1. Baibul negadiai taunimanima ese paraoa be ede e laloa tomava?

 PARAO na aniani ḡauna badana ta Baibul negadiai. (Gen. 14:18; Luka 4:4) Una dainai, nega haida Baibul ai ina hereva “parao” na e ḡaukaralaiava aniani e herevalaiva negadiai. (Mat. 6:11; Apos. 20:​7, stadi nout) Iesu danu ena hoa karadia badadia rua lalodiai parao e ḡaukaralaia. (Mat. 16:​9, 10) Una sivarai ta na Ioane karoa 6 ai baita stadilaiamu. Bona una sivarai ese be durudamu dalana baita itaiamu.

2. Dahaka e vara dainai hutuma na aniani e tahu?

² Iesu na ena aposetolo taudia ida e haroro daudau murinai taudia e manoka, bena bouti ai e gui Galilea Gohuna amo e hanai laḡadia bae ha ani. (Mar. 6:​7, 30-32; Luka 9:10) Bena asi reḡena gabuna ta ai e kau Betesaida badinai, to taunimanima na e kamonai Iesu na unuseniai neganai, hutuma na e aru ela ia i’itana. Iesu ese idia na e lalodia bada. Bona mai manauna ida Basileia sivaraina e hadibalaidia bona gorere taudia e hanamodia. Adorahi kahanai, aposetolo taudia na e lalohekwarahiva hutuma be ede amo adia be ha-abimu. Idia haida be readia aniani taidia e abi kau, to momo na aniani bae hoi totona badi hanuadia be laomu. (Mat. 14:15; Ioa. 6:​4, 5) Una dainai Iesu be dahaka e kara?

HOA DALANA AI HUTUMA E UBUDIA

3. Iesu ese ena aposetolo taudia be e hamaorodia dahaka bae kara hutuma daidiai? (Laulau danu ba itaia.)

³ Iesu ese ena aposetolo taudia e hamaorodia, eto: “Asi badina baela; umui hari adia ba henidia.” (Mat. 14:16) Aposetolo  taudia ese una e haeroa na taina auka, badina una negai e duahidia tatau na 5,000 bamona. Bona bema ha’hine bona natudia baita duahidia heboumu, una na 15,000 mai kahana be ubudiamu. (Mat. 14:21) Andrea na e gwa: “Mero-mero ta iniseni ai, ia na mai ana bali gabugabudia ima bona gwarume-gwarume rua; to unu na ede bae hekara toma, taunimanima na hutuma herea.” (Ioa. 6:9) Una negai, bali gabugabuna na ogoḡami taudia bona ma haida ese e he-ubulaiava anianina. Unu gwarume-gwarume na e damenadia bona lahi ai e nonodia. To dounu una meromero ena amo e abia anianidia na dia heḡereḡere hutuma bae ubudia.

4. Ioane 6:​11-13 amo dahaka ta dibamu? (Laulau danu ba itadia.)

⁴ Iesu na e ura hebogahisi karana baine hahedinaraia dainai, e hamaorodia orea ta ta ai bae helai. (Mar. 6:​39, 40; Ioane 6:​11-13 ba duahidia.) Bena ḡuriḡuri amo Tamana e tenkiu henia parao bona gwarume dainai. Unu e kara toma badina aniani na Dirava ena amo ema ḡaudia. Bona unu aniani dainai e moale. Iesu baita tohotohoa, do asita aniani neganai baita ḡuriḡuri na mai anina bada, herevana ita be edeseni ai. Bena Iesu ese aniani e haridia, iboudiai na e aniani vaitani murinai e moale. Aniani oredia na momo herea dainai, Iesu na se ura bae negedia. Una dainai, ena hahediba e hamaorodia aniani oredia na bae haboudia, unu amo gabeai ma bae ḡaukaralai. Dekedai miadia ḡaudia iḡaukaralaidia namonamo karana ai Iesu na haheitalai namona. Bema oi na tama ta eiava sina ta, una sivarai na ba ḡaukaralaia diba, mai anina bada ḡaudia natumu  ba hadibailaia totona. Iesu heḡereḡerena, do se aniani neganai bae ḡuriḡuri, ma haida bae kara namo henidia, bae heabidae, bona harihari bada karana bae manadalaia.

5. Una hoa karana e itaia murinai hutuma be e urava dahaka bae kara, to Iesu be dahaka e kara?

⁵ Hutuma na e hoa Iesu ena hahediba dalana bona hoa karadia daidiai. Idia na mai dibadia Mose na e gwa, Dirava na peroveta tauna ta baine siaia, una dainai e laloava Iesu na una peroveta tauna. (Deu. 18:​15-18) Readia e lalova Iesu na lohia tauna hereadaena ta, ia na mai ena siahu Israel taudia iboudiai baine ubudia. Una dainai hutuma na e urava “bae dabaia tao, edia hanua pavapavana ai bae halaoa.” (Ioa. 6:​14, 15) Bema Iesu ese edia ura bema abi dae, bema hahedinaraia ia na edia politikol karana e durua. To, ia be dahaka e kara? Baibul na e gwaumu, Iesu na “sibona ororo ai ma eha dara dae lou.” Herevana taunimanima ese e doria, to lalona e hadaia politik karadia ai basine vareai. Ina na mai anina bada karana ta ita edai!

6. Iesu ena haheitalai be ede baita tohotohoa toma? (Laulau danu ba itaia.)

⁶ Momokani, taunimanima ese basie noidamu hoa dalana ai aniani baita henidia, edia gorere baita hanamo eiava edia lohia tauna ai baitala. To readia laloda be animu, edia ura politikol tauna ta baita voutia eiava eda hereva bona kara amo baita durudia. Iesu ena haheitalai ese e durudamu. Badina ia na politikol  karadia ta lalonai se vareai, bona danu e gwa: “Egu Basilea na dia ina tanobada ḡauna.” (Ioa. 17:14; 18:36) Ita na Kristen tauda dainai namona na Iesu ena lalohadai bona kara baita tohotohodia. Iesu heḡereḡerena, ita na Dirava ena Gavamani ta sapotiamu, ta harorolaiamu bona ta ḡuriḡurimu una Gavamani na bainema. (Mat. 6:10) Mani una sivarai amo baita dibamu ḡaudia ma haida aita tahudia.

“ASIE LALOPARARA HOA DALANAI HUTUMA NA PARAOA E HENIDIA”

7. Iesu bona ena aposetolo taudia be dahaka e kara? (Ioane 6:​16-20)

⁷ Iesu ese hutuma e ubudia murinai, ena aposetolo taudia e siaidia bouti amo Kaperanauma bae lou lao. A ia be sibona ororo ta ai e dara dae, unu amo hutuma ese king ai bae halaoa karana baine dadaraia. (Ioane 6:​16-20 ba duahidia.) Aposetolo taudia na bouti amo e laova lalonai, lai gubana ese e lasidia tao, una ese hurehure badadia e havara. Bena Iesu na davara kopina amo idia e raka henidiava. Bona ia ese aposetolo Petro e boiria davara kopina ai baine raka. (Mat. 14:​22-31) Iesu bouti ai e gui neganai, lai gubana e doko. Ena hahediba taudia na e hoa dainai, e gwa: “Momokani, oi na Dirava Natuna.” a (Mat. 14:33) Mani a laloa, guna Iesu ese hutuma e ubudia murinai be unu se gwau toma. To Iesu davara kopina amo e raka murinai una hereva de gwauraia. Mareko ese una e vara ḡauna na ini e herevalaia toma, eto: “[Aposetolo taudia] na asie laloparara hoa dalanai hutuma na paraoa e henidia tauna ese ina hoa karana danu baine karaia diba.” (Mar. 6:​50-52, NWT) Hahediba taudia na se laloparara Iehova ese Iesu e henia siahuna na heḡereḡere vaitani hoa karadia momo baine kara, dia una paraoa mo. Una murinai Iesu ese hoa dalana ai parao amo hutuma e ubudia kahana ma e herevalaia lou. Unu amo ḡau ta baine hadibada.

8-9. Dahaka dainai hutuma ese Iesu e tahua? (Ioane 6:​26, 27)

⁸ Iesu ese e ubudia taudia na tauanidia edia dabu ḡaudia mo e lalo badava. Ede ta diba tomamu? Idia e ubudia dinana murinai, e laloparara Iesu bona ena aposetolo taudia na una gabu e rakatania. Una dainai hutuma na Tiberia amo ema boutidia ai e gui Kaperanauma ela Iesu e ha-tahua. (Ioa. 6:​22-24) Idia be e urava Dirava ena Gavamani sivaraina bae kamonaia dainai unu e kara toma, a? Lasi. Idia na e urava Iesu ese paraoa amo baine ubudia. Ede ta diba tomamu?

⁹ Hutuma ese Kaperanauma badinai Iesu e davaria neganai, e vara ḡauna mani a laloa. Iesu ese e hamaorodia eto umui ese lau o tahugumu, dia toa o ita dainai, to “aniani ḡaudia o ani bogamui e kunu” dainai. Basio ḡaukara “e oremu aniani” iabina, a baine mia ela bona “mauri hanaihanai anianina” iabina ba ḡaukara. (Ioane 6:​26, 27 ba duahidia.) Iesu ese e hamaorodia ia Tamana ese aniani unu bamodia be henimu. Hutuma na e kamonai aniani unu bamodia ese mauri hanaihanai be henimu neganai reana e hoa! Edena aniani ese mauri hanaihanai baine heni diba, bona edena dala ai bae abia?

10. “Dirava ena ḡaukara” be dahaka, bona dahaka dainai taunimanima ese bae dibaia na namo?

¹⁰ Unu Iuda taudia be reana e urava bae diba idia be dahaka bae kara, bena Iesu ese e herevalaiava anianina bae abia. Reana idia na e laloava Mose ena Taravatu ai e herevalai ḡaudia bae kara. To, Iesu ese e hamaorodia, eto: “Dirava ena ḡaukara binai: e siaia tauna na ba kamonai henia.” (Ioa. 6:​28, 29) Namona na  idia ese Iesu bae abidadama henia unu amo “mauri hanaihanai bae abia.” Iesu ese guna idia ediai una na e herevalaia. (Ioa. 3:​16-18, 36) Bona gabeai mauri hanaihanai baita abia dalana danu e herevalaia.—Ioane 17:3.

11. Edena dala ai Iuda taudia ese e hahedinaraia idia na dounu aniani e lalo badava? (Salamo 78:​24, 25)

¹¹ Unu Iuda taudia na asie urava Iesu bae abidadama henia. Idia ese ma e nanadaia, eto: “Toana be dahaka ba karaia, baia itaia, bena baia kamonai henimu?” (Ioa. 6:30) Idia na e gwa, Mose ena nega ai Israel taudia na hoa dalana ai dina ta ta ai mana amo e ubudiava. (Neh. 9:15; Salamo 78:​24, 25 ba duahidia.) Una ese e hahedinaraiamu, idia na aniani korikori iabina e lalo badava. Bona Iesu ese guba amo “aniani korikorina,” mauri hanaihanai be henimu ḡauna e herevalaia neganai, idia ese Iesu na se nanadaia una hereva anina baine gwauraia totona. (Ioa. 6:32) Idia na tauani iduruna ḡaudia mo e lalo badava dainai, Iesu ese mauri hanaihanai iabina dalana e herevalaia neganai se kamonai. Una sivarai amo dahaka ta dibamu?

BAITA LALOA BADA ḠAUNA

12. Iesu ese ita edai e hahedinaraia mai anina bada ḡauna be dahaka?

¹² Ioane karoa 6 ai ina mai anina bada ḡauna baita dibaiamu. Iehova ikamonai henina bona ihetura henina na mai anina bada. Iesu ese una point na e hahedinaraia, Satana ese e dibaḡania neganai ia na e gwa, “dia aniani amo mo taunimanima basie mauri, a Dirava uduna amo e lasimu herevadia iboudiai amo danu.” (Mat. 4:​3, 4) Bona Ororo Harorona ai, Iesu ese e hahedinaraia eda hetura karana Iehova ida na mai anina bada. (Mat. 5:3) Una dainai, siboda baita henanadai, ‘Egu mauri dalana amo na hahedinaraiamu egu hetura karana Iehova ida be mai anina bada eiava tauanina ḡaudia?’

13. (a) Dahaka dainai aniani korikori baita moalelaia na asi ena kerere? (b) To Paulo ena hereva heḡereḡerena dahaka dainai baita henahua toho? (1 Korinto 10:​6, 7, 11)

¹³ Eda dabu ḡaudia daidiai Iehova ta noiamu bona baita moalelai na asi ena kerere. (Luka 11:3) Baibul na e gwa, tau ta “baine aniani, baine inuinu, bona ena hekwarahi baine moalelaia.” Badina unu na “Dirava imana amo.” (Koh. 2:24; 8:15; Iak. 1:17) To, namona na eda mauri lalonai moni bona kohu na ḡau badadia ai basita halao. Aposetolo Paulo ese Kristen taudia e tore henidia herevana amo una baita dibamu. Ia ese idaunegai, Israel taudia ese Sinai Ororona badinai e karaia karana e herevalaia. Ia ese Kristen taudia e hamaorodia “[ḡau dikadia basie, NWT] ura heni, [Israel taudia] ese e ura heni na heto.” (1 Korinto 10:​6, 7, 11 ba duahidia.) Israel taudia na edia mataḡaniḡani dainai Iehova ese hoa dalana ai e heni ḡau namodia na “ḡau dikadia” ai e halao. (Num. 11:​4-6, 31-34) Bona gold amo e karaia boromakau natuna kaivakukuna e tomadiho henia neganai, Israel taudia na e aniani, e inuinu, bona e moaleva. (Eso. 32:​4-6) Paulo ese unu haheitalai e herevalai badina, Ierusalem do se hadikaia neganai, e nohova Kristen taudia baine durudia bae henahua toho. Ita danu ina nega oromana dikana dokona kahanai vada ta nohomu dainai, Paulo ena sisiba baita laloa bada na namo.

14. Baibul be e gwa tanobada matamatana ai, aniani ede bamodia baita moalelaimu?

¹⁴ Iesu na e gwa, ta ḡuriḡurimu neganai baita gwa, “hari dina ai amai bame henimai,” to danu e hadibada Dirava baita noia ‘tanobada ai ena ura baine haḡuḡurua guba ai e karaia na heto.’ (Mat. 6:​9-11) O laloamu una negai tanobada toana be ede bamona? Baibul ese Dirava ena ura tanobada ai baine ḡuḡuru karana e herevalaia neganai, una na aniani namodia bae vara karana danu e herevalaia. Isaia 25: 6-8 ena hereva heḡereḡerena, Iehova ena Gavamani henunai aniani momo herea baita moalelaimu. Salamo 72:16 na e gwa: “[Tanobada ai aniani do bae momo herea, ororo doridia ai witi do bae momo herea, NWT].” O uramu una negai bae vara uit ba ḡaukaralaidia o ura heniamu paraoana ba gabua eiava recipe matamatana ta ba tohoa? Dia una mo, to sibomu emu vine imeadia bo hadomu bona anidia bo moalelaimu. (Isa. 65:​21, 22) Tanobada inoholaina taudia iboudiai ese unu ḡau be moalelaimu.

15. Be toreisi loumu taudia be dahaka be dibamu? (Ioane 6:35)

¹⁵ Ioane 6:35 ba duahia. Mani Iesu ese parao bona gwarume amo e ubudia taudia aita lalodia lou. Ena be idia momo na edia abidadama Iesu enai na asie hahedinaraia, to vaira negai be varamu toreisi louna ai reana idia haida bo hedavari henidiamu. (Ioane 5:​28, 29) Una negai idia ese Iesu ena hereva anina be lalopararalaiamu, eto: “Mauri anianina lau binai: dekegu bainema tauna na basine hitolo.” Idia ese edia abidadama Iesu ena mauri idavalaina boubouna ai bae hagoadaia, bona bae abia dae Iesu na idia daidiai ena mauri e heni. Una negai, toreisi lou taudia bona tanobada matamatana ai bae vara natu ese Iehova bona ena ura bae dibaia. Ita na mai moaleda ida unu ḡau namodia baita hadibadiamu! Una ese aniani korikori ianina amo ta abiamu moalena be hereaiamu.

16. Atikol gabena ai be dahaka baita herevalaimu?

¹⁶ Ina stadi ai Ioane karoa 6 ese e herevalaia sivaraina kahana ta tame stadilaia, to Iesu ese “mauri hanaihanai” e herevalaia dalana amo ḡau ma haida baita dibamu. Iesu ena negai e nohova Iuda taudia ese iena hereva bema kamonai namonamo na mai anina bada, bona hari ita edai danu una na mai anina bada. Atikol gabena ai ita ese Ioane karoa 6 ena hereva ma haida baita stadilaimu.