1. Kristen tauna be dahaka baine kara unu amo lo Kristen tauna ai bainela?

 KING David ese Solomon na e hamaoroa eto: “Ba goada, [tau korikori] ai baola.” (1 Han. 2:​1-3) Hari ina negai, Kristen tataudia ese una sisiba bae badinaia na mai anina bada. Bema ta na e uramu lo Kristen tauna ai bainela, namona na ena mauri lalonai Dirava ena taravatu bona hahekau herevadia baine badina. (Luka 2:52) Dahaka dainai matamata tadikakadia na lo Kristen taudia ai baela na mai anina bada?

2-3. Dakaha dainai matamata tadikakana ta na lo Kristen tauna ai bainela na mai anina bada?

² Kristen tauna ena maduna ruma bese bona kongrigeisin ai na momo. A dibamu, umui matamata tadikakamui ese vairai bo huamu madunadia na o lalodiamu. Reana oi na o uramu ful-taim hesiai ḡaukarana ba karaia, eiava hesiai tauna o elda ta ai baola. Danu, reana o uramu ba headava bona natumu ba havara. (Efe. 6:4; 1 Tim. 3:1) To, lo Kristen tauna ai baola guna na namo, badina una ese be durumumu unu maduna ba huadia namonamo. b

³ Dahaka ese oi baine durumu lo Kristen tauna ai baola? Namona na mauri ai oi bae durumu ḡaukaradia ikaradia daladia ba diba. To, hari oi be dahaka ba kara, vairai bo huamu madunadia daidiai ba heḡaeḡae?

4. Edeseniai haheitalai namodia bo davari dibamu? (Laulau danu ba itaia.)

⁴ Haheitalai namodia bavabidia hidi. Baibul ai matamata taudia ese bae tohotohodia taudia sivaraidia na momo. Idia na Dirava e lalokau heniava bona Iena taunimanima na e naridiava. Danu, haheitalai namodia e hahedinaraimu lo Kristen  tataudia na emu ruma bese ai bona kongrigeisin ai bo davaridia dibamu. (Heb. 13:7) Haheitalai hereadaena na Iesu Keriso. (1 Pet. 2:21) Idia sivaraidia o stadilaimu neganai, edia kara namodia ba haerodia. (Heb. 12:​1, 2) Bena ba itaia idia be edena dala ai ba tohotohodia diba.

5. Dahaka dainai ḡau ba haero namonamo na mai anina bada? (Salamo 119:9)

⁵ Ḡau ba “haero namonamo.” (Her. 3:​21, NWT) Ḡau e haero namonamomu tauna na abi hidi ta do se karaia neganai, ia na e lalohadai namonamo gunamu. Namona na ba hekwarahi ḡau ihaerodia namonamo daladia ba diba bona una kara na hanaihanai ba hahedinaraia. Dahaka dainai? Badina hari ina negai, matamata taudia momo na sibodia edia lalohadai bona ura e badinamu. (Her. 7:7; 29:11) Danu, TV, muvi, intanet o social media ese emu lalohadai bona kara na bae biagu diba. Oi be dahaka ese baine durumu, ḡau ba haero namonamo? Baine durumu ḡauna na Baibul ena hahekau herevadia ba dibadia bona bae durumu daladia ba lalohadailai. Bena unu hahekau herevadia amo Iehova ese e moalelaimu abi hididia ba kara. (Salamo 119:9 ba duahia.) Unu bo kara tomamu neganai, oi na lo Kristen tauna ai bo laomu. (Her. 2:​11, 12; Heb. 5:14) Mani ḡau ihaerodia namonamo karana ese oi baine durumu daladia rua aita lalodia: (1) Taihu ta o kara heniamu dalanai, bona (2) dabua bona heḡoeva daladiai.

6. Ḡau e haerodia namonamomu tadikakana ese taihu be ede baine kara henidia toma?

⁶ Ḡau e haerodia namonamomu tauna ese taihu na e matauraidiamu. Bema matamata tadikakana ta na e uramu taihu ta baine hetura henia bona baine dibaia namonamo, una na dia kerere. To, bema ia na headava se lalohadailaiamu, namona na ena kara bona hereva daladia amo taihu na basine hauraia kava. Ḡau e haerodia namonamomu tadikakana na basine kara kavamu, to ena hereva, e toremu ḡaudia, bona e karamu ḡaudia amo taihu na be matauraiamu. (1 Tim. 5:​1, 2) To bema ia na taihu ta ida e heturamu, taihu ladana basine hadikaia totona idia raruosi sibodia na basie loa hebou, to namona na lo Kristen tauna ta ese baine bamodia.—1 Kor. 6:18.

7. Dabua bona heḡoeva dalanai haero namonamo karana ese matamata tadikakana be ede be durua tomamu?

 ⁷ Ḡau e haerodia namonamomu tauna ese ena dabua bona heḡoeva dalana ai abi hidi namodia e karamu. Nega momo, dabua e disainimu taudia ese Iehova ena lalohadai na asie laloamu, bona idia ese matabodaḡa maurina e badinaiamu. Unu dabua haida na tatau ese e karamu neganai, idia toadia na ha’hine na heto, bona unu dabua haida na taiti herea. Unu ese edia lalohadai dikadia e hahedinaraimu. Lo Kristen matamata tadikakana na dabua e abi hidimu neganai, Baibul ena hahekau herevadia e badinamu bona kongrigeisin ai haheitalai namodia e tohotohomu. Sibona baine henanadai diba: ‘Lau na karamu abi hididia ese e hahedinaraimu lau be na lalo namonamomu bona haida na matauraidiamu, eiava? Egu heḡoeva dalana amo na hahedinaraiamu lau be Dirava ena hesiai tauna ta, a?’ (1 Kor. 10:​31-33; Tito 2:6) Ḡau e haero namonamomu matamata tadikakana na, tadikaka taihu ese be matauraiamu bona Iehova ese be lalonamo heniamu.

8. Matamata tadikakana be dahaka baine kara unu amo ena ḡaukara baine haḡuḡurua?

⁸ Ba ḡaukara goada. E ḡaukara goadamu matamata tadikakana ese ena ḡaukara na e kara namonamomu. (Luka 16:10) Mani Iesu ena haheitalai aita laloa. Ia na ena ḡaukara iboudiai e karadia namonamo, bona Iehova ese e henia ḡaukaradia iboudiai na e haḡuḡurudia, ena be nega haida unu baine kara toma na auka. Ia ese taunimanima na e lalokau henidiava, ena hahediba taudia danu. Bona mai ena ura ida ena mauri e heni idia daidiai. (Ioa. 13:1) Iesu heḡereḡerena, ba ḡaukara goada e henimumu ḡaukaradia ba haḡuḡurudia. To, bema unu ḡaukara ikaradia na asi dibamu, namona na ba manau bona lo tadikakadia edia heduru ba tahu, danu basio lahedo. (Roma 12:11) Emu ḡaukara na “Iehova dainai” ba kara to “dia taunimanima daidiai.” (Kol. 3:​23, NWT) Oi na dia ḡoevadae dainai emu ḡaukara lalodiai na bo kerere dibamu, namona na ba manau bona emu kerere na ba gwaurai hedinarai.—Her. 11:2.

9. Dahaka dainai matamata tadikakana na mauri ai bae durua ḡaudia baine diba?

⁹ Lo Kristen tauna ai baola totona namona na emu mauri ai bae durumu ḡaudia ba diba. Unu amo kongrigeisin madunadia bo huamu, ḡaukara ta bo davariamu sibomu eiava emu ruma bese iduruna, bona ma haida ida emu hetura karana be hanamoamu. Mani mauri ai bae durumu ḡaudia haida aita herevalai.

10-11. Matamata tadikakana na duahiduahi bona toretore be dibamu ena namo be dahaka? (Salamo 1:​1-3) (Laulau danu ba itaia.)

¹⁰ Duahiduahi bona toretore ba diba namonamo. Baibul na e gwaumu dina ta ta ai Dirava ena hereva e duahiamu bona e laloa dobumu tauna na e moalemu. (Salamo 1:​1-3 ba  duahidia.) Dina ta ta ai Baibul bo duahiamu neganai, Iehova ese ḡau e haeromu daladia bo lalopararalaimu bona bo badinadiamu. (Her. 1:​3, 4) Kongrigeisin ai tadikaka unu bamodia bae noho na namo. Dahaka dainai?

¹¹ Badina tadikaka taihu na tadikaka unu bamodia amo Baibul ena hahekau herevadia bona sisiba bae abi diba. (Tito 1:9) Duahiduahi bona toretore bo dibamu neganai, oiemu tok bona haere amo ma haida edia abidadama na bo hagoadaiamu. Danu, be durumumu sibomu emu stadi ai eiava hebou badadia bona maraḡidia ai e henimu tok amo bae durumu point bo torediamu. Unu point ese be durumumu emu abidadama bo hagoadaiamu bona ma haida bo durudiamu.

12. Ma haida ida emu herevahereva dalana be ede ba hanamoa toma?

¹² Herevahereva daladia namodia ba diba. Kristen tauna na ma haida ida herevahereva namonamo daladia baine diba na namo. Herevahereva namonamo tauna ena kara na e hakala namonamomu, bona ma haida edia lalohadai bona hemami e lalopararalaimu. (Her. 20:5) Danu, ia na haida edia hereva daladia, vairadia toadia, bona edia kara na e lalopararalaimu. To unu na basio dibadiamu bema oi na nega basio atomu ma haida ba bamodia. Bona bema oi na hanaihanai email eiava teks meseij mo bo ḡaukaralaimu, una ese oi na be koumumu ma haida ba bamodia bena idia ida ba herevahereva. Una dainai, ma haida ida ba herevahereva hebou.—2 Ioa. 12.

13. Matamata tadikakana be ma dahaka baine diba na namo? (1 Timoteo 5:8) (Laulau danu ba itaia.)

¹³ Tauani dalanai dabu ḡaudia iabidia daladia ba diba. Lo Kristen tauna na sibona bona ena ruma bese baine naridia na namo. (1 Timoteo 5:8 ba duahia.) Tano haida ai, matamata tadikakadia na tamadia eiava varavaradia ta amo moni ḡaukara ta idavarina dalana e dibamu. Tano ma haida ai be, matamata taudia na skuli ai ḡaukara ta ikarana dalana e dibamu. Ena be dala idauidau amo diba bo abimu, to ḡaukara ta ikarana dalana ba diba na namo. Badina una ese be durumumu moni ḡaukara ta ba davaria. (Apos. 18:​2, 3; 20:34; Efe. 4:28) Namona na ba ḡaukara goada, bona o hamatamaiamu ḡaukarana na ba haḡuḡurua. Haida ese una be itaiamu neganai, emu ḡaukara na be laloa badamu. Bona moni ḡaukara ta na bo davaria dibamu. Ina atikol ai, matamata tadikakadia ese bae kara ḡaudia bona bae diba ḡaudia haida tame herevalai, unu ese idia na be durudiamu vairai bae hua madunadia bae haḡuḡurudia. Mani unu maduna haida aita herevalai.

14. Matamata tadikakana be dahaka baine kara ful-taim hesiai ḡaukara ai baine vareai totona?

¹⁴ Ful-taim hesiai ḡaukara. Lo Kristen tadikaka momo na matamatadia ai ful-taim hesiai ḡaukara e karaia matama. Painia ḡaukara ese matamata tadikakana ta na be duruamu taunimanima idauidau ida baine ḡaukara hebou. Danu, ia na be duruamu ena moni baine ḡaukaralai namonamo. (Fili. 4:​11-13) Ful-taim hesiai ḡaukarana ba hamatamaia dalana namona na heduru painia ḡaukara ba karaia. Momo na hua haida lalodiai heduru painia ḡaukarana e karaiamu, una ese e haheḡaeḡaediamu regula painia ḡaukarana bae karaia. Painia ḡaukara ese dala e kehoamu ful-taim hesiai ḡaukara idauidau, heḡereḡere konstraksen eiava Betele ḡaukara lalodiai ba vareai.

15-16. Matamata tadikakana be dahaka baine kara bena baine heḡereḡere hesiai tauna o elda ai bainela?

¹⁵ Hesiai tauna eiava elda. Namona na Kristen tadikakadia na bae ḡaukara goada elda ai baela. Baibul na e gwaumu una maduna dainai e ḡaukara goadamu tadikakadia na “ḡaukara namona e ura heniamu.” (1 Tim. 3:​1, NWT) Tadikaka ta na elda ai do sela neganai, baine ḡaukara goada hesiai tauna ena maduna baine huaia guna. Hesiai taudia na elda ida e ḡaukara heboumu kongrigeisin taudia e durudiamu. Elda taudia bona hesiai taudia na mai edia manau ida tadikaka taihu e durudiamu bona haroro ḡaukara e goadalaiamu. Matamata tadikakadia laḡanidia 17 ela 19 lalodiai, na bae abidia hidi diba hesiai tauna ena maduna bae huaia. Danu, ena be hesiai taudia laḡanidia na 20 amo e dae, to bema idia na heḡereḡere elda maduna na bae huaia, bae abidia hidi diba.

¹⁶ Matamata tadikakamui, umui be dahaka ba kara unu amo ba heḡereḡere unu maduna ba hua? Oi ba kara ḡaudia na Baibul ese e herevalai. Bona Iehova, emu ruma bese, bona kongrigeisin taudia ba lalokau henidia. (1 Tim. 3:​1-13; Tito 1:​6-9; 1 Pet. 5:​2, 3) Unu kara ta ta na ba lalopararalai namonamo. Bona Iehova ba noia baine durumu unu kara ta ta ba hahedinarai. c

17. Matamata tadikakana be dahaka baine kara bena baine heḡaeḡae tau bona ruma bese kwarana madunadia baine hua? (Laulau danu ba itaia.)

¹⁷ Tau bona ruma bese kwarana. Lo Kristen tadikaka haida na abi hidi e kara basie headava, Iesu ese e herevalaia bamona. (Mat. 19:12) To bema oi na abi hidi bo karamu ba headava, oi na tau ena maduna bona ruma bese kwarana ena maduna bo huadiamu. (1 Kor. 11:3) Iehova na e uramu tau ese adavana na baine  lalokau henia, tauani dalanai baine naria, turana namona ai baine halaoa, bona baine durua Iehova baine hetura henia. (Efe. 5:​28, 29) Ina atikol ai, ita na lo Kristen tauna ese baine kara karadia bona baine dibadia ḡaudia tame herevalai, heḡereḡere ḡau baine haero namonamo, hahine baine matauraidia, bona baine ḡaukara goada. Unu bo kara tomamu neganai, oi na tau namona bona ruma bese kwarana namona ai bo laomu.

18. Matamata tadikakana be dahaka baine kara bena baine heḡaeḡae tama madunana ihuana totona?

¹⁸ Tama. Matamata tadikakamui, bo headavamu murinai reana umui na tama ta ai bo laomu. Tama namona ai baola totona, Iehova ena haheitalai amo oi be dahaka bo dibamu? Ḡau momo bo dibamu. (Efe. 6:4) Iehova ese natuna Iesu na e hamaoroa e lalokau heniamu bona e lalonamo heniamu. (Mat. 3:17) Bema oi na tama ta ai bo laomu, namona na hanaihanai natumu na ba hadibadia o lalokau henidiamu. Bona edia ḡaukara namodia daidiai ba hanamodia. Tama ese Iehova ena haheitalai e tohotohoamu neganai, natudia na e durudiamu lo Kristen taudia ai e laomu. Una maduna totona ba heḡaeḡae dalana na, hari mai emu lalokau ida emu ruma bese bona kongrigeisin taudia ba kara henidia, bona ba hadibadia idia na o lalokau henidiamu bona o lalodia badamu. (Ioa. 15:9) Bena gabeai bema oi na tau o tama ta ai bo laomu, unu maduna na bo huadia namonamomu. To hari, namona na Iehova ese dala idauidau ai baine ḡaukaralaimu, bona emu ruma bese bona kongrigeisin ba durudia.

19-20. Dahaka ese matamata tadikakadia baine durudia lo Kristen taudia ai baela? (Rau 1 laulauna ba itaia.)

¹⁹ Matamata tadikakamui, ba ḡaukara goada lo Kristen tauna ta ai baola. Namona na haheitalai namodia ba tohotoho, ḡau ba haero namonamo, ba ḡaukara goada, mauri ai bae durumu ḡaudia ba diba, bona vaira madunadia totona ba heḡaeḡae.

²⁰ Nega haida, oi ese ba kara ḡaudia iboudiai bo haeromu neganai, reana bo laloamu unu na auka. To oi ese unu na ba kara diba. Ba helalotao Iehova na e ura dikadikamu oi baine durumu. (Isa. 41:​10, 13) Danu, kongrigeisin ai tadikaka taihu ese oi na be durumumu. Lo Kristen tauna ta ai bo laomu neganai, emu mauri ai hahenamo idauidau bo davarimu bona bo moalemu. Ai ese umui matamata tadikakamui na a lalokau henimuimu. Namona na Iehova ese baine hanamomui badina o ḡaukara goadamu lo Kristen taudia ai baola.—Her. 22:4.