1. Edena nega ai, horoa Kristen taudia iboudiai na vada guba ai?

 LAḠANI momo gunadiai, Iehova ena taunimanima na e daradarava, ‘Horoa Kristen tauna ginigabena be edena negai guba be laomu?’ Bona e laloava Aramagedono tuarina murinai horoa taudia haida na dounu tanobada Paradaisona ai nega sisina bae noho. To, The Watchtower July 15, 2013 ḡauna amo ta diba, horoa taudia oredia tanobada ai na Aramagedono tuarina do se matama ai, bae dae guba.—Mat. 24:31.

2. Haida be edena henanadai e laloamu, bona ina atikol ai dahaka baita herevalaimu?

² Reana haida na be henanadaimu: “Hisihisi bada hereana” lalonai, Keriso ena “mamoe idaudia” mai edia abidadama ediai be dahaka be varamu? (Ioa. 10:16; Mat. 24:21) Hari ina negai, haida na e lalohekwarahimu badina e laloamu horoa taudia iboudiai be daemu guba neganai, idia na asi inaridia. Ina atikol ai Baibul sivaraidia rua baita herevalaimu. Haida na reana unu sivarai daidiai e lalohekwarahimu. To basie lalohekwarahi badidia danu baita herevalaimu.

DAHAKA BASINE VARAMU?

3-4. Haida be dahaka lalohadai e abimu bona dahaka dainai?

³ Haida na e laloamu, bema Gavanin Bodi na lasi idia ihakaudia, mamoe idaudia ese hereva momokani na bae rakatania diba. Reana unu e lalo tomamu badina na Baibul sivaraidia haida daidiai. Mani rua aita herevalai. Ginigunana na,  hahelaḡa tauna badana Iehoiada sivaraina. Ia na Dirava e abidadama heniava tauna ta. Ia bona adavana Iehosabea, ese mero maraḡina ladana Ioasa e abia mauri bona e durua king namona ai bainela. Iehoiada e mauriva lalonai, Ioasa na Iehova e badinaiava. To Iehoiada e mase murinai, Ioasa ese Iehova e rakatania, badina ia ese Iuda lohia dikadia e kamonai henidia.—2 Sis. 24:​2, 15-19.

⁴ Sivarai iharuana na, laḡani 200 C.E. ai e nohova Kristen taudia sivaraidia. Aposetolo Ioane ese Kristen taudia momo e durudia, Iehova e hesiai heniava lalonai bae haheauka totona. (3 Ioa. 4) Aposetolo ma haida heḡereḡeredia, ia na e ḡaukara goada, hahediba koikoi bona karadia amo kongrigeisin baine gimaia. (1 Ioa. 2:18; 2 Tes. 2:7) To Ioane e mase murinai, kongrigeisin ai momo ese unu hahediba hereva koikoidia bona karadia e badina dainai aposteit taudia ai ela. Gabeai, unu aposteit taudia ese kongrigeisin iboudiai lalodiai hereva koikoidia e hahedibalaiva bona kara kereredia na e abi daeva.

5. Horoa taudia be laomu guba neganai dahaka basine varamu?

⁵ O laloamu horoa taudia be laomu guba neganai, Keriso ena mamoe idaudia be Ioasa bona laḡani 200 C.E. ai e nohova Kristen taudia heḡereḡeredia Iehova be rakataniamu, a? Haerena na lasi! Ta dibamu horoa taudia guba be laomu neganai, mamoe idaudia na dounu Iehova be tomadiho heniamu, badina ia ese na be naridiamu. Dahaka dainai una ta abia daemu?

TOMADIHO ḠOEVANA NA ḠAU TA ESE BASINE HADIKAIAMU

6. Ededia nega idaudia toi baita herevalaimu?

⁶ Ena be vaira negai mauri na be auka hereamu, to dahaka dainai ta abia daemu, tomadiho ḡoevana na ḡau ta ese basine hadikaiamu? Badina Baibul ese e hahedinaraiamu, iseda nega na idau Israel besena edia nega bona laḡani 200 C.E. lalonai e nohova Kristen taudia edia nega amo. Mani unu nega toiosi aita herevalaidia: (1) Idaunegai Israel taudia edia nega, (2) laḡani 200 C.E. lalonai e nohova taudia edia nega, bona (3) iseda nega, o “ḡau iboudiai ihanamo-loudia negana.”—Apos. 3:​21, NWT.

7. Dahaka dainai Dirava e badinaiava Israel taudia na se lalomanoka, ena be haida na e gwau-edeede?

⁷ Idaunegai Israel taudia edia nega. Mose do se mase ai, ia ese Israel taudia e hamaorodia, eto: “Badina be lau dibagu, lauegu mase murinai umui na do ba kara havara, bona vada na haḡanilaimui daladia na ba rakatani.” (Deu. 31:29) Danu e hadibadia bema idia na bae gwau-edeede, idia na asi dibadia besedia bogaraḡidiai bae noho. (Deu. 28:​35, 36) Unu hereva e ḡuḡuru, a? Oibe. Laḡani hanred momo lalodiai, Israel taudia edia king momo na dala kererena e abia hidi bona Dirava ena taunimanima e hakaudia kerere. Una dainai Iehova ese e gwau-edeede taudia e dadaraidia bona pavapava ta se lohia lou. (Esek. 21:​25-27) To Dirava e badinaiava Israel taudia na se lalo-manoka, badina e itaia Dirava ese e gwaurai herevadia na e ḡuḡuru.—Isa. 55:​10, 11.

8. Dahaka dainai asita hoamu kongrigeisin lalonai aposteit karana na e bada herea?

⁸ Laḡani 200 C.E. lalonai e nohova taudia edia nega. Dahaka dainai ita na asita hoamu una negai kongrigeisin ai aposteit karadia na e bada herea? Badina Iesu ese una na e perovetalaia. (Mat. 7:​21-23; 13:​24-30, 36-43) Aposetolo Paulo, Petro bona Ioane ese e hamomokania, Iesu ena peroveta herevana na Kristen ginigunadia edia nega ai e ḡuḡuru matama. (2 Tes. 2:​3, 7; 2 Pet. 2:1; 1 Ioa. 2:18)  Bena laḡani 200 C.E. lalonai, aposteit oreana ese Kristen kongrigeisin e hadikaia. Bona una na, Babulono badana o tanobada idoinai tomadiho orea koikoidia iboudiai, ena orea badana ta ai ela. Oibe, Iesu ena peroveta herevana na vada e ḡuḡuru.

9. Edena dala ai Israel bona laḡani 200 C.E. ai e nohova Kristen taudia edia nega na iseda nega amo idau?

⁹ “Ḡau iboudiai ihanamo-loudia negana.” Idaunegai Israel bona laḡani 200 C.E. ai e nohova Kristen taudia edia nega na iseda nega amo idau. Baibul ese iseda nega be ede e herevalaia tomamu? E gwauraiamu ina nega dikana ena “dina gabedia.” (2 Tim. 3:1) To danu Baibul ese e hahedinaraiamu, ina nega na mai anina bada, bona baine hesiriu ela bona Mesia Basileiana ese taunimanima na ḡoevadae taudia ai baine halaodia bona tanobada na paradaiso ai baine halaoa. Una nega na e gwauraiamu “ḡau iboudiai ihanamo-loudia negana.” (Apos. 3:​21, NWT) Laḡani 1914 amo una nega e hematama. Una laḡani ai dahaka e vara? Guba ai, Iehova ese Iesu na King ai e halaoa. Ia na King David ena bese amo e abia hidi Lohia Tauna bona una nega amo e lohia matama. Danu se daudau tomadiho ḡoevana e haginia lou! (Isa. 2:​2-4; Esek. 11:​17-20) Tomadiho ḡoevana be ma bae hadikaia lou, a?

10. (a) Baibul ese tomadiho ḡoevana be ede e perovetalaia toma? (Isaia 54:17) (b) Dahaka dainai unu peroveta herevadia ese ita na e hagoadadamu?

¹⁰ Isaia 54:17 ba duahia. Mani ina peroveta herevana a laloa: “Tuari ḡauna ta oi ihadikamu totona e karaiamu na ena ḡaukara anina basine vara”! Hari unu hereva na e ḡuḡurumu. Ini hereva danu iseda negai na e ḡuḡurumu: “Natumu mamaruanedia iboudiai na Iehova ese baine hadibadia, oibe, natumu mamaruanedia edia noho na baine namo herea. Kara maoromaoro ai do baina haginimu . . . badina be basio gari, bona hahegari karana amo danu, badina be basine kahi henimu.” (Isa. 54:​13, 14) Danu Satana, “ina tanobada diravana,” na asi siahuna Iehova ena taunimanima ese e karaiamu hahediba ḡaukarana baine koua. (2 Kor. 4:4) Tomadiho ḡoevana na vada e gini lou bona ta ese basine hadikaiamu, to baine gini hanaihanai. Oibe tuari ḡauna ta eiava tau ta ese ita na basine hadarereda!

DAHAKA BE VARAMU?

11. Ede ta diba tomamu horoa taudia guba be laomu neganai, hutuma bada na dounu mai inaridia?

¹¹ Horoa taudia guba be laomu neganai, dahaka be varamu? Baita helalotao Iesu na ita Inarida Tauna bona Kristen kongrigeisin kwarana. Ia na e gwa: “Emui Hahekau Tauna  na tamona mo, Keriso.” (Mat. 23:10) Iseda King Keriso na e lohiamu bona ia ese ia murinai e rakamu taudia na be naridiamu. Una dainai, idia na ḡau ta garina basie garimu. Ena be ia ese una negai ena taunimanima baine hakaudia dalana na do asi dibada namonamo, to mani Baibul sivaraidia haida aita herevalai.

12. (a) Mose e mase murinai, Iehova ese ena taunimanima be ede e naridia toma? (b) Iehova ese Elia ena ḡaukara e haidaua neganai, Iehova ese ena taunimanima be ede e naridia toma? (Laulau danu ba itaia.)

¹² Israel taudia do asie vareai Gwauhamata Tanona ai, Mose na e mase. Dirava ena taunimanima ediai be dahaka e vara? Mose na lasi dainai Iehova ese idia e rakatanidia, a? Lasi. Iehova ese ia e badinaia taudia na e naridia. Mose do se mase ai, Iehova ese e hamaoroa Iosua baine abia hidi ena taunimanima baine gunalaidia. Una dainai laḡani momo lalodiai Mose ese Iosua na ḡau momo e hadibaia. (Eso. 33:11; Deu. 34:9) Dia una mo, to iduhu ta ta lalodiai heitatao taudia e abidia hidi, Mose bae durua. Idia ese taunimanima tausen, hanred, fifti, eiava ten bae naridia. (Deu. 1:15) Momokani, Dirava ena taunimanima na e reḡudia namonamo. Elia danu unu e kara toma. Ia na laḡani momo lalodiai e ḡaukara goada Israel taudia e durudia Iehova bae toma henia diho. To, gabeai Iehova ese ia na Iuda ena saut kahana e siaia lao. (2 Han. 2:1; 2 Sis. 21:12) Una dainai Israel ena iduhu ten Basileiana lalonai abidadama taudia be vada asi inaridia, a? Lasi. Badina laḡani momo lalodiai Elia ese Elisaia e hadibaia. Bona “peroveta” taudia danu e hadibadia. (2 Han. 2:7) Una dainai abidadama ta’taudia na momo Dirava ena taunimanima bae reḡudia. Oibe, Iehova ena ura na e ḡuḡuru, bona ia e abidadama heniava taudia na e reḡudia namonamo.

13. Heberu 13:5b ai Iehova na e gwauhamata dahaka baine kara? (Laulau danu ba itaia.)

¹³ Mose bona Elia sivaraidia amo tame diba horoa taudia oredia guba be laomu neganai, dahaka be varamu? Baibul ese e hahedinaraia ḡoevaḡoevamu: Iehova ese ena taunimanima tanobada ai na basine rakatanidiamu, lasi ona lasi vaitani. (Heberu 13:5b ba duahia.) Mose bona Elia heḡereḡeredia, hari Gavanin Bodi na e lalopararamu treinin na mai anina bada. Laḡani momo lalodiai, Gavanin Bodi ese mamoe idaudia amo tadikaka haida treinin e henidiamu Iehova ena mamoe bae hakaudia totona. Heḡereḡere, idia na sikuli idauidau e heḡaeḡaelaimu unu amo elda taudia, sekit taudia, Brens Komiti,  Betele ai ovasia bona ma haida treinin e henidiamu. Gavanin Bodi ena komiti idauidau e durudiamu tadikakadia danu treinin e henidiamu, una dainai idia ese edia maduna na e huadia namonamomu. Oibe, idia na heḡaeḡae Keriso ena mamoe ireḡuna ḡaukarana bae karaia.

14. Ina atikol ena point badana be dahaka?

¹⁴ Ina atikol ena point badana na: Hisihisi badana dokona kahanai horoa taudia oredia na guba be laomu neganai, tanobada ai Iehova ena taunimanima na dounu ia be toma henia dihomu. Ta moalemu badina Iesu Keriso ena hahekau henunai una na be varamu. Una negai, Gog, Magog tauna o tanobada idoinai gavamanidia iboudiai ese Dirava ena taunimanima be tuari henidiamu. (Esek. 38:​18-20) To idia na basie kwalimumu bona Iehova Dirava itoma diho henina karana na basie kouamu. Iehova ese ena taunimanima na be hamauridiamu! Aposetolo Ioane na matahanai ta lalonai, Keriso ena mamoe idaudia e itadia, idia na “hutuma bada-herea.” Bona “hisihisi badana amo vada ema.” (Apok. 7:​9, 14) Ta dibamu, Iehova ese idia na be naridiamu!

15-16. (a) Apokalupo 17:14 ena hereva heḡereḡerena, Aramagedono tuarina ai Keriso e badinaiamu horoa taudia be dahaka be karamu? (b) Dahaka dainai una ese ita e hagoadadamu?

¹⁵ Horoa taudia na guba be laomu neganai dahaka be karamu? Baibul ese una henanadai e haerelaiamu, e gwaumu, ina tanobada gavamanidia na “Mamoe Natuna bae tuari henia.” To idia na basie kwalimumu badina “Mamoe Natuna na do baine kwalimu.” Bona daidia ese be duruamu? Idia na Baibul ese e gwauraidiamu “e boiridia,” “e abidia hidi,” bona “abidadama” taudia. (Apokalupo 17:14 ba duahia.) Idia be daidia? Be toreisi loumu horoa taudia! Hisihisi badana dokona kahanai horoa taudia oredia na guba be laomu neganai, edia ḡaukara ta na bae tuari. Una na ḡaukara badana! Horoa taudia haida na Iehova ena Witnes ai do asiela neganai idia na heatu taudia. A haida be ami ai e vareai, to gabeai Kristen korikoridia ai ela neganai maino dalana e dibaia. (Gal. 5:22; 2 Tes. 3:16) Bena tanobada  tuaridia amo e gini siri. To guba be laomu neganai, idia na Keriso bona ena aneru helaḡadia ida Dirava e inai heniamu taudia be tuari henidiamu.

¹⁶ Mani a laloa, tanobada ai horoa Kristen taudia haida na buburuka bona tauanidia na mamanoka. To guba ai, idia na lauma taudia dainai, mai edia siahu bona basie mase dibamu. Danu, Iesu Keriso, edia King bona Tuari Tauna, ese be durudiamu. Bena Aramagedono tuarina murinai, taunimanima na ḡoevadae taudia ai bae halaodia ḡaukarana be duruamu. Una dainai, ta dibamu idia ese guba amo taunimanima na be durudia badamu, tanobada ai e karaia ḡaukarana na be hereaiamu!

17. Ede ta diba tomamu Dirava ena hesiai taudia iboudiai na Aramagedono tuarina ai be roho maurimu?

¹⁷ Oi be mamoe idauna ta, a? Bema oibe, Aramagedono tuarina baine matama neganai oi be dahaka ba kara? Namona na Iehova bavabidadama henia, bona ena hahekau dalana ba badinaia. Una anina be dahaka? Baibul na e gwaumu: “Emui daiutu ai ba raka vareai, iduaramui ba kou; nega taina ba komu, ela bona badu baine ore.” (Isa. 26:20) Una nega ai, Dirava ena hesiai taudia iboudiai, guba ai bona tanobada ai, na be roho maurimu. Aposetolo Paulo heḡereḡerena, ta abia daemu “lohia hereadia, . . . harihari e miamu ḡaudia, eiava gabeai bae vara ḡaudia . . . ese Dirava ena uraheni . . . amo basine bibida oho diba.” (Roma 8:​38, 39) Hanaihanai ba helalotao: Iehova na oi e lalokau henimumu, bona basine rakatanimumu!