Laḡani 1920 lalodiai, tamagu bona sinagu na do asie headava neganai hereva momokani e dibaia. Lau be laḡani 1939 ai na vara. England ai, lau na maraḡigu ai tamagu bona sinagu ida Kristen heboudia a laova bona Tiokratik Haroro Skuli ai na vareai. Na helalotaomu, egu nega ginigunana tok baina heni neganai, lau na boksi ta latanai na gini bena podium amo tok na heni. Una neganai lau laḡanigu na 6, bona na gari dikadika badina helai taudia iboudiai na taunimanima badadia.

Haroro heḡaeḡaedia a karava neganai, tamagu ese egu haroro herevana na kadi ta ai e toreava. Lau laḡanigu 8 neganai, egu nega ginigunana haroro ai sibogu nala ruma ta baina karaia. Ruma tauna ese egu kadi e duahia bena maoromaoro “Let God Be True”! bukana e abia neganai, na moale dikadika bona na heau nala tamagu na hamaoroa. Haroro ḡaukara bona kongrigeisin heboudia na na moalelaiva, bona una ese Iehova baina hesiai henia urana e habadaia.

Tamagu ese Watchtower sabskripsen ta e henigu murinai, lau ese Baibul ena hereva momokani na ura henia matama. Post ofes amo Watchtower ta ta a abiva neganai, maoromaoro na duahiva. Una ese egu abidadama Iehova enai e hagoadaia bena se daudau egu mauri na gwauhamatalaia.

Laḡani 1950 ai, lau, tamagu bona sinagu na “Theocracy’s Increase” hebouhebouna totona New York ala. Thursday, August 3 ai, hebou sinadona na “Missionary Day.” Una dina ai, Tadikaka Carey Barber, gabeai Gavanin Bodi memba ta ai ela, ese bapatiso tok e heni. Ia ese ena tok dokonai henanadai rua  na bapatiso taudia e henidia neganai, Launa na gini bona na gwa, “Oibe!” Lau laḡanigu na 11, to na diba lau na mai anina bada abi hidina na karaia. To na gariva ranu lalonai baina vareai badina asi nahu dibagu. Vavagu ese e hakaugu lao ranu badinai, bona e hagoadagu basina gari. Bona momokani, egu bapatiso na e ore haraḡa badina aegu na pool floana ai danu se kau. Tadikaka ta ese e ha’bapatisogu bena ma ta be ranu amo e abigu isi. Una dina amo, Iehova ese egu dala e hamaoromaorodia.

Skuli na rakatania neganai, launa na urava painia ḡaukara baina karaia, to egu teacher momo ese e doriguva skuli badana bainala. Lau ese edia hereva na kamonai bona iunivesiti nala. To, gabeai na laloparara lau na hereva momokani ai na basina goada dibamu bema egu skuli ḡaudia mo ba lalo badamu, una dainai lalogu na hadaia skuli baina rakatania. Iehova enai una na ḡuriḡurilaia bona leta ta na torea bena egu teacher na henidia, bona laḡani dokonai skuli na rakatania. Iehova na abidadama henia momokani dainai, maoromaoro painia ḡaukara na hamatamaia.

July 1957 ai, lau na Wellingborough ai ful-taim hesiai ḡaukara na karaia matama. Lau ese London Betele tadikaka na noidia mai ena ekspiriens painia tadikaka ta bae abia hidi, ia ida baina ḡaukara hebou totona. Tadikaka Bert Vaisey ese ḡau momo e hadibagu, bona iena haroro goadagoada karana ese e durugu egu haroro sediual namona ta baina karaia. Kongrigeisin lalonai na taihu burukadia 6, lau bona Tadikaka Vaisey. Hebou totodia na heḡaeḡaeva bona hebou ai kaha idauidau na heniva karana ese egu abidadama Iehova enai e hagoadaia bona egu abidadama na hahedinaraiava.

Lau na ami ḡaukarana ai asina vareai dainai e hadiburagu, to una murinai lau ese spesol painia taihu ta, Babara, na hedavari henia. Laḡani 1959 ai, a headava bona lalomai a hadai bae siaimai gabudia baiala totona. Emai asainment ginigunana na, Lancashire ala, England ena notwest kahana. Bena January 1961 ai, e boirimai London Betele ai hua tamona lalonai Basileia Evanelia Skuli baia abia. Skuli dokonai, na hoa badina e abigu hidi seket ḡaukarana baina karaia. Birmingham siti ai, lau na wiki rua lalonai ekspiriens seket tauna ta ese treinin e heniguva, bona Barbara danu gwau maoro e heni una treinin lalonai baine vareai totona. Una murinai, ai na a lou emai asainment gabudia Lancashire bona Cheshire.

August 1962 ai, emai holidei negana lalonai, brens ofes amo leta ta a abia. Una leta lalonai na Gilead Skuli ena aplikeisen fom haida e uda! Barbara ida ese una a ḡuriḡurilaia, bena fom a hahonudia bona brens ese e makaia dinana ai a siaidia. Hua faiv muridiai,  ai na Brooklyn, New York ala, Gilead Skuli ena klas namba 38 ai hua 10 baia skuli.

Gilead Skuli ai, ai na Dirava ena Hereva, ena orea, bona tanobada heḡeḡemadai tadikaka taihu edia ḡaukara goadagoada sivaraidia e hadibadimaiva. Ai laḡanimai na 20 heḡereḡerena, bona emai klas lalonai ai na stiuden ma haida edia amo ḡau momo a diba. Na abia hahenamona ta na, dina ta ta ai lau na Tadikaka Fred Rusk, emai instructor ta, ida na ḡaukara hebouva. Ia amo na dibaia ḡauna ta na, nega iboudiai na henimu sisibadia na Baibul ena hereva heḡereḡerena. Emai skuli lalonai tok e heniva tadikakadia haida na Nathan Knorr, Frederick Franz, bona Karl Klein. Danu ai ese Tadikaka A.  H.  Macmillan ena manau karana amo ḡau momo a diba. Iena tok amo ai ese laḡani 1914 ela 1919 ai e vara hahetoho lalodiai, Iehova ese ena taunimanima e gimadia dalana a lalopararalaia.

Skuli dokonai, Tadikaka Knorr ese lau bona Barbara e hamaoromai, ai na Africa ena hanua ta, Burundi ma be siaimai laomu. Haraḡa herea ala Betele laibri, badina a urava Yearbook ai baia itaia Burundi ai pablisa namba be hida. A hoa badina Burundi ena pablisa nambana ta asia davaria! Oibe, ai na haroro ḡaukara do se hekara gabuna ta baiala. Lalomai na e hekwarahi bada herea! To, a ḡuriḡuri murinai, lalomaino a abia.

Emai asainmen matamatana ai, ḡau momo na matamata ai emai ai​—weda, kastom bona gado. Ai na French gado baia dibaia. Danu a hekwarahiva emai noho gabuna ta baia davaria. A kau bena dina rua muridiai, Gilead ai a skuli hebou tadikakana ta, Harry Arnott, na ena asainmen gabuna Zambia baine lou lao lalonai, ai e vadivadimai. Ia ese e durumai apatmen ta a davaria, bona una apatmen na emai misinari rumana ginigunana ai ela. To se daudau, gavamani taudia ese ai na daḡedaḡe henimai matamata, idia na asi dibadia Iehova ena Witnes be daidia. Emai asainmen na moalelaiava, to gavamani taudia ese e hamaoromai una gabu ai na basia noho bema ai na asi emai work permit. Madi, una gabu a rakatania bona ala Uganda.

Ai na asi emai visa dainai a gariva Uganda baiala, to Iehova enai a tabekau. Canada tadikakana ta, Uganda ai hesiai ḡaukara e karava  ese emai hekwakwanai na immigration officer ta enai e herevalaia. Bena una officer ese e hamaoromai, ai na hua haida baia noho diba ela bona una tano ai emai permit baia abia. Una e vara ḡauna ese e hahedinaraia Iehova ese ai na e durumaiva.

Uganda ai e vara ḡaudia na idau Burundi amo. Unuseniai Witnes taudia na 28 bona idia ese haroro gaukara na e karaiava. Teritori ai, English gado ai e herevava taudia momo a davaridia. To gabeai a laloparara, kamonai taudia baia durudia bae goada totona, edia gado ta baia dibaia na namo. Ai na siti badana Kampala ai a haroro matama, bona unuseniai momo na Luganda gado e ḡaukaralaiava, una dainai lalomai a hadai una gado baia dibaia. Laḡani haida muridiai, ai ese una gado a dibaia namonamo, bona una ese e durumai emai haroro ḡaukara a karaia namonamo! Ai ese emai Baibul stadi edia dabu lauma dalanai a lalopararalaia namonamo. Bona idia danu ese edia hemami korikori na emai ai e gwaurai hedinaraiva.

Taunimanima a durudiava hereva momokani e dibaiava neganai, a moaleva. Danu emai moale e habadaia ḡauna ta na, ai na e noimai una tano ai seket ḡaukarana baia karaia. Kenya brens ena hahekau henunai, Kenya ena gabu momo ala bona spesol painia bae siaidia gabudia a tahuva. Nega momo, Iehova ena Witnes se dibadia taudia ese mai moaledia ida e abimai daeva bona emai aniani danu e heḡaeḡaelaiva.

Gabeai, lau na ma loaloa idauna ta na karaia. Kampala ai, trein ai na gui bena dina rua a heau ela bona Kenya edia bouti abi gabuna, Mombasa ai na kau. Bena unuseniai bouti ai na gui bona Seychelles nala, una na motumotu ta Indian Ocean ai bona grup ta na unuseniai. Gabeai, laḡani 1965 ela 1972 ai, Barbara ese nega momo e bamoguva Seychelles a vadivadiava. Una neganai, pablisa na rarua hona unuseniai e nohova, to gabeai grup ta e hekara, bena gabeai una grup na kongrigeisin ai ela. Egu seket ḡaukarana ai Eritrea, Ethiopia, bona Sudan tadikakadia na vadivadi henidia.

Uganda ai, ami oreana ta ese gavamani e biaguava. Una negai e vara hahegari karadia ese e hagoadagu ina aonega herevana baina badinaia totona: “Kaisara ena, Kaisara ba henia.” (Mar. 12:17) Nega ta ai, Uganda ai e nohova idau tano taudia iboudiai e hamaorodia edia gabu kahikahina ai e nohomu police steisen baela bona ladadia bae rejista. Ai na maoromaoro edia hereva a badinaia. Dina haida muridiai, lau bona misinari ma ta na motuka amo Kampala a lao heniava lalonai, police ofesa ese e hastopumai. A gari dikadika! Idia na e gwauva ai na spai taumai bona police steisen e laohaimai, unuseniai mai manaumai ida a hamaorodia ai na misinari taumai. A hadibadia ai ladamai na vada a rejista police ediai, to asie urava emai hereva bae kamonai. Bena e arestimai bona emai misinari rumana badinai e nohomu police steisen e laohamai. A moale dikadika badina police ofesa ta, ai ladamai a rejista neganai e itamai tauna, ese toamai e kara bena police taudia e hamaorodia bae ruhamai!

Unu negadiai, ai na nega momo a gariva badina ami taudia ese roadblock e karava, bona e inu kekerova soldia taudia ese dalamai e kouva. To, hanaihanai a ḡuriḡuriva  bona e kahumai negeva negadiai lalomaino a abiava. To madi, laḡani 1973 ai gavamani ese misinari iboudiai e haḡanidia Uganda bae rakatania.

Ai na asainmen ma ta a abia, West Africa ai Côte d’Ivoire baiala. Ai na sensi badadia ma haida baia kara. Ai ese noho dalana matamatana baia dibaia, French gado ai baia hereva bona tano idauidau amo ema misinari taudia ida baia ḡaukara hebou! To, a mamia Iehova ese ai na e hakaumaiva, badina kudou-maoro taudia na haraḡa herea sivarai namona e kamonaiava. Iehova a abidadama heniava dainai a itaiava ia ese emai dala na e hamaoromaorodiava.

Se daudau Barbara na kensa gorere e abia. Ena be nega momo Europe ala Barbara ena treatment baine abi totona, to laḡani 1983 ai a laloparara ai na vada dia heḡereḡere Africa ai emai asainmen karaia. Taumai raruosi a lalohisihisi!

London Betele ai a nohova neganai, Barbara ena gorere na e bada, bona se daudau madi e mase. Betele famli ese e hagoadamai bada. Tadikaka ta adavana ida ese e durugu bada, hanaihanai Iehova enai baina tabekau totona. Gabeai, lau ese Betele ai commuter taihuna ta na hedavari henia, ia na guna spesol painia ḡaukara e karaiava bona ia ese Iehova na e lalokau henia badava. Laḡani 1989 ai, lau bona Ann na a headava, una nega amo ema bona hari, ai raruosi na London Betele a ḡaukaramu.

Laḡani 1995 ela 2018 ai, na moalelaia hahenamona ta na, hedkwota ena gwaukau tauna ai nala (guna e gwauraiava zone overseer), bona tano 60 mai kahana na vadivadidia. Unu vadivadi ta ta lalodiai, na itaia Iehova ese ena hesiai taudia na e naridiamu, herevana dahaka hekwakwanai e davarimu.

Laḡani 2017 ai, ai na Africa a vadivadia lou. Na moale badina Ann na laohaia Burundi bona a hoa dikadika badina unuseniai momo herea na hereva momokani lalonai e vareai! Laḡani 1964 ai ruma-ta-ruma-ta haroro ḡaukara na karaiava gabunai, hari na Betele ruma namona ta vada e haginia, bona una tano ai pablisa iboudiai na 15,500 mai kahana.

Laḡani 2018 ai, baina vadivadidia tanodia edia lista na abia neganai na moale dikadika. Una lista ai Côte d’Ivoire tanona danu e hetore. Abidjan taonina ai a kau neganai, una vaitani egu hanua na lou lao. Betele ai e nohomu taudia edia telefon namba listana na itaia neganai, emai daiutu badinai lau mai dibagu tauna ta ladana na itaia, una na Sossou. Na helalotaomu, Abidjan ai na nohova neganai, ia na city overseer. To lasi, gabeai na diba una ia natuna, ladana danu Sossou.

Iehova ese ena gwauhamata na e badinamu. Hekwakwanai idauidau lalodiai na itaia Iehova enai baita tabekaumu neganai, ia ese iseda dala na be hamaoromaorodiamu. Hari, ai na a uramu se dokomu dalana baia badinaia, badina tanobada matamatana ai una dala diarina na be bada hereamu.​—Her. 4:18.