1. Dahaka dainai Abraham na e laroa natuna ta na baine vara?

 IEHOVA na turana Abraham e gwauhamata henia ia natuna amo tanobada besedia iboudiai baine hanamodia. (Gen. 15:5; 22:18) Abraham ena abidadama Dirava enai na goada, una dainai e abia dae una gwauhamata na be ḡuḡurumu. Ena be Abraham laḡanina na 100 bona ia adavana laḡanina na 90, to idia na do asi natudia. (Gen. 21:​1-7) To, Baibul na e gwaumu: “[Abraham na] abidadama dainai e helarova; taunabunai ia na bese loḡora tamadia ai ela, ḡwauhamata herevana heḡereḡerena.” (Roma 4:18) Ta dibamu Abraham ese e laroa ḡauna na e vara momokani. Ia ese Isaak e havaraia, una na nega daudau lalonai e nariava ḡauna. Dahaka dainai Abraham na e abia dae momokani Iehova ese ena gwauhamata na baine haḡuḡurua?

2. Dahaka dainai Abraham na e diba momokani Iehova ena gwauhamata na baine ḡuḡuru?

² Abraham ena hetura karana Iehova ida na namo herea dainai, ia na “dibana [Dirava ese] ena gwauhamata baine hamomokania.” (Roma 4:21) Abraham na ena abidadama dainai Iehova ese e lalonamo henia bona e gwauraia kara maoromaoro tauna. (Iak. 2:23) Roma 4:18 ai e hahedinaraia heḡereḡerena, Abraham na mai ena abidadama bona helaro. Mani Roma karoa 5 ai aposetolo Paulo ese helaro anina e herevalaia dalana aita itaia.

3. Paulo ese helaro be ede e herevalaia tomamu?

 ³ Paulo ese e hahedinaraia dahaka dainai baita abia dae vaitani eda “helaro ese lalohisihisi basine havaraia.” (Roma 5:​5, NWT) Danu e durudamu ita be dahaka baita kara, unu amo eda Kristen helarona baita hagoadaia. Paulo ena hereva Roma 5:​1-5 ai baita stadilaimu neganai, emu mauri ai e varamu ḡauna ba laloa. Unu bo kara tomamu neganai, bo lalopararamu oiemu helaro na goada, dia guna bamona. Danu ina stadi ese be durumumu edena dala ai emu helaro na dounu ba hagoadaia. Mani helaro hereadaena aita herevalaia, una na Paulo ese e gwauraia lalohisihisi basine havaraia ḡauna.

4. Roma 5:​1, 2 ese dahaka e herevalaia?

⁴ Roma 5:​1, 2 ba duahidia. Paulo ese unu hereva na Roma kongrigeisin e tore henidia. Unuseniai tadikaka bona taihu na Iehova bona Iesu e dibadia, edia abidadama e hagoadaia, bona Kristen taudia ai ela. Dirava ese edia ‘abidadama dainai maorodia vada e gwaurai,’ bona lauma helaḡa amo e horodia. Oibe, idia na helaro hereadaena e abia.

5. Horoa taudia edia helaro be dahaka?

⁵ Gabeai Paulo ese Efeso ai horoa Kristen taudia e tore henidia neganai, Dirava ese e henidia helarona e herevalaia. Idia ese “ahuna herea-daena, davana bada ḡauna helaḡa taudia edia” bae abia. (Efe. 1:18) Danu Paulo ese Kolose tadikakadia e hamaorodia, edia helaro be edeseni ai bae abia. Ia na e gwa: “Emui helaro na guba ai.” (Kol. 1:​4, 5) Una dainai, horoa Kristen taudia edia helaro na, bae toreisi lou bona guba ai mauri hanaihanai bae abia, unuseniai idia na Keriso ida bae lohia.—1 Tes. 4:​13-17; Apok. 20:6.

6. Horoa tadikaka ta ese ena helaro be ede e herevalaia toma?

⁶ Horoa Kristen taudia ese una helaro na e laloa bada. Idia ta na, Tadikaka Frederick Franz, ia na e gwa: “Aiemai helaro na be vara  momokanimu, ai 144,000 taumai iboumai ai na Dirava ese e gwauhamatalaia ḡauna baia abiamu, bona una ese ai a laloa ḡauna na e hereaia.” Tadikaka Franz na laḡani momo lalodiai Dirava e hesiai henia goadagoada murinai, laḡani 1991 ai ia na e gwa: “[Ai] ese emai helaro na dounu a laloa badamu. . . . Ena be laḡani daudau vada a nari, to a moalemu. Herevana laḡani momo baia nari, to dounu baia nari. Lau ese emai helaro na, na laloa badamu, dia guna heḡereḡerena.”

7-8. Ita momo eda helaro be dahaka? (Roma 8:​20, 21)

⁷ Hari ina negai Iehova e tomadiho heniamu taudia momo edia helaro na idau. Una helaro na Abraham ese e nariava ḡauna—una na mauri hanaihanai tanobada ai. (Heb. 11:​8-10, 13) Paulo ese una helaro bae abia taudia edia hahenamo na e herevalaia. (Roma 8:​20, 21 ba duahidia.) Nega ginigunana Baibul ena gwauhamata vaira negana totona o dibaia neganai, dahaka ḡau haida o moalelai? O moalelaia ḡauna ta be, dina ta ai oi na ḡoevadae tauna ai bo laomu, a? Eiava o moale dikadika badina o diba tanobada paradaisona ai emu lalokau taudia na mase amo be toreisi loumu, a? Una helaro dainai, vaira nega ai ḡau namodia momo bo moalelaimu.

⁸ Ena be ita na guba ai eiava tanobada ai baita mauri hanaihanaimu, to eda helaro hereadaena dainai baita moale. Bona eda helaro na be goada be laomu. Una baine vara dalana na Paulo ese e herevalaia. Mani e herevalai ḡaudia aita lalodia. Unu amo baita abia dae momokanimu eda helaro na dounu be goadamu bona ta laromu ḡaudia na be varamu.

9-10. Paulo ena haheitalai amo Kristen taudia be dahaka e dibamu? (Roma 5:3) (Laulau danu ba itaia.)

⁹ Roma 5:3 ba duahia. Paulo na e gwa hisihisi ta davarimu neganai, eda helaro na e goadamu. Reana una hereva na baita daradaralaiamu. To, namona na baita diba Keriso murinai e rakamu taudia iboudiai na hisihisi be davarimu. Mani Paulo ena haheitalai aita  laloa. Ia ese Tesalonika ai e nohova tadikakadia e hamaorodia, eto: “Ta noho hebouva negana ai a hamaoromui heḡaeḡaeva hisi bae vara; benaini, vada e vara, ani!” (1 Tes. 3:4) Bona Korinto tadikakadia e hamaorodia, eto: “Varavaramai e, a uramu . . . a aniva hisidia ba diba . . . banava baia mase ato.”—2 Kor. 1:8; 11:​23-27.

¹⁰ Hari ina negai, Kristen taudia danu dala idauidau ai hisihisi e davarimu. (2 Tim. 3:12) Oi be Iesu o abidadama heniamu bona o badinaiamu dainai daḡedaḡe o davarimu, a? Reana turamu bona varavaramu ese e kirikirilaimumu eiava e kara auka henimumu. Eiava reana ḡaukara gabunai ḡau iboudiai na mai momokanimu ida o karamu dainai emu bosi o turamu ese e daḡedaḡe henimumu, a? (Heb. 13:18) Eiava ma haida ediai emu helaro o harorolaiamu dainai gavamani ese e daḡedaḡe henimumu, a? Ena be daḡedaḡe o hisihisi idauidau ta davarimu, to Paulo na e gwa baita moale na namo. Dahaka dainai?

11. Dahaka dainai laloda baita hadai hahetoho idauidau baita haheaukalai?

¹¹ Hisihisi ta davarimu neganai baita moale badina dibada una ese mai anina bada karana ta be havaraiamu. Roma 5:3 na e gwaumu, “hisihisi ese haheauka e havaraiamu.” Kristen taudia iboudiai na hisihisi be davarimu. Una dainai namona na laloda baita hadai ta davarimu hisihisidia iboudiai na baita haheaukalaidia. Unu baita kara tomamu neganai, ta laromu ḡaudia be ḡuḡurumu karana na baita itaiamu. Ita na asita uramu Iesu ese e gwauraia parabolena ai nadi gabunai e moru uhedia ese e laulaulaidia taudia baita tohotohodia. Idia na matamanai Dirava ena hereva na mai moaledia ida e abia dae, to “hisihisi eiava daḡedaḡe” e davari neganai, asie haheauka. (Mat. 13:​5, 6, 20, 21) Vaia, daḡedaḡe o hahetoho ta davarimu neganai asita moalemu, to baita haheaukalaidiamu neganai namo baita davarimu. Edena dala ai?

12. Hahetoho baita haheaukalai ena namo be dahaka?

¹² Hahediba tauna Iakobo ese hahetoho baita haheaukalai ena namo e herevalaidia. Ia na eto: “Haheauka ese ena ḡaukara baine haḡuḡurua baine namo, bena ba ḡoeva dae bona ba namo ḡuḡuru, ḡau ta ai basio dabu.” (Iak. 1:​2-4) Iakobo na e gwa haheauka na vaitani ḡaukara ta baine karaia. Dahaka ḡaukara baine karaia? Haheauka karana ese be durumumu emu abidadama bo hagoadaiamu bona Dirava enai dounu bo tabekaumu. To, baita haheaukamu na mai ena namo ma ta danu.

13-14. Haheauka ese dahaka e havaraiamu, bona edena dala ai una ese eda helaro e hagoadaiamu? (Roma 5:4)

¹³ Roma 5:4 ba duahia [NWT]. Paulo ese e hahedinaraia baita haheaukamu neganai Dirava ese be lalonamo henidamu. Una anina na dia hahetoho eiava hekwakwanai o davarimu neganai Iehova na e moalemu, to ia na oi emu ai e moalemu. Emu haheauka dainai ia ese e lalonamo henimumu. Una na hahenamo namona ta!—Sal. 5:12.

¹⁴ Mani Abraham aita laloa, ia na hahetoho momo e davari, bona e haheaukalaidia neganai Iehova ese e lalonamo henia. Iehova ese Abraham na turana ai e halaoa bona e gwauraia kara maoromaoro tauna. (Gen. 15:6; Roma 4:​13, 22) Ita edai danu unu baine vara toma. Dirava ese ita e lalonamo henidamu badina na dia hesiai ḡaukaradia idauidau ta karamu eiava ta abimu hahenamodia daidiai. To badina na mai eda abidadama ida ta haheaukamu dainai. Bona ena be ita laḡanida, eda noho daladia, eiava  eda diba na idauidau, to baita haheauka dibamu. Harihari oi be hekwakwanai ta o haheaukalaiamu, a? Bema oibe, namona na ba helalotao Dirava ese oi na e lalonamo henimumu. Dirava ena lalonamo ita edai ta lalopararalaimu dainai, una ese eda helaro na e hagoadaiamu.

15. Paulo be dahaka ma e gwaurai, bona dahaka dainai haida na reana e daradara?

¹⁵ Paulo ena hereva heḡereḡerena, hahetoho baita haheaukalaimu neganai Iehova ese be lalonamo henidamu. To Paulo na ma e gwa: “Dirava ena lalonamo ese helaro e havaraiamu. Bona una helaro ese lalohisihisi basine havaraia.” (Roma 5:​4, 5, NWT) To reana haida ese una na be daradaralaiamu. Dahaka dainai? Badina Roma 5:2 ai Paulo na e gwa, Roma Kristen taudia na vada mai edia helaro, una na ‘Dirava hairaina e laroamu.’ Una dainai, reana ta na be henanadaimu, ‘Bema unu Kristen taudia na vada mai edia helaro, dahaka dainai Paulo ese ena hereva dokonai helaro ma e gwauraia?’

16. Taunimanima ta ena helaro be ede baine goada toma? (Laulau danu ba itaia.)

¹⁶ Ita ese Paulo ena hereva anina na baita lalopararalaia dibamu bema baita laloataomu helaro na e goada e laomu ḡauna. Mani a laloa: Oi ese Baibul amo helaro hereadaena o dibaia matama negana o laloataomu, a? Reana una nega ai o daradarava tanobada paradaisona ai mauri hanaihanai be vara momokanimu eiava lasi. To Baibul ai Iehova bona ena gwauhamata o dibadia namonamo neganai, o abia dae una helaro na baine vara momokani.

17. O gwauhamata bona o bapatiso murinai edena dala ai emu helaro na dounu be goadamu?

¹⁷ Ena be Dirava o gwauhamata henia bona o bapatiso, to emu helaro na dounu e goada e laova badina oi ese Iehova o dibaia namonamo bona emu lalokau ia enai o habadaia. (Heb. 5:13–6:1) Bena Roma 5:​2-4 ese e herevalai ḡaudia na oiemu ai e vara. Oi na hisihisi  idauidau o davari, to o haheaukalaidia bona Dirava ena lalonamo o abia. O dibamu Dirava ese oi na e lalonamo henimumu dainai, o abia daemu ia ese e gwauhamatalai ḡaudia na bo abimu. Bena emu helaro na e goada, dia guna bamona. O abia dae una helaro na momokani. Bona una ese e durumu emu mauri dalana o hanamoa, emu ruma bese o kara henidiamu dalana, o abi hidimu ḡaudia bona emu nega o ḡaukaralaiamu dalana danu e haidaua.

18. Iehova be dahaka e gwauhamatalaia?

¹⁸ Aposetolo Paulo ese eda helaro dainai hahegoada herevana ta e gwauraia. Ia na e gwa emu helaro anina na baine ḡuḡuru. Dahaka dainai una na bavabia dae? Badina Paulo ese Kristen taudia ediai ina hereva e gwauraia: “Una helaro ese lalohisihisi basine havaraia, badina lauma helaḡa amo Dirava ese ena lalokau na kudouda ai e vedaia.” (Roma 5:​5, NWT) Una dainai bavabia dae Iehova ese e henimu helarona na be vara momokanimu.

19. Emu helaro dainai dahaka o diba momokanimu?

¹⁹ Iehova ena gwauhamata Abraham enai, ia e lalonamo henia bona turana ai e halaoa dalana ba laloa. Abraham ese e laroa ḡauna na e vara momokani. Baibul na e gwaumu: “Abraham e haheauka taritariva ela bona gwauhamata anina e davaria.” (Heb. 6:15; 11:​9, 18; Roma 4:​20-22) Ia na se lalohisihisi. Oi danu bema Dirava bo badinaia tarika-tarikamu, o laromu ḡaudia na bo abimu. Oiemu helaro na helaro korikorina, una helaro ese lalohisihisi basine havaraiamu. (Roma 12:12) Paulo na e gwa: “Helaro Diravana ese emui abidadama dainai moale bona maino idoinai baine hahonulaimui, Lauma Helaḡa siahuna amo baine habadaia.”—Roma 15:13.