1. Dahaka badi ta dainai Iehova ena taunimanima na e lalotamonamu?

TA MOALEMU ita na Iehova ena ruma bese kahana ta. Dahaka dainai lalomaino bona lalotamona ai ta nohomu? Badi ta na, ita iboudai ta hekwarahimu Iehova ese e atoa kwara dagina baita matauraia. Baita gwau dibamu, kwara dagina e heaumu dalana baita lalopararalaia namonamomu neganai, una ese eda lalotamona karana be hagoadaiamu.

2. Ina stadi ai, ededia henanadai baita haerelaimu?

² Ina stadi ese be hahedinaraiamu kongrigeisin lalonai be daika ena kwara dagina baita matauraia. Danu ini henanadai baita haerelaimu: Taihu edia maduna be dahaka? Momokani tadikaka iboudiai be taihu iboudiai kwaradia, a? Elda taudia ese kongrigeisin ai kwara dagina bae ḡaukaralaia dalana be, tau ese ruma bese lalonai adavana bona natuna ediai e ḡaukaralaiamu heḡereḡerena, a? Ginigunana, taihu baita lalodia karana aita herevalaia.

3. Iseda taihu edia ḡaukara baita lalodia bada totona, dahaka ese ita baine duruda?

³ Iseda taihu na ta lalodia badamu badina be edia ruma bese e reḡudiamu, sivarai namona e harorolaiamu, bona kongrigeisin e duruamu. Iehova bona Iesu ese taihu e lalodia badamu dalana baita laloa. Danu, Paulo ese taihu e lalodia bada dalana amo heduru baita abimu.

4. Baibul ese ede e hahedinaraia tomamu Iehova ese ha’hine bona tatau na e lalodia badamu?

⁴ Baibul ese e hahedinaraiamu Iehova ese ha’hine bona tatau na e lalodia badamu. Heḡereḡere, aposetolo edia negai,  Iehova ese lauma helaḡa na ha’hine bona tatau e henidia, unu amo idia na hoa karadia idauidau e karava, heḡereḡere gado idauidau ai e herevava. (Apos. 2:1-4, 15-18) Dirava ese ha’hine bona tatau na lauma helaḡa amo e horodia, Keriso ida bae lohia. (Gal. 3:26-29) Danu, ha’hine bona tatau na tanobada ai mauri hanaihanai ahuna be abiamu. (Apok. 7:9, 10, 13-15) Ma danu, tatau bona ha’hine ese haroro bona hahediba ḡaukarana e karaiamu. (Mat. 28:19, 20) Heḡereḡere, Baibul bukana Aposetolo Edia Kara ai taihu Priskila sivaraina baita duahiamu​—ia bona adavana, Akula, raruosi ese aonega tauna Apolo enai Dirava ena dala e hadibalaia maoromaoro.​—Apos. 18:24-26.

5. Luka 10:38, 39, 42 ai tame duahia, Iesu ese ha’hine be ede e matauraidia tomava?

⁵ Iesu ese ha’hine na e matauraidiamu. Ia ese Farisea taudia na se tohotohodiava​—Farisea taudia ese ha’hine na ḡau ta ai asie halaodiava, o pablik ai ha’hine na asie hereva henidiava, o ha’hine ida Dirava ena Hereva na asie herevalaia hebouva. To, Iesu ese hereva momokani badadia na ha’hine bona tatau ida e herevalai hebouva. * (Luka 10:38, 39, 42 ba duahi.) Ia ese haroro ḡaukara e karaiava negadiai, ha’hine ese danu ia na e bamoava. (Luka 8:1-3) Bona Iesu ese ha’hine amo aposetolo e hadibadia ia na mase amo e tore isi.​—Ioa. 20:16-18.

6. Aposetolo Paulo be edena dalai e hahedinaraia ha’hine na e matauraidiava?

⁶ Aposetolo Paulo ese Timoteo e hadibaia ha’hine baine matauraidia. Paulo ese Timoteo e hadibaia “hahine badadia ba hereva henidia sinamu na heto [bona] eregabe hahinedia ba hereva henidia taihumu na heheto.” (1 Tim. 5:1, 2) Ena be Paulo na Timoteo e duruava, to danu mai dibana Timoteo na sinana bona tubuna hahinena ese “revareva helaḡadia” amo e hadibaia guna. (2 Tim. 1:5; 3:14, 15) Paulo ese Roma taudia e tore henidia neganai, ia ese taihu ladadia e tore hedinarai bona e hanamodia. Bona ia ese taihu edia ḡaukara namodia dainai e tenkiu henidia.​—Roma 16:1-4, 6, 12; Fili. 4:3.

7. Ededia henanadai edia haere baita diba be namo?

⁷ Paragraf matamadiai eme hahedinaraia Baibul na se gwa tadikaka ese taihu e hereadia. Iseda taihu ese kongrigeisin na e durua namonamomu, bona elda taudia na e moalemu badina taihu edia heduru dainai kongrigeisin na maino bona lalotamona ai e noho. To, namona na ini henanadai haida edia haere baita diba: Dahaka dainai Iehova ese taravatu e atoa, nega haida taihu ta ese kwarana baine koua na namo? Bema tadikaka sibodia ese elda bona ministerial servant edia ḡaukara bae karaia na maoro, anina be unu tadikaka iboudiai be kongrigeisin ai taihu iboudiai kwaradia, a?

8. Efeso 5:23 ai tame duahia, tadikaka iboudiai be taihu iboudiai kwaradia, a? Anina ba herevalaia.

⁸ Tadikaka iboudiai be kongrigeisin ai taihu iboudiai kwaradia, a? Haere na, lasi. (Efeso 5:23 ba duahia.) Ruma bese ai, hahine kwarana na ia adavana. Sina ta kwarana na dia ia natuna merona, herevana una mero na e bapatiso. (Efe. 6:1, 2) Bona kongrigeisin ai, elda edia siahu na mai hetoana tadikaka taihu ediai. (1 Tes. 5:12; Heb. 13:17) Herevana single taihu ta na tamana o sinana ida se nohomu be edeheto? Ia ese tamana o sinana na dounu baine matauraidia, herevana ia kwarana na dia ia  tamana. Bona una taihu ese elda taudia baine matauraidia na namo, to danu, kongrigeisin ai tatau bona tadikaka heḡereḡeredia, ia kwarana na tamona mo, tauna binai, Iesu.

9. Dahaka dainai nega haida taihu ese kwaradia bae kou na namo?

⁹ Iehova na e uramu kongrigeisin na baine heau namonamo. Una dainai, ia ese Iesu e abia hidi, tatau iboudiai kwaradia ai e halaoa. Bona Dirava ese tatau e abidia hidi, kongrigeisin ai bae hahediba eiava tomadiho ḡaukaradia bae gunalai. To Dirava ese taihu e taravatudia, kongrigeisin ai basie hahediba o tomadiho ḡaukaradia ta basie gunalai. (1 Tim. 2:12) Bema badi ta dainai tadikaka ta ese vaevae e karaiamu ḡaukarana ta na taihu ese baine karaia, ia ese Iehova ena taravatu baine badinaia, ḡauna binai, ia ese kwarana baine koua na namo. * (1 Kor. 11:4-7) Iehova ese taihu e noidiamu kwaradia bae kou, anina na dia idia e hahemaraidiamu, lasi, to ia na e uramu ia ese siahu e henidia tadikakadia na taihu ese bae matauradia. Hari, ina henanadai mani aita haerelaia: Elda bona ruma bese kwaradia edia siahu be heḡereḡere, eiava?

10. Dahaka dainai nega haida elda na be uramu kongrigeisin totona taravatu baine ato?

¹⁰ Elda taudia ese Keriso bona “mamoe” na e lalokau henidiamu​—Iehova bona Iesu na unu elda e noidia unu mamoe bae reḡudia. (Ioa. 21:15-17) Nega haida, reana badi namona ta dainai elda taudia na be laloamu kongrigeisin ai ia na tama ta na heto. Una dainai ruma bese kwarana ese taravatu haida e atomu ena ruma bese baine  gimadia heḡereḡerena, elda danu Dirava ena mamoe igimadia taravatudia e atomu. Bona nega haida tadikaka bona taihu na elda taudia be hamaorodiamu idia totodia abi hidi bae kara. To kongrigeisin lalonai elda taudia bona ruma bese kwaradia edia siahu be heḡereḡere, a?

11. Edena dalai ruma bese kwarana ena ḡaukara na elda tauna ena ida taidia heḡereḡere?

¹¹ Paulo ese e hahedinaraia, ruma bese kwarana ena ḡaukara haida na elda tauna ta ena ḡaukara ida taidia heḡereḡere. (1 Tim. 3:4, 5) Haheitalai binai, Iehova na e uramu ruma bese taudia ese tama bona sina eredia bae kamonai. (Kol. 3:20) Bona Dirava na e uramu kongrigeisin taudia ese elda taudia eredia bae kamonai. Iehova na e uramu ruma bese kwaradia bona elda taudia ese e naridiamu taudia na bae durudia lauma dalanai bae goada. Danu, idia ese idia henudiai e nohomu taudia na bae lalokau henidia. Bona ruma bese kwaradia e karamu heḡereḡeredia, hekwakwanai negadiai, elda ese e naridiamu taudia bae durudia be namo. (Iak. 2:15-17) Danu, Iehova na e uramu elda taudia bona ruma bese kwaradia ese ma haida bae durudia iena taravatu iboudiai bae badina. Bona e hadibadia Baibul ai e tore ḡaudia sibodia mo bae badina.​—1 Kor. 4:6.

12-13. Roma 7:2 ai tame duahia, ededia dalai ruma bese kwarana ena ḡaukara haida na elda tauna ta ena ḡaukara ida se heḡereḡere?

 ¹² To danu, elda tauna ta ena ḡaukara haida na ruma bese kwarana ena ḡaukara ida se heḡereḡere. Haheitalai binai, Iehova ese elda taudia na judge o hahemaoro ḡaukarana e henidia, anina binai, asie helalo-kerehaimu kara dika taudia na idia ese kongrigeisin amo bae kokia diba.​—1 Kor. 5:11-13.

¹³ To danu, Iehova ese ruma bese kwarana e henia ḡaukaradia haida na elda taudia na se henidia. Haheitalai binai, Iehova ese ruma bese kwarana na maoro e henia taravatu idauidau baine ato, bona ena ruma taudia baine hamaorodia unu taravatu bae badina. (Roma 7:2 ba duahia.) Heḡereḡere, tama na mai ena maoro taravatu baine ato, hanuaboi ai natuna be dahaka taim ai ruma baine lou henia na namo. Bema natu ta ese una taravatu basine badinaia, tamana na mai ena maoro natuna baine matahakani henia. (Efe. 6:1) To, lalokau ruma bese kwarana na abi hidi ta do se kara neganai, adavana ida be herevahereva gunamu badina idia na tauani “tamona.” *​—Mat. 19:6.

14. (a) Mareko 10:45 heḡereḡerena, dahaka dainai Iehova ese Iesu e abia hidi kongrigeisin kwarana ai bainela na maoro? (b) Gavanin Bodi ena ḡaukara be dahaka? (Maua ladana, “ Gavanin Bodi Ena Maduna,” ba itaia.)

¹⁴ Iehova na mauri davana amo kongrigeisin taudia bona taunimanima iboudiai e hoidia. (Mareko 10:45 ba duahia; Apos.  20:28; 1 Kor. 15:21, 22) Una dainai, Iesu, mauri davana e heni tauna, na kongrigeisin kwarana ai e halaoa na maoro. Iesu na ita kwarada dainai, ia na mai ena maoro ita ta ta, ruma bese, bona kongrigeisin totodia taravatu baine ato bona baine haḡanida baita badina. (Gal. 6:2) To Iesu na dia taravatu mo e heni. Ia na ita ta ta e ubudamu bona e lalokau henidamu.​—Efe. 5:29.

15-16. Taihu Marley bona tadikaka Benjamin edia hereva amo dahaka o dibamu?

¹⁵ Bema taihu na Keriso ese idia igunalaidia totona e abidia hidi taudia edia taravatu bae badina, e hahedinaraiamu idia na Keriso e matauraiamu. United States ai, taihu momo na taihu Marley ena hereva ai e lalotamonamu. Ia na ini e gwau toma: “Lau na headava hahinena ta bona taihu ta kongrigeisin lalonai dainai na moalemu. Hanaihanai na hekwarahimu, Iehova ese e atoa kwara dagina baina matauraia bona lalohadai maorona baina abia. To adavagu bona kongrigeisin tadikakadia ese e durugumu, badina e matauraigumu bona e hahedinaraiamu na karamu ḡaudia na e lalo badamu.”

¹⁶ Tadikaka ese taihu e matauraidiamu bona e hanamodiamu neganai, e hahedinaraiamu kwara dagina na e lalopararalaiamu. England ai, tadikaka Benjamin na e gwa: “Hebou ai taihu edia haere na kamonaimu bona stadi eiava haroro ḡaukara ihanamona daladia e herevalaimu neganai, idia amo ḡau momo na dibamu. Na laloamu idia e karamu ḡaukaradia na mai anidia bada.”

17. Dahaka dainai kwara dagina ena ḡaukara baita lalopararalaia bona baita matauraia?

¹⁷ Bema kongrigeisin lalonai tatau, ha’hine, ruma bese kwaradia, bona elda ese kwara dagina ena ḡaukara be lalopararalaiamu bona be matauraiamu, kongrigeisin na maino ai be nohomu. Bona mai anina bada ḡauna na ita ese eda lalokau guba Tamana, Iehova, baita imodaiamu.​—Sal. 150:6.