1. Dahaka dainai Iehova ese baine hakauda na namo?

 MANI a laloa, oi na uda badana ta lalonai o boio. Unuseniai dika na ba davari diba badina daḡedaḡe animal, gorere e havaramu insect idauidau, tubutubu ḡaudia mai poisinidia bona guri na momo. Oi na bo moalemu bema ta na be maimu oi baine hakaumu, badina ia na mai dibana ededia gabu be gabu dikadia bona dala maorona be hakaumu laomu! Ina tanobada na una uda badana heḡereḡerena, badina eda abidadama ihadikadia ḡaudia na momo. To, ita na mai ihakauda tauna hereadaena, una na Iehova. Ia ese ita na dika amo e hakauda sirimu bona e hakauda laomu tanobada matamatana ai baita vareai.

2. Edena dala ai Iehova ese ita e hakaudamu?

² Edena dala ai Iehova ese ita e hakaudamu? Ita e hakaudamu dalana badana na iena hereva Baibul amo. Danu, taunimanima e ḡaukaralaidiamu ita baine hakauda. Heḡereḡere, ia ese “hesiai tauna mai ena abidadama bona aonega” e ḡaukaralaiamu, lauma aniani bae heḡaeḡaelai unu amo ita bae duruda, abi hidi namodia baita kara. (Mat. 24:​45, NWT) Danu, ia ese tatau haida e ḡaukaralaidiamu, heḡereḡere seket taudia bona kongrigeisin elda taudia amo e hagoadadamu bona hahekau herevadia e henidamu, nega aukadia ai baita gini goada totona. Ta moalemu badina ini dina gabedia aukadia lalodiai, Iehova ese unu dala ai ita e hakaudamu! Bona e durudamu Iena lalonamo baita abia bona mauri dalana ai dounu baita raka.

3. Ina atikol ai dahaka baita herevalaimu?

³ Nega haida unu hahekau daladia ibadinadia na be aukamu, bema dia ḡoevadae taudia ese be henidamu. Dahaka dainai? Badina reana e henimu sisiba herevadia na ita ese asita  moalelaimu. Eiava ta lalomu baita badina na dia aonega karana, eiava ta gwaumu, una sisiba na dia Iehova amo. Nega unu bamodia ai, namona na baita abia dae Iehova ese ena taunimanima na e hakaudiamu bona iena hahekau daladia baita badinamu neganai, namo baita davarimu. Unu baita kara toma totona, ina atikol ai ini point toi baita herevalaimu (1) edena dala ai Baibul negadia ai Iehova ese ena taunimanima e hakaudia, (2) edena dala ai hari ina negai ena taunimanima e hakaudiamu, bona (3) edena dala ai unu hereva baita badinadiamu neganai namo baita davarimu.

IEHOVA ESE ISRAEL BESENA E HAKAUA DALANA

4-5. Edena dala ai Iehova ese e hahedinaraia ia na Mose e ḡaukaralaia Israel besena baine hakaua? (Rau ba itaia.)

⁴ Iehova ese Mose e abia hidi Aigupto amo Israel taudia baine hakaudia lasi. Bona hahemomokani ḡaudia amo Israel taudia e hadibadia ia na Mose e ḡaukalaia idia baine hakaudia. Heḡereḡere, dina ai ia ese ori amo e hakaudiava, hanuaboi ai be lahi amo e hakaudiava. (Eso. 13:21) Mose ese ori e badinaia, bona una ese idia e hakaudia ela bona Davara Kakakakana. Una nega ai, idia na e gari badina Aigupto tuari oreana ese bae dogodiatao na garina. Danu, e lalo Mose na e kerere idia e hakaudia lao davara kakakakana, to ia na se kerere badina una na Iehova ena ura Mose ese unu baine hakaudia lao. (Eso. 14:2) Bena Iehova ese hoa dalana ai e hamauridia.—Eso. 14:​26-28.

⁵ Laḡani 40 lalodiai, Mose na Israel taudia e hakaudia neganai, ia na una ori e badinaia. a Nega ta ta, Iehova ese una ori na Mose ena kalaga daenai e atoava, unu amo Israel taudia ese bae itaia. (Eso. 33:​7, 9, 10) Una ori amo Iehova na Mose e hereva heniava, unu amo Iena hereva na taunimanima baine hadibadia. (Sal. 99:7) Una ese e hahedinaraiamu, Iehova na Mose e ḡaukaralaia iena taunimanima baine hakaudia.

6. Israel taudia ese Iehova ena hahekau dalana e badinaia eiava lasi? (Numera 14:​2, 10, 11)

⁶ Israel taudia momo na asie abia daeva Iehova ese Mose e abia hidi iena taunimanima baine hakaudia. (Numera 14:​2, 10, 11 ba duahidia.) Bona nega momo idia na asie urava Mose bae badinaia. Una dainai idia na Iehova ese gwauhamata tanona ai se hakaudia vareai.—Num. 14:30.

7. Iehova ena hahekau dalana e badinaiava taudia haida be daidia? (Numera 14:24) (Laulau danu ba itaia.)

⁷ Israel taudia haida na Iehova ena hahekau dalana e badinaia. Heḡereḡere, Iehova na e gwa: “Egu hesiai tauna Kaleb . . . na . . . [lau e] badinagu mai lalona idoinai.” (Numera 14:24 ba duahia.) Una dainai, Iehova ese Kanana tanona ai, Kaleb sibona ese e abia hidi gabuna ai ahuna e henia. (Ios. 14:​12-14) Israel taudia uru matamatana danu ese Iehova ena hahekau dalana e badinaia. Iosua ese Mose gabuna e abia neganai, Israel taudia iboudiai ese ia na “e matauraia bada, ena mauri dinadia iboudiai.” (Ios. 4:14) Una dainai Iehova ese idia na gwauhamata tanona ai e hakaudia vareai.—Ios. 21:​43, 44.

8. King edia nega ai, Iehova ese ena taunimanima be ede e hakaudia toma? (Laulau danu ba itaia.)

⁸ Laḡani momo muridiai, Iehova ese hahemaoro taudia e abidia hidi iena taunimanima bae hakaudia. Bena, king edia nega ai, Iehova ese peroveta taudia e abidia hidi iena taunimanima bae hakaudia. Una nega ai, Iehova e abidadama heniava pavapavadia ese peroveta  taudia edia sisiba na e badina. Heḡereḡere, King David na mai manauna ida peroveta tauna Natan ena sisiba e abia dae. (2 Sam. 12:​7, 13; 1 Sis. 17:​3, 4) King Iehosafat na peroveta tauna Iahasiel ese e henia herevana na e badinaia bona Iuda taudia e hagoadadia ‘peroveta taudia bae kamonai henidia.’ (2 Sis. 20:​14, 15, 20) King Hesekia na e lalohisihisi neganai, peroveta tauna Isaia enai heduru e tahu. (Isa. 37:​1-6) Unu nega ai, pavapava ese Iehova ena hahekau dalana e badinaiava neganai, e hanamodiava bona Israel besena danu e gimadiava. (2 Sis. 20:​29, 30; 32:22) Una ese e hahedinaraiamu, Iehova na peroveta taudia e ḡaukaralaidia ena taunimanima bae hakaudia. To king bona taunimanima momo ese Iehova ena peroveta taudia na e dadaraidia.—Ier. 35:​12-15.

IEHOVA ESE KRISTEN TAUDIA GINIGUNADIA E HAKAUDIA DALANA

9. Iehova be daidia e ḡaukaralaidia Kristen ginigunadia baine hakaudia? (Laulau danu ba itaia.)

⁹ Pentekost 33 C.E. ai, Iehova ese Kristen kongrigeisen e haginia. Ia ese Kristen ginigunadia be ede e hakaudia toma? Iehova ese Iesu e abia hidi Kristen kongrigeisin kwarana ai ela. (Efe. 5:23) To Iesu na dia hahediba taudia ta ta e hereva henidiava. Ia na Ierusalem ai aposetolo bona heitatao taudia e abidia hidi kongrigeisin bae gunalaia. (Apos. 15:​1, 2) Bona elda taudia danu e abidia hidi kongrigeisen ta ta bae naridia.—1 Tes. 5:12; Tito 1:5.

10. (a) Kristen ginigunadia ese Iehova ena hahekau dalana be ede e laloa toma? (Apos. 15:​30, 31) (b) Dahaka dainai haida na Iehova ese e ḡaukaralaidiava taudia asie kamonai henidiava? (Maua ladana “ Iehova Asie Kamonai Henia Badidia Haida” ba itaia.)

¹⁰ Kristen ginigunadia be dahaka e kara? Idia momo na e abi hahekau herevadia e badinadia. Bona “unu hahealo herevadia na e moalelai.” (Aposetolo Edia Kara 15:​30, 31 ba duahidia.) Hari ina negai Iehova ese ena taunimanima be ede e hakaudia tomamu?

IEHOVA ESE ITA E HAKAUDAMU DALANA

11. Laḡani 1870 lalodiai dahaka ese e hamomokaniamu Iehova na ta’tau haida e ḡaukaralaidia?

¹¹ Hari ina negai Iehova na doini ena taunimanima e hakaudiamu. Ia ese Natuna, kongrigeisen kwarana, bona ena Hereva amo e hakaudiamu. O laloamu hari ina negai Dirava  ese taunimanima e ḡaukaralaidiamu ita baine hakauda, a? Oibe. Laḡani 1870 murinai e vara ḡaudia haida mani aita herevalai. Charles Taze Russell bona bamona na e laloparara 1914 na laḡani badana. Una laḡani ai, Iehova ese ena Basileia e haginia. (Dan. 4:​25, 26) Idia e durudia ḡauna na Baibul ena peroveta herevadia e hetahulai namonamo. Iehova ese edia hetahu karana e hanamoa, a? Oibe. Laḡani 1914 ai e vara ḡaudia ese e hamomokania, Dirava ena Basileia na una nega ai vada e lohia matama. Tanobada Tuarina Ginigunana e vara, una murinai dai-hanai goreredia, tano laga bona doe e vara. (Luka 21:​10, 11) Momokani, Iehova na unu abidadama ta’tau e ḡaukaralaidia iena taunimanima baine durudia.

12-13. Tanobada Tuarina Iharuana ai, tadikaka be dahaka e kara haroro bona hahediba ḡaukaradia bae habada totona?

¹² Mani Tanobada Tuarina Iharuana negana aita laloa. Hedkwota ai, ḡaukara e gunalaiava tadikakadia ese Apokalupo 17:8 e stadilaia namonamo bena e laloparara, tanobada tuarina iharuana murinai, Aramagedono na do basine vara, to nega sisina lalonai maino baine vara. Una ese dala e kehoa haroro ḡaukara bae habadaia. Una dainai, ina sikuli Watchtower Bible College of Gilead e haginia. Ena be haida na e laloava una na dia nega maorona, to Iehova ena orea ese una sikuli amo misinari na treinin e henidia, unu amo tanobada heḡeḡemadai ai bae haroro bona hahediba ḡaukarana bae karaia. Mani a laloa, tuari e varava lalonai unu misinari na edia asainmen ta ta e siaidia lao. Danu, hesiai tauna mai ena abidadama ese ina Kosi ladana Theocratic Ministry b e hamatamaia, unu amo kongrigeisen iboudiai ese edia haroro bona hahediba ḡaukarana bae hanamoa. Unu dala idauidau ai, Dirava ena taunimanima na vada e haheḡaeḡaedia, haroro ḡaukara badana bae karaia totona.

¹³ Hari ita siboda ese ta itaiamu, una nega aukana lalonai, Iehova ese ena taunimanima na e hakaudiava. Tanobada Tuarina Iharuana amo ema bona hari, Iehova ena taunimanima gabu momo ai na ḡau ta ese se koudiamu dainai, edia haroro ḡaukara na e moalelaiamu. Una dainai momo ese Iehova e dibaiamu.

14. Dahaka dainai Iehova ena orea bona elda taudia ese e henimu hahekau daladia baita abidadama henidia? (Apokalupo 2:1) (Laulau danu ba itaia.)

 ¹⁴ Hari, Gavanin Bodi ese Keriso ena hahekau dalana e badinaiamu. Idia na e uramu e halasimu hahekau herevadia na Iehova bona Iesu edia ura heḡereḡerena. Idia ese unu hahekau herevadia na seket bona elda taudia amo kongrigeisen ai e halasimu. c Elda taudia iboudiai na Keriso “imana idibana ai.” (Apokalupo 2:1 ba duahia.) Momokani, idia na dia ḡoevadae bona mistake na be karamu. Mose, Iosua bona aposetolo taudia danu nega haida mistake e karava. (Num. 20:12; Ios. 9:​14, 15; Roma 3:23) Danu, Keriso ese hesiai tauna mai ena abidadama bona e abidia hidi elda taudia na be ḡaukaralaidiamu “ela bona tanobada dokona.” (Mat. 28:20) Una dainai ia ese e abidia hidi taudia amo e henimu hahekau dalana na baita badinaia.

IEHOVA ENA HAHEKAU IBADINANA ENA NAMO

15-16. Iehova ena hahekau dalana e badinaiamu taudia sivaraidia amo dahaka o dibamu?

¹⁵ Bema Iehova ena hahekau daladia baita badinamu, hari danu hahenamo momo baita davarimu. Andy bona Rose d na e ura Heberu 13:5 ena hahekau herevana bae badinaia dainai edia mauri ai ḡau haida e haidau. (Heb. 13:5.) Unu amo idia na tiokratik konstraksen projek ai e heduru. Rose na e gwa: “Ai a noho gabudia haida ai, speis na dia bada bona asi kisinidia. Piksa abi karana na na ura henia dikadikamu, una dainai egu camera momo na hoihoilai neganai na tai. To, Abraham adavana Sara heḡereḡerena, lalogu na hadaia na unu na basina lalodia momo.” (Heb. 11:15) Idia be dahaka hahenamo e davari? Rose na e gwa: “Ai na a moalemu badina Iehova dainai ḡau iboudiai a henimu. Tiokratik ḡaukaradia a karamu neganai, tanobada matamatana ai baita karamu ḡaudia a lalomu.” Andy na e gwa: “Ai na a moalemu badina Iehova ena Basileia ḡaukaradia ai emai nega bona goada a ḡaukaralaimu.”

¹⁶ Iehova ena hahekau baita badinadia ena namo ma haida be dahaka? Marcia na high school amo e gradueit murinai, lalona e hadaia Iehova baine hesiai henia. (Mat. 6:33; Roma 12:11) Ia na e gwa: “Lau na skolasip ta e henigu univesiti ta ai laḡani 4 baina skuli. To egu  ura ḡauna na lauma dalanai egu tahua ḡaudia baina haḡuḡurudia. To abi hidi na kara technical training school ai trade ta baina dibaia unu amo baina painia diba. Lau na na moalemu badina abi hidi maorona na karaia. Hari, regula painia ḡaukarana na moalelaiamu, bona egu moni ḡaukara sediual na heḡereḡere dainai, Betele ai baina heduru bona ḡaukara ma haida baina kara diba.”

17. Iehova ena hahekau dalana baita badinaiamu neganai ededia hahenamo danu baita davarimu? (Isaia 48:​17, 18)

¹⁷ Nega haida, Iehova ena orea amo ta abimu sisiba herevadia ese e durudamu kohu momo itahuna karana bona Dirava ena taravatu e utumu karadia baita dadarai. Unu sisiba baita badinamu neganai, Iehova ena hahenamo baita davarimu. Heḡereḡere, laloda mamina na be ḡoevamu bona hekwakwanai idauidau basita davarimu. (1 Tim. 6:​9, 10) Danu, mai kudouda idoinai ida Iehova baita tomadiho heniamu, unu amo baita moalemu bona maino ai baita nohomu.—Isaia 48:​17, 18 ba duahidia.

18. Dahaka dainai o uramu hanaihanai Iehova ena hahekau dalana ba badinaia?

¹⁸ Hisihisi badana negana amo ela Iesu ena Lohia Laḡanidia 1,000, Iehova ese taunimanima na dounu be ḡaukaralaidiamu ena orea baine hakaua. (Sal. 45:16) Una nega ai, ita be Iehova ese be ḡaukaralaidiamu taudia edia hahekau dalana baita badinaiamu, eiava? Unu baita kara toma dibamu, bema hari Iehova ese e hakaudamu dalana baita badinaiamu. Una dainai, hanaihanai Iehova ena hahekau dalana baita badinaia; ia ese e abidia hidi ta’taudia amo e halasimu herevadia na baita badina. (Isa. 32:​1, 2; Heb. 13:17) Oibe, namona na Ihakauda Tauna Hereadaena, Iehova baita abidadama henia, badina ia ese lauma dalana ai baine gimada diba bona baine hakauda ela bona tanobada matamatana ai baine hakauda vareai.