Laḡani 1913 ai, tamagu John Mills na laḡanina 25 ai New York City ai e bapatiso. Tadikaka Russell ese bapatiso tok e heni. Se daudau, Tamagu na Trinidad ela, unuseniai ia ese Constance Farmer, Baibul Stiuden goadana ta, e adavaia. Tamagu ese turana William R. Brown e duruava “Photo-Drama of Creation” bae hahedinaraia. Idia na unu e kara toma ela bona laḡani 1923 ai Brown bona adavana na e siaidia West Africa ela. Tamagu bona Sinagu​—guba helarona e abia taudia​—na dounu Trinidad ai Iehova e hesiai heniava.

Tamagu bona sinagu natudia na 9, mero roboana ladana na Rutherford, ia na Watch Tower Bible and Tract Society ena presiden ginigunana e nemaia. Lau be December 30, 1922 ai na vara, bona Clayton J. Woodworth, The Golden Age (hari Awake!) ena editor na nemaia. Tamamai sinamai ese ai na sikuli ai e atomai, to e hagoadamaiva Iehova ena hesiai ḡaukara ai tahua ḡaudia baia ato. Sinagu na Buka Helaḡa ai siri anidia e herevalai ḡoevaḡoevava. Tamagu na mai moalena ida Baibul sivaraidia e hamaorolaimaiva, ia ese imana bona tauanina e ḡaukaralaiva daladia amo e durumaiva unu sivarai na lalomai ai baia piksadia.

Edia hekwarahi ese huahua namona e havaraia. Memero 5 amo ai tatoi na Gilead Sikuli ala. Taihumai tatoi na Trinidad bona Tobago ai laḡani momo e painia. Tamamai sinamai edia hahediba bona haheitalai namodia ese ai natu na vaitani “Iehova ena ruma ai” e hadomai. Edia hahegoada herevadia ese e durumai dainai unuseniai a noho bona ai na vaitani “Dirava ena ikoukou ai” a tubu.​—Sal. 92:13.

Haroro ḡaukara na emai ruma ai e heḡaeḡaelaiva. Painia taudia e hebouva bona nega  momo Tadikaka George Young e herevalaiava, ia na Canada tauna bona Trinidad ai e misinariva. Tamagu bona sinagu na mai moaledia ida tadikaka Brown bona adavana edia sivarai e herevalaiva, idia na West Africa ai e nohova. Unu ese e hagoadagu dainai laḡanigu 10 ai haroro ḡaukara na hamatamaia.

Unu negadiai eda magasin ese tomadiho koikoi, mataḡaniḡani bisnes oreadia, bona politikol edia koikoi karadia e hahedinarai ḡoevaḡoevava. Una dainai, laḡani 1936 ai dubu igunalaina taudia ese Trinidad ena gavana ta lalona e ania Watch Tower pablikeisen iboudiai bae taravatudia. Ai ese pablikeisen na a hunidia to a hariharilaidia ela bona e ore. Ai ese bodi mai toretoredia (o placards) a hua loaloava bona baskele amo pepapepa a hariharilaiva. Emai grup na Tunapuna taonina amo ema sound-car grup ida Trinidad ena gunika gabudiai a harorova. A moale dikadika! Unu hesiai ḡaukaradia ese hagoadagu dainai laḡanigu 16 ai na bapatiso.

Tamagu sinagu ese e hadibagu ḡaudia bona na karava hesiai ḡaukaradia ese e durugu dainai na urava misinari ta ai bainala. Laḡani 1944 ai, Aruba nala bona Tadikaka Edmund W. Cummings ida na ḡaukara hebou neganai, misinari urana na e goada. A moale badina laḡani 1945 ai taunimanima 10 a boiridia Memorial ema. Murina laḡanina ai, una motumotu ai kongrigeisin ginigunana e hematama.

Se daudau, guna a ḡaukara hebouva hahinena ta, Oris Williams, na haroro henia. Oris ese guna e diba hahediba herevadia na e badinadia aukava. To, Baibul e stadilaia neganai, e diba Dirava ena Hereva na momokani, una dainai January 5, 1947 ai e bapatiso. Gabeai, a heura heheni bona a headava. Oris na November 1950 ai e painia matama. Lau bona Oris ese emai mauri na a moalelaia.

Laḡani 1955 ai, e boirimai Gilead Sikuli baiala. Una sikuli baiala totona, lau bona Oris na emai moni ḡaukara amo a risain, emai ruma bona kohu haida a hoihoilai, bena Aruba a rakatania. July 29, 1956 ai, Gilead klas namba 27 amo a gradueit, bona e siaimai Nigeria baiala.

Oris na una nega e laloa lou neganai, e gwa: “Iehova ena lauma ese ta baine durua diba misinari ḡaukara lalonai bae vara hekwakwanai idauidau baine haheaukalaidia. Egu ura ḡauna na dia adavagu ena heḡereḡerena, iena ura be misinari ḡaukarana baine karaia. A egu ura na ruma ai baina noho bona natumai baina naridia. To na laloparara sivarai namona iharorolaina ḡaukarana na mai anina bada, una dainai egu lalohadai na haidaua. Gilead amo a gradueit neganai, lau na da heḡaeḡae misinari ḡaukara baina karaia. Kada ladana Queen Mary ai baia gui neganai, Tadikaka Knorr ida e ḡaukara hebouva tadikakana, Worth Thornton, na ema baine bamahuta henimai. Ia ese e hamaoromai ai na Betele ai baia ḡaukaramu. Una hereva na kamonai neganai taina na lalohisihisi. To haraḡa herea egu lalohadai na haidaua bona Betele ḡaukara na ura henia, unuseniai ḡaukara idauidau na moalelaiva. Na moalelaia bada ḡaukarana na reception ḡaukarana. Taunimanima na na ura henidiava, bona ina ḡaukara dainai Nigeria tadikakadia momo na hereva henidiava. Momo na Betele e maiva neganai mai kahudia, toadia na hesiku, ranu ese e masedia bona e hitolodia. Idia na durudiava bona aniani bona ranu na henidiava neganai na moaleva. Unu iboudiai na Iehova ena hesiai ḡaukara helaḡadia, bona unu ese e hamoaleguva.” Oibe, emai asainmen idauidau ese dala e kehoa emai hesiai ḡaukara baia habadaia.

Laḡani 1961 ai, Trinidad ai ruma bese ida a aniani hebouva neganai, Tadikaka Brown na Africa ai e davari ekspiriens namodia haida e herevalaiva. Bena lau ese Nigeria ai orea ena tubu karana na herevalaia. Tadikaka Brown ese e turagu bena Tamagu e hamaoroa, eto: “Johnny, oi be Africa na sola, to Woodworth hari ela!” Bena Tamagu ese e hamaorogu, eto: “Ba goada, Worth! Ba goada!” Idia raruosi edia hahegoada herevadia ese e durugu, egu hesiai ḡaukara baina karaia namonamo totona.

 Laḡani 1962 ai, Gilead klas namba 37 nala bona hua 10 lalonai treinin haida ma na abi. Tadikaka Wilfred Gooch, una negai Nigeria edia brens ovasia, na klas namba 38 ela bona e siaia England. Una dainai e abigu hidi Nigeria brens ofes baina naria. Tadikaka Brown ena haheitalai na tohotohoa, gabu momo na laova, unu amo Nigeria tadikakadia na dibadia bona na ura henidia. Ena be edia kohu na dia momo to e moaleva, unu amo e hahedinaraia mauri namona na moni bona kohu ese basie havaraia diba. Edia noho daladia na lalo neganai, na moale badina hebou ai na itadiava idia na e heḡoeva namonamova bona e hematauraiva. Momo na motuka badadia (lorries) bona basi (bolekajas) * amo hebouhebou dainai e maiva. Unu basi ai hereva haida e tore. Ta na ini bamona: “Ranu hetuturuna na davara ai bainela.”

Una hereva na e momokani! Ai na Nigeria tadikakadia ida a hekwarahi hebouva. Laḡani 1974 ai, United States murimurina tanodia amo Nigeria na tano ginigunana ena pablisa nambana na 100,000 e hanaia. Ḡaukara na e bada herea!

Ena be laḡani 1967 ela 1970 lalodiai, Nigeria ai tuari e varava, to momo na hereva momokani ai e vareaiva. Hua momo lalodiai, Niger Sinavaina kahanai Biafran ai e nohova tadikakadia na asi edia dala brens ofes ida bae herevahereva. Una dainai emai maduna na lauma anianidia baia laohai idia dekedia. Matamanai na herevalaia heḡereḡerena, Iehova a ḡuriḡuri heniava bona a abidadama heniava dainai, nega momo sinavai amo a hanaiva.

Na helalotaomu Niger sinavaina a hanaia neganai kahirakahira emai mauri baiama haboio, badina soldia na e hepidi kava hepidi kavava, danu gorere bona ma hekwakwanai haida e varava. Gavamani edia soldia e nohova gabuna amo baia hanai na mai garina, to Biafran amo baia hanai na mai garina momokani. Hanuaboi ta ai, lau na Niger Sinavaina ai vanaḡi ai na gui bena Asaba amo Onitsha nala, unuseni amo Enugu nala elda taudia baina hagoadadia. Laolao ma ta ai, Aba rumadia momo ai laiti na asie haoniva, inaidia ese bae itaidia garina; unuseniai e nohova elda taudia na vadivadidia bona na hagoadadia. Port Harcourt ai, emai hebou na ḡuriḡuri amo a koua haraḡa, badina gavamani edia soldia na Biafran ena taoni murimurina amo e vareai.

Unu hebou na mai anidia bada, badina Iehova ese mai lalokauna ida e naridiava tadikakadia na e hagoadadiava, bona e durudiava lalo-tamona ai bae noho, bona unu heiri-heiri lalodiai na basie vareai. Nigeria tadikakadia na unu nega aukadia ai e haheaukava. Edia helalokau heheni karana ese e hagoadadiava dainai lalotamona ai e nohova, ena be iduhu taudia na e heinai heheniva. Unu nega aukadia ai na durudiava na hahenamo ta!

Laḡani 1969 ai, “Peace on Earth” Intanesinol Hebouhebouna Yankee Stadium, New York ai e heabi neganai, Tadikaka Milton G. Henschel na seamani, bona ia na duruava dainai ḡau momo na diba. Nega maoronai una treinin na abia, badina laḡani 1970 ai “Men of Goodwill” Intanesinol Hebouhebouna na Lagos, Nigeria ai a karaia. Tuari e ore murinai, Iehova ena heduru dainai una hebouhebou a abia. Una hebouhebou na gado 17 ai e heabi, bona ela taudia na 121,128. Tadikaka Knorr bona Henschel, bona vadivadi taudia United States bona England amo ema bona hahediba taudia matamatadia 3,775 e bapatiso na e itadia​—⁠Pentekost dinana amo una na Kristen bapatiso badana! Egu mauri lalonai una hebouhebou iduruna ḡaukaradia na karava na ḡaukara badana. Pablisa edia namba na e tubu haraḡava!

Nigeria ai, lau na laḡani 30 mai kahana seket ḡaukara na karaia bona West Africa ai zone ḡaukara na karaia danu. Misinari taudia na e moale badina idia ta ta a vadivadidiava bona a hagoadadiava! Bona a hadibadiava idia na a lalodia badava! Una ḡaukara amo na dibaia ḡauna na, taunimanima baita lalodia badamu neganai una ese be durudiamu bae goada bona Iehova ena orea lalonai lalotamona ai bae noho.

 Iehova ena heduru dainai, tuari bona gorere daidiai e varava hekwakwanaidia na a haheaukalaidia. Iehova ena hahenamo na nega iboudiai a itava. Oris na eto:

“Ai raruosi na nega momo malaria a abiva. Nega ta, Worth na e maserea dainai Lagos hospelena a laohaia. Dokta ese e hamaorogu, ia na reana basine mauri, to na moale badina una na se vara! E noga neganai, nesi ta enai Dirava ena Basileia e herevalaia. Gabeai, Worth ida, ala una nesi ladana, Mr. Nwambiwe, baia vadivadia, ena ura Baibul ai baia habadaia totona. Una nesi ese hereva momokani e abia dae, bona gabeai Aba ai, elda ta ai ela. Lau ese danu momo na durudia, Iehova ena hesiai taudia ai baela totona, idia haida na guna Muslim taudia. To a moalelaia bada ḡauna na, Nigeria taudia a lalokau henidiava dainai, edia mauri dalana, kastom bona edia gado a dibaia.”

Na diba ḡauna ma ta bina: E siaimai tanona ai emai hesiai ḡaukara baia moalelaia totona, namona na tadikaka bona taihu baia dibadia bona baia lalokau henidia, herevana edia mauri daladia na idau emai amo.

Nigeria Betele ai a ḡaukara, bena laḡani 1987 ai e abimai hidi misinari ḡaukarana baia karaia St. Lucia motumotuna, Caribbean ai. Una asainmen na a moalelaia, to ma mai ena hekwakwanai haida. Heḡereḡere, Africa tanona ai be tau tamona ese hahine momo e adavadiava, to St. Lucia ai, asie headava taudia na e noho hebouva, herevana edia headava na gavamani ai asie hamomokania. Dirava ena Hereva ese emai Baibul stadi momo e durudia dainai edia mauri ai senisi e kara.

A buruka dainai, laḡani 2005 ai Gavanin Bodi ese e siaimai hedkwota Brooklyn, New York, U.S.A. ai baia noho. Oris dainai dina ta ta ai Iehova na tenkiu heniamu. Ia na laḡani 2015 ai e mase, bona ena mase dainai na mamia hisihisina baina herevalaia na auka. Ia na turagu namo hereana, ena kara namodia na momo, bona na lalokau heniamu. Emai headava laḡanidia 68 na a moalelaidia hebou. A dibaia ḡauna na, headava lalonai bona kongrigeisin ai moale baine mia totona, namona na kwara dagina baita matauraia, dika baita hegwautao heheni, baita manau, bona lauma huahuadia baita hahedinarai.

A lalohisihisiva eiava a lalomanokava negadiai, Iehova enai a tabekauva unu amo Ia baia hesiai henia hanaihanai. Lalohadai maorona a abiava neganai, a itaiava ḡau iboudiai na e namo e laova​—⁠bona hahenamo momo na nega vairai baia davarimu!​—⁠Isa. 60:17; 2 Kor. 13:11.

Trinidad bona Tobago ai, Iehova ese tamagu, sinagu bona ma haida edia ḡaukara e hanamoa dainai, vanega ripotidia ese e hahedinarai, taunimanima 9,892 na tomadiho momokanina ai e vareai. Aruba ai, momo na egu kongrigeisin gunana e duruamu. Hari una motumotu ai kongrigeisin iboudiai na 14. Nigeria ai, pablisa ena namba na e dae 381,398. Bona St. Lucia motumotu ai, pablisa 783 ese Iehova ena Basileia e harorolaiamu.

Hari lau laḡanigu na 90 heḡereḡerena. Salamo 92:14 ese Iehova ena ruma ai vada e hado ḡaudia na ini e herevalai toma: “Sene audia na huahuadia dounu e havaramu; todedia e arumu, rau matamatadia e hekaramu.” Na moalemu badina egu mauri ibounai lalonai Iehova na hesiai henia. Tamagu sinagu bona ma haida ese e hadibagu ḡaudia ese e durugu Iehova baina hesiai henia namonamo. Iehova ena lalokau dainai, “[egu] Dirava ena ikoukou ai” na tubu namonamo.​—Sal. 92:13.