Ina laḡani Gima Kohorona ena atikol idauidau o duahidia, a? Mani ini henanadai ba haerelaidia:

Iehova ese ha’hine be ede e kara henidia tomamu?

Iehova ese tatau bona ha’hine na e kara henidia heḡereḡeremu. Dirava ese ha’hine na e hakala henidiamu, edia lalohadai bona hemami na e lalodia badamu. Iehova ese Kristen hahinedia e trastidiamu dainai ḡaukara e henidiamu.—w24.01, rau 15-16.

Edena dala ai Efeso 5:7 ena hereva baita badinaia, eto: “Idia ida basio hetura”?

Aposetolo Paulo na e gwa, Iehova ena taravatu asie lalo badamu taudia na basita bamodia. Taunimanima unu bamodia ibamodia karana ai baita henahua toho. Una hahekau herevana na social media ai danu baita badinaia.—w24.03, rau 22-23.

Ededia sivarai koikoidia amo baita henahua toho?

Namona na bamo edia amo ta kamonaimu sivaraidia, email ai asi dibada tauna ta ese Iehova ena taunimanima e sivarailaidia koikoi herevadia e siai henidamu, bona koikoi dalana ai e uramu eda hereva bae kamonai aposteit taudia amo baita henahua toho.—w24.04, rau 12.

Iehova ese King Solomon, Sodom bona Gomora, bona Abata ai e mase taudia be ede be hahemaoro henidia tomamu? Ita mai dibada bona asi dibada ḡaudia be dahaka?

Ita asi dibada ḡauna na, Iehova ese idia be mase hanaihanai hahemaorona be henidiamu eiava. To, ita mai dibada ḡauna na Iehova na hebogahisi bada Diravana bona ia sibona ese abi hidi maorona be karaiamu.—w24.05, rau 3-4.

Dahaka dainai Dirava na eda “Nadi-ginina” ai baita halaoa? (Deu. 32:4)

Iehova na eda roho-mauri gabuna. Ia ese ita na hanaihanai be durudamu bona basine rakatanidamu. Ia na se idaumu, iena kara bona ura danu se idaumu.—w24.06, rau 26-28

Dahaka ba kara unu amo kongrigeisin matamatana ba durua bona ba moale diba?

Iehova bavabidadama henia, ia ese oi na be durumumu, guna ena hesiai taudia e durudia heḡereḡerena. Kongrigeisin matamatana na gunana ida basio haheḡereḡerea. Emu kongrigeisin matamatana ai ba bisi, bona ma haida ba hetura henidia.—w24.07, rau 26-28.

Mataio karoa 25 ai, parabole toi amo dahaka ta diba?

Mamoe bona nani parabolena ese Dirava iabidadama henina bona ibadinana karana e herevalaiamu. Aonega bona kavakava ulatodia parabolena ese e hahedinaraiamu, baita heḡaeḡae bona baita gima na mai anina bada. Bona talent parabolena ai, ḡaukara goada karana e herevalaiamu.—w24.09, rau 20-24.

Solomon ena dubu helaḡa dehena harana ena height be hida?

Sisiga Iharuana 3:4 ai, idaunega ai e tore manuscript haida na e gwa, una dehe ena height na “kiubit 120,” una na 53 mita (175 ft). To toretore haida ai e gwa, dehe harana ena height na “20 kiubit,” eiava 9 mita (30 ft). Dubu habana udunana (thickness) baita haeroamu neganai, baita gwau dibamu una dubu dehena harana ena [height] na 20 kiubit.—w24.10, rau 31.

Hesiai taudia na “basie hodara,” anina be dahaka? (1 Tim. 3:12)

Anina na hahine tamona e adavaia bona basine matabodaḡa. Danu, namona na adavana baine badinaia bona hahine idaudia na basine ḡahusidia.—w24.11, rau 19.

Dahaka dainai baita gwau dibamu, Ioane 6:53 na dia Lohiabada Ena Anibou ai taunimanima ese bae kara ḡaudia e herevalai?

Ioane 6:53 ai Iesu hidiona bae ania bona rarana bae inua karana e herevalaiamu. Ini hereva na laḡani 32 C.E. ai, Iesu ese Galilea ai e gwauraia, ia do asie abidadama henia Iuda taudia ediai. To, Lohiabada Ena Anibou na laḡani ta murinai, Ierusalem ai e hamatamaia. Una nega ai, Iesu ese ia ida guba ai bae lohia taudia e hereva henidia.—w24.12, rau 10-11.