Tadikaka ta natuna na e hemata neganai, ia na ini e gwau toma: ‘Iehova be mai dibana lau bona adavagu ese natumai ena hemata karana baia haheaukalaia diba, a? Una e vara badina be Dirava mai dibana ai na baia haheauka dibamu, a?’ O laloamu badi namona ta dainai baita abia dae eda mauri ai e varamu ḡaudia be Iehova ese e havaramu, eiava?

Paulo ena hereva 1 Korinto 10:13 ai baita laloa namonamomu neganai, ina baita dibamu: Baibul sirina ta ese na se hahedinaraia, Iehova na mai dibana ita be dahaka hedibaḡani baita haheaukalaimu bona una heḡereḡerena baita davari hedibaḡanidia e abi hidimu. Unu badi hani mani aita itadia.

Ginigunana na, Iehova ese taunimanima na ura kwalimu e henidia. Ia na e uramu ita siboda ese eda abi hidi baita kara. (Deu. 30:19, 20; Ios. 24:15) Bema dala maorona baita abia hidimu Iehova ese be hakaudamu. (Her. 16:9) To bema dala kererena baita abia hidimu, hekwakwanai baita davarimu. (Gal. 6:7) Bema Iehova ese edai bae vara hedibaḡanidia na e abi hidimu, anina be e henida ura kwalimuna be da asi anina, a?

Iharuana na, Iehova ese “e vara kavamu” ḡaudia amo ita na se gimadamu. (Koh. 9:11) Aksiden o hekwakwanai badadia na bae vara diba, badina reana ita na nega kererena ai bona gabu kererena ai nonoho. Iesu ese e vara dika badana ta e herevalaia, kohoro ta e moru neganai taunimanima 18 e mase, bona Iesu ese e hahedinaraia una dika na dia Dirava ena ura dainai e vara. (Luka 13:1-5) Una dainai basitato, dika negadia ai Dirava ese abi hidi e kara gunamu daika baine mauri bona daika baine mase.

Ihatoina na, ita ta ta ese baita hahedinaraia ita na Dirava ta badinaiamu. Baita helalotao, Satana ese Iehova ena hesiai taudia iboudiai edia abidadama karana na e hepapahuahulaia, eto hahetoho baita davarimu  neganai Iehova na basita badinaiamu. (Iobu 1:9-11; 2:4; Apok. 12:10) Bema Iehova ese ta davarimu hedibaḡanidia bema koudia badina e laloamu basita haheaukalaidia diba, una ese Satana ena hereva na be hamomokaniamu, eto ita na siboda eda ura ḡaudia iabidia totona Dirava ta hesiai heniamu.

Ihahanina na, Iehova ese edai bae vara ḡaudia iboudiai baine diba guna na asi anina. Bema baita laloamu Dirava ese edai bae vara hedibaḡanidia e abi hidi gunamu, anina na eda vaira negana na mai dibana. To Baibul na unu se gwau toma. Momokani Dirava na eda vaira negana na mai dibana. (Isa. 46:10) To Baibul ese e hahedinaraiamu Ia ese vaira negana ai bae vara ḡaudia haida na badi maorodiai e abi hidimu. (Gen. 18:20, 21; 22:12) Eda ura kwalimu na e matauraiamu dainai, Ia ese bae vara ḡaudia idibadia karana ai ena siahu na e ḡaukaralaia namonamomu. Ita na ta uramu eda ura kwalimu e laloa badamu bona e kara maoromaoromu Diravana baita badinaia, ani?—Deu. 32:4; 2 Kor. 3:17.

Edena dala ai Paulo ena hereva baita lalopararalaia diba, eto: “Dirava . . . ese baine narimui, emui goada e hereaiamu hedibaḡanina ta ese baine butumui tao na garina”? Paulo ese hedibaḡani lalodiai Iehova ese e durudamu daladia e herevalai. * Paulo ena hereva ese e hadibadamu, herevana eda mauri ai dahaka hahetoho bae vara, to bema Iehova baita abidadama henia, Ia ese baine duruda. (Sal. 55:22) Paulo na mai anina bada hereva momokanidia rua dainai una hahegoada herevana e gwauraia.

Ginigunana na, ta davarimu hedibaḡanidia na “taunimanima iboudiai ese e haheaukalai hedibaḡanidia heḡereḡeredia.” Ta davarimu hedibaḡanidia na taunimanima iboudiai ese danu e davarimu. To, Dirava enai baita tabekau neganai, hedibaḡani unu bamodia na baita hahanaidia diba. (1 Pet. 5:8, 9) Korinto Ginigunana 10:13 badina herevadia ese e hahedinaraiamu, Paulo na Israel taudia ese tano ḡaḡaena ai e davari hahetohodia e herevalai. (1 Kor. 10:13, 6-11) Abidadama Israel taudia ese unu hahetoho na bae haheaukalai diba eiava bae hahanaidia diba. Paulo na nega hani e gwa, “idia haida” na e gwau-edeede. To, Israel taudia haida na Dirava enai asie tabekau dainai ura dikadia e badina.

Iharuana na, “Dirava na momokani.” Baibul ai Dirava ese ena taunimanima e kara henidia dalana ese e hahedinaraiamu, Ia “e lalokau heniamu bona ena haheḡani e badinamu taudia” na Ia ese e lalokau henidiamu. (Deu. 7:9) Danu e hahedinaraiamu Dirava na hanaihanai ena gwauhamata e haḡuḡurudiamu. (Ios. 23:14) Dirava ese guna e kara ḡaudia sivaraidia ese e hahedinaraimu, Ia e lalokau heniamu bona e badinaiamu taudia na e diba momokanimu, hedibaḡani negadia ai, Dirava ese ini baine kara diba: (1) Ia ese baine durudia edia goada e hereaiamu hedibaḡanidia bae haheaukalaidia, bona (2) ‘edia roho mauri dalana baine henidia.’

Iehova enai e tabekaumu taudia na hedibaḡani e davarimu negadiai, edena dalai Ia ese edia roho mauri dalana e kehoamu? Momokani, bema Iehova baine ura, hedibaḡani na baine kokia diba. To Paulo ena hereva ba laloa lou, eto: “Ia [Iehova] ese emui roho mauri dalana baine henimui, bena ba haheaukalaia diba.” Una dainai nega momo Dirava ese heduru ḡaudia e henidamu karana amo eda “roho mauri dalana” e kehoamu, unu amo hedibaḡani baita haheaukalai diba. Iehova ese baine duruda daladia haida mani aita herevalaidia:

• ‘Eda hisihisi iboudiai lalodiai ia ese tauda e halodiamu.’ (2 Kor. 1:3, 4) Iehova ese ena Hereva, ena lauma helaḡa bona hesiai tauna mai ena kamonai amo e henimu lauma aniani ese darada, kudouda, bona eda hemami baine hanamodia diba.—Mat. 24:45; Ioa. 14:16; Roma 15:4.

• Ia ese ena lauma helaḡa amo baine hakauda diba. (Ioa. 14:26) Hedibaḡani bae vara negadia ai, iena lauma helaḡa ese baine duruda, Baibul sivaraidia bona hahekau herevadia baita lalodiatao bena abi hidi maorodia baita kara.

• Ena aneru baine ḡaukaralaidia ita baine duruda.—Heb. 1:14.

• Ia ese tadikaka taihu baine ḡaukaralaidia edia hereva bona kara amo bae “hagoadada” diba.—Kol. 4:11, NWT.

Korinto Ginigunana 10:13 ai, Paulo ena hereva anina be dahaka? Iehova ese ta davarimu hedibaḡanidia na se abi hidimu. To eda mauri ai hedibaḡani bae vara neganai, ina baita diba na namo: Bema Iehova baita abidadama henia momokanimu, be durudamu eda goada e hereaiamu hedibaḡanidia ese basie hamanokada; Ia ese hanaihanai eda roho mauri dalana baine kehoa, unu amo hedibaḡani baita haheaukalaidia diba. Una na hahegoada herevana, ani?