1. Lo Kristen taudia ai baitala totona dahaka baita kara?

 ITA NA natu ta e tubu haraḡamu, taunimanima badana ai e laomu neganai ta hoamu. To una na se vara kavamu. Una heḡereḡerena, ta na ḡau haida baine kara na namo lo Kristen tauna ai bainela totona. b (1 Kor. 13:11; Heb. 6:1) Anina na iena hetura karana Iehova ida na baine hagoadaia. Danu lauma helaḡa huahuadia baine hahedinarai, bae durua ḡaukaradia baine diba, bona vairai baine hua madunadia totona baine heḡaeḡae.—Her. 1:5.

2. Genese 1:27 amo ita be dahaka ta dibamu, bona ina atikol ai dahaka baita herevalaimu?

² Iehova ese tau bona hahine e karadia. (Genese 1:27 ba duahia.) Dala momo ai idia na idau, heḡereḡere idia na ḡaukara idauidau bae kara diba. To unu ḡaukara ihaḡuḡurudia totona, namona na ikaradia daladia bae diba bona kara namodia bae hahedinarai. (Gen. 2:18) Ina atikol ai baita herevalaiamu ḡauna na matamata taihuna be dahaka baine kara diba unu amo lo Kristen taihuna ai bainela. Bona atikol gabena ai, matamata tadikakadia ese bae kara ḡaudia baita herevalaimu.

3-4. Matamata taihudia ese haheitalai namodia be edeseniai bae davari diba? (Laulau danu ba itaia.)

³ Baibul ai Iehova e lalokau heniava bona e hesiai heniava hahinedia momo sivaraidia bo davarimu. (Ina atikol “Women in the Bible—What Can We Learn From Them?” na jw.org ai ba itaia.) Ina stadi ena siri badana heḡereḡerena, idia na e “boga auka” bona ḡau iboudiai lalodiai e “heabidadama” o kamonai karana  e hahedinaraia. Danu, taihu na edia kongrigeisin ai Iehova e lalokau heniamu lo Kristen taihudia edia haheitalai bae tohotoho diba.

⁴ Matamata taihumui, emui kongrigeisin ai ba itaia ededia taihu be haheitalai namodia bona o uramu ba tohotohodia. Edia kara namodia ba ita, bona unu kara namodia ba tohotoho daladia ba lalo. Paragraf gabedia ai lo Kristen taihudia ese bae hahedinarai kara badadia toi baita herevalaimu.

5. Dahaka dainai Kristen taihudia bae manau na mai anina bada?

⁵ Lo Kristen tauna ena kara badana na manau. Bema taihu na be manaumu, ena hetura karana Iehova bona ma haida ida na be moalelaiamu. (Iak. 4:6) Heḡereḡere, Iehova e lalokau heniamu hahinena na be manaumu dainai Iehova ese e atoa kwara dagina ena hahekau dalana be badinaiamu. (1 Kor. 11:3) Una hahekau herevana na mai anina bada kongrigeisin bona ruma bese lalonai. c

6. Rebeka ena manau karana amo matamata taihudia be dahaka e dibamu?

⁶ Mani Rebeka ena haheitalai aita laloa. Ia na aonega hahinena bona ena mauri ai mai dibana edena nega ai ḡau ta baine karaia bona ede baine karaia toma. (Gen. 24:58; 27:​5-17) Danu ia na hemataurai hahinena bona hahekau daladia e badinava. (Gen. 24:​17, 18, 65) Rebeka heḡereḡerena, bo manaumu bona Iehova ena dala bo badinamu neganai, emu ruma bese bona kongrigeisin ediai oi na haheitalai namona ai bo laomu.

7. Eseta ena amo matamata Kristen taihudia be dahaka e dibamu?

⁷ Lo Kristen taudia na e dibamu idia na mai edia hetoa. Baibul ese ita e hagoadadamu baita manau bona eda hetoa baita lalopararalai na namo. (Her. 11:2) Eseta ese ena hetoa na e lalopararalaia, bona ia na Dirava e badinaiava hahinena ta. Una dainai ia kwin ai ela neganai ia na se hekokoroku. Ia ese ena cousin Morodekai ena sisiba e kamonai bona e badinaia. (Eseta 2:​10, 20, 22)  Eseta heḡereḡerena, oi danu emu hetoa bo lalopararalaiamu neganai, ma haida edia sisiba bo tahumu bona bo badinamu.—Tito 2:​3-5.

8. Taihu be edena dala ai 1 Timoteo 2:​9, 10 ena hereva bae badinaia?

⁸ Dala ma ta ai danu Eseta na e hahedinaraia ena hetoa na e lalopararalaia. Eseta na “hane namo mai hairaina” to se ura taunimanima ese una na bae laloa bada. (Eseta 2:​7, 15) Edena dala ai Kristen taihudia ese Eseta ena haheitalai bae tohotohoa? Dala ta na 1 Timoteo 2:​9, 10 ese e herevalaia. (Ba duahidia.) Unu siri ai aposetolo Paulo ese Kristen hahinedia e hamaorodia mai manaudia bona mai hematauraidia ida edia dabua bae hahedokilai. Paulo ese e ḡaukaralai Grik herevadia ese e hahedinaraimu Kristen taihudia ese edia heḡoeva dalana amo ma haida edia hemami eiava lalohadai na basie hadika. Ta moalemu badina eda lo Kristen taihudia ese una sisiba na e badinaiamu!

9. Abigail ena haheitalai amo dahaka ta dibamu?

⁹ Lo Kristen taihudia ese e hahedinaraiamu karana ma ta na haero-haero namonamo karana. Una anina be dahaka? Anina na ia ese maoro bona kerere edia idau e lalopararalaimu bona dala maorona e abia hidimu. Mani Abigail ena haheitalai aita laloa. Ia adavana na abi hidi kererena ta e karaia dainai edia ruma bese na dika bada bema davari diba. Abigail na kara haraḡa kara ta e karaia. Ia na dala maorona e badinaia dainai momo edia mauri e gimadia. (1 Sam. 25:​14-23, 32-35) Danu, haero-haero namonamo karana dainai ita na baita dibamu ededia nega ai baita hereva bona ededia nega ai asi reḡereḡeda baita noho. Bona be durudamu ma haida edia namo baita lalomu dainai baita hereva henidiamu neganai eda hereva nahuadia na baita tohomu.—1 Tes. 4:11.

10-11. Duahiduahi bona toretore namonamo karana ena namo be dahaka? (Laulau danu ba itaia.)

¹⁰ Kristen taihu na mauri ai ia baine durua ḡaudia baine dibadia na namo. Kekeni ta na maraḡina ai e diba ḡaudia ese ena mauri ibounai lalonai be duruamu. Mani mauri ai bae durumu ḡaudia haida aita herevalai.

¹¹ Duahiduahi bona toretore ba diba namonamo. Gabu haida ai, taunimanima na e laloamu kekeni na duahiduahi bona toretore bae diba na dia ḡau badana. To Kristen taudia ediai una na mai anina bada. d (1 Tim. 4:13) Una dainai ḡau ta ese oi basine koumu, duahiduahi bona toretore ba diba totona. Ena namo be dahaka? Una ese oi na be durumumu moni ḡaukarana ta bo davariamu. Danu oi  na be durumumu Dirava ena Hereva bo dibaia namonamomu bona bo hahedibalaiamu. A hereadaena be Dirava ena Hereva bo duahiamu bona bo laloa dobumu neganai, ia turana namona ai bo laomu.—Ios. 1:8; 1 Tim. 4:15.

12. Eda hereva daladia ai Hereva Lada-isidia 31:26 ena heduru be dahaka?

¹² Herevahereva daladia namodia ba diba. Kristen taudia ediai una na mai anina bada. Hahediba tauna Iakobo ese sisiba namona ta e gwauraia, eto: “Ta ta hereva ikamonaina ai baine haraḡa, hereva igwauraina ai baine halahe.” (Iak. 1:19) Bema ta be herevamu bona oi na bo hakala namonamomu, anina na ia o laloa badamu bona o uramu ba durua. (1 Pet. 3:8) Bema ta ena hemami o hereva na so lalopararalaimu, henanadai maorodia ba henia diba. Bona do so hereva ai ba gwaurai herevadia na ba haerodia guna. (Her. 15:28) Sibomu ba henanadai: ‘Lau ba gwauraimu herevadia be momokani bona ta be hagoadaiamu, eiava? Lau ba gwauraimu herevadia ese be hahedinaraimu ia be na matauraiamu bona na bogaia hisimu, eiava?’ Namona na e hakala namonamomu bona mai edia gado namo ida e herevamu taihudia ba tohotohodia. (Hereva Lada-isidia 31:26 ba duahia.) Idia e gwauraimu herevadia bona daladia ba haerodia. Emu herevahereva dalana bo hanamoamu neganai, emu hetura karana ma haida ida na be namomu.

13. Edena dala ai ruma ḡaukara ikaradia daladia ba diba? (Laulau danu ba itaia.)

¹³ Ruma ḡaukara ikaradia daladia ba diba. Gabu momo ai, ruma ḡaukaradia momo na hahine ese e karamu. Oi sinamu eiava taihu ma ta ese bae durumu diba unu ḡaukara ikaradia daladia ba diba. Taihu ta ladana Cindy na e gwa: “Lau sinagu ena amo na dibaia mai anina bada ḡauna ta na baina ḡaukara goada, unu amo baina moale. Ia ese nanadu, ḡau ihaḡoevadia, turituri, bona shopping daladia e hadibagu dainai egu mauri iduruna ḡaudia na na davarimu bona mai egu nega Iehova na hesiai heniamu. Sinagu ese danu heabidae karana e hadibagu, bona unu na kara toma dainai tadikaka taihu namodia na dibadia bona edia haheitalai namodia ese lau na e durugu.” (Her. 31:​15, 21, 22) Ḡaukara goadagoada bona heabidae hahinena ese ruma bese bona kongrigeisin taudia na e hamoalediamu.—Her. 31:​13, 17, 27; Apos. 16:15.

14. Crystal ena ekspiriens amo dahaka o dibamu, bona dahaka ba laloa bada?

¹⁴ Sibomu ba henari daladia ba manadalai. Kristen taudia iboudiai unu bae kara toma na mai anina bada. (Fili. 4:11) Taihu ta ladana Crystal na e gwa: “Tamagu bona sinagu ese e durugu high school ai edena kosi baina abia hidi bona gabeai egu mauri ai baina ḡaukaralaia diba. Tamagu ese e hagoadagu accounting kosina baina abia, una ese lau na e durugu bada.” Momokani moni ḡaukarana ta ba davaria totona diba bavabi na namo, to danu ba  diba ededia dala ai emu moni ba ḡaukaralaia namonamo. (Her. 31:​16, 18) Bema dekedai mimia ḡaudia na baita moalelaimu bona eda moni baita ḡaukaralai namonamomu, Iehova ena hesiai ḡaukara na baita laloa badamu.—1 Tim. 6:8.

15-16. Singul taihudia ese haida be ede bae durudia toma? (Mareko 10:​29, 30)

¹⁵ Kara namodia bo hahedinaraimu bona ḡaukara namodia bo dibamu ese oi na be haheḡaeḡaemumu vairai madunadia ba hua. Mani unu maduna haida aita herevalai.

¹⁶ Singul maurina bavabia hidi diba. Iesu ena hereva heḡereḡerena, haida na lalodia e hadai do basie headava, ena be edia gabu ai e hagoadadiamu bae headava. (Mat. 19:​10-12) Ma haida be badi haida daidiai asie headava. Namona na ba diba Iehova bona Iesu ese singul Kristen taudia na e lalodia badamu. Tanobada heḡeḡemadai, singul taihudia na kongrigeisin ai haheitalai namodia. Idia ese ma haida e lalokau henidiamu bona e lalodia badamu dainai momo ese taihudia o sinadia ai e halaodiamu.—Mareko 10:​29, 30 ba duahidia; 1 Tim. 5:2.

17. Edena dala ai matamata taihuna ta na ful-taim hesiai ḡaukarana ai baine vareai diba?

¹⁷ Oi ese ful-taim hesiai ḡaukarana ba karaia diba. Tanobada heḡeḡemadai haroro ḡaukarana na Kristen taihudia momo ese e karaiamu. (Sal. 68:11) Hari plen ba karaia diba ful-taim hesiai ḡaukarana ai ba vareai totona, a? Oi ese painia, konstraksen, eiava betele ḡaukara ba karaia diba. Emu tahua ḡauna na ba ḡuriḡurilaia. Bona ful-taim hesiai ḡaukara e karaiamu taudia ba nanadaidia oi be dahaka ba kara unu amo ful-taim hesiai ḡaukara ai ba vareai. Bena plen ta ba karaia una ese oi baine durumu emu tahua ḡauna ba haḡuḡurua. Emu tahua ḡauna bo haḡuḡuruamu neganai dala na be hekehomu hesiai ḡaukara ma haida ba kara.

18. Dahaka dainai taihu ese baine adavaia tauna baine abia hidi namonamo na namo? (Laulau danu ba itaia.)

¹⁸ Bema oi na o uramu ba headava. Ina atikol ai ita na kara haida bona ḡaukara haida tame herevalai unu ese oi bae durumu diba hahine namona ai baola. Momokani, bema oi na o uramu ba headava, namona na bavabi hidi namonamo badina una na abi hidi badana ta. Ba helalotao, oi na bo adavaiamu tauna ena kwara dagina henunai bo nohomu.  (Roma 7:2; Efe. 5:​23, 33) Una dainai sibomu ba henanadai: ‘Ia be Iesu bamona e lalomu bona e karamu, a? Ena mauri lalonai Iehova e atoa gunamu, eiava? Ia be abi hidi namodia e karamu, a? Ia ese ena kerere e gwaurai hedinaraimu, eiava? Bona ia ese ha’hine e matauraidiamu, a? Ia ese tauani dalana ai be narigumu, be durugumu egu hetura karana Iehova ida baine namo bona egu hemami be laloamu, eiava? Ia ese ena maduna e huadia namonamomu, eiava? Heḡereḡere, kongrigeisin ai ia be ededia ḡaukara e karamu bona e lalodia badamu, eiava?’ (Luka 16:10; 1 Tim. 5:8) Bema oi na o uramu tau namona ta bavadavaia, namona na oi na hahine namona ai baola.

19. Dahaka dainai hahine na e gwauraiamu tau iduruna na mai anina bada?

¹⁹ Baibul ese hahine na e gwauraiamu tau iduruna bona “bamona.” (Gen. 2:18) Una ese e hahedinaraiamu hahine be e lalodia maraḡimu, a? Lasi! Hahine na e gwauraia tau iduruna, una na mai anina bada. Baibul ai nega momo Iehova na e gwauraiamu “hekaha” o heduru tauna. (Sal. 54:4; Heb. 13:6) Hahine ese tau na be durua namonamomu bema ruma bese totona tau abi hidi be karamu neganai, hahine na ia ida be ḡaukara heboumu. Ia ese ena kara amo ma haida be durudiamu adavana ena kara namodia bae lalo. (Her. 31:​11, 12; 1 Tim. 3:11) Oi ese hahine namona ena kara na bo manadalaiamu bema Iehova bo lalokau heniamu bona famili bona kongrigeisin taudia bo durudiamu.

20. Edena dala ai sina ta ese ena ruma bese baine durua diba?

²⁰ Sina ta ai baola neganai. Bo headavamu murinai, oi bona adavamu na reana natumui bo havaramu. (Sal. 127:3) Una dainai sina ese baine kara ḡaukaradia ba dibadia na namo. Ina atikol ai tame herevalai karadia bona ḡaukaradia ese oi na be durumumu hahine eiava sina namona ai baola. Bema oi na lalokau, hebogahisi bona haheauka bo hahedinaraimu, natumui na basie garimu to be mamiamu idia na o lalodia badamu.—Her. 24:3.

21. Ita ese taihu be ede ta lalodia tomamu, bona dahaka dainai? (Rau 1 laulauna ba itaia.)

²¹ Ai ese umui taihu iboumuiai na a lalomui badamu badina umui na Iehova bona ena taunimanima daidiai o ḡaukara goadamu. (Heb. 6:10) Umui na kara namodia o hahedinaraimu, emui ḡaukara namodia daidiai umui bona ma haida na namo o davarimu, bona o heḡaeḡaemu vaira madunadia ba hua. Iehova ena orea lalonai emui heduru na mai anina bada!