1. Haida ese mauri hanaihanai be ede e laloa tomamu?

 TAUNIMANIMA momo na e ḡaukara goadamu aniani namodia e animu bona e eksasaisimu, unu amo bae mauri daudau. To, mai dibadia unu ḡau amo buruka bona mase na basie koua dibamu. Reana e laloamu mauri hanaihanai na basine varamu badina e buruka e laomu bona lalohekwarahi momo e varamu. To, Iesu na e gwa taunimanima na bae “mauri hanaihanai” diba, Ioane 3:16 bona 5:24 ai e gwauraia heḡereḡerena.

2. Ioane karoa 6 ese mauri hanaihanai be ede e gwauraia toma? (Ioane 6:​39, 40)

² Nega ta ai, Iesu ese hoa dalana ai parao bona gwarume amo hutuma e ubudia. a Una na hoa ḡauna, to una e vara murina dinana ai hutuma ese e tahua ela bona Kaperanauma ai e davaria, bona unuseniai e gwauraia herevana dainai momo na e hoa, e hamaorodia ia ese mase taudia na baine hatoredia isi lou bena mauri hanaihanai bae abia diba. (Ioane 6:​39, 40 ba duahidia.) Una hereva anina na, oi turamu bona emu femli ai e mase taudia ediai, mani a laloa. Iesu ena hereva ese  oi na e hadibamumu mase taudia na be toreisi loumu, una negai oi bona emu lalokau taudia na bo mauri hanaihanaimu. To, Ioane karoa 6 ai Iesu ese e gwaurai herevadia na momo ese asie lalopararalai. Mani unu hereva aita haerodia namonamo.

3. Ioane 6:51 ai, Iesu be dahaka e gwa?

³ Iesu ese hoa dalana ai aniani amo hutuma e ubudia murinai, idia na Iehova ese idia tubudia tano ḡaḡaena ai mana amo e ubudiava karana e laloa. Iesu ese e hereva henidiava taudia na Toretore Helaḡadia amo e diba, mana na “guba amo e henidia dobiva.” (Sal. 105:40; Ioa. 6:31) Iesu ese mana e ḡaukaralaia unu amo mai anina bada ḡauna baine herevalaia. To danu mana na hoa dalana ai Dirava ese e henidia, bona una mana e aniava taudia na se mauri hanaihanai. (Ioa. 6:49) Una heḡereḡerena, Iesu na sibona e hegwaurai “guba amo [ema], aniani korikorina,” “Dirava ena aniani,” bona “mauri anianina.” (Ioa. 6:​32, 33, 35) Iesu ese mana bona aniani korikori edia idau na e hahedinaraia namonamo. Ia na e gwa: “Lau na mauri anianina, guba amo name diho. Ta ese ina aniani baine ania, ia na do baine mauri hanaihanai.” (Ioane 6:51 ba duahia.) Unu Iuda taudia na e daradara. Idia na asie laloparara, dahaka dainai Iesu na e gwa ia na guba amo ema ‘anianina’ bona una aniani ese guna idia tubudia ese e aniava anianina mana na e hereaia. Bena Iesu ese e hamaorodia: “Lau ese baina henia anianina na lau hidiogu.” Iesu ena hereva anina be dahaka? Iesu ese e herevalaia ḡauna anina baita lalopararalaia na mai anina bada badina una ese e hahedinaraiamu mauri hanaihanai na be vara momokanimu, ita bona eda lalokau taudia ediai. Mani Iesu ena hereva anina aita itaia.

MAURI ANIANINA BONA IA HIDIONA

4. Dahaka dainai momo na Iesu ena hereva dainai e hoa?

⁴ Iesu ena hereva e kamonaia taudia haida na e hoa badina ia na e gwa “lau ese baina henia anianina na lau hidiogu, unu amo tanobada taudia ese mauri bae abia.” Reana idia na e lalova Iesu na e ura idia ese ia hidiona korikori bae ania. (Ioa. 6:52) To danu una murinai e gwauraia herevana ese idia na e hahoadia bona e ha-daradaradia. Ia na e gwa: “Taunimanima Natuna hidiona basio ania bona rarana danu basio inua, mauri na lalomui ai basine mia.”—Ioa. 6:53.

5. Ede ta diba tomamu Iesu ena hereva anina na dia ia rarana korikorina bae inua?

⁵ Noa ena negai, Dirava ese taunimanima ediai taravatu ta e atoa, rara na basie ani. (Gen. 9:​3, 4) Gabeai, Iehova ese Israel taudia e haḡanidia rara na basie ani. Bema ta na rara baine ani, ia na “bae hamasea.” (Lev. 7:​27, NWT) Iesu ese Iuda taudia e hadibadia, Dirava ese e heni taravatudia iboudiai bae badina. (Mat. 5:​17-​19) Una dainai, Iesu ese Iuda taudia na basine noidia diba ia hidiona bona ­rarana korikorina bae ania bona bae inua. To, se ḡaukaralai herevadia e gwaurai amo, Iesu ese taunimanima ediai “mauri hanaihanai” bae abia dalana e hahedinaraia.​—Ioa. 6:​54.

6. Ede ta diba tomamu Ioane 6:53 ai Iesu ese haheitalai e ḡaukaralaia?

⁶ Iesu na e ura dahaka point baine hahedinaraia? Ta dibamu, Iesu na hutuma e hereva henidiava neganai laulau herevadia e ḡaukaralai, Samaria hahinena e hereva henia neganai danu laulau herevadia e ḡaukaralai, eto: “Lau ese baina henia ranuna baine inua tauna na basine ranu mase lou, to ia lalonai guri ta bamona baine lohilohi dae, mauri hanaihanai  baine henia.” (Ioa. 4:​7, 14, NWT) b Iesu na se gwa una Samaria hahinena na ranu guri idauna ta amo ranu baine inu bena baine mauri hanaihanai. Una heḡereḡerena, Kaperanauma ai hutuma e hereva henidia neganai, ia na se gwa ia hidiona bona rarana korikori bae ania bona bae inua bena bae mauri.

E VARA ḠAUDIA RUA EDIA IDAU

7. Ioane 6:53 ai Iesu ese e gwauraia herevana, haida ese be ede e laloa tomamu?

⁷ Haida na e gwa Ioane 6:53 ai Iesu na Lohiabada Ena Anibou ai taunimanima ese bae kara ḡaudia e herevalai badina una negai, ia na unu hereva tamodia e ḡaukaralai lou. (Mat. 26:​26-28) Idia na e gwaumu Lohiabada Ena Anibou e maimu taudia iboudiai na mai edia maoro paraoa bona wain bae ania bona bae inua. Una be maoro? Namona na ita ese baita tahua namonamo bema taunimanima edia lalohadai be maoro eiava kerere, badina laḡani ta ta ai tanobada heḡeḡemadai taunimanima hutuma na ita ida Lohiabada Ena Anibou ta lao heniamu. Mani ita ese Ioane 6:53 ai e herevalaia sivaraina bona Lohiabada Ena Anibou ai e vara ḡaudia edia idau aita herevalai.

8. Unu sivarai ruaosi edia idau haida be dahaka? (Laulau danu ba itadia.)

⁸ Mani unu sivarai ruaosi edia idau aita  ita. Ginigunana, Iesu ese Ioane 6:​53-56 ai e gwaurai herevadia be edena negai bona edeseniai e gwaurai? Unu e gwaurai ḡaudia na Galilea ai Iuda taudia hutuma e hereva henidiava neganai, laḡani 32 C.E. ai. Una e vara bona laḡani ta murinai, Iesu ese Lohiabada Ena Anibou na Ierusalem ai e heḡaeḡaelaia matama. Iharuana, ia be daidia e hereva henidiava? Galilea ai ia e kamonai heniava taudia momo na tauani ḡaudia e lalo badava taudia, to dia lauma ḡaudia. (Ioa. 6:26) Una dainai, Iesu ese e gwaurai herevadia asie lalopararalai neganai, edia abidadama Iesu enai na e manoka. Danu ena hahediba taudia haida ese e rakatania. (Ioa. 6:​14, 36, 42, 60, 64, 66) Unu Iuda taudia na dia abidadama aposetolo 11 heḡereḡeredia, idia na laḡani 33 C.E. ai Iesu ida Lohiabada Ena Anibou lalonai, ena be idia ese Iesu ena hahediba herevadia na se lalopararalai namonamo. Aposetolo taudia na e ita ḡaudia ese e hagoadadia dainai e abia dae Iesu na Dirava Natuna, guba amo ema, dia Galilea ai e hereva henidia Iuda taudia heḡereḡeredia. (Mat. 16:16) Iesu ese e hamaorodia: “Umui be e dibaḡaniguva negadia ai dekegu ai o noho tarika-tarikava taumui.” (Luka 22:28) Ini ḡau rua amo tame diba Ioane 6:53 ai Iesu na dia Lohiabada Ena Anibou ai bae vara ḡaudia e herevalai. To, ita na ini sivarai ruaosi amo ḡau momo baita dibamu.

IESU ENA HEREVA NA MAI ANINA BADA OIEMU AI

9. Lohiabada Ena Anibou ai Iesu ese e gwaurai herevadia be daidia ediai e ḡuḡurumu?

⁹ Lohiabada Ena Anibou ai, Iesu ese asie hatubua paraoana na ena aposetolo e henidia bona e hamaorodia, una ese ia tauanina e laulaulaia. Bena ia ese wain kapusi ta e henidia bona e hamaorodia una ese ia ‘rarana amo e karaia gwauhamatana’ e laulaulaia. (Mar. 14:​22-25; Luka 22:20; 1 Kor. 11:24) Iesu ese e herevalaia gwauhamatana na mai anina bada. Una gwauhamata matamatana na Iesu ese “Dirava ena basileia” ai be lohiamu taudia ida e karaia. (Heb. 8:​6, 10; 9:15) Una negai, aposetolo taudia ese una gwauhamata anina ibounai na do se lalopararalaia, to idia na gabeai lauma helaḡa amo e abidia hidi bona una gwauhamata matamatana lalonai e vareai, unu amo Iesu ida guba ai bae noho.—Ioa. 14:​2, 3.

10. Iesu ese Lohiabada Ena Anibou ai e gwauraia herevana bona Galilea ai e gwauraia herevana ena idau ma ta be dahaka? (Laulau danu ba itaia.)

¹⁰ Iesu ese Lohiabada Ena Anibou ai e gwauraia herevana na “seri maraḡina” e herevalaidia. Una daiutu ai ia ida nonoho abidadama aposetolo taudia na una orea maraḡina lalonai e vareai taudia ginigunadia. (Luka 12:32) Idia bona una orea maraḡina ai bae vareai taudia ma haida na Iesu ena mase ilalotaona hebouna ai, Iesu ena haheḡani heḡereḡerena ai paraoa bae ania bona wain bae inua. Idia sibodia mo Iesu ida guba ai bae noho. Una dainai Lohiabada Ena Anibou ai bona Galilea ai e vara ḡaudia edia idau ta bina. Lohiabada Ena Anibou ai be orea maraḡina e herevalaidia to Galilea ai be hutuma bada e herevalaidia.

11. Ede ta diba tomamu Iesu ese Galilea ai e gwauraia herevana na hutuma bada e gwauraidiamu?

¹¹ Laḡani 32 C.E. ai, Iesu ese Galilea ai e hereva henidiava taudia na aniani e lalo badava. To, Iesu na e urava baine durudia bena bae laloparara ia e herevalaiava ḡauna ese aniani e hereaia. Bona mauri hanaihanai baine henidia diba. E hamaorodia e mase taudia na dina gabena ai bae toreisi lou bona bae mauri  hanaihanai. Iesu ese Ioane karoa 6 ai e gwauraia hahenamona na dia haida ese mo bae abia ḡauna, to taunimanima momo ese bae abia ḡauna. Ia na e gwa: “Ta ese ina aniani baine ania, ia na do baine mauri hanaihanai . . . Lau ese baina henia anianina na lau hidiogu, unu amo tanobada taudia ese mauri bae abia.”—Ioa. 6:51.

12. Ta na Iesu ese e herevalaia mauri hanaihanai baine abia totona dahaka baine kara be namo?

¹² Iesu ena hereva be taunimanima iboudiai ese mauri hanaihanai bae abia diba, a? Lasi. To ‘ina aniani bae ania taudia’ mo, anina na Iesu bae abidadama henia taudia ese una hahenamo bae abia. Hari ina negai, momo na e gwaumu idia ese “Iesu na e abia daemu” bona e gwauraiamu edia hahemauri tauna. (Ioa. 6:​29, King James Version) To, ḡau ma haida bae kara na namo, badina matamanai Galilea ai momo ese Iesu na e badinaiava to gabeai idia ese Iesu na e rakatania. Dahaka dainai?

13. Iesu baita abidadama henia anina be dahaka?

¹³ Hutuma bogaraḡidiai, momo ese Iesu e badinaiava badina ia ese edia ura ḡaudia e heniva. Idia na e urava ia ese edia gorere baine hanamo, aniani baine henidia, bona iena amo e ura heniva hahediba herevadia mo bae kamonai. To, Iesu ese e hahedinaraia ḡoevaḡoeva ia ema tanobada badina na dia edia ura ḡaudia mo baine henidia. Ia ema badina na baine hadibadia, edena dala ai iena hahediba taudia korikoridia ai baela. Namona na ‘ia dekena baela’ anina na iena hahediba herevadia iboudiai bae kamonai bona bae badina.—Ioa. 5:40; 6:44.

14. Ita be dahaka baita kara Iesu tauanina bona rarana e bouboulaia ḡauna amo namo baita davari?

 ¹⁴ Iesu ese hutuma e hamaorodia ia tauanina bona rarana e bouboulaia karana amo dala e kehoa taunimanima na bae mauri hanaihanai totona. Namona na idia ese una bae abidadama henia. To dia Iuda taudia mo, hari iseda negai danu ita edai na mai anina bada. (Ioa. 6:40) Oibe, Ioane 6:53 ai Iesu ena hereva heḡereḡerena, mauri hanaihanai baita abia totona namona na mauri idavalaina boubouna baita abidadama henia. Taunimanima hutuma ese una hahenamo bae abia diba.—Efe. 1:7.

15-16. Ioane karoa 6 amo dahaka mai anina bada ḡaudia tame diba?

¹⁵ Ioane karoa 6 ai, mai anina bada ḡaudia bona ita ihagoadada ḡaudia momo tame diba. Tame laloparara Iesu ese taunimanima na e lalodia badamu. Galilea ai, ia ese gorere taudia e hanamodia, Dirava ena Basileia e hahedibalaia, bona hutuma e ubudia. (Luka 9:11; Ioa. 6:​2, 11, 12) To hereadaena na e hahedinaraia, “mauri anianina” na ia.—Ioa. 6:​35, 48.

¹⁶ Iesu ese e gwauraidia “mamoe idaudia haida” na Lohiabada Ena Anibou ai paraoa basie ania bona wain basie inua. (Ioa. 10:16) To, Iesu Keriso ena boubou ḡauna amo namo bae davari totona, namona na bae hahedinaraia idia ese una boubou ḡauna na e abidadama heniamu. (Ioa. 6:53) A paraoa e aniamu bona wain e inuamu taudia na gwauhamata matamatana lalonai be vareaimu taudia, bona idia na guba Gavamanina ai be lohiamu. Una dainai, ena be ita na horoa taudia eiava mamoe idaudia ma haida, to Ioane karoa 6 ai e torea sivaraina amo ina mai anina bada ḡauna baita dibaiamu. Baita mauri hanaihanai totona, namona na ita ese mauri idavalaina boubouna baita abidadama henia.