Aposetolo Paulo ese bamona Timoteo e tore henia, eto: “Dirava bona Keriso Iesu bona e gwauraidia hidi anerudia vairadiai na haḡanimumu, ini hahedua herevadia na ba badina; lalomu basio hadaia kava, bona emu hahemaoro basio hagagevaia.”—1 Tim. 5:21.

E gwauraidia hidi anerudia baita dibadia totona, ita ese aneru ma haida baita herevalaidiamu, idia na dia una grup lalonai. Idia na dia 144,000 taudia. Paulo ese Timoteo e tore henia neganai, horoa tauna ta do se dae guba. Una negai, aposetolo taudia bona e horodia taudia na lauma taudia ai do asiela, una dainai “e gwauraidia hidi anerudia” na dia idia e herevalaidia.—1 Kor. 15:​50-54; 1 Tes. 4:​13-17; 1 Ioa. 3:2.

Danu, “e gwauraidia hidi anerudia” na dia Noa ena negai e gwau-edeede anerudia. Unu aneru na Satana e badinaia bena lauma dikadia ai ela, bona Iesu inaina ai ela. (Gen. 6:2; Luka 8:​30, 31; 2 Pet. 2:4) Nega vairai, Iesu ese guri dobu-masemasena ai baine tahodia dobi bona unuseniai laḡani 1,000 bae noho, una murinai Satana ida baine haoredia vaitani.—Iuda 6; Apok. 20:​1-3, 10.

Paulo eto “e gwauraidia hidi anerudia” na guba ai e nohomu, “Dirava bona Keriso Iesu” ida e ḡaukara heboumu.

Guba ai abidadama anerudia na momo herea e nohomu. (Heb. 12:​22, 23) Una dainai basita lalo aneru iboudiai na ḡaukara tamona e karaiamu. (Apok. 14:​17, 18) Heḡereḡere Iehova ese aneru tamona e siaia Asuria ena tuari taudia 185,000 e hamasedia. (2 Han. 19:35) Aneru haida na e siaidia “hekwakwanai ḡaudia iboudiai bona kara-havara taudia [Iesu] ena basileia amo bae gogodia oho.” (Mat. 13:​39-41) Ma haida be “e abidia hidi taudia . . . bae gogodia” guba baela. (Mat. 24:31) Bona aneru ma haida be e haduadia ‘eda dala iboudiai lalodiai bae gimada.’—Sal. 91:11; Mat. 18:10; Mataio 4:11 ba haheḡereḡerea; Luka 22:43.

Timoteo Ginigunana 5:21 ai “e gwauraidia hidi anerudia” ese kongrigeisin ta ta lalodiai mai anina bada ḡaukarana e gunalaiamu. Una siri ai, Paulo ese elda taudia e haḡanidia edia maduna bae hua bona kongrigeisin taudia ese danu bae matauraidia. Paulo na e gwa, elda taudia ese taunimanima iboudiai na “[maka tamona ai bae kara henidia, NWT]” bona hahediba herevadia iboudiai bae tahu namonamo, bena abi hidi bae kara. Idia ese Paulo ena sisiba e badinaiamu badina badana na, edia ḡaukara na “Dirava bona Keriso Iesu bona e gwauraidia hidi anerudia vairadiai” e karamu. Una ese e hahedinaraiamu aneru haida na e abidia hidi kongrigeisin e duruamu, heḡereḡere Dirava ena hesiai taudia e gimadiamu, edia haroro ḡaukara ai e durudiamu, bona idia daidiai Iehova vairanai e ginimu.—Mat. 18:10; Apok. 14:6.