1-2. Mataio 5:11 ena hereva heḡereḡerena, hedibaḡani be ede baita lalodia toma?

IESU na e gwauhamata ia murinai bae raka taudia na do bae moale. To e hadibadia danu, idia na hahetoho be davarimu. (Mat. 10:22, 23; Luka 6:20-23) Ta moalemu badina ita na Keriso ena hahediba taudia. To, ede baita hemami tomamu bema eda ruma bese ese be inai henidamu, gavamani ese be daḡedaḡe henidamu, eiava ḡaukara o skul turadia ese be doridamu kara dika ta baita karaia? Vaia ḡau unu bamodia ese lalohekwarahi na be havaramu.

² Taunimanima na daḡedaḡe e davarimu neganai, asie moalemu. To, Baibul na etomu baita moale. Heḡereḡere, hahediba tauna Iakobo na e gwa, hedibaḡani negadiai, basita lalohekwarahi to baita moale. (Iak. 1:2, 12) Bona Iesu na e gwa, daḡedaḡe ta davarimu neganai namona na baita moale. (Mataio 5:11 ba duahia.) Ena be hedibaḡani baita davari to edena dalai dounu baita moale? Iakobo ese Kristen ginigunadia e tore henidia revarevana amo ḡau momo baita dibamu. Mani idia e davari hahetohodia haida aita herevalai.

3. Iakobo na Iesu ena hahediba ta ai ela murinai dahaka e vara?

³ Iesu tadina Iakobo na hahediba tauna ta ai ela murinai, Ierusalem ai Kristen taudia na daḡedaḡe bada herea e davariva. (Apos. 1:14; 5:17, 18) Bona hahediba tauna Stefano e mase neganai, Kristen taudia momo na hanua e rakatania bena “Iudea bona Samaria tanodia idoidiai” ela, ma haida be Kupro bona Antioka ela. (Apos. 7:58–8:1; 11:19) Hahediba taudia na hekwakwanai momo e davariva. To, idia ela gabudiai sivarai namona e harorolaiava, bona Roma Basileiana ena gabu momo ai kongrigeisin e hagini. (1 Pet. 1:1) To, gabeai Kristen taudia na ma hekwakwanai momo e davari.

4. Kristen ginigunadia be dahaka hekwakwanai e haheaukalai?

 ⁴ Kristen ginigunadia na hekwakwanai momo e haheaukalai. Heḡereḡere, laḡani 50 C.E. lalodiai, Roma Pavapavana Klaudio ese Iuda taudia iboudiai oda e henidia Roma bae rakatania. Una dainai, Kristen ai ela Iuda taudia na edia ruma e rakatani bona gabu idauidau ela. (Apos. 18:1-3) Laḡani 61 C.E. lalonai, aposetolo Paulo na eto, Kristen taudia na taunimanima ese e daḡedaḡe henidiava, dibura ruma ai e atodiava, bona edia kohu e dadiva. (Heb. 10:32-34) Danu, Kristen taudia e gorerediava bona ogoḡami maurina e haheaukalaiava.​—Roma 15:26; Fili. 2:25-27.

5. Ededia henanadai baita haerelaimu?

⁵ Laḡani 62 C.E. ai, Iakobo ese ena revareva e torea neganai, ia na mai dibana tadikakana be dahaka hekwakwanai e davariva. Iehova ena siahu amo Iakobo ese Kristen taudia e tore henidia bona sisiba namodia amo e durudia hekwakwanai negadiai dounu bae moale totona. Mani Iakobo ena revareva aita itaia bona ini henanadai aita haerelaidia: Iakobo be edena moale e herevalaia? Dahaka ese Kristen tauna ena moale baine hadikaia diba? Bona hekwakwanai negadiai edena dalai aonega, abidadama, bona lalogoada ese bae duruda baita moale hanaihanai totona?

6. Luka 6:22, 23 heḡereḡerena, dahaka dainai Kristen tauna na hekwakwanai negadiai baine moale diba?

⁶ Momo na e laloamu idia bae moale diba bema basie gorere, moni momo bae habou, bona ruma bese na maino ai bae noho. To, Iakobo ese e herevalaia moalena na Dirava ena lauma helaḡa huahuana ta, una dainai baita moale herevana  dahaka hekwakwanai bae vara. (Gal. 5:22) Kristen tauna ese Iehova be hamoaleamu bona Iesu ena haheitalai be badinaiamu neganai, moale korikorina be abiamu. (Luka 6:22, 23 ba duahi; Kol. 1:10, 11) Una moale na lamepa lalonai e aramu lahina ida baita heḡereḡereamu. Herevana lai be toamu o medu be dihomu, to una lahi na galasi ese e koua dainai basine bodomu. Una heḡereḡerena ena be baita gorere eiava eda moni na dia bada, eiava eda ruma bese bona ma haida ese be hevasehalaidamu o be daḡedaḡe henidamu, to dounu baita moale. Taunimanima ese eda moale e uramu bae hadikaia neganai, eda moale na be bada be laomu. Eda abidadama dainai ta davarimu hekwakwanaidia ese e hamomokaniamu ita na Keriso ena hahediba korikoridia. (Mat. 10:22; 24:9; Ioa. 15:20) Una dainai, Iakobo na gwa: “Varavaragu e, hedibaḡani ese bae butumui tao negadia ai na lalomui baeto ene na moale mo.”​—Iak. 1:2.

7-8. Edena dalai hekwakwanai ese eda abidadama baine hagoadaia diba?

⁷ Kristen taudia ese hekwakwanai e haheaukalaimu badina ma ta na Iakobo ese herevalaia. Eto: “Emui abidadama itohona ese haheauka e havaraiamu.” (Iak. 1:3) Hekwakwanai o hedibaḡani na kaia e gabuamu lahina ida baita haheḡereḡereamu. Una kaia na lahi lalonai e gabuamu, bena ranu lalonai e urua dobimu bona e hakeruamu neganai, kaia na e aukamu. Una heḡereḡerena, hekwakwanai baita haheaukalaimu neganai, eda abidadama danu be goadamu. Iakobo na e gwa: “Haheauka ese ena ḡaukara baine haḡuḡurua baine namo, bena ba ḡoeva dae bona ba namo ḡuḡuru, ḡau ta ai basio dabu.” (Iak. 1:4) Ta davarimu hekwakwanaidia ese eda abidadama e hagoadaiamu neganai, mai moaleda ida baita haheaukamu.

⁸ Iakobo ena revareva ai e hahedinaraia danu ḡau haida daidiai eda moale baita haboio dibamu. Unu hekwakwanai haida be dahaka bona ede baita hanaidia tomamu?

9. Dahaka dainai baita aonega na namo?

⁹ Hekwakwanai: Asi dibada dahaka baita kara. Hekwakwanai e varamu neganai, ita na ta uramu Iehova ena heduru amo, abi hidi maorodia baita kara, eda tadikaka taihu baita durudia, bona Iehova baita badinaia. (Ier. 10:23) Namona na baita aonega unu amo baita diba e daḡedaḡe henidamu taudia ediai dahaka baita gwaurai bona dahaka baita kara. Bema asi dibada dahaka baita kara, reana baita lalomanokamu bona eda moale baita haboioa haraḡamu.

10. Baita aonega totona, Iakobo 1:5 ese e hadibadamu dahaka baita kara?

¹⁰ Ihahanaina dalana: Iehova baita noia aonega baine henida. Bema ta uramu mai moaleda ida hekwakwanai baita haheaukalai,  namona na ḡuriḡuri amo Iehova baita noia aonega baine henida, unu amo abi hidi maorodia baita kara. (Iakobo 1:5 ba duahia.) To bema Iehova ese eda ḡuriḡuri na se haerelaia haraḡamu, dahaka baita kara? Iakobo na eto, Dirava baita “noia” loulou. Aonega totona baita noinoi louloumu neganai Iehova na basine badumu o basine gwau henidamu. Una dainai Tamada guba ai na mai moalena ida aonega be henidamu, bema hekwakwanai ihaheaukalaidia totona aonega baita noiamu. (Sal. 25:12, 13) Ia ese eda hekwakwanai na e itamu, bona e bogadahisimu dainai e ura dikadikamu baine durudia. Oibe, una badi dainai baita moale! To, edena dalai Iehova ese aonega e henidamu?

11. Baita aonega totona, dahaka danu baita kara be namo?

¹¹ Iehova na Baibul amo ita e ha’aonegadamu. (Her. 2:6) Una dainai, namona na Baibul bona orea ese e halasimu pablikeisin idauidau baita stadilai. To, baita stadi mo na dia heḡereḡere. Namona na eda mauri lalonai Dirava ena aonega herevadia baita badinadia. Iakobo na eto: “Hereva ibadinana taumui ai baola; bema hereva ikamonaina taumui mo, una be sibomui o hekoimu.” (Iak. 1:22) Dirava ena sisiba baita badinamu neganai, maino, lalo maoromaoro, bona hebogahisi tauda ai baita laomu. (Iak. 3:17, NWT) Unu ese ita be durudamu hekwakwanai baita haheaukalaimu bona eda moale basita haboioamu.

12. Dahaka dainai Baibul baita dibaia namonamo na mai anina bada?

¹² Dirava ena Hereva na hevarivari na heto. Ita be durudamu eda manoka ḡaudia baita lalopararalai bona baita hamaoromaoro. (Iak. 1:23-25) Heḡereḡere, Dirava ena Hereva baita stadilaiamu murinai, baita laloparara eda badu baita biagua na namo. Iehova ena heduru dainai, taunimanima eiava hekwakwanai haida ese laloda  be hahisimu neganai, baita lalo manaumu. Ta lalo manaumu dainai hekwakwanai be varamu neganai baita haheauka dibamu. Bona mai lalo maoromaoroda ida disisin maorodia baita karamu. (Iak. 3:13) Momokani, Baibul baita dibaia namonamo na mai anina bada!

13. Dahaka dainai Baibul ese e sivarailaidia taudia edia haheitalai baita stadilai?

¹³ Nega haida kara ta ta karaiamu murinai, ta lalopararamu una ta karaia ḡauna na kerere. To una na dia aonega karana. Dala maorona na ma haida edia kara maorodia bona kara kereredia amo diba baita abi. Una dainai Iakobo ese ita e hagoadada Baibul ese e sivarailaidia taudia heḡereḡere, Abraham, Rahaba, Iobu bona Elia edia haheitalai baita stadilai. (Iak. 2:21-26; 5:10, 11, 17, 18) Unu abidadama hesiai taudia na mai moaledia ida Iehova e badina bona hekwakwanai idauidau e haheaukalai. Edia haheauka karana ese e hahedinaraia ita danu Iehova ena heduru amo baita haheauka diba.

14-15. Dahaka dainai ta daradaralaimu ḡaudia na baita hamaoromaorodia haraḡa?

¹⁴ Hekwakwanai: Daradara. Nega haida reana Dirava ena Hereva lalonai e gwauraia ḡauna ta baita lalopararalaiamu na auka. Eiava Iehova ese iseda ḡuriḡuri na dia ita ta laloamu dalana heḡereḡerena be haerelaiamu. Ḡau unu bamodia ese daradara bae havara diba. Bema basita hamaoromaoro haraḡamu, eda abidadama be hamanokaiamu bona eda hetura karana Iehova ida be hadikaiamu. (Iak. 1:7, 8) Bona nega vaira helarona baita haboioa dibamu.

¹⁵ Aposetolo Paulo ese iseda helaro na dogo ta idia e haheḡereḡerea. (Heb. 6:19) Lai gubana lalonai dogo ese bouti na e dogoatao aukamu, unu amo nadi ai basine kau. To dogo na mai ena heduru bema bouti ai e kwatua seini na auka. To rasta ese dogo seinina e hamanokaiamu heḡereḡerena, daradara ese eda abidadama be hamanokaiamu. Daradara tauna na hekwakwanai be davarimu neganai, ena abidadama Iehova ese e gwauhamatalai ḡaudia ai na be manoka dibamu. Bema eda abidadama be manokamu, eda helaro danu baita haboioamu. Iakobo na e gwa, “daradara tauna na davara hurehurena na heto, lai ese e hohoamu bona e haginiamu.” (Iak. 1:6) Taunimanima unu hetomana na basine moale diba!

16. Bema ta daradaramu dahaka baita kara?

¹⁶ Ihahanaina dalana: Daradara ḡaudia ba hamaoromaoro; emu abidadama ba hagoadaia. Kara ta ba karaia haraḡa. Elia ena negai, Iehova ena taunimanima na lalorua ai e nohova. Elia ese ia hamaorodia, eto: “Lalo rua ai ba raka ege raka ege ela bona edena nega? Bema Iehova na Dirava, ia murina ai ba raka; a bema Baal, ia murina amo ba raka.” (1 Han. 18:21) Namona na hari ita danu kara ta baita karaia. Orea ese e halasimu pablikeisin idauidau baita stadilai, unu amo siboda ese baita hamomokania Iehova na Dirava, Baibul na iena Hereva, bona Iehova ena Witnes na iena taunimanima. (1 Tes. 5:21) Unu baita kara tomamu neganai, basita daradaramu to eda abidadama baita hagoadaiamu. To bema heduru ta uramu, elda taudia baita noidia. Momokani, mai moaleda ida Iehova baita hesiai henia totona, kara ta baita karaia haraḡa na namo.

17. Bema baita lalomanokamu dahaka be varamu?

¹⁷ Hekwakwanai: Lalomanoka. Baibul na e gwa: “Hekwakwanai dinana ai boma manoka-manoka, emu goada na maraḡi-maraḡi.” (Her. 24:10) Bema bo lalomanokamu, emu moale na bo haboioa haraḡamu.

18. Baita haheauka anina be dahaka?

¹⁸ Ihahanaina dalana: Iehova enai baita  tabekau ia ese goada baine henida baita haheauka totona. Hahetoho baita haheaukalai totona, namona na baita lalogoada. (Iak. 5:11) Iakobo ese ina e ḡaukaralaia herevana “haheauka” baita haeroamu neganai, ita ese tau ta gabunai e gini tutuka-tutukamu karana baita laloamu. Eiava tuari tauna baita laloamu. Ena be inaina na mai daḡedaḡedia ida ia be tuari heniamu, to ia na asi garina ida gabuna ai be ginimu bona be tuarimu.

19. Aposetolo Paulo ena haheitalai amo dahaka ta dibamu?

¹⁹ Aposetolo Paulo na asi gari dibana bona haheauka karana ai haheitalai namona e hahedinaraia. Ena be nega haida lalomanoka mamina e abiava, to Iehova ena goada ai e tabekauva dainai e haheauka. (2 Kor. 12:8-10; Fili. 4:13) Bema baita manau bona Iehova ena heduru ai baita tabekau, baita goadamu bona basita garimu.​—Iak. 4:10.

20-21. Dahaka baita abia dae na namo?

²⁰ Ita ta davarimu hedibaḡani o hekwakwanai na Iehova ese se havaramu. Iakobo na e gwa: “Hedibaḡani ai ta basineto ‘Dirava ese e dibaḡanigumu’; badina be dika na Dirava idibaḡanina asi dibana, bona Dirava ese danu tau ta se dibaḡaniamu.” (Iak. 1:13) Una hereva baita abia daemu neganai, ita ese Tamada lalokauna guba ai baita hetura henia namonamomu.​—Iak. 4:8.

²¹ Iehova na “se idaumu.” (Iak. 1:17) Ia ese Kristen ginigunadia edia hekwakwanai negadiai e durudia heḡereḡerena, ita ta ta danu be durudamu. Iehova ba noia goadagoada aonega, abidadama, bona goada baine heniamu. Ia ese emu ḡuriḡuri na be haerelaimu. Unu bo kara tomamu neganai, Iehova ese oi na be durumumu mai moalemu ida o davarimu hedibaḡani o hekwakwanai idauidau ba haheaukalai!