BAIBUL negadiai, bema mero bona kekeni edia ruma bese na e lalotamonava idia raruosi na bae headava, mero ese kekeni davana na kekeni ena ruma bese e henidiava. Dava kara ai e ḡaukaralaiva ḡaudia haida na dava bada kohudia, animal eiava moni. Nega haida, mero na e ḡaukarava kekeni davana baine karaia, heḡereḡere Iakob na Rahela tamana enai laḡani seven e ḡaukara Rahela baine adavaia totona. (Gen. 29:17, 18, 20) Dahaka dainai unu e kara tomava?

Diba bada hahinena ta, Carol Meyers na e gwa: “Dava e karava badina kekeni ese tamana sinana idurudia karana, biru ḡaukaradia e karava ruma besedia ediai una na mai anina bada karana, na da basine karaiamu.” Danu, dava e karava badina na reana mero bona kekeni edia ruma bese edia hetura karana bae hagoadaia totona. Unu amo nega aukadiai bae heduru heheni diba. Dava kara ese e hamomokaniava kekeni na da e hemaoheni bona hari ia na da adavana ena henari bona heitatao henunai.

Dava e karava anina na dia kekeni na ḡau ta heḡereḡerena e hoiava o e hoihoilaiava. Buka ta Ancient Israel​—Its Life and Institutions na eto: “Israel ai moni eiava kohu na kekeni ena ruma bese e henidiava karana amo taunimanima na de dibava kekeni na da davana de heni. To, una dava e heniva na dia una kekeni e hoiava, to una na harihari ḡauna ta ia tamana sinana ediai.”

Hari, tano haida ai, dava kara na dounu e karamu. Kristen tama sina ese natudia kekenina dainai dava bae gwaurai neganai, namona na moni bada herea basie gwaurai, unu amo “taunimanima iboudiai ese edia lalo maoromaoro karana bae itaia” diba. (Fili. 4:5, NWT; 1 Kor. 10:32, 33) Unu amo moni basie “mata ḡaniḡani henia.” (2 Tim. 3:2) Danu, bema Kristen tama sina ese moni bada herea basie noimu, kekeni maohenina ese headava na basine duavaiamu ela bona dava monina ia enai baine heḡereḡere negana. Eiava ia na basine lalomu painia ḡaukara baine hadokoa, bena moni ḡaukarana baine karaia una dava badana baine heni totona.

Tano haida ai, dava kara na taravatu heḡereḡerenai e karaiamu. Gabu unu bamodiai, Kristen tama sina ese taravatu bae badinaia na namo. Dahaka dainai? Badina Dirava ena Hereva na e gwaumu Kristen taudia ese “lohia bae matauraidia” bona Dirava ena taravatu asie utumu taravatudia bae badina.​—Roma 13:1; Apos. 5:29.