Lasi. David ese e torea ḡauna na maoro bona momokani.

Una siri ai David na e gwa, “ladamu baina imodaia ela bona hanaihanai.” (Sal. 145:1, 2) Ma siri ta ai David na e gwa: “[Iehova] Dirava e, lau oi na hanamomumu mai lalogu idoinai ida, oi ladamu baina imodaia hanaihanai.”​—Sal. 86:12.

David ese unu hereva e toredia neganai, se laloa ia na basine mase. Mai dibana Iehova na e gwa taunimanima na mai edia kara dika dainai bae mase, bona dibana ia danu kara dika tauna. (Gen. 3:3, 17-19; Sal. 51:4, 5) Ia na mai dibana Dirava ese e lalo namo henidia taudia, heḡereḡere Abraham, Isaak, bona Iakob na e mase. Bona David na e diba ia danu baine mase. (Sal. 37:25; 39:4) To Salamo 145:2 ai e gwauraia herevana ese Dirava baine hesiai henia hanaihanai urana e hahedinaraia, anina na, ena mauri dinadia iboudiai lalodiai.​—2 Sam. 7:12.

David ena toretore haida na ena mauri ai e vara ḡaudia haida e hahedinarai, heḡereḡere haida na Salamo 18, 51, bona 52 ai. Salamo 23 lalonai, David, mamoe ireḡuna tauna, ese Iehova na e gwauraia mamoe ireḡuna tauna na heto. Ia ese e hakaudamu, e hagoadadamu, bona e gimadamu. Una dainai David na e ura ena “mauri dinadia idoidiai” Dirava baine hesiai henia.​—Sal. 23:6.

Danu ba helalotao, Iehova ena hahekau henunai David ese unu hereva e tore. Gabeai bae vara peroveta herevadia danu e toredia. Heḡereḡere, Salamo 110 lalonai, David ese iena Lohiabada na guba ai Dirava ‘idibana kahana ai baine helai’ bona siahu badana baine abia negana e gwauraia. Dahaka baine kara? Ia ese tanobada ai Dirava inaina baine hadareredia bona “bese idau-idau bogaraḡidiai hahemaoro baine karaia.” David na Mesia tubuna; Mesia na guba amo baine lohia bona ia na “hahelaḡa tauna hanaihanai.” (Sal. 110:1-6) Iesu na e gwa Salamo 110 ai e gwauraia peroveta herevana na ia e herevalaia bona una na vaira negai baine ḡuḡuru.​—Mat. 22:41-45.

Oibe, Iehova ena hahekau henunai David na iena nega e herevalaia bona vaira nega danu, una negai baine tore isi lou bona Iehova baine hanamoa hanaihanai. Una ese ita e durudamu baita laloparara Salamo 37:10, 11, 29 ese idaunega Israel besena ediai e vara ḡaudia, bona vaira negai Dirava ese tanobada ibounai lalonai ena gwauhamata baine haḡuḡuru ḡaudia e herevalaidia.​—Ina magasin ai atikol ladana “Oi Na Lau ida Paradaiso ai Baita Noho” ena paragraf 8 ba itaia.

Salamo 145:2 bona siri unu bamodia ese e hahedinaraimu, David na e ura Iehova baine hanamoa ela bona ena mauri dokona. Bona unu siri amo ta dibamu vaira negai Iehova ese David baine hamauria lou neganai, David ese ia baine imodaia ela bona hanaihanai.