1. Bema ta na e urava Parasa pavapavana baine hereva henia ia be dahaka baine kara?

MANI a laloa, oi na laḡani 2,500 gunana ai Parasa ai o nohova. Bona o urava una tano pavapavana enai ḡau ta ba herevalaia dainai iena hanua, Susa, ola. To ia do so hereva henia neganai, namona na gwaumaoro bavabi guna. Unu basio kara tomamu neganai oi na bo mase dibamu.​—⁠Eset. 4:11.

2. Iehova ihereva henina karana be ede baita laloa toma?

² Ta moalemu badina Iehova na dia Parasa pavapavana heḡereḡerena. Ena be Iehova ese tanobada lohiadia iboudiai e hereadiamu, to nega idauidau ai baita hereva henia diba. Heḡereḡere, ena be Iehova na Ihavarada Tauna, Siahu-Idoinai Diravana, bona Lohia Badana, to ia na e uramu baita hereva henia neganai ina hereva ‘Tama’ baita ḡaukaralaia. (Mat. 6:9) Ta moalemu badina Iehova na e uramu ia baita hetura henia.

3. Dahaka dainai Iehova na baita gwauraia ita Tamada, bona ina atikol ese dahaka be herevalaimu?

³ Iehova baita gwauraia ita Tamada na maoro, badina ia na mauri badina. (Sal. 36:9) Ia na ita Tamada dainai baita kamonai henia na namo. Ia e uramu karadia baita karamu neganai hahenamo momo baita davarimu. (Heb. 12:9) Heḡereḡere, mauri hanaihanai guba ai eiava tanobada ai baita abiamu. Hari danu hahenamo baita davarimu. Ina atikol amo baita dibamu hari ina negai Iehova na tama lalokauna ena kara e hahedinaraiamu bona Ia ese basine rakatanidamu badina danu baita herevalaiamu. To baita herevalaia gunamu ḡauna na, dahaka dainai baita abia dae Tamada gubai e nohomu ese ita na e lalokau henidamu bona e lalodamu.

4. Dahaka dainai haida ediai na e aukamu Iehova na idia Tamadia ai bae halaoa?

⁴ Oiemu ai auka Dirava na Tamamu ai ba halaoa, a? Haida na reana e laloamu idia na dia heḡereḡere badina Iehova ese idia na e hereadiamu. Idia na e daradaramu bema Siahu–Idoinai Diravana ese idia ta ta e lalodiamu eiava lasi. To, ita Tamada lalokauna na se uramu ita na unu baita lalo toma. Ia ese mauri e henida bona ia na e uramu ia ida baita hetura. Paulo na una e herevalaia murinai, e gwa: “Ia bona ita ta ta padada na dia daudau.” (Apos. 17:24-29) Dirava na e uramu ita ta ta na ia baita hereva henia, natu ta ese tamana o sinana lalokauna e hereva heniamu bamona.

5. Taihu ta ena ekspiriens amo dahaka ta dibamu?

⁵ Haida ediai na e aukamu Iehova na Tamadia ai bae halaoa, badina idia tamadia edia lalokau idia ediai na dia bada eiava se lalokau henidia. Kristen taihu ta ena hereva mani a laloa, ia na e gwa: “Tamagu ena hereva na dia nanamo lauegu ai. Una dainai Baibul na stadilaia matama neganai, Tamada gubai e nohomu ihetura henina egu ai na e auka. To, Iehova na dibaia murinai egu lalohadai na e idau.” Oiemu lalohadai be unu bamona, a? Bema oibe, oi danu gabeai bo lalopararamu Iehova na tama hereadaena.

6. Mataio 11:27 heḡereḡerena, Iehova na ita Tamada lalokauna ta bamona baita laloa totona, Ia be dahaka e kara?

⁶ Baibul ai Iehova ese Iesu ena kara bona hereva e toredia, unu amo e duruda ita ese Ia na Tamada lalokauna bamona baita laloa. (Mataio 11:27 ba duahia.) Iesu ese Tamana ena kara na e tohotohodia ḡoevaḡoeva dainai ia na e gwa: “Vada eme itagu tauna ese Tamagu danu vada eme itaia.” (Ioa. 14:9) Nega momo Iesu ese Iehova na e gwauraia Tama. Evanelia bukadia haniosi lalodiai Iesu ese ina hereva “Tama” na nega 165 bamona e ḡaukaralaia, bona una na Iehova e herevalaia. Dahaka dainai Iesu ese nega momo Iehova e herevalaia? Badi ta na, unu amo taunimanima na bae abia dae Iehova na Tama lalokauna.​—⁠Ioa. 17:25, 26.

7. Iehova ese Iesu e kara henia dalana amo dahaka ta dibamu?

⁷ Mani Iehova ese Natuna Iesu e kara henia dalana amo Ienai baita diba ḡaudia baita lalo. Iehova na hanaihanai Iesu ena ḡuriḡuri e kamonai henidia bona e haerelaidia danu. (Ioa. 11:41, 42) Iesu e davari hahetohodia iboudiai lalodiai, ia ese Tamana ena lalokau bona heduru na e mamidia.​—⁠Luka 22:42, 43.

8. Ededia dalai Iehova ese Iesu e durua?

⁸ Iesu na e diba ia Tamana na iena mauri Badina bona iena mauri Iduruna Ḡaudia E Heniva Tauna, una dainai e gwa: “Tamada dainai na maurimu.” (Ioa. 6:57) Iesu ese Tamana na e abidadama henia momokani bona Iehova ese Iesu ena mauri iduruna ḡaudia na e henia. To mai anina bada ḡauna na Iehova ese Iesu na lauma dalanai e durua.​—⁠Mat. 4:4.

9. Edena dalai Iehova na e hahedinaraia Iesu na e lalokau henia bada?

⁹ Iehova na e ura Iesu na baine diba ia ese ia na be duruamu, badina Ia na Tama lalokauna. (Mat. 26:53; Ioa. 8:16) Ena be Iesu ese e davari dika iboudiai na Iehova ese se kou, to e durua e haheaukalai. Iesu na e diba baine davari dika idauidau na basie mia daudau ḡaudia. (Heb. 12:2) Iehova ese Iesu ena ḡuriḡuri na e kamonai, lauma bona tauanina dalanai  iduruna ḡaudia e heni, e hadibaia, bona e durua, unu amo e hahedinaraia Ia ese Iesu na e lalokau henia. (Ioa. 5:20; 8:28) Hari, namona na Tamada guba ai ese ita e lalodamu daladia aita herevalai.

10. Salamo 66:19, 20 heḡereḡerena, edena dalai Iehova ese e hahedinaraiamu ita na e lalokau henidamu?

¹⁰ Iehova ese eda ḡuriḡuri na e kamonaimu. (Salamo 66:19, 20 ba duahi.) Ia na se uramu eda ḡuriḡuri karana na baita laloa maraḡi, to e hagoadadamu hanaihanai baita ḡuriḡuri. (1 Tes. 5:17) Nega bona gabu idauidau ai, mai hematauraida ida eda Dirava baita ḡuriḡuri henia diba. Ena be iena ḡaukara na momo, to ia na e noho heḡaeḡaemu bona eda ḡuriḡuri na e hakala henimu. Ta dibamu Iehova ese eda ḡuriḡuri na e kamonaimu dainai, eda lalokau ia enai na e badamu. Salamo itorena tauna na ini e gwau tomamu: “Iehova na lalokau heniamu, badina be gadogu . . . vada e kamonai.”​—⁠Sal. 116:1.

11. Iehova ese eda ḡuriḡuri be ede e haeralai tomamu?

¹¹ Tamada na dia eda ḡuriḡuri mo e kamonaimu to e haerelaimu danu. Aposetolo Ioane na e gwaumu: “Dibada ḡau ta iena [Dirava ena] ura heḡereḡerena ai baita noia, ia ese baine hakala henida.” (1 Ioa. 5:14, 15) Momokani, reana ita ese asi ta laloamu dalanai Iehova ese eda ḡuriḡuri be haerelaimu. Ita baine duruda momokani ḡauna na ia na mai dibana, una dainai nega haida eda ḡuriḡuri na basine haerelaimu eiava basine haerelai haraḡamu.​—⁠2 Kor. 12:7-9.

12-13. Ededia dalai Tamada gubai e nohomu ese ita na e naridamu?

¹² Iehova ese lauma bona tauani dalanai e naridamu. Ia e uramu tama ese bae karaia ḡaukarana na ia ese e karaiamu. (1 Tim. 5:8) Ia ese dabu ḡaudia na e henimu. Badina se uramu aniani, dabua eiava ruma daidiai baita lalohekwarahi. (Mat. 6:32, 33; 7:11) Iehova na tama lalokauna dainai, dala e kara vaira negai ḡau ta ai basita dabu totona.

¹³ To, bada hereana na Iehova na ia ida eda hetura karana baine goada totona heduru ḡaudia e henimu. Ena Hereva amo ia sivaraina momokanidia, iena ura, mauri, bona vaira nega maurina e hadibadamu. Ia baita dibaia totona tamada sinada eiava haida e ḡaukaralaidia. Danu, eda hetura karana Iehova ida basine dika totona Ia ese elda taudia bona lo tadikaka taihu e ḡaukaralaidiamu ita bae duruda. Bona Iehova na kongrigeisin heboudia amo ita bona tadikaka taihu e hadibadamu. Ia na ini dala bona ma dala haida amo e hahedinaraiamu Ia na tama ta heḡereḡerena e laloda badamu.​—⁠Sal. 32:8.

14. Dahaka dainai Iehova ese e matahakani henidamu, bona ededia dalai?

¹⁴ Iehova ese e matahakani henidamu. Iesu na ḡoevadae, to ita na dia ḡoevadae. Una dainai, nega haida Tamada lalokauna ese e matahakani henidamu. Iena Hereva ese e hadibadamu: “Lohiabada [Iehova] ese e ura heniamu tauna matana e hakaniamu.” (Heb. 12:6, 7) Iehova ese dala idauidau ai e matahakani henidamu. Heḡereḡere, Baibul ai ta duahiamu sirina ta eiava kongrigeisin heboudia ai ta kamonaiamu herevana ta amo ta lalopararamu eda kara eiava lalohadai baita haidau na namo. Eiava reana elda taudia amo heduru ta abimu. Iehova ese dala idauidau ai ita e matahakani henidamu badina Ia ese ita na e lalokau henidamu.​—⁠Ier. 30:11.

15. Iehova be ededia dalai ita e gimadamu?

¹⁵ Iehova ese e durudamu hahetoho baita haheaukalai. Tama lalokauna ta ese natuna na nega aukadia ai e durudiamu heḡereḡerena, Tamada guba ai e nohomu ese hahetoho negadiai e durudamu. Ia ese ena lauma helaḡa e ḡaukaralaiamu ita baine gimada unu amo eda hetura karana ia ida na basine dika. (Luka 11:13) Bona ta lalomanokamu negadiai, Iehova ese e durudamu. Heḡereḡere, ia ese helaro namo hereana e henida. Bona una helaro ese e durudamu ta davarimu nega aukadia baita haheaukalai totona. Mani ina a laloa: Ena be metau idauidau ta davarimu, to Tamada lalokauna ese unu iboudiai do baine haoredia vaitani. Ta davarimu hahetohodia na basie mia hanaihanai ḡaudia, to Iehova amo ta abimu hahenamodia hari bae mia hanaihanai.​—⁠2 Kor. 4:16-18.

16. Adam ese Tamana lalokauna e gwau-edeede henia neganai, dahaka e vara?

¹⁶ Adam e gwau-edeede neganai, Iehova ese ia e kara henia dalana amo e hahedinaraia Ia na mai ena lalokau ita edai. Una negai Adam na Iehova ena ruma bese amo e hekoki, bona ia ena amo baine vara besena danu. (Roma 5:12; 7:14) To, Adam besena iduruna totona Iehova na ḡau ta e karaia.

17. Adam e gwau-edeede murinai, Iehova be dahaka e kara?

¹⁷ Iehova ese Adam na e panisia, to ia besena hari e gwauhamata henidia baine durudia. Idia na iena ruma bese ai do baela. (Gen. 3:15; Roma 8:20, 21) Iehova ese Natuna lalokauna Iesu ena mauri idavalaina boubouna amo una dala e karaia. Ita daidai Natuna e heni, una ese e hahedinaraiamu ita na e lalokau henida badamu.​—⁠Ioa. 3:16.

18. Ena be Iehova ta rakatania to dahaka dainai ta abia dae momokanimu Ia na e uramu ita na ia natuna ai baitala lou?

¹⁸ Ena be ita na dia ḡoḡoevadadae, Iehova na e uramu iena ruma bese lalonai baita noho, bona ia na se lalomu ita baine duruda na metau ḡauna ta. Reana ia lalona baita hahisia diba eiava baita rakatania diba, to ia na e dibamu ita na ia ma baita lou heniamu. Iesu ese boio merona parabolena amo e hahedinaraia Iehova ese natuna na e lalokau henidiamu. (Luka 15:11-32) Una parabole ai e herevalaia tama na e diba momokani natuna na ma be loumu. Una dainai natuna merona na ruma e lou lao neganai, tamana na mai moalena ida ia e welkam henia. Bema ita na nega daudau lalonai Iehova ta rakatania, to bema baita helalo-kerehaimu, baita abia dae momokanimu Tamada lalokauna na heḡaeḡae ita baine welkam henida.

19. Edena dalai Adam ese e havara dika iboudiai na Iehova ese baine hanamo lou?

¹⁹ Adam ese e havara dika iboudiai na ita Tamada ese baine hanamodia lou. Adam e gwau-edeede murinai, Iehova ese tanobada amo taunimanima 144,000 e abidia hidi ia Natuna ida guba ai king bona hahelaḡa ḡaukarana bae karaia. Tanobada matamatana ai Iesu bona ia ida bae lohia taudia ese Iehova e badinaiamu taudia bae durudia bae ḡoevadae totona. Idia ese hahetoho ginigabena bae hanaia murinai, Dirava ese mauri hanaihanai hahenamona na idia be henidiamu. Tamada na be moalemu badina tanobada na natuna ḡoevadaedia ese be hahonuamu. Una na nega namo hereana.

20. Ededia dalai Iehova ese e hahedinaraiamu ita na e lalokau henida badamu, bona atikol 7 ai dahaka baita herevalaimu?

²⁰ Iehova ese ita na e lalokau henida badamu. Ia na Tama hereadaena. Eda ḡuriḡuri e hakalamu, tauani bona lauma dalanai e naridamu. E matahakani henidamu bona e durudamu. Bona vaira negai ita daidai ḡau namo hereadia be karamu. Unu ḡau idauidau ese e hamoaledamu badina ta dibamu Tamada ese e lalokau henidamu bona e naridamu. Atikol 7 ai ita, ia natuna ese iena lalokau karana ta laloa badamu daladia be herevalaimu.