1. Abraham ena abidadama ta laloamu neganai, edena henanadai baita laloa?

 ENA be taunimanima momo na mai dibadia Abraham, to ia sivaraina ibounai na asi dibadia namonamo. To, oi be Abraham sivaraina na mai dibamu. Heḡereḡere, mai dibamu Baibul ese Abraham na e gwauraia “mai edia abidadama taudia tamadia.” (Roma 4:11) To, reana bo lalomu, ‘Dirava enai egu abidadama baine goada diba, Abraham ena heḡereḡerena, a?’ Oibe.

2. Dahaka dainai Abraham sivaraina baita stadilaia na mai anina bada? (Iakobo 2:​22, 23)

² Dirava enai eda abidadama baine goada dalana ta na, Abraham sivaraina baita stadilaia. Abraham na Dirava ena haheḡani e badina. Heḡereḡere, ia ese ena tano e rakatania, laḡani momo palai rumadia ai e noho, bona e ura natuna lalokauna Isaak baine bouboulaia. Ia na unu e kara toma amo ena abidadama goadana e hahedinaraia. Abraham ese ena abidadama na kara amo e hahedinaraia dainai, Dirava ese e lalonamo henia bona e gwauraia ia turana. (Iakobo 2:​22, 23 ba duahidia.) Iehova na e uramu ita iboudai—oi danu—ese iena lalonamo baita abia bona turana ai baitala. Una dainai, ia ese Baibul e torea taudia rarua Paulo bona Iakobo e hasiahudia Abraham sivaraina e torea. Mani Roma karoa 4 bona Iakobo karoa 2 ai Abraham sivaraina aita itaia. Unu karoa rua ese Abraham e herevalaia neganai, mai anina bada ḡauna ta e hahedinaraia.

3. Paulo bona Iakobo ese e gwauraia herevana be edena siri amo e abia?

 ³ Paulo bona Iakobo ese Genese 15:6 ena hereva e gwauraia, una siri na e gwaumu: “[Abraham] ese Iehova e abidadama henia; una dainai maorona e gwauraia.” Dirava ese e lalonamo heniamu tauna na e gwauraiamu, kara maoromaoro tauna eiava asi ena kerere tauna. Una na hoa ḡauna badina dia ḡoevadae tauna na Dirava ese e gwauraiamu asi ena kerere! Reana oi danu o uramu Dirava ese unu baine gwauraimu toma, bona una na baine vara diba. Una baita diba totona, mani aita itaia dahaka dainai Dirava ese Abraham na maorona e gwaurai.

4. Dahaka dainai taunimanima na dia heḡereḡere maorodia bae gwaurai?

⁴ Paulo ena revareva ai, Roma taudia e hamaorodia taunimanima iboudiai na mai edia kara dika. (Roma 3:23) To, edena dala ai ta na Dirava ese baine lalonamo henia bona maorona baine gwaurai? Paulo ese Abraham sivaraina amo Kristen taudia e durudia, una henanadai haerena bae dibaia.

5. Dahaka dainai Dirava ese Abraham na maorona e gwauraia? (Roma 4:​2, 4)

⁵ Abraham na Kanaan tanona ai e nohova neganai, Iehova ese maorona e gwaurai. Dahaka dainai? Badina be Abraham ese Mose ena Taravatu e badinaia ḡoevaḡoeva dainai, a? Lasi. (Roma 4:13) Dirava ese Abraham na maorona e gwaurai guna bena laḡani 400 muridiai, Israel besena na Mose ena Taravatu e henidia. Dirava ese Abraham maorona e gwaurai badina be dahaka? Iehova ese Abraham enai hebogahisi hereadaena e hahedinaraia bona maorona e gwaurai badina Abraham na mai ena abidadama.—Roma 4:​2-4 ba duahidia.

6. Dahaka dainai Iehova ese kara dika tauna e gwauraiamu asi ena kerere?

⁶ Paulo na e gwa ta na Dirava be abidadama heniamu neganai, “ena abidadama dainai maorona [be] gwauraiamu.” (Roma 4:5) Bena ma e gwa: “Dirava ese ena kara se laloamu to maorona e gwauraiamu tauna na David ese danu vada e hanamoa, eto, Edia kara rea e gwau taomu bona edia dika e herome ahumu taudia na nanamo; Lohiabada ese dikana se gwauraiamu tauna hari namo.” (Roma 4:​6-8; Sal. 32:​1, 2) Dirava ese ia e abidadama heniamu taudia edia dika na e gwautaomu, bona e lalodia boiomu. Idia edia abidadama dainai Dirava matanai idia na asi edia kerere.

7. Dahaka dainai Dirava e abidadama heniava taudia e gwauraidia asi edia kerere?

⁷ Ena be Abraham, David, bona abidadama taudia ma haida na Dirava ese maorodia e gwaurai, to idia na dounu dia ḡoevadae. A edia abidadama dainai, Dirava matanai idia na asi edia kerere, Dirava asie abidadama heniamu taudia be dia unuheto. (Efe. 2:12) Paulo ese ena revareva ai e hahedinaraia, Dirava turana ai baitala totona baita abidadama na mai anina bada. Abraham bona David na Dirava e abidadama henia dainai ia turana ai ela, ita danu unu baita kara tomamu neganai, Dirava turana ai baita laomu.

8-9. Haida ese Paulo bona Iakobo e tore herevadia be ede e lalodia kerere toma, bona dahaka dainai?

⁸ Laḡani handred momo lalodiai, Kristendom ese abidadama bona kara e ḡaukara heboumu dalana na asie lalotamonalaia. Dubu igunalaina taudia haida na e gwaumu, hahemauri bavabia totona Lohiabada Iesu Keriso bavabidadama henia. Reana o kamonai idia na e gwaumu: “Iesu bavabia dae bena ba  mauri.” Bona idia ese Paulo ena hereva e ḡaukaralaiamu, e gwaumu: “Dirava ese [ta] ena kara se laloamu to maorona e gwauraiamu.” (Roma 4:6) To, haida be e gwaumu, “sibomu ba hahemauri” dalana na, dubu ese e abidia hidi helaḡa gabudia baola, bona tomadiho karadia ba kara. Bena reana idia ese Iakobo 2:24 ena hereva e gwauraiamu, e gwaumu: “Kara daidiai taunimanima be maorodia bae gwauraidia, dia kamonai mo dainai.”

⁹ Unu lalohadai idauidau daidiai, toretore taudia haida na e gwaumu Paulo bona Iakobo na abidadama bona kara e herevalaidia neganai asie lalotamona. Dubu edia haroro taudia na e gwaumu, Paulo ena hereva anina na, ta na Dirava ena lalonamo baine abia totona baine abidadama mo na heḡereḡere. Danu, ma e gwaumu Iakobo ese e hahedibalaia ḡauna na, ta na kara namodia mo baine hahedinarai, unu amo Dirava ena lalonamo baine abia. Tomadiho e stadilaia profesa ta na e gwaumu: “Iakobo na se laloparara dahaka dainai Paulo na e gwa ta na ena abidadama dainai Dirava ese maorona baine gwauraia diba.” To Iehova ese Paulo bona Iakobo na e hasiahudia unu revareva e tore. (2 Tim. 3:16) Idia e tore herevadia baita lalopararalai namonamo totona, Roma bona Iakobo bukadia edia siri ma haida baita haerodia.

10. Paulo be edena kara e herevalaia? (Roma 3:​21, 28) (Laulau danu ba itaia.)

¹⁰ Roma karoa 3 bona 4 ai, Paulo be edena kara e herevalaia? Ia ese “taravatu ibadinana” karana e herevalaia, una na Dirava ese Sinai Ororona ai Mose e henia taravatudia. (Roma 3:​21, 28 ba duahidia.) Paulo ena negai, toana na Iuda Kristen taudia haida na e daradarava badina dounu e urava Mose ena  Taravatu ese e gwaurai ḡaudia bae badina, ena be idia na dia una Taravatu henunai. Una dainai, Paulo na Abraham e herevalaia, unu amo baine hamomokania ta na dia “taravatu ibadinana” karana amo Dirava ese maorona baine gwaurai. To mai ena abidadama hari namo. Una ese ita na e hagoadadamu, badina ta dibamu bema Dirava bona Keriso baita abidadama henidiamu, Dirava ena lalonamo baita abia dibamu.

11. Iakobo be ededia “kara” e herevalai?

¹¹ Iakobo karoa 2 ai, Iakobo ese e herevalaia “kara” be idau, a Paulo ese e herevalaia “taravatu ibadinana” be ma idau. Iakobo na Kristen taudia ese dina ta ta ai e karamu karadia e herevalai. Kara unu bamodia e hahedinaraimu Kristen tauna ese Dirava e abidadama henia momokanimu. Mani Iakobo ese e gwaurai ḡaudia rua aita herevalai.

12. Iakobo ese abidadama bona kara e ḡaukara heboumu dalana be ede e herevalaia toma? (Laulau danu ba itaia.)

¹² Iakobo ese e gwauraia ḡauna ginigunana na, Kristen taudia ese taunimanima iboudiai bae kara henidia heḡereḡere. Una na ini e haheitalaia toma, tau ta na taḡa tauna e kara namo heniamu, a ogoḡami tauna be se kara namo heniamu. Iakobo na e gwa, reana una tau na be laloamu ia na mai ena abidadama, to iena kara amo una e hahedinaraiamu, eiava? (Iak. 2:​1-5, 9) Ḡau iharuana be, Iakobo na e gwa, tau ta na tadikakana eiava taihuna ta baine itaia asi ena dabua eiava asi ana, to basine durua, ena be una tau na baine gwa ia na mai ena abidadama to ena kara ai basine hahedinaraia, iena abidadama na asi anina. Iakobo na e gwa: “Kamonai asi ena kara vada e mase, badina be sibona.”—Iak. 2:​14-17.

13. Iakobo ese abidadama mai ena kara e herevalaia neganai, daika ena haheitalai e herevalaia? (Iakobo 2:​25, 26)

 ¹³ Iakobo ese abidadama mai ena kara e herevalaia neganai, Rahaba ena haheitalai namona e herevalaia. (Iakobo 2:​25, 26 ba duahidia.) Rahaba ese Iehova sivaraina na e kamonai bona e diba ia ese Israel taudia e durudiava. (Ios. 2:​9-11) Iena abidadama na ena kara amo e hahedinaraia—ia ese Israel spai taudia rarua e gimadia. Una dainai, ena be ia na dia Israel hahinena bona dia ḡoevadae, to Dirava ese maorona e gwaurai, Abraham heḡereḡerena. Rahaba ena haheitalai amo ta dibamu eda abidadama na kara amo baita hahedinaraia na mai anina bada.

14. Paulo bona Iakobo edia toretore ai dahaka e herevalai?

¹⁴ Baibul itorena taudia rarua, Paulo bona Iakobo ese abidadama bona kara na dala idaudia rua ai e herevalaidia. Paulo ese Iuda Kristen taudia e hamaorodia, ta na dia Mose ena Taravatu ibadinana karana dainai Iehova ena lalonamo baine abia. Bona Iakobo ese Kristen taudia iboudiai e hagoadadia, edia abidadama bae hahedinaraia dalana na, ma haida bae kara namo henidia.

15. Ededia dala ai eda abidadama na kara amo baita hahedinaraia? (Laulau danu ba itaia.)

¹⁵ Iehova na se gwa bema ta uramu maoroda baine gwaurai, namona na Abraham e kara ḡaudia baita kara. To, dala idauidau ai eda abidadama na eda kara amo baita hahedinaraia. Heḡereḡere, nega ginigunana kongrigeisin heboudia e maimu taudia baita welkam henidia, heduru e uramu tadikakadia bona taihudia baita durudia, bona eda ruma bese taudia baita kara namo henidia. Unu iboudiai na Dirava ese e abi daemu karadia bona  be hanamodamu. (Roma 15:7; 1 Tim. 5:​4, 8; 1 Ioa. 3:18) Eda abidadama baita hahedinaraia dala namona ta na, ma haida ediai sivarai namona baita harorolaia. (1 Tim. 4:16) Ita iboudai ese eda kara amo baita hahedinaraia ita na mai eda abidadama, bona baita abia dae Iehova ena gwauhamata na be ḡuḡurumu, bona iena dala na hereadae. Bema unu baita kara tomamu, ta diba momokanimu Dirava ese ita na maoroda be gwauraimu bona turana ai baita laomu.

16. Abraham be dahaka e laroa bona e abidadama?

¹⁶ Roma karoa 4 ai, Abraham ena amo ta dibaiamu ḡauna ta na ina: Iseda helaro. Iehova na e gwauhamata “bese diaḡau” na Abraham amo hahenamo bae abi. Mani a laloa, Abraham enai una na hahenamo ta! (Gen. 12:3; 15:5; 17:4; Roma 4:17) Abraham laḡanina na 100 bona Sara laḡanina na 90, to asi natudia. Una dainai taunimanima edia roharoha ai, Abraham bona Sara ese natudia ta basie havaraia diba. Abraham enai una na hahetoho ta. “To abidadama dainai e helarova; taunabunai ia na bese loḡora tamadia ai ela.” (Roma 4:​18, 19) Bona gabeai Abraham ese e laroa ḡauna na e vara momokani. Ia na Isaak tamana ai ela.—Roma 4:​20-22.

17. Ede ta diba tomamu Dirava ese maoroda baine gwaurai diba?

¹⁷ Ita danu, Dirava ese baine lalonamo henida, maoroda baine gwaurai bona turana ai baine halaoda diba, Abraham heḡereḡerena. Una na Paulo ese e hahedinaraia, eto: “Dia [Abraham] mo sibona herevana unu se torea toma; a ita danu, Iesu, eda Lohiabada, mase amo e hatorea isi Diravana ta abidadama heniamu tauda, maoroda e gwaurai.” (Roma 4:​23, 24) Abraham heḡereḡerena, namona na Iehova baita abidadama henia, kara namodia baita hahedinarai, bona baita abia dae Iehova ena gwauhamata na be ḡuḡurumu. Roma karoa 5 ai Paulo ese eda helaro e herevalaia, bona una na atikol gabenai baita stadilaiamu.