OI ESE Iehova ena harihari ḡaudia na o moalelaidiamu, ta na ura kwalimu. Una ura kwalimu dainai oi na abi hidi ba kara diba edena dala ai unu harihari ḡaudia ba moalelaidia. Baibul na e gwa wain na Dirava ena harihari ḡauna ta. Bona ma e gwaumu: “Aniani na kiri ihavarana ḡauna, bona vine ranuna ese taunimanima edia mauri e hamoaleamu.” (Koh. 10:19; Sal. 104:15) To reana o itaiamu, taunimanima haida na alkahol momo e inumu dainai hekwakwanai e davarimu. Danu, alkahol i’inuna karana ai taunimanima edia lalohadai na idauidau. To, Kristen taudia be dahaka ese baine durudia abi hidi maorodia bae kara?

Herevana edeseniai ta nohomu eiava edena kastom ta badinaiamu, to abi hidi ta karamu neganai namona na Dirava ena lalohadai baita badinaia, unu amo baita moalemu.

Reana o itaiamu taunimanima momo na e inuinu momomu bona e kekeromu. Haida na alkahol e inumu badina una ese edia hemami e hanamoamu. Haida be alkahol e inumu edia problem basie lalohekwarahilai totona. Bona gabu haida ai, taunimanima na e lalomu bema ta na alkahol momo be inumu, ia na goada tauna.

To, ita Kristen tauda na Ihavarada Diravana ese sisiba namodia e henidamu. Heḡereḡere, ia ese kekero karana ena dika idauidau na e hadibadamu. Hereva Lada-isidia 23:​29-35 ai, kekero tauna ena kara bona e davarimu problem haida baita duahimu. a Europe ai elda ta Daniel na ena mauri gunana e laloa lou neganai, e gwa: “Lau na na inuinu momova dainai disisin kereredia na karava bona ḡau dikadia momo egu ai e varava, unu na lalo loumu neganai na lalohisihisimu.”

Edena dala ai Kristen taudia ese edia ura kwalimu bae ḡaukaralaia, unu amo alkahol momo i’inuna karana amo e varamu dika basie davari? Namona na Dirava ena lalohadai ese idia edia abi hidi bona kara baine biagudia.

Mani alkohol i’inuna karana ai Baibul ena hereva bona taunimanima e inuinumu badidia haida aita lalodia.

Baibul ese alkahol sisina baita inua karana na se taravatua, badina alkahol o wain i’inuna karana na mai moalena. Baibul na e gwaumu: “Amu bavania mai moalemu ida, bona emu vine ranuna ba inua mai lalo-namomu ida.” (Koh. 9:7) Nega ta ta, Iesu bona abidadama hesiai taudia haida na wain e inu.—Mat. 26:​27-29; Luka 7:34; 1 Tim. 5:23.

To, Baibul ese kekero karana na e taravatua. Baibul na e gwaumu: “Vine ranuna basio inua momo, kekero garina.” (Efe. 5:18) Bona ma e gwaumu: “Muramura ese e hakekerodiamu taudia . . . na asi ahudia, Dirava ena basileia lalonai.” (1 Kor. 6:10) Oibe, Iehova ese inuinu momo bona kekero karana na e taravatudia. Una dainai, Dirava ena lalohadai baita badinaia na ḡau badana, dia taunimanima edia lalohadai.

Haida na e laloamu ena be alkahol bada herea be inumu to basie kekeromu. To, una na mai ena dika. Baibul na e gwaumu wain momo i’inuna karana ese e biaguamu tauna na kerere badadia be karamu bona ena hetura karana Iehova ida be hadikaia dibamu. (Tito 2:3; Her. 20:1) Iesu danu e gwa, “kekero” karana ese ta baine koua diba Dirava ena tanobada matamatana ai basine noho. (Luka 21:​34-36) Una dainai, Kristen tauna be dahaka baine kara, unu amo alkahol i’inuna karana amo e varamu dika basine davari?

Alkahol i’inuna karana ai bema ta na taunimanima edia lalohadai be badinamu, dika be davari dibamu. Kristen taudia na aniani bona inuinu ḡaudia e abi hidimu neganai, idia ese e laloa badamu ḡauna na Iehova bae hamoalea. Baibul na e gwaumu: “Bavaniani eiava ba inuinu eiava dahaka dahaka ba kara, ḡau iboudiai ba kara Dirava iheatolaina ai.” (1 Kor. 10:31) Oi ese ba lalodia henanadaidia bona Baibul ena hahekau herevadia haida be ini:

Lau be haida ese bae ura henigu dainai alkahol na inumu, a? Esodo 23:2 na e gwaumu: “Hutuma muridiai basio raka.” Una siri ai Iehova ese Israel taudia e hadibadia ia asie hamoaleamu taudia na basie tohotohodia. Hari ina negai Kristen taudia ediai danu una sisiba na mai anina bada. Alkahol i‘inuna karana ai bema turada edia lalohadai baita badinamu, ita na Iehova ena amo baita daudaumu bona iena taravatu baita utu dibamu.—Roma 12:2.

Lau ese alkahol na inumu badina be na uramu baina hahedinaraia lau na mai goadagu, a? Gabu haida ai, taunimanima ese inuinu momo bona kekero karadia na e abi daemu. (1 Pet. 4:3) To mani 1 Korinto 16:13 ena hereva aita laloa, e tomu: “Ba gima. Abidadama ai ba gini tutuka-tutuka. Ba haheauka. Ba goada.” Alkahol i’inuna karana ese ta baine durua diba goada tauna ai bainela, a? Lasi. Alkahol ese ta ena lalohadai na be biagua haraḡamu dainai, basine lalo namonamomu bona abi hidi kereredia be karamu. Una dainai, alkahol momo i’inuna karana ese ta ena manoka toana e hahedinaraiamu. Isaia 28:7 na e gwaumu e kekeromu tauna na e laigo-laigomu, lalona e heḡonumu, bona e gwau rea gwau reamu.

Iehova ena amo goada korikorina baita abiamu, unu amo baita gimamu bona abidadama ai baita gini tutuka-tutuka dibamu. (Sal. 18:32) Anina na ita ese bae vara dika na baita haerodiamu bona baita karamu disisen amo eda hetura karana Iehova ida baita gimaiamu. Iesu ena hetura karana Iehova ida na goada, bona momo ese ia na e matauraiava badina kara maorodia ikaradia ai ia lalona na goada.

Lau be alkahol na inumu unu amo egu problem basina lalodia momo, a? Salamo  itorena tauna na e gwa: “Lalogu e hekwarahi momomu negadia ai, oi [Iehova] ese o hagoadagumu.” (Sal. 94:​19, NWT) Bema o lalohekwarahimu, Iehova ena heduru ba tahua, dia alkahol i’inuna karana amo emu lalohekwarahi ba haorea. Heduru dalana namona ta na, Iehova ba ḡuriḡuri henia loulou. Danu, momo na e mamiamu kongrigeisin lalonai lo taudia edia heduru iabina karana na mai ena namo. Bema ta na, problem ihaheaukalaidia totona alkahol be inumu neganai, ia enai na be aukamu kara maorodia baine kara. (Hos. 4:11) Daniel, matamanai tame herevalaia tauna, na e gwa: “Lau na na lalohekwarahiva bona na lalohisihisiva negadiai na inuinu momova, to egu problem na e bada e laova, una dainai bamogu momo na haboiodia bona na mamia egu mauri na asi anina.” Dahaka ese Daniel e durua? Ia na e gwa: “Na laloparara Iehova enai baina tabekau na namo, bona unu na kara toma dainai, egu problem na hanaidia.” Momokani, Iehova na nega iboudiai noho heḡaeḡae ita baine duruda, ena be nega haida ta laloamu heduru dalana ta na lasi.—Fili. 4:​6, 7; 1 Pet. 5:7.

Bema nega haida oi na alkahol o inumu, namona na ba kara sensidia ba lalodia. Sibomu ba henanadai: ‘Egu inuinu karana dainai egu famili eiava turagu namona ta ese e hereva henigu, a?’ Bema oibe, anina na una na oiemu manoka ḡauna ta, to so lalopararalaiamu. ‘Lau be na inuinu momomu dia guna bamona, a?’ Se inuinu momomu tauna ese inuinu karana na taina ruana be manadalaiamu. ‘Lau egu ai be e aukamu dina haida eiava dina momo basina inuinu, a?’ Bema oibe, anina na inuinu karana na o manadalaia. Una problem ba hanaia totona dokta edia amo heduru maorona bavabia.

Inuinu karana ese hekwakwanai momo e havaramu dainai, Kristen taudia haida na lalodia e hadaimu alkahol basie inu. Haida be alkahol mamina asie ura heniamu dainai asie inuamu. Bema oi turamu ta na se uramu baine inuinu, ena abi hidi na ba matauraia.

Reana o lalopararamu namona na hetoa bavato alkahol hida ba inu bona ba inu negadia bavabi hidi. Heḡereḡere, reana wiki ta lalonai  nega tamona ba inu eiava aniani negadiai mo ba inu. Haida na e lalomu ededia alkahol bae inu, ededia be lasi, heḡereḡere wain eiava bia taidia e inumu, to muramura aukadia bona e miksi ḡaudia na se inumu. Ta na abi hidi unu bamodia be karamu neganai, ibadinadia na be haraḡamu. Bema lo Kristen tauna ta na abi hidi unu hetomana ta be karaiamu bona be badinaiamu, haida ese ia ede e laloa tomamu karana na basine lalohekwarahilaiamu.

Alkahol i’inuna karana ai abi hidi ta karamu neganai, ma haida edia hemami danu baita lalo. Roma 14:21 na e gwaumu: “Vamu basita ania, vine ranuna basita inua, bona varavarada ihahekwakwanaina karana ta basita karaia, unu hari namo.” Una sisiba be ede ba badinaia toma? Namona na lalokau ba hahedinaraia. Bema o laloamu alkahol bo inuamu ese ta na be hahekwakwanaiamu, lalokau dainai alkahol na basio inuamu ena be ba inua na maoro. Unu amo o hahedinaraiamu oi na ma haida o matauraidiamu bona edia namo o lalomu.—1 Kor. 10:24.

Danu, alkahol iḡaukaralaina dalanai gavamani na taravatu e atomu, bona Kristen taudia ese unu taravatu na bae badina. Reana unu taravatu ai mauri laḡani ta e abia hidi bona una laḡani e abiamu taudia na alkahol bae inu diba, eiava taunimanima na motuka e tarimu o misini ḡaudia haida e ḡaukaralaimu negadiai alkahol na basie inu.—Roma 13:​1-5.

Iehova ese ita na harihari ḡaudia momo e henida. Ta na ura kwalimu, bona una ura kwalimu dainai ita na baita ani eiava baita inu ḡaudia baita abi hidi diba. Namona na ta abi hidimu ḡaudia amo baita hahedinaraia, una ura kwalimu na Iehova ihamoalena totona ta ḡaukaralaiamu.