1. Mauri davana ihenina karana dainai dahaka hahenamo bae vara diba?

IESU Keriso ena mauri davana ihenina karana ese dala e kehoa hahenamo momo baita abi diba. Una mauri davana dainai, Adam natuna—kara maoromaoro e ura heniamu taudia—na Dirava ena ruma bese ai baela diba. Danu una mauri davana ihenina karana ese dala e kehoa mai moaleda ida baita noho hanaihanai. To, Keriso ena mauri davana ihenina karana ese vaira negai kamonai taudia ese bae abi hahenamodia mo se havara. Iesu na mai ena kara maoromaoro ida e mase karana amo ia ese guba bona tanobada ai e vara hepapahuahu badadia na e hamaoromaorodia.—Heb. 1:8, 9.

2. (a) Iesu ena ḡuriḡuri ai, dahaka mai anidia bada ḡaudia e herevalai? (Rau 8 ai laulau ba itaia.) (b) Ina stadi ai dahaka baita herevalaimu?

² Laḡani rua gunanai, Iesu do se mase bona mauri davana do se heni negana ai, ia ese ena hahediba e hamaorodia ini bae ḡuriḡuri toma: “Tamamai e, guba ai o nohomu, Oi ladamu baia hahelaḡaia; Emu basileia bainema, emu ura ḡauna tanobada ai baine vara, guba ai e vara na heto.” (Mat. 6:9, 10; NWT) Mauri davana ihenina karana baita laloa bada totona,  mani una mauri davana ihenina karana dainai Iehova ladana e hahelaḡaia, Dirava ena Basileia e lohia, bona Dirava ena ura e ḡuḡuru daladia aita herevalai.

3. Iehova ladana ese dahaka e hahedinaraiamu, bona edena dala ai Satana ese una lada helaḡana e hadikaia?

³ Iesu ese e hahedibalaia ḡuriḡurina ai, e gwauraia ḡauna ginigunana na Dirava ladana baita hahelaḡaia. Iehova ladana ese iena hereadae, hairai, bona helaḡa karana e hahedinaraia ḡoevaḡoeva. Ḡuriḡuri ma ta ai, Iesu ese Iehova na e gwauraia, “Tamagu helaḡa.” (Ioa. 17:11) Iehova na helaḡa dainai, iena hahekau herevadia bona taravatu iboudiai na helaḡa. Ena be unu taravatu na helaḡa, to Eden imeana ai Satana na mai aonegana ida Dirava e ato taravatudia e hepapahuahulai. Satana ese Iehova e gwauraia koikoi, unu amo Dirava ladana helaḡana e hadikaia.—Gen. 3:1-5.

4. Iesu ese Dirava ladana be ede e hahelaḡaia toma?

⁴ To Iesu na idau, ia ese Iehova ladana na e laloa bada. (Ioa. 17:25, 26) Bona Dirava ladana na e hahelaḡaia. (Salamo 40:8-10 ba duahi.) Iesu na tanobada ai kara maoromaoro e badinaia karana amo e hahedinaraia, Iehova na mai ena maoro aneru bona taunimanima daidiai taravatu baine ato. Ena be Satana ese Iesu na e hahisia bona e hamasea, to Iesu ese Tamana gubai na e badinaia ḡoevaḡoeva. Iesu na unu e kara toma dainai, e hahedinaraia ḡoevadae taudia ese Dirava ena kara maoromaoro taravatudia na bae badinadia ḡoevaḡoeva diba.

5. Edena dalai Dirava ladana baita hahelaḡaia diba?

⁵ Edena dala ai baita hahedinaraia Iehova ladana na ta laloa badamu? Eda kara amo. Iehova na e uramu baita helaḡa. (1 Petro 1:15, 16 ba duahia.) Una anina na Iehova mo baita tomadiho henia bona mai kudouda idoinai ida baita badinaia. Bae daḡedaḡe henida negadiai danu, Iehova ena kara maoromaoro taravatudia bona hahekau herevadia baita badina. Kara maoromaoro baita karamu neganai, eda diari be hedinaraimu bona Iehova ladana baita hahelaḡaiamu. (Mat. 5:14-16) Ita na helaḡa tauda dainai, eda mauri dalana amo baita hahedinaraia Iehova ena taravatu na nanamo bona Satana ena hahebade herevadia na koikoi. Kerere baita kara neganai, namona na mai laloda idoinai ida baita helalo-kerehai bona Iehova ladana e hadikaiamu karadia baita dadaraidia.—Sal. 79:9.

6. Dahaka dainai Iehova ese ita na maoroda e gwaurai ena be ita na dia ḡoevadae?

⁶ Keriso ena boubou ḡauna dainai, Iehova ese abidadama taudia edia dika na e gwautao. Ia e toma henia dihomu bona e gwauhamata heniamu taudia na e abidia daemu. E horodia Kristen taudia na Iehova ese e gwauraidiamu ia natuna helaḡadia bona “mamoe idaudia” na e gwauraidiamu ia turana bona kara maoromaoro taudia. (Ioa. 10:16; Roma 5:1,2; Iak. 2:21-25) Una dainai, hari danu, mauri davana ihenina karana ese dala e kehoa, Dirava ese baine gwauraida maoro diba bona ia ladana baita hahelaḡaia diba.

7. Mauri davana ihenina karana dainai, Basileia ena lohia henunai dahaka hahenamo bae vara?

⁷ Iesu na e hahedibalaia ḡuriḡurina ai, ma e gwa: “Emu Basileia bainema.” Mauri davana ihenina karana ese Dirava ena Basileia be ede e durua toma? Mauri davana ihenina karana ese dala e kehoa taunimanima 144,000 na guba ai Keriso ida pavapava bona hahelaḡa ḡaukara bae karaia. (Apok. 5:9, 10; 14:1) Dirava ena Basileia lalonai, Iesu bona  ia ida bae lohia hebou taudia ese laḡani daha ta lalonai, una boubou ḡauna ena namo na kamonai taudia ediai bae ḡaukaralaia. Tanobada na paradaiso ai be laomu, bona abidadama taudia iboudiai bae ḡoevadae, bona Dirava ena ruma bese guba ai bona tanobada ai na bae tamona. (Apok. 5:13; 20:6) Iesu ese gaigai kwarana baine huaria bona guba bona tanobada ai Satana ena gwau-edeede karadia iboudiai baine haoredia vaitani.—Gen. 3:15.

8. (a) Edena dalai Iesu ese ena hahediba e durudia bae laloparara Dirava ena Basileia na mai anina bada? (b) Edena dalai hari ita ese una Basileia baita durua diba?

⁸ Iesu tanobada ai e nohova neganai, ena hahediba e durudia unu amo bae laloparara Dirava ena Basileia na mai anina bada. Iesu na e bapatiso murinai, maoromaoro “Dirava ena Basileia” sivaraina namona na gabu iboudiai e harorolaia. (Luka 4:43) Ia do guba ai se dae neganai, ena hereva oredia ai ena hahediba e haḡanidia “tanobada heḡeḡe-madai” ia sivaraina bae haripiulaia. (Kara 1:6-8) Basileia sivaraina iharorolaina ḡaukarana amo, tanobada heḡeḡemadai ai taunimanima ese mauri davana ihenina karana bae dibaia bona Dirava ena Basileia henunai bae noho diba. Hari ina negai, Basileia baita durua dalana na, Keriso tadikakana tanobada ai baita durudia Basileia sivaraina namona na gabu iboudiai lalodiai baita harorolaia.—Mat. 24:14; 25:40.

9. Dahaka dainai ta dibamu Iehova ese ena ura taunimanima ediai na baine haḡuḡurua?

⁹ Iesu ena hereva, “emu ura ḡauna . . . baine vara,” anina be dahaka? Iehova na ḡau iboudiai Ihavaradia Tauna. Una dainai e gwauraimu herevadia iboudiai anidia na e varamu. (Isa. 55:11) Ia ese Satana na basine rakatania Iena ura taunimanima ediai baine hadikaia totona. Matamana amo, Iehova ena ura na, Adam bona Heva natudia ḡoevadaedia ese tanobada bae hahonua. (Gen. 1:28) Bema Adam bona Heva na asi natudia ai bema mase, Dirava ena ura, idia natudia ese tanobada bae hahonua urana, na basinema vara. Una dainai, Adam bona Heva e kara dika murinai, Iehova ese se koudia natudia bae havara. Mauri davana ihenina karana amo, Dirava ese dala e kehoa abidadama taudia iboudiai na bae ḡoevadae bona bae mauri hanaihanai diba. Iehova ese taunimanima na e lalokau henidiamu, bona e uramu kamonai taudia na iena ura heḡereḡerena ai bae mauri.

10. Mauri davana ihenina karana ese mase taudia be ede baine durudia toma?

¹⁰ To Iehova asie dibaia bona asie hesiai henia bena e mase taudia milioni momo be ede heto? Mauri davana ihenina karana dainai mase taudia na do bae toreisi lou. Tamada lalokauna guba ai e nohomu ese baine hamauridia lou bona idia na iena ura bae dibaia bona mauri hanaihanai bae abia. (Kara 24:15) Iehova na e uramu taunimanima na bae mauri, dia bae mase. Ia na mauri Badina dainai, bae toreisi lou taudia iboudiai Tamadia ai bainela. (Sal. 36:9) Una dainai, Iesu ena hereva na maoro, e hadibada ini baita ḡuriḡuri toma: “Tamamai e, guba ai o nohomu.” (Mat. 6:9) Iehova ese Iesu na ḡaukara badana e henia mase taudia baine hatoredia isi lou. (Ioa. 6:40, 44) Paradaiso ai, Iesu ese ena ḡaukara baine karaia, eto: “Tore-isi-lou be lau; mauri danu lau.”—Ioa. 11:25.

11. Dirava ena ura “hutuma bada-herea” taudia ediai be dahaka?

¹¹ Iehova ena hariharibada karana na dia taunimanima haida ese mo bae abia, badina Iesu na eto: “Dirava ena ura e karamu taudia, idia hari tadigu, bona taihugu, bona sinagu.” (Mar. 3:35) Dirava na e uramu  bese, iduhu, bona gado idauidau taudia “hutuma bada-herea” na Ia itomadiho henina taudia ai baela. Keriso ena mauri davana ihenina karana bae abidadama henia bona Dirava ena ura bae karaia taudia na bae boi, baeto: “Hahemauri na iseda Dirava, terono ai e helaimu Diravana, bona Mamoe Natuna, ediai.”—Apok 7:9, 10.

12. Edena dalai Iesu ese e hahedibalaia ḡuriḡurina ai Iehova ena ura kamonai taudia ediai e hahedinaraia?

¹² Iehova ena ura Ia e kamonai heniamu taudia ediai na Iesu ese e hahedibalaia ḡuriḡurina ai e hedinarai. Una ḡuriḡuri heḡereḡerena, namona na baita ḡaukara goada Iehova ladana baita hahelaḡaia bona baita hanamoa. (Isa. 8:13) Iesu ladana anina na “Iehova na Hahemauri,” bona mauri davana ihenina karana dainai hahemauri baita abi karana ese Iehova ladana baine hanamoa bona baine abia isi. Dirava ena Basileia ese kamonai taudia na mauri davana amo hahenamo baine henidia. Momokani, Iesu ese e hahedibalaia ḡuriḡurina amo ta dibamu, ḡau ta ese Dirava ena ura baine ḡuḡuru karana na basina koua diba.—Sal. 135:6; Isa. 46:9, 10.

13. Iseda bapatiso amo dahaka ta hahedinaraiamu?

¹³ Mauri davana ihenina karana baita laloa bada dalana ta na, Iehova enai eda mauri baita gwauhamatalaia bona baita bapatiso badina una mauri davana na ta abidadama heniamu. Iseda bapatiso amo ta hahedinaraiamu ‘ita na Iehova ena.’ (Roma 14:8) Una ese iseda ura, Dirava ese laloda mamina baine haḡoevaia urana, e hahedinaraiamu. (1 Pet. 3:21) Iehova ese eda ura baine haḡuḡurua totona, Iesu ese e bouboulaia rarana amo baine haḡoevada. Ta diba momokanimu, ita e gwauhamatalai henida ḡaudia iboudiai na do baine henida.—Roma 8:32.

14. Dahaka dainai dekeda taudia baita lalokau henidia na namo?

 ¹⁴ Mauri davana ihenina karana baita laloa bada dalana ma ta be dahaka? Iehova na lalokau dainai ḡau iboudiai e karamu, una dainai Ia na e uramu e tomadiho heniamu taudia ese lalokau bae hahedinaraia na ḡau badana. (1 Ioa. 4:8-11) Ta uramu baita hahedinaraia ita na ‘Tamada guba ai e nohomu natuna ai baitala,’ bema dekeda taudia baita lalokau henidia. (Mat. 5:43-48) Haheḡani ginigunana be Iehova baita lalokau henia; iharuana be dekeda taudia baita lalokau henidia. (Mat. 22:37-40) Dekeda taudia baita lalokau henidia dalana ta na, Dirava ena Basileia sivaraina namona baita harorolaia. Dekeda taudia ediai lalokau ta hahedinaraiamu neganai, ita na Dirava hairaina ta hahedinaraiamu. Danu, ita tadikakada bona ma haida baita lalokau henidiamu neganai, Dirava ilalokau henina karana na “ita laloda ai” be ḡuḡurumu.—1 Ioa. 4:12, 20.

15. (a) Hari ina negai Iehova ena amo dahaka hahenamo ta abimu? (b) Vaira negana ai dahaka hahenamo baita abimu?

¹⁵ Mauri davana baita abidadama heniamu neganai, eda dika na bae hegwautao vaitani. Baibul ese e hadibadamu, eda dika na bae “heabi oho.” (Kara 3:19-21 ba duahi.) Matamanai tame herevalaia heḡereḡerena, mauri davana ihenina karana dainai, Iehova ese ena lauma helaḡa amo e horodia taudia na natuna ai e halaodia. (Roma 8:15-17) A ita “mamoe idaudia” be, Iehova natuna ai bema halaoda totona, vaitani setifikeit ai ladada bema tore. Ita na tama ḡoevadae bona hahetoho ginigabena tama hahanaia murinai, Iehova na mai moalena ida una setifikeit bema sainia, bona ita na iena tanobada natudia ai bema halaoda. (Roma 8:20, 21; Apok. 20:7-9) Iehova ena lalokau ia natuna ediai na baine hesiriu hanaihanai. Mauri davana ihenina karana ena hahenamo danu bae mia hanaihanai. (Heb. 9:12) Una harihari ḡauna ena namo na basine ore. Tau ta eiava ḡau ta asi siahuna una hahenamo ita eda amo baine abia oho.

16. Edena dalai mauri davana ihenina karana ese vada e ruhada vaitani?

¹⁶ E helalo-kerehai bona Iehova ena ruma bese ai baela taudia na Diabolo ese basine koudia diba. Iesu na tanobada ema bona “nega tamona” mo e mase. Una dainai, mauri davana vada e heni vaitani. (Heb. 9:24-26) Una mauri davana ese Adam ena amo ta abia kara dikana na e dahua oho vaitani. Keriso ena boubou dainai, ita na Satana ese e biaguamu tanobadana ena iḡui amo vada e ruhada, bona mase garina na asita garimu.—Heb. 2:14, 15.

17. Iehova ena lalokau dainai dahaka hahenamo bavabi diba?

¹⁷ Dirava ena gwauhamata na baita abidadama henidia diba. Mauri ḡaudia daidiai e ato taravatudia na asie morumu heḡereḡerena, Iehova ese ita na basine hamoruda diba. Ia na se idaumu. (Mal. 3:6) Iehova ese ita na mauri mo se henida. Ia ese ita na e lalokau henidamu. “Dirava ese e ura henidamu vada dibada, bona ta abia daemu. Dirava na lalokau.” (1 Ioa. 4:16) Tanobada idoinai na paradaiso ai bainela, bona tanobada ai bae noho taudia iboudiai ese Dirava ena lalokau bae hahedinaraia. Namona na Dirava ena abidadama anerudia ida baitato: “Hahenamo bona hairai bona aonega bona heimodai bona hemataurai bona siahu bona goada na eda Dirava ese baine abi, harihari ela bona hanaihanai; Amen.”—Apok. 7:12.