1. Iesu ese ena hahediba ediai dokona negana be ede e herevalaia toma, bona e hamaorodia dahaka bae kara?

 IESU ena mase dinana e kahikahiva ai, iena hahediba hani na ia e nanadaia: ‘Tanobada dokona toana be dahaka?’ (Mat. 24:3) Unu hahediba na e urava bae diba Ierusalem bona ena dubu be edena negai bae ore. Iesu ena haere lalonai, ia na Ierusalem bona ena dubu bae ore negana mo se gwauraia, to hari ta nohomu negana “dokona” danu e gwauraia. Iesu ese una nega e herevalaia neganai, eto: “Una dina, una hora, ta asi dibana, guba anerudia na asi dibadia, Natuna danu asi dibana, a Tamana sibona mai dibana.” Bena ena hahediba iboudiai e hamaorodia, namona na ‘bae lalo maoromaoro’ bona ‘bae gima.’​—Mar. 13:32-37.

2. Dahaka dainai Iuda Kristen taudia bae gima na mai anina bada?

² Iuda Kristen taudia na bae mauri totona, bae gima na mai anina bada. Iesu ese ena hahediba e hamaorodia dahaka bae itaia, unu amo bae diba Ierusalem bona ena dubu ihadikadia negana vada e kau. Ia na eto: “Tuari oreadia ese Ierusalem bae koua heḡeḡe ba itaia, vada ba diba ia dokona vada eme kahira-kahira.” Una neganai, idia na Iesu ena hereva bae badinaia bona “ororo bae heau lao.” (Luka 21:20, 21) Roma taudia ese Ierusalem e hadikaia neganai, una hereva e badinaia taudia na e roho mauri.

3. Ina atikol ai dahaka baita herevalaimu?

 ³ Hari ita na nega dikana dokona lalonai ta nohomu. Una dainai ita danu baita lalo maoromaoro bona baita gima na namo. Ina atikol ai, ita ese tanobada ai e varamu ḡaudia ta itamu neganai lalohadai maorona baita abia, siboda nahuada baita toho, bona eda nega baita ḡaukaralaia namonamo daladia baita herevalaimu.

4. Dahaka dainai ta uramu hari e varamu ḡaudia ese peroveta herevadia e haḡuḡurumu daladia baita diba?

⁴ Badi namodia daidiai, ta uramu tanobada ai e varamu ḡaudia ese Baibul ena peroveta herevadia e haḡuḡurumu daladia baita diba. Heḡereḡere, Iesu ese bae vara ḡaudia e gwaurai, unu amo baita diba Satana ena nega dokona na e kahikahimu. (Mat. 24:3-14) Aposetolo Petro ese e hagoadadamu peroveta herevadia e ḡuḡurumu daladia baita haerodia namonamo, unu amo eda abidadama baine goada. (2 Pet. 1:19-21) Baibul bukana Apokalupo na ini hereva amo e matama: “Iesu Keriso ihahedinaraina herevana Dirava ese e henia, asi vanahana bae vara ḡaudia na ena hesiai taudia baine hamaorolaidia.” (Apok. 1:1) Una dainai, ta uramu tanobada ai e varamu ḡaudia bona Baibul ena peroveta herevadia e ḡuḡurumu daladia baita diba. Bona ta uramu ma haida ida unu baita herevalai.

5. Dahaka basita kara, to dahaka baita kara na namo? (Laulau danu ba itaia.)

⁵ Baibul ena peroveta herevadia ta herevalaimu neganai, bae vara ḡaudia na basita herevalai kava. Dahaka dainai? Badina asita uramu baita gwauraia ḡauna ta ese kongrigeisin ena lalotamona karana baine hadikaia. Heḡereḡere, baita kamonaimu tanobada lohiadia na be gwaumu hekwakwanai ta bae hamaoromaoroa bona maino bona noho namona bae havaraia. Una neganai, basita hereva kava, basitato una ese 1 Tesalonika 5:3 ena peroveta herevana e haḡuḡuruamu, to namona na Iehova ena orea ese e halasimu laloparara matamatadia baita badina. Eda herevahereva lalodiai, Iehova ena orea ese e halasimu pablikeisin ai e ato ḡaudia baita herevalaimu neganai, kongrigeisin taudia baita durudiamu “lalo tamona” ai bae noho.​—1 Kor. 1:10; 4:6.   

6. Petro Iharuana 3:11-13 amo dahaka ta dibamu?

⁶ Petro Iharuana 3:11-13 ba duahidia. Aposetolo Petro ese e durudamu Baibul ena peroveta herevadia ta lalodiamu neganai, lalohadai maorona baita abia. Ia ese e hagoadadamu Iehova “ena dina ena mai” baita naria. Dahaka dainai? Badina dia ta uramu Iehova ese Aramagedono baine mailaia ‘dinana bona horana’ baita diba, to ta uramu nega orena miana baita ḡaukaralaia, unu amo eda ‘kara bae helaḡa bona Dirava baita badinaia.’ (Mat. 24:36; Luka 12:40) Anina na, ta uramu kara namodia baita goadalai bona Iehova ena hesiai ḡaukara ai baita hahedinaraia ia na ta lalokau heniamu. Unu ta kara tomamu neganai, siboda nahuada baita toho na namo.

7. Edena dala ai baita hahedinaraia ita na siboda nahuada ta tohomu? (Luka 21:34)

⁷ Iesu ese ena hahediba e hamaorodia, dia tanobada ai e varamu ḡaudia mo nahuadia bae toho, to idia sibodia nahuadia danu bae toho. Una na Luka 21:34 ai e gwauraia. (Ba duahia.) Iesu na e gwa: “Nahuamui ba toho.” Nahuana e tohoamu tauna na ena hetura karana Iehova ida bae hadika ḡaudia daidiai e gimamu, bona ḡau haida e karamu unu baine dadaraidia totona. Unu amo ia na Dirava ena  lalokau lalonai baine noho.​—Her. 22:3; Iuda 20, 21.

8. Aposetolo Paulo ese Kristen taudia e hamaorodia dahaka bae kara?

⁸ Aposetolo Paulo ese Kristen taudia e hamaorodia nahuadia bae toho. Heḡereḡere, Efeso Kristen taudia e hamaorodia, eto: “Emui raka nahuana ba tohoa; aonega taudia heḡereḡeredia ai ba raka, dia kavakava taudia na heheto.” (Efe. 5:15, 16) Satana na e hekwarahimu eda hetura karana Iehova ida baine hadikaia totona, una dainai Baibul na e gwaumu Iehova ‘ena ura baita diba ḡoeva,’ bena Satana ena hahetoho idauidau baita dadaraidia diba.​—Efe. 5:17.

9. Iehova ena ura be ede baita diba toma?

⁹ Baibul ese eda hetura karana Iehova ida bae hadika ḡaudia iboudiai se hahedinarai. Nega momo ita na Baibul ese se herevalai ḡaudia ai abi hidi baita kara na namo. To abi hidi maorodia baita kara totona, namona na Iehova “ena ura” baita diba. Una baita karaia dalana na, hanaihanai Baibul baita stadilaia bona baita laloa dobu. Bona ena be baita karaia ḡauna ta ai taravatu ta na lasi, to Iehova ena ura baita lalopararalaiamu bona “Keriso darana” baita abiamu neganai, “aonega taudia heḡereḡeredia” baita rakamu. (1 Kor. 2:14-16) Dika ḡaudia haida be baita lalopararalai haraḡamu, a haida be lasi.

10. Ededia kara baita dadaraidia na namo?

¹⁰ Namona na heḡahusi herevadia o karadia, inuinu kekero, aniani momo, haida ihadikadia herevadia, daḡedaḡe moale karadia, bona ponografi i’itadia karana, bona ḡau unu bamodia baita dadarai. (Sal. 101:3) Ita inaida Diabolo na hanaihanai dala e tahumu, eda hetura karana Iehova ida baine hadikaia totona. (1 Pet. 5:8) Bema basita gimamu, Satana ese mama, koikoi, mataḡaniḡani, inai karana, hekokoroku, bona badu na darada bona kudouda ai be hadomu. (Gal. 5:19-21) Matamanai, baita lalomu unu na dia didika, to bema basita kokidia haraḡamu, poisin avana ta bamona be tubumu bona dika be havaraiamu.​—Iak. 1:14, 15.

11. Ita baine hadikada ḡauna ta be dahaka, bona dahaka dainai baita dadaraia?

¹¹ Ita baine hadikada ḡauna ta na hebamo dikadia. Mani ina haheitalai a laloa: Moni ḡaukara gabunai oi ida o ḡaukaramu tauna na dia Iehova ena Witnes. O uramu ia na baine laloa Iehova ena Witnes taudia na taunimanima namodia dainai, bo kara namo heniamu. Danu reana nega ta ta ai bo lansi heboumu. Basine daudaumu, oi na ia bo bamoa louloumu. Nega ta ta ai, ia ese matabodaḡa sivaraidia be gwauraimu, bona matamanai na basio uramu ba kamonai, to gabeai, bo uramu ba kamonai. Bena dina ta, ia ese be hamaoromumu ḡaukara murinai ba inuinu hebou, bona bo abia daemu. Taina ruana, iena lalohadai vada bo badinaiamu. Basine daudaumu, oi ese iena kara bo tohotohomu. Momokani, taunimanima iboudiai baita kara namo henidia bona baita matauraidia na namo, to baita helalotao hebamo dikadia ese eda kara namodia bae hadika diba. (1 Kor. 15:33) Iesu ena hereva heḡereḡerena bema siboda nahuada baita tohomu, Iehova ena taravatu asie badinamu taudia ibamodia karana baita dadaraiamu. (2 Kor. 6:15) Oibe, ita baine hadikada ḡauna na baita itaiamu bona baita dadaraiamu.

12. Iesu ena hahediba na nega dokona e nariava lalonai dahaka e kara?

¹² Iesu na e ura ena hahediba na nega dokona bae naria lalonai basie noho kava.  Una dainai ḡaukara ta e henidia. E haḡanidia sivarai namona na “Ierusalem ai bona Iudea idoinai bona Samaria kahana idoinai, ela bona tanobada heḡeḡe-madai ai bae harorolaia.” (Apos. 1:6-8) Una na ḡaukara bada hereana! Bona una ḡaukara e karaia dainai, edia nega na e ḡaukaralaia namonamo.

13. Dahaka dainai eda nega baita ḡaukaralaia namonamo? (Kolose 4:5)

¹³ Kolose 4:5 ba duahia. Nahuada baita toho totona, namona na eda nega ta ḡaukaralaiamu dalana baita haeroa namonamo. Ita iboudai edai ḡau haida na e “vara kavamu.” (Koh. 9:11) Bona asi dibada edena negai baita masemu.   

14-15. Eda nega be ede baita ḡaukaralaia namonamo toma? (Heberu 6:11, 12) (Laulau danu ba itaia.)

¹⁴ Eda nega na baita ḡaukaralaia namonamomu bema Iehova ena ura baita karaiamu bona eda hetura karana ia ida baita hagoadaiamu. (Ioa. 14:21) Namona na baita ‘gini tutuka-tutuka, basita marere, Lohiabada ena ḡaukara lalonai baita goada balaheni nega idoinai.’ (1 Kor. 15:58) Bena dokona baine kau neganai, herevana una na eda mauri dokona o ina nega dikana dokona, to basita lalohishisimu.​—Mat. 24:13; Roma 14:8.   

¹⁵ Hari ina negai, Iesu ese ena hahediba taudia na e hakaudiamu, unu amo tanobada  ibounai lalonai Dirava ena Basileia e harorolaiamu. Ia ese ena gwauhamata na e haḡuḡuruamu. Iehova ena orea amo Iesu ese haroro ḡaukara ikarana dalana e hadibadamu, bona una ḡaukara baita karaia totona iduruda ḡaudia e henimu. (Mat. 28:18-20) Namona na haroro bona hahediba ḡaukaradia baita goadalai bona Iehova ese ina nega oromana baine haorea negana ta nariamu lalonai baita gima. Heberu 6:11, 12 ena sisiba baita badinaiamu neganai, eda helaro na baita dogoatao aukamu “ela bona dokona.”​—Ba duahidia.   

16. Laloda baita hadai dahaka baita kara?

¹⁶ Iehova ese Satana ena nega oromana dikana baine haorea dinana bona negana na vada e abi hidi. Una dina baine kau neganai, Iehova ese ena Hereva lalonai e gwaurai peroveta herevadia na baine haḡuḡuru. To nega haida reana ta lalomu dokona na se mai haraḡamu. To, Iehova ena dina na “bainema, basine halahe!” (Hab. 2:3) Una dainai, namona na laloda baita hadai ‘Iehova baita haḡerea, ihamaurida Diravana baita naria.’​—Mika 7:7.