1, 2. Tadikaka ta be dahaka e lalopararalaia, bona dahaka e kara?

ROBERT na laḡanina 15 ai e bapatiso, to hereva momokani na se laloa badava. Ia na eto: “Lau na kerere ta asina karaia, to na mamiava egu hesiai ḡaukara na dia mai kudougu idoinai ida na karaiava. Toana na lauma dalana ai na goadava, badina hebou iboudiai na laova bona laḡani ta lalonai nega haida na heduru painiava. To egu mauri ai ḡau ta na na reaiava.”

² Robert ese una na se lalopararalaia ela bona e headava murinai e diba. Nega haida, ia bona adavana na Baibul topik haida e henanadailai heheniva. Ia adavana na Baibul mai dibana namonamo dainai unu henanadai na e haerelaiva, to Robert na e hemaraiva badina henanadai haeredia na asi dibana. Ia na eto: “Toana na lau na ḡau ta asi dibagu. Ini na lalo toma, ‘Bema lau na ruma bese kwarana, namona na kara ta baina karaia.’” Bona Robert na unu e kara toma. Ia na eto: “Baibul na stadilaia loulou neganai, hereva momokani na lalopararalaia namonamo. Bona mai anina bada ḡauna na, egu hetura karana Iehova ida na hagoadaia.”

3. (a) Robert ena ekspiriens amo dahaka baita dibamu? (b) Ededia henanadai badadia baita herevalaimu?

³ Robert ena ekspiriens amo mai anina bada ḡaudia baita dibamu. Reana ita na Baibul ena hereva haida ta lalopararalaimu bona Kristen kongrigeisen ta bamoa hanaihanaimu, to unu ese na se hahedinaraimu ita na lo Kristen tauda ai vada tala. Eiava reana  vada ta goadamu, to bema siboda eda kara baita haeromu neganai, baita dibamu lauma dalana ai ḡau haida na dounu baita hanamodia. (Fili. 3:16) Lauma dalana ai dounu baita goada totona, ina stadi ai henanadai badadia toi baita haerelaimu: (1) Dahaka ese baine duruda diba unu amo baita diba lauma dalana ai ta goadamu eiava lasi? (2) Edena dala ai lauma ḡaudia baita lalo bada bona lo Kristen taudia ai baitala? (3) Edena dala ai lauma dalana ai baita goada karana ese dina ta ta ai eda mauri baine durua diba?

4. Daidia ese Efeso 4:23, 24 ena sisiba bae badinaia na namo?

⁴ Dirava ta hesiai henia matama neganai, eda mauri lalonai ḡau momo ta haidau. Bona ta bapatiso murinai dounu ḡau haida na ta haidaumu. Baibul na e gwaumu, ‘darada baita hamatamata’ hanaihanai na namo. (Efe. 4:23, 24) Ita na dia ḡoevadae tauda dainai, eda mauri ai ḡau haida na dounu baita haidau na namo. Laḡani momo lalodiai Iehova e hesiai henia taudia danu lauma dalana ai dounu bae goada na namo.​—Fili. 3:12, 13.

5. Ededia henanadai ese be durudamu siboda eda kara baita haerodia totona?

⁵ Lauma dalana ai baita goada totona, mai momokanida ida siboda eda kara baita haeroa na namo. Herevana ita na eregabe eiava buruka, to siboda baita henanadai diba: ‘Egu mauri ai ḡau haida na haidaumu lauma dalana ai dounu baina goada totona, a? Lau be Keriso na tohotohoamu, a? Kristen heboudia ai egu kara ese e hahedinaraiamu lau be goada lauma dalanai, a? Na herevalaimu ḡaudia ese dahaka e hahedinaraimu? Egu stadi karana, dabua bona heḡoeva daladia, eiava sisiba na lalodiamu dalana ese dahaka e hahedinaraiamu? Hedibaḡani negadia ai dahaka na karamu? Lau be na hekwarahimu lo Kristen tauna ta ai bainala, a?’ (Efe. 4:13) Unu henanadai haeredia baita lalodiamu karana ese be durudamu lauma dalana ai baita goada totona.

6. Dahaka baita kara na namo, unu amo baita diba lauma dalana ai ta goadamu eiava lasi?

⁶ Nega haida ma haida edia amo heduru baita tahu na namo, unu amo baita diba ita be lauma dalana ai ta goadamu eiava lasi. Aposetolo Paulo ese e hahedinaraia tauani ḡaudia e lalo badamu tauna na se dibamu ia na Dirava vairanai kara kereredia e karamu. To, lauma ḡaudia e lalo badamu tauna ese Dirava ena lalohadai e lalopararalaiamu bona tauani ḡaudia e lalo badamu tauna ena kerere danu e dibamu. (1 Kor. 2:14-16; 3:1-3) Elda taudia na Keriso darana o ena lalohadai e badinaiamu dainai, tauani ena ura e badinaiamu tauna ena kara e itaiamu bona e duruamu. Bema eda kara ta dainai e sisiba henidamu, edia sisiba be ta abi daemu bona ta badinamu, a? Unu baita kara tomamu neganai, baita hamomokaniamu ita na ta uramu lauma dalana ai baita goada.​— Koh. 7:5, 9.

7. Dahaka dainai lauma ḡaudia baita lalodia bada totona Baibul baita dibaia mo na dia heḡereḡere?

⁷ Ba helalotao, lauma ḡaudia baita lalodia bada totona Baibul ena diba baita abia mo na dia heḡereḡere. King Solomon ese Iehova ena dala na e dibadia namonamo. Ena hereva na gabeai Baibul kahana ta ai ela. To gabeai, ia ese Iehova na se badinaia. (1 Han. 4:29, 30; 11:4-6) Una dainai, dia Baibul ena diba mo baita abia, to dahaka danu baita kara na namo? Namona na nega iboudiai eda abidadama baita hagoadaia. (Kol. 2:6, 7) To edena dala ai unu baita kara toma?

8, 9. (a) Dahaka ese baine duruda eda abidadama baita hagoadaia totona? (b) Dahaka dainai baita stadi bona baita lalo dobu? (Rau 23 ai laulau ba itaia.)

⁸ Paulo ese Kristen ginigunadia e hagoadadia bae hekwarahi “lo taudia ai” baela. (Heb. 6:1, NWT) Hari ina negai Paulo ena sisiba  baita badinaia totona, dahaka baita kara diba? Mai anina bada ḡauna ta na, “Keep Yourselves in God’s Love” bukana baita stadilaia. Una buka bo stadilaia oremu neganai be durumumu, emu mauri lalonai Baibul ena hahekau herevadia ibadinadia daladia bo lalopararalaimu. Bema una buka na vada o stadilaia ore, emu abidadama ihagoadana bukadia ma haida ba stadilai na namo. (Kol. 1:23) O stadilaimu ḡaudia ba badinadia daladia o lalodia dobumu, a?

⁹ Ba helalotao, ta stadimu bona ta lalo dobumu neganai, namona na Iehova ihamoalena urana bona ena taravatu ibadinadia karana baita habadaia. (Sal. 40:8; 119:97) Danu, baita ḡaukara goada eda abidadama bae hadikaia ḡaudia baita dadaraidia.​— Tito 2:11, 12.

10. Memero kekeni be dahaka bae kara diba lauma dalana ai dounu bae goada totona?

¹⁰ Bema oi na mero eiava kekeni, lauma ḡaudia o tahumu, a? Betele tadikakana ta na seket heboudia e laomu neganai, program do se hematama ai nega momo bapatiso bae abi taudia ida e herevaherevamu. Unu bapatiso bae abi taudia momo na memero kekeni. Tadikaka ese e nanadaidia dahaka hesiai ḡaukaradia e uramu bae kara. Momo edia haere ese e hahedinaraiamu Iehova ena hesiai ḡaukara lalonai e uramu bae kara ḡaudia na vada e lalohadailai​— reana ful-taim hesiai ḡaukaradia eiava pablisa dia momo gabudia ai hesiai ḡaukara bae kara. To, memero kekeni ma haida na asi dibadia haere be ede bae heni toma. Una anina be idia ese hesiai ḡaukara ai bae kara ḡaudia be do asie lalodia, a? Bema oi na mero eiava kekeni matamata, sibomu ba henanadai: ‘Lau be tamagu sinagu edia ura dainai hesiai ḡaukara na karamu, a? Egu hetura karana Dirava ida na hagoadaiamu, a?’ Momokani, dia memero kekeni sibodia mo lauma ḡaudia itahudia karana bae atoa guna. To, ita iboudai unu baita kara tomamu neganai, lauma dalanai baita goadamu.​— Koh. 12:1, 13.

11. (a) Lo Kristen taudia ai baitala totona dahaka baita kara namo? (b) Baibul ai daika ena haheitalai baita tohotohoa diba?

¹¹ Bema ta dibamu eda mauri ai ḡau haida baita hanamo, baita haidaudia haraḡa na namo. Lauma dalana ai dounu baita goada na mai anina bada. Bema unu basita kara tomamu, baita mase dibamu. (Roma 8:6-8) To, lo Kristen taudia ai baitala anina na dia baita ḡoevadae. Iehova ena lauma helaḡa ese be durudamu lo taudia ai baitala totona. To una baine vara totona, baita hekwarahi na namo. John Barr, Gavanin Bodi ena memba ta, na laḡani haida gunadiai Luka 13:24 e herevalaia neganai, eto: “Momo na e morumu badina asie hekwarahimu bae goada totona.” Namona na Iakob bamona baita kara, ia na aneru ida e goada helulu bona se hesiku ela bona hahenamo e abi. (Gen. 32:26-28) Ena be Baibul istadilaina karana na baita moalelaiamu, to basita laloa Baibul na buka ma ta heḡereḡerena baita duahia. Namona na baita ḡaukara goada Baibul ena hereva momokani baita diba namonamo.

12, 13. (a) Dahaka ese baine duruda 1 Korinto 2:16 ena hereva baita badinaia? (b) Edena dala ai aposetolo Petro ena haheitalai bona sisiba ese e durudamu? (c) Dahaka ba kara diba lauma dalana ai dounu ba goada? (Maua ladana “ Lauma Dalana ai Ba Goada Daladia Haida,” ba itaia.)

¹² Lauma dalanai dounu baita goadamu neganai, lauma helaḡa ese be durudamu eda lalohadai baita haidaua totona. Lauma helaḡa ena heduru amo, taina ruana Keriso darana eiava ena lalohadai baita abia matamamu. (1 Kor. 2:16) Danu, be durudamu tauanida ena ura baita dadarai vaitanimu bona Dirava ese e moalelaimu karadia baita hahedinaraimu. (Gal. 5:16, 22, 23) Bema ta dibamu ita na kohu bona moni eiava ura dikadia ta lalohadailaimu, namona na basita hesiku. Iehova ena lauma helaḡa ena heduru  baita noia, baine duruda eda lalohadai dalana baita haidaua bona ḡau namodia baita lalo. (Luka 11:13) Aposetolo Petro baita laloa. Nega haida ena mauri lalonai, Keriso ena lalohadai dalana na se badinaiava. (Mat. 16:22, 23; Luka 22:34, 54-62; Gal. 2:11-14) To se hesiku. Iehova ena heduru amo, Petro na taina ruana Keriso ena lalohadai heḡereḡerena e lalova. Ita danu unu baita kara toma.

¹³ Gabeai, Petro ese baita kara ḡaudia haida e gwaurai hedinarai. (2 Petro 1:5-8 ba duahi.) Bema baita ḡaukara goadamu haheauka, boga-auka, bona tadikaka iura-henidia karadia baita hahedinaraimu, una ese be durudamu lauma dalanai baita goadamu. Dina ta ta ai, siboda baita henanadai, ‘Hari dina ai edena kara baina hahedinaraia unu amo lauma dalanai ai dounu baina goada?’

14. Edena dala ai lauma ḡaudia baita lalodia bada karana ese eda mauri baine durua?

¹⁴ Keriso ena lalohadai ese be durudamu hereva namodia baita gwauraimu, ḡaukara gabudiai eiava sikuli ai kara namodia baita hahedinaraimu, bona dina ta ta ai abi hidi maorodia baita karamu. Eda abi hidi ese be hahedinaraimu ita na ta uramu Keriso baita badinaia. Ita na lauma ḡaudia ta lalo badamu tauda dainai, asita uramu ḡau ta ese eda hetura karana Dirava ida baine hadikaia. Hedibaḡani ta davarimu neganai, Keriso ena lalohadai ese be durudamu hedibaḡani baita dadaraia totona. Abi hidi ta karamu neganai, ini henanadai baita haerodia: ‘Edena hahekau herevadia Baibul ai ese bae durugu abi hidi baina kara? Nega ini bamodia ai Keriso be dahaka bema kara? Edena abi hidi ese Iehova baine hamoalea?’ Unu baita haerodia totona, mani haheitalai haida aita lalodia. Unu haheitalai ta ta amo baita dibamu Baibul ena hahekau herevana ese baine duruda abi hidi maorona baita karaia diba.

15, 16. Edena dala ai Keriso ena lalohadai bavabia karana ese baine durumu (a) ba adavaia tauna o hahinena o abia hidimu neganai? (b) Bamomu o abidia hidimu neganai?

¹⁵ Ba adavaia tauna o hahinena o abia hidimu neganai. Baibul ena hahekau herevana na 2 Korinto 6:14, 15 ai. (Ba duahia.) Paulo ena hereva ese e hahedinaraiamu lauma ḡaudia e lalo badamu tauna bona tauani ḡaudia e lalo badamu tauna na basie hebamo diba. O uramu ba adavaia tauna o hahinena o abia hidimu neganai, edena dala ai una hahekau herevana ba badinaia diba?

¹⁶ Hebamo karadia. Mani Baibul ena hahekau herevana 1 Korinto 15:33 ai a laloa. (Ba duahia.) Lauma ḡaudia e lalo badamu tauna ese ena abidadama bae hadikaia diba taudia na basine bamodia. Ededia henanadai ese bae durumu diba una hahekau herevana ba badinaia totona? Heḡereḡere, Intanet o ḡaukaralaiamu neganai edena dala ai una hahekau herevana ba badinaia? Eiava dahaka ba kara na namo bema asi dibamu tauna ta ese baine boirimu Intanet ai game ba gadaralai?

17-19. Edena dala ai lauma ḡaudia ilalodia karana ese baine durumu (a) kara asi anidia ba dadarai? (b) Dirava ihesiai henina karadia bavato guna? (c) hepapahuahu ba hamaoromaoro?

¹⁷ Emu hetura karana Dirava ida baine hadikaia  karadia. Paulo ese Kristen taudia na hahediba herevana ta e henidia. (Heberu 6:1 ba duahia.) Ededia “kara asi anidia” baita dadaraidia na namo? Unu na lauma dalana ai basie hagoadada diba karadia. Una hahekau herevana ese baine duruda eda mauri ai ta lalomu henanadaidia momo baita diba totona, heḡereḡere: ‘Ina kara be tauani ḡaudia ilalodia bada karana ta, a? Ina bisnes lalonai baina vareai be namo, eiava? Dahaka dainai tanobada maurina e uramu bae hanamoa oreadia ai basina vareai?’

¹⁸ Dirava ihesiai henina karadia. Iesu ese Ororo Harorona ai eda mauri ai baita ato guna hesiai ḡaukaradia e herevalai. (Mat. 6:33) Lauma ḡaudia e lalo badamu tauna na ena mauri lalonai Basileia e atoa gunamu. Una hahekau herevana baita laloataomu karana ese be durudamu ini henanadai baita haerelaimu: ‘Edukeisen badana baina tahua be namo, a? Moni ḡaukara ta baina abia dae be namo, eiava?’

¹⁹ Hepapahuahu. Paulo ese Roma kongrigeisen e henidia sisibana ese ita be edena dala ai e durudamu? (Roma 12:18) Ita na Keriso ta badinaiamu dainai, baita ḡaukara goada “taunimanima iboudiai ida” maino ai baita noho. Hapapahuahu e varamu neganai, ita be dahaka ta karamu? Ma ta ena lalohadai baita abia dae be auka, a? Eiava momo mai dibadia ita na ‘herohemaino tauda,’ a?​— Iak. 3:18.

20. Dahaka dainai o uramu lauma dalana ai ba goada?

²⁰ Ini haheitalai ese e hahedinaraimu, Dirava ena hahekau herevadia ese bae duruda diba lauma ḡaudia baita lalodia bada bona abi hidi maorodia baita kara. Unu baita kara tomamu neganai eda mauri baita moalelaiamu. Robert, paragraf matamana ai e herevalaia tauna, na eto: “Egu hetura karana Iehova ida na hagoadaia neganai, lau na tau namona ai nala. Bona na moaleva.” Bema baita ḡaukara goadamu lauma dalana ai baita goadamu, ita danu hahenamo momo baita moalelaimu. Lauma ḡaudia ta lalo badamu dainai, hari ina negai bona vaira negana ai “mauri korikori” baita moalelaiamu.​—1 Tim. 6:19.