehova ese Natuna Iesu ena lohia henunai taunimanima daidiai be karamu ḡaudia e hahedinarai.

10. Ededia dala ai Iesu ese Solomon e hereaia?

¹⁰ Iesu ese Solomon na e hereaia. Solomon na dia ḡoevadae tauna bona ena hahemaoro karana ai kerere badadia momo e kara bona una ese Dirava ena taunimanima edia mauri na e ha-aukaia. To, Iesu be Lohia Tauna ḡoevadaena, bona kerere ta se karaiamu. (Luka 1:32; Heb. 4:14, 15) Iesu ese Satana ena hahetoho aukadia na e hanaidia. Ia ese e hamomokania ia na nega ta basine kara dika, bona ena lohia henunai e nohomu taudia ihahisidia ḡauna ta basine karaiamu. Ta moalemu badina Iesu na eda King hereadaena.

11. Daidia ese Iesu be duruamu?

¹¹ Iesu bona ia ida be lohiamu 144,000 taudia ese taunimanima be naridiamu bona Iehova ena ura tanobada ai be haḡuḡuruamu. (Apok. 14:1-3) Unu lohia tataudia bona hahinedia na guna tanobada ai hahetoho bona hisihisi momo e haheaukalai. Una dainai, idia ese tanobada ai be nohomu taudia ediai e varamu ḡaudia na be lalopararalaimu. Idia be karamu ḡaukaradia be dahaka?

12. Iehova ese 144,000 taudia be dahaka ḡaukara be henidiamu?

¹² Iesu bona ia ida be lohiamu taudia be karamu ḡaukaradia ese Solomon ena ḡaukara na e hereadia. King Solomon na tano tamona ai e nohova taudia milion momo e naridia. To, Dirava ena Basileia ai be lohiamu taudia ese tanobada ibounai lalonai be nohomu taudia bilion bilion be naridiamu. Iehova ese 144,000 taudia na hahenamo hereana be henidiamu!

13. Iesu ida be lohiamu taudia edia ḡaukara ma ta be dahaka?

¹³ Iesu heḡereḡerena, 144,000 taudia na king bona hahelaḡa taudia ai be laomu. (Apok. 5:10) Mose ena Taravatu henunai, hahelaḡa taudia edia maduna badana na tauani bona lauma dalanai taunimanima e durudiava. Taravatu na “ḡau namodia bae vara laulaudia mo,” una dainai baita gwau dibamu Iesu ida be lohiamu taudia ese Dirava ena taunimanima na tauani bona lauma dalanai be durudiamu. (Heb. 10:1) Hari ita na asi dibada unu king bona hahelaḡa taudia be edena dala ai Basileia henunai be nohomu taudia ida be herevaherevamu. To ta dibamu tanobada Paradaisona ai, Iehova ese taunimanima na heduru maorona be henidiamu.​—Apok. 21:3, 4.

14. “Mamoe idaudia” bona Keriso tadikakana be ede e tamona toma?

¹⁴ Iesu ese ia ida be lohiamu taudia na e gwauraidia “seri maraḡi” taudia. (Luka 12:32) Danu, ia ese orea iharuana e herevalaia  neganai e gwauraidia “mamoe idaudia.” Unu orea ruaosi na e haboudia bena orea tamona ai ela. (Ioa. 10:16) Hari ina negai unu orea ruaosi na e ḡaukara heboumu, bona tanobada Paradaisona ai danu be ḡaukara heboumu. Una negai, “seri maraḡi” taudia be guba ai be nohomu, bona “mamoe idaudia” be tanobada ai be mauri hanaihanaimu. To hari, “mamoe idaudia” ese ḡau ma haida bae kara na namo, unu amo bae heḡereḡere Paradaiso ai bae noho.

15. (a) Edena dala ai “mamoe idaudia” na Keriso tadikakana ida bae ḡaukara hebou? (b) Edena dala ai stoa ai e haroromu tadikakana ba tohotohoa? (Laulau ba itaia.)

¹⁵ E helalo-kerehai kara dika tauna na e mase dainai, Keriso ese ia dainai e kara ḡaudia totodia ena tenkiu na se hahedinaraia. To ita “mamoe idaudia” be hari dala momo ai eda tenkiu karana Iesu enai baita hahedinaraia diba. Heḡereḡere, Iesu tadikakana horoa taudia ta kara henidiamu dalana amo ta hahedinaraiamu, Iesu na ta lalokau heniamu. Iesu na e gwa mamoe na ia tadikakana e kara henidiamu dalana heḡereḡerenai baine hahemaoro henidia. (Mat. 25:31-40) Haroro bona hahediba ḡaukaradia na mai moaleda ida baita karamu neganai, Keriso tadikakana ta durudiamu. (Mat. 28:18-20) Unu ḡaukara lalodiai Baibul stadi bukadia na baita ḡaukaralai namonamo, heḡereḡere Mauri Ba Moalelaia Hanaihanai! bukana. Bema Baibul stadi ta do so karaiamu, namona na emu tahua ḡauna na taunimanima momo ediai Baibul stadi ba herevalaia.

16. Dahaka baita kara Dirava ena Basileia henunai baita noho totona?

¹⁶ Ita na basita nari ela bona Paradaiso ai baita noho bena Iehova ena ura heḡereḡerena ai baita mauri. Namona na hari baita hekwarahi mai momokanida ida baita hereva bona baita kara, bona eda mauri na baita biagua namonamo. Danu, iboudai ese Iehova baita badinaia, headava taudia bae hebadina heheni, bona tadikaka taihu baita durudia. Bema ina tanobada dikana lalonai, Dirava ena taravatu baita badinadia namonamomu, Paradaiso lalonai unu taravatu ibadinadia na be haraḡamu. Danu ḡaukara ikaradia daladia  baita diba, unu amo baita hahedinaraia ita na ta heḡaeḡaemu una negai baita noho totona. Ina magasin ai atikol ladana “Oi Heḡaeḡae ‘Tanobada Bavabia,’ A?” ba itaia.

17. Eda kara dika gunadia daidiai baita lalo hisihisi be namo, a? Mani a herevalaia.

¹⁷ Danu namona na baita hekwarahi guna ta kara kerere badadia ilalohisihisilaina karana baita dadaraia. Bona basita laloa Iesu ena mauri idavalaina boubouna ese eda dika be gwauataomu dainai, kara dika na ‘mai eda ura ida baita karaia.’ (Heb. 10:26-31; NWT) Bema ita na kara dika badana ta amo ta helalo-kerehai momokani, Iehova ena heduru daladia ta tahu, bona eda kara ta haidaua, baita abia dae Iehova ese eda dika na vada e gwauatao vaitani. (Isa. 55:7; Apos. 3:19) Iesu ese Farisea taudia e hamaorodia herevana ba laloatao, eto: “Kara maoromaoro taudia iboiridia asinama, a kara dika taudia hari.” (Mat. 9:13) Mauri idavalaina boubouna na mai siahuna eda kara dika baine gwautao.

18. O uramu Iesu badinai e mase kara dika tauna ida dahaka ba herevalai?

¹⁸ Mani a laloa, oi na Paradaiso ai guna Iesu e hereva henia kara dika tauna ida o hereveherevamu. Umui raruosi na Iesu ena boubou ḡauna ese e durumui daladia o herevalaimu. Reana o nanadaiamu, ‘Iesu ena mauri horadia oredia ai be dahaka e vara? Bona Iesu ese emu noinoi ḡauna e haerelaia neganai emu hemami be ede bamona?’ Bona ia be reana oi be nanadaimumu, ‘Satana ena nega oromana dokona lalonai mauri be ede bamona?’ Unu bamona taudia ida Dirava ena Hereva bo stadilaiamu na hahenamo!​—Efe. 4:22-24.

19. Dahaka dainai Paradaiso maurina na baita moalelaia hanaihanaimu? (Rau 1 laulauna ba itaia.)

¹⁹ Paradaiso maurina na baita moalelaia hanaihanaimu. Taunimanima idauidau baita hedavari henidiamu bona ḡaukara namodia baita karamu. Hereadaena be, dina ta ta ai Tamada guba ai baita dibaia namonamomu bona ia ese be henidamu ḡaudia baita moalelaimu. Ia idibana karana na be hesiriu hanaihanaimu, bona e kara ḡaudia ma momo herea baita dibadiamu. Baita mauri daudaumu lalonai, eda lalokau Dirava enai danu be bada be laomu. Iehova bona Iesu daidiai ta moalemu badina idia ese Paradaiso ai baita mauri hanaihanai diba gwauhamatana na e henida!