1, 2. Iesu na guba ai e daekau murinai, aposetolo be reana dahaka e lalo?

IESU ena aposetolo taudia na Olive Ororona ai gini, guba e raraia. Idia ese biagudia bona turadia, Iesu, vada e itaia guba ai e daekau bena ori ta ese e ḡovaia ahu. (Kara 1:9, 10) Laḡani rua lalodiai, Iesu ese e hadibadia, e hagoadadia, bona e hakaudia. Hari ia na vada ela. Idia be dahaka bae kara?

² Iesu ese murinai e rakava taudia e haḡanidia, eto: “Lau igwaurai-hedinaraigu taumui ai baola, Ierusalem ai bona Iudea idoinai bona Samaria kahana idoinai, ela bona tanobada heḡeḡe-madai.” (Kara 1:8) Idia ese una ḡaukara be ede bae haḡuḡurua toma? Momokani, Iesu ese e gwauhamata henidia nega sisina murinai lauma helaḡa bae abia. (Kara 1:5) To, tanobada heḡeḡemadai haroro ḡaukara bae haḡuḡurua totona, orea ta ese baine hakaudia na namo. Idaunegai Iehova ese gwaukau taudia haida e ḡaukaralaidia, ena taunimanima baine hakaudia totona. Una dainai, reana aposetolo taudia na e lalova, ‘Iehova be hahekau tauna matamatana ta baine abia hidi, a?’

3. (a) Iesu na gubai e daekau murinai, aposetolo taudia be dahaka abi hidi badana e karaia? (b) Ina stadi ai dahaka baita herevalaimu?

 ³ Pura rua muridiai, Iesu ena hahediba na Buka Helaḡa ai e hetahu, Dirava ena hahekau totona e ḡuriḡuri, bena Matia e abia hidi Iuda Iskariote gabuna e abia bona aposetolo tauna namba 12 ai ela. (Kara 1:15-26) Dahaka dainai idia ediai bona Iehova enai una abi hidi na mai anina bada? Matia na mai anina bada ḡaukarana ta baine karaia. * Iesu ese ena aposetolo e abidia hidi na dia ia mo bae bamoa haroro ḡaukara ai, to Dirava ena taunimanima bogaraḡidiai mai anina ḡaukarana bae karaia. Una ḡaukara be dahaka, bona Iehova ese Iesu ena amo idia be ede e haheḡaeḡaedia toma? Hari ina negai Dirava ena taunimanima ese dala unuhetomana e badinaiamu danu, a? Bona edena dalai ita e ‘hakaudamu taudia’—“hesiai tauna mai ena kamonai bona mai ena kara maoromaoro”—baita lalodia?—Heb. 13:7; Mat. 24:45.

4. Aposetolo edia negai, Ierusalem ai aposetolo taudia bona elda taudia ma haida edia maduna be dahaka?

⁴ Pentekoste 33 C.E. ai, aposetolo taudia ese Kristen kongrigeisen e hakaua matama. Una dina ai, “Petro na gwauta-taosi” eiava 11 ida e gini tore bona hereva momokanidia na Iuda bona Iuda tomadihona ai e vareai taudia hutuma e hadibalaidia. (Kara 2:14, 15) Momo na abidadama taudia ai ela. Una murinai, unu Kristen taudia matamatadia na “aposetolo edia hahediba heboudia ai e noho taritariva.” (Kara 2:42) Aposetolo taudia ese kongrigeisen ena moni e nariva. (Kara 4:34, 35) Bona Dirava ena taunimanima na lauma dalana ai e naridia, eto: “Ai ese nega idoinai ḡuriḡuri bona haroro baia goadalai.” (Kara 6:4) Danu haroro ḡaukara e manadalai Kristen taudia e siaidia teritori matamatadia ai bae haroro totona. (Kara 8:14, 15) Gabeai, e horodia elda taudia ma haida na aposetolo taudia ida kongrigeisen ena ḡaukara idauidau e karadiava. Idia na gavanin bodi dainai, idia ese kongrigeisen iboudiai e hakaudia.—Kara 15:2.

5, 6. (a) Lauma helaḡa ese gavanin bodi be ede e hasiahua toma? (Rau 23 ai laulau ba itaia.) (b) Aneru ese gavanin bodi be ede e durua toma? (c) Dirava ena Hereva ese gavanin bodi be ede e hakaua toma?

⁵ Aposetolo edia negai, Kristen taudia na mai dibadia Iehova Dirava ese gavanin bodi na Igunalaidia Tauna, Iesu, ena amo e hakaudia. Ede e diba toma? Ginigunana na, lauma helaḡa ese gavanin bodi e hasiahudia. (Ioa. 16:13) E horodia Kristen taudia iboudiai na lauma helaḡa e abia, bona una ese Ierusalem ai aposetolo bona elda taudia e durudia edia maduna bae huaia namonamo totona. Heḡereḡere, laḡani 49 C.E. ai, lauma helaḡa ese gavanin bodi e hakaua dainai, idia ese peritome karana ai e vara hepapahuahuna e hamaoromaoroa. Kongrigeisen taudia ese edia hahekau herevadia e badina dainai, “edia abidadama e goada e laova, bona dina iboudiai ekalesia taudia na e hutuma e laova.” (Kara 16:4, 5) Kongrigeisen e siai henidia revarevana ese danu e hahedinaraia, gavanin bodi na una disisen e karaia neganai Dirava ena lauma huahuadia, heḡereḡere lalokau bona abidadama e hahedinarai.—Kara 15:11, 25-29; Gal. 5:22, 23.

⁶ Iharuana na, aneru ese gavanin bodi e durua. Korenelio do se bapatiso bona Idau Bese Kristen tauna ginigunana ai do sela neganai, aneru ta ese e hamaoroa aposetolo Petro baine boiria.  Petro ese Korenelio bona varavarana e haroro henidia murinai, idia na lauma helaḡa e abia, ena be tataudia na asie peritomedia. Una kara dainai, aposetolo taudia bona tadikaka ma haida ese Dirava ena ura e badinaia bona asie peritomedia Idau Bese taudia na Kristen kongrigeisen lalonai e abidia dae. (Kara 11:13-18) Danu, aneru edia heduru amo gavanin bodi ese e gunalaiava haroro ḡaukarana na e bada e laova. (Kara 5:19, 20) Ihatoina na, Dirava ena Hereva ese gavanin bodi e hakaua. Unu e horodia elda taudia ese Baibul ena hahediba herevadia daidiai e vara hepapahuahudia e hamaoromaorova eiava hahekau herevadia e heniva negadiai, Dirava ena Hereva e ḡaukaralaiava.—Kara 1:20-22; 15:15-20.

7. Dahaka dainai baita gwau dibamu Iesu ese Kristen ginigunadia e hakaudiava?

⁷ Ena be Kristen kongrigeisen ginigunana lalonai gavanin bodi na mai ena siahu, to idia na mai dibadia Ihakaudia Tauna na Iesu. Aposetolo Paulo na eto: “[Keriso] ena herahia be haida e heni, aposetolo taudia ai baela.” Ma eto: “Lalokau ai . . . baita bada oho bada oho, ela bona Keriso enai baita kau; ia na eda orea ikwarana.” (Efe. 4:11, 15) Idia na aposetolo tauna badana ta asie nemaia, to ‘Dirava ena hahekau henunai, hahediba taudia ese ina lada Kristen e abia.’ (Kara 11:26, NWT) Momokani, Paulo na dibana aposetolo taudia bona hahekau taudia ma haida ese Buka Helaḡa amo e heni “hahediba herevadia” bae badina na ḡau badana. Paulo na ma eto: “To na uramu ba diba, tatau iboudiai [gavanin bodi taudia danu] kwaradia na Keriso; . . . Keriso kwarana be Dirava.” (1 Kor. 11:2, 3) Oibe, Keriso Iesu na Iehova Dirava henunai kongrigeisen e hakauava.

8, 9. Laḡani 1870 amo, Tadikaka Russell be dahaka ḡaukara badana e karaia?

⁸ Laḡani 1870 amo, Charles Taze Russell bona bamona haida na e ura Kristen tomadiho momokanina bae hamatamaia lou. Baibul ena hereva momokani na gado idauidau ai bae halasia totona, laḡani 1884 ai Zion’s Watch Tower Tract Society e hamatamaia, bona Tadikaka Russell na presiden. * Ia na Baibul e stadilaia namonamova tauna, bona asi garina ida ia ese e hahedinaraia Toi Tamona hahedibana bona souli se masemu hahedibana na koikoi. Ia na e diba Keriso ena lou mai na taunimanima matadia ese basie itaia, bona “idau bese edia nega” na laḡani 1914 ai baine ore. (Luka 21:24) Tadikaka Russell ese ena nega, goada, bona moni e ḡaukaralai hereva momokani na ma haida baine hadibalaidia helaoreana. Una ese e hahedinaraia ḡoevaḡoevamu, Iehova bona kongrigeisen kwarana, Iesu, na nega korikorina ai Tadikaka Russell e ḡaukaralaia.

⁹ Tadikaka Russell na se ura taunimanima ese bae imodaia. Laḡani 1896 ai, ina hereva e torea: “Asia uramu ai sibomai eiava emai toretore daidiai taunimanima ese bae imodaimai, eiava bae hanamomai; asia uramu ladamai bae hato Reverend eiava Hahediba Tauna (Rabi). Bona asia uramu ta ese ladamai bae nemailai.” Gabeai ia na ini e gwau toma: “Ina na dia taunimanima ta ena ḡaukara.”

10. (a) Edena negai Iesu ese “hesiai tauna mai ena kamonai bona mai ena kara maoromaoro” e abia hidi? (b) Tadikaka ese Gavanin Bodi bona Watch Tower Society edia idau be ede e lalopararalaia toma?

¹⁰ Tadikaka Russell e mase bena laḡani toi muridiai, una na laḡani 1919 ai, Iesu ese “hesiai tauna mai ena kamonai bona mai ena kara maoromaoro” e abia hidi. Dahaka dainai? Nega korikori ai ena hesiai taudia “adia malamala baine henidia” totona. (Mat. 24:45)  Unu laḡani lalodiai danu, Brooklyn, New York ena hedkwota ai e ḡaukarava horoa tadikakadia edia orea maraḡina ese lauma aniani e heḡaeḡaelaiva bona Iesu murinai e rakava taudia e henidia. Laḡani 1940 murina laḡanidia ai, ina hereva “gavanin bodi” na eda pablikeisen ai e hedinarai matama, badina e laloava ia na Watch Tower Bible and Tract Society ena dairekta e herevalaia. To, laḡani 1971 ai tadikaka ese Gavanin Bodi bona Watch Tower Society edia idau e lalopararalaia—Watch Tower Society na dia Baibul ese e gwauraia oreana ta, to ia bona ena dairekta na gavamani ena taravatu heḡereḡerena Iehova ena orea ena ḡaukara idauidau e narimu. Gavanin Bodi taudia na horoa tadikakadia, bona idia na dia Society ena dairekta taudia. Vanega laḡani lalodiai, “mamoe idaudia” amo maduna e huamu tadikakadia na Watch Tower Society bona Dirava ena taunimanima ese e ḡaukaralaimu oreadia ma haida edia dairekta ai ela. Unu amo Gavanin Bodi na lauma aniani ihalasina ḡaukarana mo bae laloa bada. (Ioa. 10:16; Kara 6:4) July 15, 2013, Gima Kohorona ai e hahedinaraia “hesiai tauna mai ena kamonai bona mai ena kara maoromaoro” na e horodia tadikakadia edia orea maraḡina, ladana na Gavanin Bodi.

11. Gavanin Bodi be ede e ḡaukara tomamu?

¹¹ Gavanin Bodi na abi hidi badadia e kara heboumu. Edena dalai? Idia na pura ta ta ai e heboumu, bena lalotamona ai e herevaherevamu. (Her.  20:18) Laḡani ta ta ai, edia hebou ai idia ta ta na seamani ḡaukara e karaiamu, badina dibadia Gavanin Bodi tadikakana ta ese ma ta na se hereaia. (1 Pet. 5:1) Gavanin Bodi ena komiti 6 ese edia seamani ḡaukarana danu unu e haidaua tomamu. Bona Gavanin Bodi ena memba ta ta na asie lalomu, idia na tadikakadia ihakaudia taudia, to e laloamu idia na hesiai taudia, bona hesiai tauna mai ena kamonai ese e ubudiamu bona ena hahekau henunai e nohomu.

12. Gavanin Bodi na se matahanaimu bona dia ḡoevadae dainai, ededia henanadai baita lalodia?

¹² Gavanin Bodi na Dirava ena amo matahanai se abimu bona idia na dia ḡoevadae. Una dainai, nega haida hahediba herevadia eiava orea ihakauna dalana ai kerere bae kara diba. Watch Tower Publications Index ena sinado ta “Beliefs Clarified” henunai na laḡani 1870 amo Baibul ai e davari diba matamatadia edia list e hahedinaraia. Momokani, Iesu na se gwa ena hesiai tauna mai ena kamonai ese lauma aniani ḡoevadaedia baine heni. Una dainai Iesu ena henanadai be ede baita haerelaia toma, eto: “Hesiai tauna mai ena kamonai bona mai ena kara maoromaoro . . . be daika?” (Mat. 24:45) Dahaka ese e hahedinaraiamu Gavanin Bodi ese una ḡaukara e karaiamu? Aposetolo edia negai e nohova gavanin bodi e durudia ḡaudia toi mani aita lalodia.

13. Lauma helaḡa ese Gavanin Bodi be ede e hagoadaia toma?

¹³ Lauma helaḡa ese e durudia dalana. Lauma helaḡa ese Gavanin Bodi e durudia dainai, guna asie lalopararalai Baibul hereva momokanidia na e lalopararalaidia. Heḡereḡere, paragraf 12 ese e herevalaia pablikeisen ai Baibul ai e davari diba matamatadia edia list mani ba haerodia. Momokani, taunimanima ta basita imodaia ena be ia ese “Dirava ena dobu ḡaudia” baine davari bona anidia baine hahedinarai! (1 Korinto 2:10 ba duahia.) Gavanin Bodi ese Paulo ena hereva e gwauraia lou, e tomu: “Una na a gwauraimu, dia taunimanima edia aonega herevadia amo, a Lauma ese e hadibalaimu herevadia amo.” (1 Kor. 2:13) Laḡani momo lalodiai aposteit karadia e vara bona taunimanima na lauma diburana ai e noho, una dainai bema lauma helaḡa ena heduru na lasi, o laloamu laḡani 1919 amo e  hedinarai diba matamatadia be tama dibadia diba, eiava?

14. Apokalupo 14:6, 7, ena hereva heḡereḡerena, aneru ese hari ina negai Dirava ena taunimanima be ede e durudia tomamu?

¹⁴ Aneru ese e durudia. Hari ina negai Gavanin Bodi na ḡaukara badana e karaiamu, tanobada heḡeḡemadai pablisa 8 milion mai kahana ese e karaiamu haroro ḡaukarana e nariamu. Dahaka dainai una ḡaukara ese anina namona e havaraiamu? Badina aneru ese una ḡaukara e duruamu. (Apokalupo 14:6, 7 ba duahi.) Nega momo, taunimanima haida na heduru totona e ḡuriḡuri muridiai, pablisa ese e vadivadidiava! * Ena be tano haida lalodiai daḡedaḡe na e bada herea, to haroro bona hahediba ḡaukarana na e bada e laomu; una ese e hahedinaraiamu aneru ese e durudiamu.

15. Kristendom edia hahekau taudia bona Gavanin Bodi be ede e idau toma? Haheitalai ta mani a gwauraia.

¹⁵ Dirava ena Hereva ai e tabekau. (Ioane 17:17 ba duahia.) Laḡani 1973 ai e vara ḡauna ta mani a laloa. June 1 Gima Kohorona ai ina henanadai e heni: “Kuku dounu e animu taudia be heḡereḡere bae bapatiso, a?” Ena haere binai: “Buka Helaḡa ese e hahedinaraiamu idia na dia heḡereḡere.” Gima Kohorona ese Baibul siri haida e herevalai murinai e hahedinaraia, bema kuku dounu e animu tauna na basine helalo kerehai, orea amo bae atoa lasi na namo. (1 Kor. 5:7; 2 Kor. 7:1)  Una Gima Kohorona na eto: “Dia taravatu aukana ta dainai eiava hebiagu auka karana dainai ta na orea amo e atoa sirimu. Lasi, to una taravatu na Dirava ena amo e maimu; ena ura na ena Hereva amo e hahedinaraiamu.” Tomadiho oreadia haida be Dirava ena Hereva ai e tabekaumu, herevana edia memba taudia haida ediai una na auka, a? United States ena tomadiho e herevalaia bukana ta na eto: “Nega momo Tomadiho igunalaidia taudia ese edia hahediba herevadia na e haidaudiava badina e urava edia hahediba herevadia na edia dubu taudia bona ma haida edia lalohadai ida bae heḡereḡere.” Bema Gavanin Bodi na abi hidi e karamu neganai, Dirava ena Hereva e badinaiamu to dia taunimanima edia lalohadai, daika ese hari Dirava ena taunimanima e hakaudiamu?

16. Gavanin Bodi baita lalodia dalana ta be dahaka?

¹⁶ Heberu 13:7 ba duahia. Ina hereva “lalodia” o “lalodiatao” anina ta na “herevalaidia.” Una dainai, ‘ihakaumui taudia ba lalodia’ dalana ta na emu ḡuriḡuri ai Gavanin Bodi ba herevalaidia. (Efe. 6:18) Edia ḡaukara ba lalodia bada, idia ese lauma aniani e henimu, tanobada heḡeḡemadai haroro ḡaukarana e nariamu, bona kontribiusen monidia e narimu. Una dainai, idia daidiai baita ḡuriḡuri loulou na namo!

17, 18. (a) Edena dalai ita na Gavanin Bodi ida ta ḡaukara heboumu? (b) Eda haroro ḡaukara amo hesiai tauna mai ena kamonai bona Iesu be ede ta durudia tomamu?

¹⁷ Momokani, Gavanin Bodi baita lalodiatao anina na dia eda hereva ai mo, to edia hahekau herevadia baita badina karana amo danu. Gavanin Bodi ese eda pablikeisen, eda hebou maraḡidia bona badadia amo hahekau herevadia e henidamu. Danu, ia ese seket taudia e abidia hidimu, bona seket taudia ese kongrigeisen elda e abidia hidimu. Seket bona elda taudia ese Gavanin Bodi e laloataomu dalana ta na ia amo e abimu haheḡanidia e badina namonamomu. Ita iboudai ese Ihakauda Tauna, Iesu na baita matauraiamu bema ia ese e ḡaukaralaidiamu tataudia baita kamonai henidia bona baita badinadia.—Heb. 13:17.

¹⁸ Gavanin Bodi baita laloatao dalana ma ta na haroro ḡaukara baita karaia goadagoada. Mani a laloa, Paulo ese Kristen taudia e haḡanidia ihakaudia taudia edia abidadama bae tohotohoa. Hesiai tauna mai ena kamonai ese sivarai namona e harorolaia goadagoadamu karana amo edia abidadama e hahedinaraiamu. Oi ese una ḡaukara badana ai e horodia taudia o durudiamu, a? Bo moalemu bema Ihakaumu Tauna, Iesu, na ini be gwau tomamu: “Tadikakagu maraḡi-maraḡidia bini, maraḡi-maraḡi hereana unu o karaia toma heḡereḡerena, lau danu unu o karagu toma.”—Mat. 25:34-40.

19. Dahaka dainai o uramu Ihakauda Tauna, Iesu ba badinaia?

¹⁹ Iesu na guba ai e daekau neganai, ia murinai e raka taudia na se dadaraidia. (Mat. 28:20) Ia na mai dibana tanobada ai idia e hakaudiava negana ai, lauma helaḡa, aneru, bona Dirava ena Hereva ese e durua bada. Una dainai, ia ese hari ina negai hesiai tauna mai ena kamonai danu unu e durua tomamu. Una hesiai tauna oreana na e horodia Kristen taudia dainai, idia na “Mamoe Natuna murinai e rakamu, ena loa iboudiai.” (Apok. 14:4) Una dainai, edia hahekau dalana baita badinaiamu neganai, ita na Ihakauda Tauna, Iesu ta badinaiamu. Kahirakahira, ia ese baine hakauda mauri hanaihanai baita abia. (Apok. 7:14-17) Hahekau tauna ta ina tanobadai na unu basine gwauhamata toma!