1-2. (a) Dahaka dainai hari ina negai momo ediai na auka siahu taudia bae abidadama henidia? (b) Ina atikol ai dahaka baita herevalaimu?

 HARI ina negai taunimanima momo ediai na auka siahu taudia bae abidadama henidia. E itaiamu taravatu e karamu taudia bona gavamani ese taḡa bona siahu taudia mo e hanamodiamu, to ogoḡami taudia be asie hahemaoro henidia maoromaoromu. Baibul ese una na e hahedinaraia ḡoevaḡoeva, e gwa: “Taunimanima haida ese bamodia e biagudiamu bona e hahisidiamu.” (Koh. 8:9) Danu, tomadiho igunalaina taudia haida danu kara kereredia e karamu, bena haida ese Dirava na da asie abidadama heniamu. Una dainai, ta ida Baibul ta stadilaiamu neganai, nega haida baita hekwarahimu baita durua Iehova bona ena tanobada oreana e gunalaiamu taudia baine abidadama henidia.

² To momokani, dia Baibul stiuden mo ese Iehova bona ena orea bae abidadama henidia na namo. Laḡani momo hereva momokani ai ta noho tauda ese danu ina na basita laloaboio, Iehova ena dala na nega iboudiai mamaoro. Nega haida, ḡau haida be varamu dainai eda abidadama na reana be tohoamu. Ina atikol ai eda abidadama be tohoamu ḡaudia toi baita herevalaimu: (1) Baibul sivaraidia haida ta duahimu neganai, (2) Iehova ena orea amo hahekau herevadia ta abimu neganai, bona (3) vaira negai hahetoho baita abimu neganai.

3. Edena dalai Baibul sivaraidia haida ese eda abidadama Iehova enai be tohoamu?

 ³ Dirava ena Hereva ta duahiamu neganai, Iehova ese taunimanima haida e kara henidia daladia bona abi hidi haida e  kara badidia baita henanadailaimu. Heḡereḡere, Numera bukana ai, Israel tauna ta na Sabati dinanai au e gogo dainai Iehova ese e hamasea sivaraina baita duahiamu. Samuel bukana iharuana ai, ta diba laḡani hanred momo muridiai, ena be King David na e heudahanai bona e ala-ala to Iehova ese ena dika e gwauatao. (Num. 15:32, 35; 2 Sam. 12:9, 13) Reana baita laloamu, ‘David na e ala-ala bona e heudahanai to dahaka dainai Iehova ese ena dika na e gwautao, a hari Israel tauna ma ta ena be vaitani ena kerere na dia bada to e hamasea?’ Una henanadai baita haerelaia totona, Baibul ta duahiamu lalonai baita lalodia tao ḡaudia toi mani aita herevalai.

4. Edena dalai Genese 18:20, 21 bona Deuteronomi 10:17 ese eda abidadama Iehova ena hahemaoro karana ai e hagoadaiamu?

⁴ Baibul ese sivarai ta ena kaha maraḡimaraḡidia iboudiai na se herevalai. Heḡereḡere, ta dibamu David na mai kudouna ibounai ida ena kara amo e helalo-kerehai. (Sal. 51:2-4) To Sabati taravatuna e utua tauna be taunimanima ede bamona? Ia e karaia karana amo e helalo-kerehai, a? Guna Iehova ena taravatu e utudia, a? Guna e abi hahediba herevadia be se kamonai o e dadaraidia, a? Baibul ese unu na se herevalai. To, ina baita diba na namo: Iehova na “asi ena kara dika.” (Deu. 32:4) Ia na ḡau iboudiai e tahu namonamomu bena hahemaoro e karamu​—dia haida edia hereva o taunimanima toadia, eiava hahemaoro e hagagevaiamu ḡauna ma ta dainai hahemaoro e karamu. (Genese 18:20, 21; Deuteronomi 10:17 ba duahi.) Iehova bona ena dala baita dibadia namonamomu neganai, baita abia dae momokanimu iena hahemaoro na mamaoro. Ena be Baibul sivaraina ta dainai be varamu henanadaidia edia haere na dia horanai baita abimu, to eda Dirava na mai dibada namonamo dainai ta diba momokanimu “ena dala iboudiai na mamaoro-mamaoro.”​—Sal. 145:17.

5. Ita na kara dika tauda dainai, edena dalai una ese eda hahemaoro maoromaoro karana baine hadikaia diba? (Maua ladana “ Kara Dika ese Hahemaoro Maoromaoro E Hakerereamu” ba itaia danu.)

⁵ Ita na kara dika tauda dainai, una ese eda hahemaoro maoromaoro karana be hadikaiamu. Dirava ese ia ida-idana ai e karada dainai, baita uramu taunimanima ese ma haida na bae kara henidia namonamo. (Gen. 1:26) To ita na  dia ḡoevadae dainai, baita hahemaoro kerere dibamu, ena be ta laloamu sivarai iboudiai na mai dibada. Heḡereḡere, Iona na se moale Iehova ese Nineva taudia e bogadia hisi neganai. (Iona 3:10–4:1) To, mani e vara ḡauna a laloa. Nineva taudia 120,000 na e helalo-kerehai dainai e mauri! Dokonai ta diba Iona ese ena kara baine haidaua na namo, dia Iehova.

6. Dahaka dainai Iehova ese ita edai ena kara badidia baine gwaurai hedinarai na asi anina?

⁶ Iehova ese taunimanima ediai ena kara badidia baine gwaurai hedinarai na asi anina. Momokani, Iehova ese idaunegai ena hesiai taudia na se koudiava, ia e karava ḡaudia o baine kara ḡaudia ai edia lalohadai bae gwaurai hedinarai. (Gen. 18:25; Iona 4:2, 3) Bona nega haida, ia ese e karava ḡaudia na e herevalaiva. (Iona 4:10, 11) To, Iehova ese ena kara badidia ita baine hamaoroda na asi badina. Ia na ita e Havarada Tauna dainai, kara ta do se karaia o baine karaia murinai ediai gwaumaoro baine abi na asi anina.​—Isa. 40:13, 14; 55:9.

7. Edena hahetoho baita davaria dibamu, bona dahaka dainai?

⁷ Ita na mai kudouda idoinai ida ta abia daemu Iehova ena kara na nega iboudiai mamaoro. To reana edai na be aukamu, ia ese e abidia hidi taudia baita abidadama henidia. Reana baita lalomu, Iehova ena orea e gunalaiamu taudia be Iehova ena dala e badinaiamu eiava sibodia edia dala e badinamu. Baibul negadiai e nohova taudia haida danu unu e lalo tomava. Mani  paragraf 3 ai tame herevalai haheitalaidia aita lalodia. Sabati taravatuna e utua tauna varavarana ta na reana bema lalo, momokani Mose be Iehova ena lalohadai e tahua guna bena una tau ihamasena herevana e gwauraia, eiava. Bona David ida e heudahanai hahinena adavana Uria, Hiti tauna, turana ta na reana bema lalo, David na ena king dagina e ḡaukaralaia dainai asie hahemaoro henia. To baita diba ḡauna na ina, Iehova na basita abidadama henia dibamu bema ia ese ena tanobada oreana igunalaina totona e abidia hidi bona e abidadama henidiamu taudia na basita abidadama henidiamu.

8. Aposetolo edia Kara 16:4, 5 ai e herevalaia sivaraina bona hari ina negai Kristen kongrigeisin e ḡaukaramu dalana be edena dalai e heḡereḡere?

⁸ Hari ina negai Iehova ese ena orea tanobada ai na “hesiai tauna mai ena abidadama bona aonega” amo e gunalaiamu. (Mat. 24:45, NWT) Aposetolo taudia edia negai gavanin bodi heḡereḡerena, ina hesiai tauna ese tanobada ibounai lalonai Dirava ena taunimanima e naridiamu bona hahekau herevadia na elda taudia e henidiamu. (Aposetolo edia Kara 16:4, 5 ba duahia.) Bona kongrigeisin ai bae badina totona, elda taudia ese unu hahekau herevadia na e gwaurai hedinaraimu. Bema orea bona elda taudia amo ta abimu hahekau herevadia baita badinamu, baita hahedinaraiamu ita ese Iehova ena dala na ta abia daemu.

9. Edena negai edai na be aukamu elda taudia ese be karaiamu abi hidina baita badinaia, bona dahaka dainai?

⁹ Nega haida edai na be aukamu, elda taudia ese e karaiamu abi hidina baita badinaia totona. Heḡereḡere, vanega laḡanidia ai, kongrigeisin bona seket momo na e haidaudia. Gabu haida ai, elda taudia ese pablisa haida e noidia Kingdom Hall ai helai gabudia daidiai, kongrigeisin ma ta baela diba. Bema bae noida kongrigeisin ma ta baita bamoa, reana edai na be aukamu turada bona eda ruma bese baita rakatanidia. Elda taudia be Dirava ese e hadibadia pablisa ta ta be ede bae siaidia lao, a? Lasi. Bona reana una dainai edai na be aukamu e henida hahekau herevana baita badinaia.  To Iehova ese elda taudia na e abidadama henidiamu abi hidi unu bamodia bae kara, bona ita danu idia baita abidadama henidia na namo. *

10. Heberu 13:17 ena hereva heḡereḡerena, dahaka dainai elda taudia ida baita ḡaukara hebou na namo?

¹⁰ Ena be elda taudia ese bae kara abi hididia na dia iseda ura heḡereḡerena, to dahaka dainai idia ida baita ḡaukara hebou bona baita durudia? Badina unu baita kara tomamu neganai, Dirava ena taunimanima edia lalotamona karana baita duruamu. (Efe. 4:2, 3) Kongrigeisin na be goadamu, bema kongrigeisin taudia iboudiai ese elda oreana e karaia abi hidina be badinaiamu. (Heberu 13:17 ba duahia.) Mai anina bada ḡauna na, baita hahedinaraiamu Iehova na ta abidadama heniamu, bema ita inarida totona ia ese e abidia hidi bona e abidadama henidiamu taudia ida baita ḡaukara heboumu.​—Apos. 20:28.

11. Dahaka ese baine duruda diba, unu amo elda ese e henimu hahekau dalana baita abidadama henia?

¹¹ Elda edia hahekau dalana na baita abidadama henia dibamu, bema baita helalotaomu idia na lauma helaḡa ena heduru e noia gunamu, bena kongrigeisin iduruna totona bae kara ḡaudia e herevalaimu. Danu, idia ese Baibul ena hahekau herevadia bona Iehova ena orea e haheauamu daladia e lalodia namonamo gunamu. Idia na e ura dikadikamu Iehova bae hamoalea bona ena taunimanima bae naridia namonamo. Ini abidadama tatau na mai dibadia edia maduna e huamu daladia daidiai Dirava ese be hahemaoro henidiamu. (1 Pet. 5:2, 3) Mani ina a laloa: Bese, tomadiho bona politikol dainai e pararamu tanobadana lalonai, Iehova ena taunimanima na mai lalotamonadia ida Dirava korikorina tamona e tomadiho heniamu. Iehova ese ena orea na e hanamoamu dainai, una na e varamu!

12. Elda taudia be dahaka bae lalo guna na namo, unu amo bae diba ta na e helalo-kerehai eiava?

¹² Iehova ese elda taudia na maduna badana e henidia, una na bae ḡaukara goada kongrigeisin baine ḡoeva. Bema Kristen tauna ta na kerere badana ta e karaia, Iehova na e uramu elda taudia na bae haeroa bema ia na kongrigeisin ai baine noho eiava lasi. Namona na bae tahua bema ia na ena kerere dainai e sori momokanimu eiava lasi. Reana be gwaumu ia na e helalo-kerehai, to e karaia karana be momokani de dadaraia, eiava? Lalona de hadaia una kerere ma basine karaia lou, a? Bema hebamo dikadia dainai una kerere e karaia, lalona de hadaia e hebamo henidiamu taudia baine dadaraidia, a? Elda taudia na Iehova e ḡuriḡuri heniamu, Baibul ena hereva heḡereḡerenai e vara ḡaudia e haeromu bona kerere tauna ese e karaia kererena e laloamu dalana e haeroamu. Una murinai abi hidi be karaiamu bema kerere tauna na kongrigeisin ai dounu baine noho eiava lasi. To badi haida daidiai kerere tauna na murimuri ai bae atoa na namo.​—1 Kor. 5:11-13.

13. Bema turada o varavarada ta na murimuri ai be atoamu, reana edena lalohadai baita abiamu?

¹³ Eda abidadama elda ediai be dahaka ese reana baine tohoa diba? Bema murimuri ai e atoa tauna na dia ita turada o varavarada ta, reana elda taudia ese e karaia abi hidina na baita abia dae haraḡamu. To bema da murimuri ai e atoa tauna na ita turada namona ta, reana una na basita abia daemu. Reana baita lalomu elda taudia ese ḡau iboudiai na asie haero namonamo, eiava baita lalomu idia be momokani Iehova ena dala heḡereḡerena hahemaoro e karaia eiava. Dahaka ese baine duruda diba lalohadai maorona baita abia elda taudia ese e karaia abi hidina ai?

14. Bema elda taudia ese ita turada o varavarada ta na murimuri ai bae atoa, dahaka baita laloatao na namo?

 ¹⁴ Baita helalotao, murimuri ai ta e atoamu karana na Iehova ese e atoa dalana bona una ese kongrigeisin be duruamu bona murimuri ai e atoa tauna danu. Bema se helalo-kerehai tauna na kongrigeisin ai dounu be nohomu, ia ese ma haida na baine hakaudia kerere diba. (Gal. 5:9) Danu, reana ena kerere ena bada na basine lalopararalaiamu, bona basine hekwarahimu ena lalohadai bona kara baine haidaudia, unu amo Iehova ena lalonamo baine abia lou. (Koh. 8:11) Bema elda taudia na abi hidi e karamu ta na murimuri ai bae atoa na namo, namona na baita abia dae idia ese una maduna na e laloa badamu. Idia na mai dibadia, idaunegai Israel ena hahemaoro taudia heḡereḡeredia, edia “hahemaoro [na] dia tau ta ena a Iehova ena.”​—2 Sis. 19:6, 7.

15. Dahaka dainai hari Iehova ena dala baita abidadama henia na mai anina bada?

¹⁵ Ina nega oromana dokona e kahikahimu lalonai, Iehova ena dala baita abidadama henia karana na mai anina bada. Dahaka dainai? Hisihisi badana lalonai, reana baita abimu hahediba herevadia be idaumu, ibadinadia na be aukamu, eiava dia mamaoro. Momokani, Iehova na dia guba amo ita ta ta be hereva henidamu. To hahediba herevadia na e abidia hidi taudia edia amo be henimu. Una na dia nega namona unu hahediba herevadia baita henanadailai, eiava baita hetahulai, baita lalo, ‘Ina be momokani Iehova ena amo, eiava e abidia hidi taudia na sibodia edia lalohadai e gwauraimu?’ Una mai anina bada negana lalonai, oi be ede bo kara tomamu? Haerena na hari Dirava ena orea e gunalaiamu taudia edia amo e maimu hahediba herevadia o lalomu dalana ese be hahedinaraiamu. Bema hari e henimu hahediba herevadia bo abi daemu bona bo badina haraḡamu, hisihisi badana ai danu unu bo kara toma dibamu.​—Luka 16:10.

16. Vaira negai, edena dalai eda abidadama Iehova ena hahemaoro karadia ai na be tohoamu?

¹⁶ Ita ese baita laloa ḡauna ma ta na​—ina nega oromana dokona ai Iehova ena hahemaoro karadia. Hari, ita na ta uramu Iehova asie hesiai heniamu taudia momo, varavarada danu, ese Iehova bae hesiai henia. To Aramagedono ai, Iehova na Iesu ena amo idia edia vaira negana abi hidina be karaiamu. (Mat. 25:31-33; 2 Tes. 1:7-9) Ita ese abi hidi na basita karamu, daidia be Iehova ese baine bogadia hisi bona daidia be lasi. (Mat. 25:34, 41, 46) Ita be Iehova ena hahemaoro karadia baita abidadama henidia, eiava unu hahemaoro karadia daidiai baita hekwakwanai, a? E hahedinaraia  ḡoevaḡoevamu, hari Iehova baita abidadama henia karana baita hagoadaia na namo, unu amo vaira negai ia baita abidadama henia momokani dibamu.

17. Ina nega oromana dokona ai, Iehova ena hahemaoro karadia amo dahaka namo baita davarimu?

¹⁷ Tanobada matamatanai Iehova ena hahemaoro murinai be varamu ḡaudia baita itamu neganai, baita abiamu hemamina mani a laloa. Tomadiho koikoi, mataḡaniḡani bisnes oreadia bona laḡani laḡani taunimanima e hahisidiamu gavamanidia iboudiai na be oremu. Gorere be oremu, ta basine buruka loumu, bona eda lalokau taudia na basie masemu. Satana bona ena demoni na laḡani 1,000 lalodiai be koudiamu. Edia gwau-edeede dainai e varamu dika iboudiai na be oremu. (Apok. 20:2, 3) Bena baita moale dikadikamu badina Iehova ena dala ta abidadama henidia dainai!

18. Numera 11:4-6 bona 21:5 ai, Israel taudia edia haheitalai amo dahaka ta dibamu?

¹⁸ Tanobada matamatana ai be varamu ḡaudia haida ese Iehova ena dala baita abidadama henia karana be tohoamu, a? Israel taudia na Aigupto ena iḡui amo e ruhadia murinai e vara ḡauna mani a laloa. Haida na e maumauva badina Aigupto ai e aniva aniani namodia e lalodiava bona Iehova ese e henidia anianina, mana, na asie ura. (Numera 11:4-6; 21:5 ba duahi.) Hisihisi badana be oremu neganai ita danu unu baita lalo tomamu, a? Ita na asi dibada tanobada ihaḡoevana bona paradaiso ai ihalaona ḡaukarana ena bada be ede bamona. Reana ḡaukara na bada herea bona reana matamanai edai na be aukamu. Ita be Iehova ese una negai be henidamu ḡaudia dainai baita maumaumu, a? Ina baita laloatao na namo, Iehova ese hari e henidamu ḡaudia baita lalo badamu neganai, vaira negai be henidamu ḡaudia danu baita lalodia badamu.

19. Ina atikol ena poin badadia be ede bo herevalai tomamu?

¹⁹ Iehova ena dala na nega iboudiai mamaoro. Una baita abia dae momokani na namo. Danu, Iehova ese e abidia hidi iena hahediba herevadia bae halasi taudia baita abidadama henidia. Iehova ese ena peroveta tauna Isaia amo e gwauraia herevana na basita laloaboio, eto: “Bema bo manaumu bona lau bo abidadama henigumu, bo goadamu.”​—Isa. 30:15, NWT.