TAUNIMANIMA na e uramu edia mauri bae moalelaia. To ini dina gabedia ai, hekwakwanai momo e davarimu. (2 Tim. 3:1) Hahemaoro kereredia, gorere, moni ḡaukara lasi, lalohisihisi, eiava lalohekwarahi bona hisihisi e havaramu ḡaudia daidiai haida na asie moalemu. Dirava ena hesiai taudia danu bae lalomanoka diba bona basie moale. Bema emu ai una na e vara, edena dala ai ba moale lou diba?

Una henanadai ihaerelaina totona, namona na moale korikori anina baita lalopararalaia, bona edena dala ai haida na doini e moalemu ena be hekwakwanai e davarimu. Una murinai, baita itaiamu dahaka baita kara diba unu amo eda moale baita habadaia.

Moale na dia ta lalona e namomu eiava e kirimu karana. Ini baita haheitalaia toma: Kekero muramurana e inua momomu tauna na be kiri kava kiri kavamu. To, be sobamu neganai, ia na basine kirimu, bona ena mauri ai e davarimu hisihisidia bona hekwakwanaidia ma be lalomu. Iena moale na nega sisina mo bona una na dia moale korikorina.​— Her. 14:13.

To, moale na kudouda ai e miamu hemami goadana ta. Ia anina na “ta ese ḡau namona ta e abiamu eiava e uramu baine abia” neganai e mamiamu hemami namona. Moale na nega namodia ai eiava nega dikadia ai ta nohomu neganai baita hahedinaraia karana. (1 Tes. 1:6) Danu, ena be ta na ḡau ta dainai baine lalohisihisi diba to dounu baine moale. Heḡereḡere, aposetolo taudia na e dadabadia badina Keriso sivaraina e harorolaiava. To, idia na “kaunsil e rakatania mai moaledia ida, badina be Iesu ladana bagunai hisi e ani.” (Kara 5:41) Oibe, idia na dia e dadabadia dainai e moale. To idia na Dirava ena hesiai taudia dainai, Ia e badinaia karana amo moale korikori e davaria.

Moale na dia ta varalaia, eiava se vara kavamu. Dahaka dainai? Badina moale korikorina na Dirava ena lauma helaḡa huahuana ta. Dirava ena lauma helaḡa ena heduru amo “tau matamatana,” moale danu, baita hahedinaraia diba. (Efe. 4:24; Gal. 5:22) Danu, baita moalemu neganai, ta davarimu hekwakwanaidia na baita haheaukalaidia dibamu.

Iehova ena ura na tanobada ai ḡau namodia bae vara, dia ḡau dikadia. To, taunimanima edia kara dikadia ese Iehova ena moale na asie hadikaiamu. Baibul na e gwaumu: “Goada bona moale na ena gabu ai.” (1 Sis. 16:27) Danu, Iehova ena hesiai taudia ese e haḡuḡurumu ḡau namodia ese Ia kudouna na ‘e hamoaleamu.’​— Her. 27:11.

Bema ḡau haida na eda ura dalanai se varamu neganai basita lalohekwarahi, to Iehova baita tohotohoa. Dia namo baita lalohisihisi, to hari ta davarimu ḡau namodia baita lalodia bada bona vaira negana ai bae vara ḡau namodia  daidiai mai haheaukada ida baita nari. *

Danu, Baibul ese e herevalaidia taudia momo na hekwakwanai e davari to dounu e moaleva. Idia ta na Abraham, ia na mokona ena mauri e haboioa bona ma haida ese e hahisia. (Gen. 12:10-20; 14:8-16; 16:4, 5; 20:1-18; 21:8, 9) Ena be Abraham na unu hekwakwanai e davari, to dounu e moaleva. Edena dala ai unu e kara toma? Ia ese Mesia ena lohia henunai tanobada matamatana ai baine mauri hanaihanai helarona e laloava. (Gen. 22:15-18; Heb. 11:10) Iesu na eto: “Tamamui Abraham na e ura dikadikava lauegu nega baine itaia.” (Ioa. 8:56) Abraham heḡereḡerena, vaira negana ai baita abiamu moalena baita laloa na namo.​— Roma 8:21.

Abraham heḡereḡerena, aposetolo Paulo bona bamona Sila ese Dirava ena gwauhamata na e lalodia bada. Edia abidadama na goada, bona ena be hekwakwanai momo e davari to dounu e moaleva. Heḡereḡere, e dadabadia dikadika bona dibura rumana ai e atodia neganai, “malokihi ai, [idia na] e ḡuriḡuriva bona Dirava ihanamolaina anedia e abiva.” (Kara 16:23-25) Paulo bona Sila na edia helaro ese mo se hagoadadia, to danu e moale badina Keriso ladana dainai hisi e ani. Paulo bona Sila heḡereḡeredia, mai eda abidadama ida Dirava ta hesiai heniamu karana amo e varamu ḡau namodia baita lalodia bada.​— Fili. 1:12-14.

Hari ina negai, eda tadikaka bona taihu momo na hekwakwanai momo e davarimu to dounu e moalemu. Heḡereḡere, November 2013, Philippines ai lai gubana (Super Typhoon Haiyan) e vara neganai, Witnes ruma besedia 1,000 mai kahana edia ruma e hadika. George, Tacloban hanuana ai lai gubana ese ena ruma e hadikaia tauna, na ini e gwau toma: “Ena be una e vara, to tadikaka na e moalemu. A mamia moalena iherevalaina na auka.” Bema Iehova ese ita daidai e kara ḡaudia baita haerodia namonamomu neganai, ena be hekwakwanai baita davarimu to dounu baita moalemu. Baita moale totona Iehova be dahaka ḡau ma haida e henida?

Ta moalemu badina badana na ita na Dirava ida ta heturamu. Mani ina aita laloa: Ḡau iboudiai e lohiadiamu Diravana na mai dibada. Ia na Tamada, eda Dirava, bona Turada!​— Sal. 71:17, 18.

Danu, ta moalemu badina Ia ese mauri bona diba e henida baita moale totona. (Koh. 3:12, 13) Ita na Iehova ese e boirida dainai, iena ura ita edai ta lalopararalaiamu. (Kol. 1:9, 10) Una dainai, eda mauri na mai anina bada bona eda mauri ai baita kara ḡaudia na mai dibada. To, taunimanima momo ese mauri anina na asie lalopararalaiamu. Paulo ese una na ini e herevalaia toma: “Mata ta se ita bona taia ta se kamonai ḡaudia, tau ta lalona ese se lalo-hadailai ḡaudia, Dirava ese vada e abi heḡaeḡae, e lalokau heniamu taudia edia. A Dirava ese ia Laumana ena amo ini ḡau vada e hahedinarai henida.” (1 Kor. 2:9, 10) Iehova ena ura ta lalopararalaiamu dainai baita moale na namo.

Iehova ese ena taunimanima daidiai e kara ḡaudia ma haida aita lalo. Ta moalemu badina Ia ese eda dika na baine gwautao diba. (1 Ioa. 2:12) Dirava ena hebogahisi dainai, tanobada matamatana ai mauri hanaihanai baita abiamu, una na kahirakahira be varamu. (Roma 12:12) Hari danu, Iehova ese tura namodia e henida unu amo Ia baita tomadiho henia. (Sal. 133:1) Danu, Dirava ena Hereva ese e hadibadamu Iehova ese ena taunimanima na e gimadiamu Satana bona ena demoni ese basie hakaudia kerere helaoreana. (Sal. 91:11) Dirava ena amo unu hahenamo e maimu ḡaudia baita haerodiamu neganai, eda moale na be bada hereamu.​— Fili. 4:4.

E moalemu Kristen tauna ese ena moale baine habadaia diba, a? Iesu na eto: “Ini na hereva henimui tomamu, egu moale na lalomui ai baine mia bena emui moale baine ḡuḡuru helaoreana.” (Ioa. 15:11) Una ese e hahedinaraiamu eda moale na baita habadaia diba. Eda moale baita habadaia karana na lahi ta e habadaiamu karana ida baita haheḡereḡerea diba. Lahi hururuna ba habadaia totona au momo ba raku na namo. Una heḡereḡerena, emu moale ba habadaia totona emu lauma dalana ba hagoadaia na namo. Ba helalotao: Moale na Dirava ena lauma helaḡa amo e varamu. Una dainai, hanaihanai Iehova ena lauma ena heduru bo noiamu bona ena lauma helaḡa amo e havaraia Herevana bo laloa dobumu neganai, emu moale bo habadaiamu.​— Sal. 1:1, 2; Luka 11:13.

Danu, Iehova e hamoaleamu ḡaukaradia bo karamu neganai emu moale bo habadaiamu. (Sal. 35:27; 112:1) Dahaka dainai? Badina Baibul na e gwaumu: “Dirava garina ba gari, bona ena haheḡani ba badinadia; badina be una na taunimanima ena kara korikori idoinai.” (Koh. 12:13) Dirava ese ita e karada na iena ura baita karaia. Una dainai Iehova ta hesiai heniamu neganai, eda mauri baita moalelaiamu. *

Eda moale baita habadaiamu neganai, hahenamo momo baita davarimu. Heḡereḡere, Tamada guba ai na be moalemu bema ita na mai moaleda ida Ia baita hesiai heniamu ena be hekwakwanai baita davari. (Deu. 16:15; 1 Tes. 5:16-18) Danu, moale korikorina baita abiamu neganai, kohu bona moni momo itahuna karana baita dadaraiamu bona Dirava ena Basileia dainai eda ura ḡaudia haida baita dadaraimu. (Mat. 13:44) Unu edia namo baita itamu neganai, eda moale na be badamu, laloda na be namomu, bona ma haida baita hamoalediamu.​— Kara 20:35; Fili. 1:3-5.

United States ai, Nebraska ena iunivesiti ai helt e stadilaiamu tauna ta na ini e gwau toma: “Bema hari oi na o moalemu eiava emu mauri o moalelaiamu, vaira negana ai basio gorere momomu.” Una hereva ese Baibul ena hereva e hamomokaniamu, e tomu: “Lalo-moale na muramura namona.” (Her. 17:22) Oibe, emu moale bo habadaiamu neganai, basio gorere momomu.

Una dainai, ena be lalometau negana lalonai ta nohomu, to ḡuriḡuri karana, stadi, bona Iehova ena Hereva ihaerona karadia amo lauma helaḡa baita abiamu neganai moale korikorina baita abia dibamu. Danu, eda moale baita habadaiamu bema hari ta abimu hahenamodia baita lalodiamu, abidadama taudia edia haheitalai baita tohotohomu, bona Dirava ena ura ikarana daladia baita tahumu. Unu dala amo ita ese Salamo 64:10 ena hereva baita hamomokaniamu, e tomu: “Kara maoromaoro taudia ese Iehova bae moalelaia, ienai bae roho mauri.”