BAIBUL e torea taudia haida ese hereva haida na e tore loulou. Unu e kara toma badidia toi mani aita herevalai:

E toredia negana. Guna Israel edia nega ai, Mose ena Taravatu kopedia na dia momo. Una dainai, kalaga helaḡana ai e hegogova negadiai mo Taravatu e kamonaiava. (Deu. 31:​10-12) To, edia kamonai karana baine hadikaia ḡaudia na momo, badina idia na hutuma bona hora momo e giniva. (Neh. 8:​2, 3, 7) Una dainai, hereva badadia bae gwaurai loulou na mai anina bada, unu amo taunimanima ese bae lalotao bona bae badina. Heḡereḡere, Dirava ena taravatu bona haheḡani na e gwauraidia loulouva.—Lev. 18:​4-22; Deu. 5:1.

E toredia dalana. Baibul kahana haida na ane, heḡereḡere Salamo, Solomon Ena Ane, bona Rohe-ahu Bukana. Nega haida, ane herevadia na e hakwadoḡiva bona e toredia loulouva ane sinadodia bae hahedinarai bena kamonai taudia ese bae lalotao. Haheitalai na Salamo 115:​9-11 ai e tore herevadia. E gwaumu: “Israel e, Iehova bavabidadama henia; ia na ikahadia bona edia kesi. Aaron iduhuna e, Iehova bavabidadama henia; ia na ikahadia bona edia kesi. Iehova garina o garimu taumui, Iehova bavabidadama henia; ia na ikahadia bona edia kesi.” Ane herevadia e tore loulou ena namo na, ane abi taudia e durudia Dirava ena hereva momokanidia na daradia bona kudoudiai bae ato.

E toredia badina. Baibul e torea taudia ese nega haida hereva badadia na e toredia loulou. Heḡereḡere, Iehova ese Israel taudia e hadibadia vamu mai rarana na basie ania, bona Mose e hamaoroa una kara badina na baine hahedinaraia loulou. Dirava na e ura baine hahedinaraia mauri ḡaudia iboudiai edia mauri na rara ai. (Lev. 17:​11, 14) Gabeai, Ierusalem ai aposetolo taudia bona heitatao taudia ese Dirava ihamoaleana ḡaudia e gwaurai neganai, rara basie ani herevana na ma e gwauraia lou.—Apos. 15:​20, 29.

Ena be Baibul herevadia haida na e toredia loulou, to Iehova na se uramu baita gwauraidia loulou kava. Iesu na e gwa: “Ba ḡuriḡuri negadia ai, basio gwau lou gwau lou.” (Mat. 6:7) To, ia ese Dirava ena ura heḡereḡerena ai baita ḡuriḡurilai ḡaudia haida e gwaurai. (Mat. 6:​9-13) Ena be eda ḡuriḡuri ai hereva tamodia asita gwaurai lou gwaurai loumu, to ḡau haida na eda ḡuriḡuri ai baita gwauraidia lou diba.—Mat. 7:​7-11.

Unu badi daidiai, Baibul ai hereva haida na e toredia loulou. Una na iseda Hahediba Tauna Badana, Iehova, ese iseda namo totona e hadibadamu dalana ta.—Isa. 48:​17, 18.